໕. ປຎ຺ຈມສງ຺ຆາທິເສສສິກ຺ຂາປທວຓ຺ຓນາ

໗໐໑. ປຎ຺ຈເມ ເອຕໍ ນ ວຸຕ຺ຕນ຺ຕິ ‘‘ຠິກ຺ຂຸນິຍາ ອວສ຺ສຸຕຠາໂວ ທຏ຺ຐພ຺ໂພ’’ຕິ ເອຕໍ ນິຍມນໍ ນ ວຸຕ຺ຕໍ. ຕນ຺ຕິ ຕໍ ນິຍເມຕ຺ວາ ອວຈນໍ. ປາຬິຍາ ສເມຕີຕິ ‘‘ເອກໂຕ ອວສ຺ສຸເຕ’’ຕິ ອວິເສເສຕ຺ວາ ວຸຕ຺ຕປາຬິຍາ ‘‘ອນວສ຺ສຸໂຕຕິ ຊານນ຺ຕີ ປຏິຄ຺ຄຓ຺ຫາຕີ’’ຕິ ອິມາຍ ຈ ປາຬິຍາ ສເມຕິ. ຍທິ ຫິ ປຸຄ຺ຄລສ຺ສ ອວສ຺ສຸຕຠາໂວ ນປ຺ປມາຓໍ, ກິໍ ‘‘ອນວສ຺ສຸໂຕຕິ ຊານນ຺ຕີ’’ຕິ ອິມິນາ ວຈເນນ, ‘‘ອນາປຕ຺ຕິ ອຸຠໂຕອນວສ຺ສຸຕາ ໂຫນ຺ຕິ, ອນວສ຺ສຸຕາ ປຏິຄ຺ຄຓ຺ຫາຕີ’’ຕິ ເອຕ຺ຕກເມວ ວຕ຺ຕພ຺ພໍ ສິຍາ. ‘‘ອຸຠໂຕອນວສ຺ສຸຕາ ໂຫນ຺ຕິ, ອນວສ຺ສຸໂຕຕິ ຊານນ຺ຕີ ປຏິຄ຺ຄຓ຺ຫາຕີ’’ຕິ ອິມສ຺ສ ຈ ອນາປຕ຺ຕິວາຣສ຺ສ ອຍມຕ຺ໂຖ. ອຸໂຠ ເຈ ອນວສ຺ສຸຕາ, ສພ຺ພຖາປິ ອນາປຕ຺ຕິ. ອຖ ຠິກ຺ຂຸນີ ອນວສ຺ສຸຕາ ສມານາ ອວສ຺ສຸຕມ຺ປິ ‘‘ອນວສ຺ສຸໂຕ’’ຕິ ສຎ຺ຎາຍ ຕສ຺ສ ຫຕ຺ຖໂຕ ປຏິຄ຺ຄຓ຺ຫາຕິ, ເອວມ຺ປິ ອນາປຕ຺ຕິ. ອຖ ສຍໍ ອນວສ຺ສຸຕາປິ ອຎ຺ຎໍ ອນວສ຺ສຸຕໍ ວາ ອວສ຺ສຸຕໍ ວາ ‘‘ອວສ຺ສຸໂຕ’’ຕິ ຊານາຕິ, ທຸກ຺ກຏເມວ. ວຸຕ຺ຕຎ຺ເຫຕໍ ອນນ຺ຕຣສິກ຺ຂາປເທ ‘‘ກິສ຺ສ ຕ຺ວໍ ອຍ຺ເຍ ນ ປຏິຄ຺ຄຓ຺ຫາສີຕິ. ອວສ຺ສຸຕາ ອຍ຺ເຍຕິ. ຕ຺ວໍ ປນ ອຍ຺ເຍ ອວສ຺ສຸຕາຕິ. ນາຫໍ ອຍ຺ເຍ ອວສ຺ສຸຕາ’’ຕິ. ເສສເມຕ຺ຖ ອຸຕ຺ຕານເມວ. ອຸທກທນ຺ຕໂປນໂຕ ອຎ຺ຎໍ ອຊ຺ໂຌຫຣຓີຍໍ, ອຸຠໂຕອວສ຺ສຸຕຕາ, ສຫຕ຺ຖາ ຄຫຓໍ, ອຊ຺ໂຌຫຣຓນ຺ຕິ ອິມານິ ປເນຕ຺ຖ ຈຕ຺ຕາຣິ ອງ຺ຄານິ.

ປຎ຺ຈມສງ຺ຆາທິເສສສິກ຺ຂາປທວຓ຺ຓນາ ນິຏ຺ຐິຕາ.