໒. ສງ຺ຆາທິເສສກຓ຺ຑໍ (ຠິກ຺ຂຸນີວິຠງ຺ຄວຓ຺ຓນາ)

໑. ປຐມສງ຺ຆາທິເສສສິກ຺ຂາປທວຓ຺ຓນາ

໖໗໙. ສງ຺ຆາທິເສສກຓ຺ຑສ຺ສ ປຐມສິກ຺ຂາປເທ ທ຺ວີສຸ ຊເນສູຕິ ອຑ຺ຑກາຣເກສຸ ທ຺ວີສຸ ຊເນສຸ. ໂຍ ໂກຈີຕິ ເຕສຸເຍວ ທ຺ວີສຸ ໂຍ ໂກຈິ, ອຎ຺ໂຎ ວາ ເຕຫິ ອາຓຕ຺ໂຕ. ທຸຕິຍສ຺ສ ອາໂຣເຈຕີຕິ ເອຕ຺ຖາປິ ທ຺ວີສຸ ຊເນສຸ ຍສ຺ສ ກສ຺ສຈິ ທຸຕິຍສ຺ສ ກຖໍ ໂຍ ໂກຈິ ອາໂຣເຈຕີຕິ ເອວມຕ຺ໂຖ ຄເຫຕພ຺ໂພຕິ ອາຫ ‘‘ທຸຕິຍສ຺ສ ອາໂຣເຈຕີຕິ ເອຕ຺ຖາປິ ເອເສວ ນໂຍ’’ຕິ. ຄຕິຄຕນ຺ຕິ ຈິຣກາລປວຕ຺ຕໍ.

ອາປຕ຺ຕີຕິ ອາປຊ຺ຊນໍ. ສຫ ວຕ຺ຖຸຊ຺ຌາຈາຣາຕິ ວຕ຺ຖຸວີຕິກ຺ກເມນ ສຫ. ສຫໂຍເຄ ກຣຓວຈນປ຺ປສງ຺ເຄ ອິທໍ ນິສ຺ສກ຺ກວຈນໍ. ຍນ຺ຕິ ຍໍ ຘມ຺ມໍ. ນິສ຺ສາເຣຕີຕິ ອາປນ຺ນໍ ຠິກ຺ຂຸນິສງ຺ຆມ຺ຫາ ນິສ຺ສາເຣຕິ. ເຫຕຸມ຺ຫິ ຈາຍໍ ກຕ຺ຕຸໂວຫາໂຣ. ນິສ຺ສາຣຓເຫຕຸຠູໂຕ ຫິ ຘມ຺ໂມ ນິສ຺ສາຣຓີໂຍຕິ ວຸຕ຺ໂຕ. ຄີວາເຍວ ໂຫຕິ, ນ ປາຣາຊິກໍ ອນາຓຕ຺ຕິຍາ ຄຫິຕຕ຺ຕາ. ຍຖາ ທາສທາສີວາປີອາທີນິ ສມ຺ປຏິຈ຺ຉິຕຸໍ ນ ວຏ຺ຏຕິ, ເອວໍ ເຕສໍ ອຕ຺ຖາຍ ອຑ຺ຑກຣຓມ຺ປິ ນ ວຏ຺ຏຕີຕິ ອາຫ ‘‘ອຍໍ ອກປ຺ປິຍອຑ຺ໂຑ ນາມ, ນ ວຏ຺ຏຕີ’’ຕິ.

ເອຕ຺ຖ ຈ ສເຈ ອຘິກຣຓຏ຺ຐານໍ ຄນ຺ຕ຺ວາ ‘‘ອມ຺ຫາກໍ ເອໂສ ທາໂສ, ທາສີ, ວາປີ, ເຂຕ຺ຕໍ, ອາຣາໂມ, ອາຣາມວຕ຺ຖຸ, ຄາໂວ, ອຊາ, ກຸກ຺ກຸຏາ’’ຕິອາທິນາ ໂວຫຣຕິ, ອກປ຺ປິຍໍ. ‘‘ອຍໍ ອມ຺ຫາກໍ ອາຣາມິໂກ, ອຍໍ ວາປີ ອິຕ຺ຖນ຺ນາເມນ ສງ຺ຆສ຺ສ ຠຓ຺ຑໂຘວນຕ຺ຖາຍ ທິນ຺ນາ, ອິໂຕ ເຂຕ຺ຕໂຕ ອາຣາມໂຕ ອຸປ຺ປຊ຺ຊນກຈຕຸປຈ຺ຈຍາ ອິໂຕ ຄາວິໂຕ ມຫິໍສິໂຕ ອຊາໂຕ ອຸປ຺ປຊ຺ຊນກໂຄຣສາ ອິຕ຺ຖນ຺ນາເມນ ສງ຺ຆສ຺ສ ທິນ຺ນາຕິ ປຸຈ຺ຉິເຕ ວາ ອປຸຈ຺ຉິເຕ ວາ ວຕ຺ຕຸໍ ວຏ຺ຏຕີ’’ຕິ ວທນ຺ຕິ. ເສສເມຕ຺ຖ ອຸຕ຺ຕານເມວ. ອນາກຑ຺ຒິຕາຍ ອຑ຺ຑກຣຓໍ, ອຑ຺ຑປຣິໂຍສານນ຺ຕິ ອິມານິ ປເນຕ຺ຖ ທ຺ເວ ອງ຺ຄານິ.

ປຐມສງ຺ຆາທິເສສສິກ຺ຂາປທວຓ຺ຓນາ ນິຏ຺ຐິຕາ.

໒. ທຸຕິຍສງ຺ຆາທິເສສສິກ຺ຂາປທວຓ຺ຓນາ

໖໘໓. ທຸຕິເຍ ມລ຺ລຄຓຠຏິປຸຕ຺ຕຄຓາທິກນ຺ຕິອາທີສຸ ມລ຺ລຄໂຓ ນາມ ນາຣາຍນຠຕ຺ຕິໂກ ຕຕ຺ຖ ຕຕ຺ຖ ປານີຍຏ຺ຐປນໂປກ຺ຂຣຓີຂຓນາທິປຸຎ຺ຎກມ຺ມກາຣໂກ ຄໂຓ, ຠຏິປຸຕ຺ຕຄໂຓ ນາມ ກຸມາຣຠຕ຺ຕິກຄໂຓ. ຘມ຺ມຄໂຓຕິ ສາສນຠຕ຺ຕິຄໂຓ ອເນກປ຺ປກາຣປຸຎ຺ຎກມ຺ມກາຣກຄໂຓ ວຸຈ຺ຈຕິ. ຄນ຺ຘິກເສຓີຕິ ອເນກປ຺ປກາຣສຸຄນ຺ຘິວິກຕິກາຣໂກ ຄໂຓ. ທຸສ຺ສິກເສຓີຕິ ເປສກາຣກຄໂຓ. ກປ຺ປຄຕິກນ຺ຕິ ກປ຺ປິຍຠາວໍ ຄຕໍ.

ວຸຏ຺ຐາເປນ຺ຕິຍາຕິ ອຸປສມ຺ປາເທນ຺ຕິຍາ. ‘‘ໂຈຣິໍ ວຸຕ຺ຕນເຍນ ອນາປຸຈ຺ຉາ ປພ຺ພາເຊນ຺ຕິຍາ ທຸກ຺ກຏ’’ນ຺ຕິ ວທນ຺ຕິ. ປຓ຺ຓຕ຺ຕິໍ ອຊານນ຺ຕາ ອຣິຍາປິ ວຸຏ຺ຐາເປນ຺ຕີຕິ ວາ ກມ຺ມວາຈາປຣິໂຍສາເນ ອາປຕ຺ຕິກ຺ຂເຓ ວິປາກາພ຺ຍາກຕສມງ຺ຄິຕາວເສນ ວາ ‘‘ຕິຈິຕ຺ຕ’’ນ຺ຕິ ວຸຕ຺ຕນ຺ຕິ ເວທິຕພ຺ພໍ. ເສສເມຕ຺ຖ ອຸຕ຺ຕານເມວ. ໂຈຣິຕາ, ໂຈຣິສຎ຺ຎາ, ອຎ຺ຎຕ຺ຣ ອນຸຎ຺ຎາຕກາຣຓາ ວຸຏ຺ຐາປນນ຺ຕິ ອິມານິ ປເນຕ຺ຖ ຕີຓິ ອງ຺ຄານິ.

ທຸຕິຍສງ຺ຆາທິເສສສິກ຺ຂາປທວຓ຺ຓນາ ນິຏ຺ຐິຕາ.

໓. ຕຕິຍສງ຺ຆາທິເສສສິກ຺ຂາປທວຓ຺ຓນາ

໖໙໒. ຕຕິເຍ ປຣິກ຺ເຂປໍ ອຕິກ຺ກາເມນ຺ຕິຍາຕິ ສກຄາມໂຕ ອຎ຺ຎສ຺ສ ຄາມສ຺ສ ປຣິກ຺ເຂປໍ ອຕິກ຺ກາເມນ຺ຕິຍາ. ‘‘ຄາມນ຺ຕຣໍ ຄຈ຺ເຉຍ຺ຍາ’’ຕິ ຫິ ວຈນໂຕ ອຎ຺ຎສ຺ສ ຄາມສ຺ສ ປຣິກ຺ເຂປໍ ອຕິກ຺ກາເມນ຺ຕິຍາ ເອວ ອາປຕ຺ຕິ, ນ ສກຄາມສ຺ສ. ອຎ຺ໂຎ ຫິ ຄາໂມ ຄາມນ຺ຕຣໍ. ອປຣິກ຺ຂິຕ຺ຕສ຺ສ ຄາມສ຺ສ ອຸປຈາຣນ຺ຕິ ເອຕ຺ຖ ອຸປຈາຣ-ສທ຺ເທນ ຆຣູປຈາຣໂຕ ປຐມເລຑ຺ຑຸປາຕສງ຺ຂາຕໍ ປຣິກ຺ເຂປາຣຫຏ຺ຐານໍ ຄຫິຕໍ, ນ ຕໂຕ ທຸຕິຍເລຑ຺ຑຸປາຕສງ຺ຂາໂຕ ອຸປຈາໂຣຕິ ອາຫ ‘‘ປຣິກ຺ເຂປາຣຫຏ຺ຐານ’’ນ຺ຕິ. ເຕເນວ ປາຬິຍໍ ‘‘ອຸປຈາຣໍ ອຕິກ຺ກາເມນ຺ຕິຍາ’’ຕິ ວຸຕ຺ຕໍ. ອຎ຺ຎຖາ ຍຖາ ວິກາລຄາມປ຺ປວິສນສິກ຺ຂາປເທ ‘‘ປຣິກ຺ຂິຕ຺ຕສ຺ສ ຄາມສ຺ສ ປຣິກ຺ເຂປໍ ອຕິກ຺ກມນ຺ຕສ຺ສ, ອປຣິກ຺ຂິຕ຺ຕສ຺ສ ຄາມສ຺ສ ອຸປຈາຣໍ ໂອກ຺ກມນ຺ຕສ຺ສາ’’ຕິ (ປາຈິ. ໕໑໓) ວຸຕ຺ຕໍ, ເອວມິຘາປິ ‘‘ປຣິກ຺ຂິຕ຺ຕສ຺ສ ຄາມສ຺ສ ປຣິກ຺ເຂປໍ ອຕິກ຺ກາເມນ຺ຕິຍາ ອປຣິກ຺ຂິຕ຺ຕສ຺ສ ຄາມສ຺ສ ອຸປຈາຣໍ ໂອກ຺ກມນ຺ຕິຍາ’’ຕິ ວເທຍ຺ຍ. ສງ຺ເຂປໂຕ ວຸຕ຺ຕມຕ຺ຖໍ ວິຠຊິຕ຺ວາ ທສ຺ເສນ຺ໂຕ ‘‘ອປິເຈຕ຺ຖາ’’ຕິອາທິມາຫ. ວິຫາຣສ຺ສ ຈຕຸຄາມສາຘາຣຓຕ຺ຕາຕິ ອິມິນາ ‘‘ວິຫາຣໂຕ ເອກໍ ຄາມໍ ຄນ຺ຕຸໍ ວຏ຺ຏຕີ’’ຕິ ເອຕ຺ຖ ກາຣຓມາຫ. ວິຫາຣສ຺ສ ຈຕຸຄາມສາຘາຣຓຕ຺ຕາເຍວ ຫິ ຈຕູສຸ ຄາເມສຸ ຍໍກິຎ຺ຈິ ເອກໍ ຄາມໍ ຄນ຺ຕຸໍ ວຏ຺ຏຕິ.

ຍຕ຺ຖາຕິ ຍສ຺ສໍ ນທິຍໍ. ‘‘ປຐມໍ ປາທໍ ອຸຕ຺ຕາເຣນ຺ຕິຍາ ອາປຕ຺ຕິ ຖຸລ຺ລຈ຺ຈຍສ຺ສ, ທຸຕິຍໍ ປາທໍ ອຸຕ຺ຕາເຣນ຺ຕິຍາ ອາປຕ຺ຕິ ສງ຺ຆາທິເສສສ຺ສາ’’ຕິ ວຈນໂຕ ນທິໍ ໂອຕຣິຕ຺ວາ ປທສາ ອຸຕ຺ຕຣນ຺ຕິຍາ ເອວ ອາປຕ຺ຕີຕິ ອາຫ ‘‘ເສຕຸນາ ຄຈ຺ຉຕິ, ອນາປຕ຺ຕີ’’ຕິອາທິ. ປຣຕີຣເມວ ອກ຺ກມນ຺ຕິຍາ ອນາປຕ຺ຕີຕິ ນທິໍ ອໂນຕຣິຕ຺ວາ ຍານນາວາທີສຸ ອຎ຺ຎຕເຣນ ຄນ຺ຕ຺ວາ ປຣຕີຣເມວ ອກ຺ກມນ຺ຕິຍາ ອນາປຕ຺ຕິ. ອຸຠຍຕີເຣສຸ ວິຈຣນ຺ຕິ, ວຏ຺ຏຕີຕິ ອິທໍ ອສຕິປິ ນທີປາຣຄມເນ ອຸປຣິ ວກ຺ຂມານສ຺ສ ວິນິຈ຺ຉຍສ຺ສ ຜລມຕ຺ຕທສ຺ສນຕ຺ຖໍ ວຸຕ຺ຕນ຺ຕິ ເວທິຕພ຺ພໍ. ໂອຣິມຕີຣເມວ ອາຄຈ຺ຉຕິ, ອາປຕ຺ຕີຕິ ປຣຕີຣໍ ຄນ຺ຕຸກາມຕາຍ ໂອຕິຓ຺ຓຕ຺ຕາ ວຸຕ຺ຕໍ. ຕເມວ ຕີຣນ຺ຕິ ຕເມວ ໂອຣິມຕີຣໍ. ອນາປຕ຺ຕີຕິ ປຣຕີຣໍ ຄນ຺ຕຸກາມຕາຍ ອຠາວໂຕ ອນາປຕ຺ຕິ.

ຕາທິເສ ອຣຎ຺ເຎຕິ ‘‘ພຫິອິນ຺ທຂີລາ ສພ຺ພເມຕໍ ອຣຎ຺ຎ’’ນ຺ຕິ (ວິຠ. ໕໒໙) ເອວໍ ວຸຕ຺ຕລກ຺ຂເຓ ອຣຎ຺ເຎ. ອຖ ຕາທິສສ຺ເສວ ອຣຎ຺ຎສ຺ສ ຄຫິຕຠາໂວ ກຖໍ ວິຎ຺ຎາຍຕີຕິ ອາຫ ‘‘ເຕເນວາ’’ຕິອາທິ. ອິມິນາ ຫິ ອຏ຺ຐກຖາວຈເນນ ອີທິເສປິ ຄາມສມີເປ ທສ຺ສນູປຈາເຣ ວິຊຫິເຕ ສຕິປິ ສວນູປຈາເຣ ອາປຕ຺ຕິ ໂຫຕີຕິ ວິຎ຺ຎາຍຕິ. ມຄ຺ຄມູຬ຺ຫາ ອຸຈ຺ຈາສທ຺ທໍ ກໂຣນ຺ຕີຕິ ອາຫ ‘‘ມຄ຺ຄມູຬ຺ຫສທ຺ເທນ ວິຍາ’’ຕິ. ສທ຺ທາຍນ຺ຕິຍາຕິ ສທ຺ທໍ ກໂຣນ຺ຕິຍາ. ປຸຣິມາໂຍຕິ ປຸເຣຕຣໍ ຄຈ຺ຉນ຺ຕິໂຍ. ອຎ຺ຎໍ ມຄ຺ຄໍ ຄຓ຺ຫາຕີຕິ ມຄ຺ຄມູຬ຺ຫຕ຺ຕາ, ນ ໂອຫາຕຸໍ, ຕສ຺ມາ ທ຺ວິນ຺ນມ຺ປິ ອນາປຕ຺ຕິ. ເສສເມຕ຺ຖ ອຸຕ຺ຕານເມວ. ອນນ຺ຕຣາເຍນ ເອກຠາໂວ, ຄາມນ຺ຕຣຄມນາທີສຸ ອຎ຺ຎຕຣຕາປຊ຺ຊນໍ, ອາປທາຍ ອຠາໂວຕິ ອິມານິ ປເນຕ຺ຖ ຕີຓິ ອງ຺ຄານິ.

ຕຕິຍສງ຺ຆາທິເສສສິກ຺ຂາປທວຓ຺ຓນາ ນິຏ຺ຐິຕາ.

໔. ຈຕຸຕ຺ຖສງ຺ຆາທິເສສສິກ຺ຂາປທວຓ຺ຓນາ

໖໙໔. ຈຕຸຕ຺ເຖ ກາຣກຄຓສ຺ສາຕິ ອຸກ຺ເຂປນີຍກມ຺ມກາຣກຄຓສ຺ສ. ເຕຈຕ຺ຕາລີສປ຺ປເຠທໍ ວຕ຺ຕໍ ຂນ຺ຘເກ ອາວິ ຠວິສ຺ສຕິ. ເນຕ຺ຖາຣວຕ຺ເຕຕິ ນິຕ຺ຖຣຓເຫຕຸມ຺ຫິ ວຕ຺ເຕ. ເສສໍ ອຸຕ຺ຕານເມວ. ຘມ຺ເມນ ກມ຺ເມນ ອຸກ຺ຂິຕ຺ຕຕາ, ອຎ຺ຎຕ຺ຣ ອນຸຎ຺ຎາຕກາຣຓາ ໂອສາຣຓນ຺ຕິ ອິມານິ ປເນຕ຺ຖ ທ຺ເວ ອງ຺ຄານິ.

ຈຕຸຕ຺ຖສງ຺ຆາທິເສສສິກ຺ຂາປທວຓ຺ຓນາ ນິຏ຺ຐິຕາ.

໕. ປຎ຺ຈມສງ຺ຆາທິເສສສິກ຺ຂາປທວຓ຺ຓນາ

໗໐໑. ປຎ຺ຈເມ ເອຕໍ ນ ວຸຕ຺ຕນ຺ຕິ ‘‘ຠິກ຺ຂຸນິຍາ ອວສ຺ສຸຕຠາໂວ ທຏ຺ຐພ຺ໂພ’’ຕິ ເອຕໍ ນິຍມນໍ ນ ວຸຕ຺ຕໍ. ຕນ຺ຕິ ຕໍ ນິຍເມຕ຺ວາ ອວຈນໍ. ປາຬິຍາ ສເມຕີຕິ ‘‘ເອກໂຕ ອວສ຺ສຸເຕ’’ຕິ ອວິເສເສຕ຺ວາ ວຸຕ຺ຕປາຬິຍາ ‘‘ອນວສ຺ສຸໂຕຕິ ຊານນ຺ຕີ ປຏິຄ຺ຄຓ຺ຫາຕີ’’ຕິ ອິມາຍ ຈ ປາຬິຍາ ສເມຕິ. ຍທິ ຫິ ປຸຄ຺ຄລສ຺ສ ອວສ຺ສຸຕຠາໂວ ນປ຺ປມາຓໍ, ກິໍ ‘‘ອນວສ຺ສຸໂຕຕິ ຊານນ຺ຕີ’’ຕິ ອິມິນາ ວຈເນນ, ‘‘ອນາປຕ຺ຕິ ອຸຠໂຕອນວສ຺ສຸຕາ ໂຫນ຺ຕິ, ອນວສ຺ສຸຕາ ປຏິຄ຺ຄຓ຺ຫາຕີ’’ຕິ ເອຕ຺ຕກເມວ ວຕ຺ຕພ຺ພໍ ສິຍາ. ‘‘ອຸຠໂຕອນວສ຺ສຸຕາ ໂຫນ຺ຕິ, ອນວສ຺ສຸໂຕຕິ ຊານນ຺ຕີ ປຏິຄ຺ຄຓ຺ຫາຕີ’’ຕິ ອິມສ຺ສ ຈ ອນາປຕ຺ຕິວາຣສ຺ສ ອຍມຕ຺ໂຖ. ອຸໂຠ ເຈ ອນວສ຺ສຸຕາ, ສພ຺ພຖາປິ ອນາປຕ຺ຕິ. ອຖ ຠິກ຺ຂຸນີ ອນວສ຺ສຸຕາ ສມານາ ອວສ຺ສຸຕມ຺ປິ ‘‘ອນວສ຺ສຸໂຕ’’ຕິ ສຎ຺ຎາຍ ຕສ຺ສ ຫຕ຺ຖໂຕ ປຏິຄ຺ຄຓ຺ຫາຕິ, ເອວມ຺ປິ ອນາປຕ຺ຕິ. ອຖ ສຍໍ ອນວສ຺ສຸຕາປິ ອຎ຺ຎໍ ອນວສ຺ສຸຕໍ ວາ ອວສ຺ສຸຕໍ ວາ ‘‘ອວສ຺ສຸໂຕ’’ຕິ ຊານາຕິ, ທຸກ຺ກຏເມວ. ວຸຕ຺ຕຎ຺ເຫຕໍ ອນນ຺ຕຣສິກ຺ຂາປເທ ‘‘ກິສ຺ສ ຕ຺ວໍ ອຍ຺ເຍ ນ ປຏິຄ຺ຄຓ຺ຫາສີຕິ. ອວສ຺ສຸຕາ ອຍ຺ເຍຕິ. ຕ຺ວໍ ປນ ອຍ຺ເຍ ອວສ຺ສຸຕາຕິ. ນາຫໍ ອຍ຺ເຍ ອວສ຺ສຸຕາ’’ຕິ. ເສສເມຕ຺ຖ ອຸຕ຺ຕານເມວ. ອຸທກທນ຺ຕໂປນໂຕ ອຎ຺ຎໍ ອຊ຺ໂຌຫຣຓີຍໍ, ອຸຠໂຕອວສ຺ສຸຕຕາ, ສຫຕ຺ຖາ ຄຫຓໍ, ອຊ຺ໂຌຫຣຓນ຺ຕິ ອິມານິ ປເນຕ຺ຖ ຈຕ຺ຕາຣິ ອງ຺ຄານິ.

ປຎ຺ຈມສງ຺ຆາທິເສສສິກ຺ຂາປທວຓ຺ຓນາ ນິຏ຺ຐິຕາ.

໖. ຉຏ຺ຐສງ຺ຆາທິເສສສິກ຺ຂາປທວຓ຺ຓນາ

໗໐໕. ຉຏ຺ເຐ ປຣິວາຣຄາຖາຍ ອຍມຕ຺ໂຖ. ນ ເທຕິ ນ ປຏິຄ຺ຄຓ຺ຫາຕີຕິ (ປຣິ. ອຏ຺ຐ. ໔໘໑) ນ ອຸຍ຺ໂຍຊິກາ ເທຕິ, ນາປິ ອຸຍ຺ໂຍຊິຕາ ຕສ຺ສາ ຫຕ຺ຖໂຕ ຄຓ຺ຫາຕິ. ປຏິຄ຺ຄໂຫ ເຕນ ນ ວິຊ຺ຊຕີຕິ ເຕເນວ ກາຣເຓນ ອຸຍ຺ໂຍຊິກາຍ ຫຕ຺ຖໂຕ ອຸຍ຺ໂຍຊິຕາຍ ປຏິຄ຺ຄໂຫ ນ ວິຊ຺ຊຕິ. ອາປຊ຺ຊຕິ ຄຣຸກນ຺ຕິ ເອວໍ ສນ຺ເຕປິ ອວສ຺ສຸຕສ຺ສ ຫຕ຺ຖໂຕ ປິຓ຺ຑຄ຺ຄຫເຓ ອຸຍ຺ໂຍເຊນ຺ຕີ ສງ຺ຆາທິເສສາປຕ຺ຕິໍ ອາປຊ຺ຊຕິ. ຕຎ຺ຈ ປຣິໂຠຄປຈ຺ຈຍາຕິ ຕຎ຺ຈ ປນ ອາປຕ຺ຕິໍ ອາປຊ຺ຊມານາ ຕສ຺ສາ ອຸຍ຺ໂຍຊິຕາຍ ປຣິໂຠຄປຈ຺ຈຍາ ອາປຊ຺ຊຕິ. ຕສ຺ສາ ຫິ ໂຠຊນປຣິໂຍສາເນ ອຸຍ຺ໂຍຊິກາຍ ສງ຺ຆາທິເສໂສ ໂຫຕິ. ເສສເມຕ຺ຖ ອຸຕ຺ຕານເມວ. ມນຸສ຺ສປຸຣິສຕາ, ອຎ຺ຎຕ຺ຣ ອນຸຎ຺ຎາຕກາຣຓາ ຂາທນີຍໍ ໂຠຊນີຍໍ ຄເຫຕ຺ວາ ຠຸຎ຺ຊາຕິ ອຸຍ຺ໂຍຊນາ, ເຕນ ວຈເນນ ຄເຫຕ຺ວາ ອິຕຣິສ຺ສາ ໂຠຊນປຣິໂຍສານນ຺ຕິ ອິມານິ ປເນຕ຺ຖ ຕີຓິ ອງ຺ຄານິ.

ຉຏ຺ຐສງ຺ຆາທິເສສສິກ຺ຂາປທວຓ຺ຓນາ ນິຏ຺ຐິຕາ.

໗. ສຕ຺ຕມສງ຺ຆາທິເສສສິກ຺ຂາປທວຓ຺ຓນາ

໗໐໙. ສຕ຺ຕເມ ກິນ຺ນຸມາວ ສມຓິໂຍຕິ ກິໍ ນຸ ອິມາ ເອວ ສມຓິໂຍ. ຕາສາຫນ຺ຕິ ຕາສໍ ອຫໍ. ເສສໍ ອຸຕ຺ຕານເມວ.

ສຕ຺ຕມສງ຺ຆາທິເສສສິກ຺ຂາປທວຓ຺ຓນາ ນິຏ຺ຐິຕາ.

໗໑໕. ອຏ຺ຐມໍ ອຸຕ຺ຕານຕ຺ຖເມວ.

໙. ນວມສງ຺ຆາທິເສສສິກ຺ຂາປທວຓ຺ຓນາ

໗໒໑. ນວເມ ວຊ຺ຊປ຺ປຏິຈ຺ຉາທິກາຕິ ຂຸທ຺ທານຸຂຸທ຺ທກວຊ຺ຊສ຺ສ ປຏິຈ຺ຉາທິກາ. ສມນຸຠາສນກມ຺ມກາເລ ເຈຕ຺ຖ ທ຺ເວ ຕິສ຺ໂສ ເອກໂຕ ສມນຸຠາສິຕພ຺ພາ.

ນວມສງ຺ຆາທິເສສສິກ຺ຂາປທວຓ຺ຓນາ ນິຏ຺ຐິຕາ.

໗໒໗. ທສມໍ ອຸຕ຺ຕານຕ຺ຖເມວ.

ຠິກ຺ຂຸນີວິຠງ຺ເຄ ສງ຺ຆາທິເສສວຓ຺ຓນາ ນິຏ຺ຐິຕາ.

ສງ຺ຆາທິເສສກຓ຺ຑໍ ນິຏ຺ຐິຕໍ.