ມຫາປຊາປຕິໂຄຕມີວຕ຺ຖຸກຖາວຓ຺ຓນາ

໔໐໒. ຠິກ຺ຂຸນິກ຺ຂນ຺ຘເກ ສກ຺ເກສຸ ວິຫຣຕີຕິ ປຐມຄມເນນ ຄນ຺ຕ຺ວາ ວິຫຣຕິ. ມຫາປຊາປຕິ ໂຄຕມີຕິ ເອຕ຺ຖ ໂຄຕມີຕິ ໂຄຕ຺ຕໍ. ນາມກຣຓທິວເສ ປນສ຺ສາ ລທ຺ຘສກ຺ກາຣາ ພ຺ຣາຫ຺ມຓາ ລກ຺ຂຓສມ຺ປຕ຺ຕິໍ ທິສ຺ວາ ‘‘ສເຈ ອຍໍ ຘີຕຣໍ ລຠິສ຺ສຕິ, ຈກ຺ກວຕ຺ຕິຣຎ຺ໂຎ ມເຫສີ ຠວິສ຺ສຕິ. ສເຈ ປຸຕ຺ຕໍ ລຠິສ຺ສຕິ, ຈກ຺ກວຕ຺ຕິຣາຊາ ຠວິສ຺ສຕີຕິ ອຸຠຍຖາປິ ມຫຕີເຍວສ຺ສາ ປຊາ ຠວິສ຺ສຕີ’’ຕິ ພ຺ຍາກຣິໍສຸ, ຕສ຺ມາ ປຸຕ຺ຕປຊາຍ ເຈວ ຘີຕຸປຊາຍ ຈ ມຫນ຺ຕຕາຍ ‘‘ມຫາປຊາປຕີ’’ຕິ ນາມໍ ອກໍສຸ, ອິຘ ປນ ໂຄຕ຺ເຕນ ສທ຺ຘິໍ ສໍສນ຺ທິຕ຺ວາ ‘‘ມຫາປຊາປຕິ ໂຄຕມີ’’ຕິ ວຸຕ຺ຕໍ. ເຍນ ຠຄວາ ເຕນຸປສງ຺ກມີຕິ ຠຄວາ ກປິລປຸຣໍ ຄນ຺ຕ຺ວາ ປຐມເມວ ນນ຺ທໍ ປພ຺ພາເຊສິ, ສຕ຺ຕເມ ທິວເສ ຣາຫຸລກຸມາຣໍ. ຈຸມ຺ພຏກກລເຫ ປນ ອຸຠຍນຄຣວາສິເກສຸ ຍຸທ຺ຘຕ຺ຖາຍ ນິກ຺ຂນ຺ເຕສຸ ສຕ຺ຖາ ຄນ຺ຕ຺ວາ ເຕ ຣາຊາໂນ ສຎ຺ຎາເປຕ຺ວາ ອຕ຺ຕທຓ຺ຑສຸຕ຺ຕໍ (ສຸ. ນິ. ໙໔໑ ອາທໂຍ) ກເຖສິ. ຣາຊາໂນ ປສີທິຕ຺ວາ ອຑ຺ຒເຕຍ຺ຍສເຕ ອຑ຺ຒເຕຍ຺ຍສເຕ ທາຣເກ ອທໍສຸ. ຕານິ ປຎ຺ຈ ກຸມາຣສຕານິ ສຕ຺ຖຸ ສນ຺ຕິເກ ປພ຺ພຊິໍສຸ. ອຖ ເນສໍ ປຊາປຕິໂຍ ສາສນໍ ເປເສຕ຺ວາ ອນຠິຣຕິໍ ອຸປ຺ປາທຍິໍສຸ. ສຕ຺ຖາ ເຕສໍ ອນຠິຣຕິຍາ ອຸປ຺ປນ຺ນຠາວໍ ຎຕ຺ວາ ເຕ ປຎ຺ຈສເຕ ທຫຣຠິກ຺ຂູ ກຸຓາລທຫໍ ເນຕ຺ວາ ອຕ຺ຕໂນ ກຸຓາລກາເລ ນິສິນ຺ນປຸພ຺ເພ ປາສາຓຕເລ ນິສີທິຕ຺ວາ ກຸຓາລຊາຕກກຖາຍ (ຊາ. ໒.໒໑.ກຸຓາລຊາຕກ) ເຕສໍ ອນຠິຣຕິໍ ວິໂນເທຕ຺ວາ ສພ຺ເພປິ ເຕ ໂສຕາປຕ຺ຕິຜເລ ປຕິຏ຺ຐາເປສິ, ປຸນ ມຫາວນໍ ອາເນຕ຺ວາ ອຣຫຕ຺ຕຜເລ. ເຕສໍ ຈິຕ຺ຕຊານນຕ຺ຖໍ ປຸນປິ ປຊາປຕິໂຍ ສາສນໍ ປຫິຓິໍສຸ. ເຕ ‘‘ອຠພ຺ພາ ມຍໍ ຆຣາວາສສ຺ສາ’’ຕິ ປຏິສາສນໍ ປຫິຓິໍສຸ. ຕາ ‘‘ນ ທານິ ອມ຺ຫາກໍ ປຣຆຣໍ ຄນ຺ຕຸໍ ຍຸຕ຺ຕໍ, ມຫາປຊາປຕິຍາ ສນ຺ຕິກໍ ຄນ຺ຕ຺ວາ ປພ຺ພຊ຺ຊໍ ອນຸຊານາເປຕ຺ວາ ປພ຺ພຊິສ຺ສາມາ’’ຕິ ປຎ຺ຈສຕາປິ ມຫາປຊາປຕິໍ ອຸປສງ຺ກມິຕ຺ວາ ‘‘ອຍ຺ເຍ, ອມ຺ຫາກໍ ປພ຺ພຊ຺ຊໍ ອນຸຊານາເປຖາ’’ຕິ ອາຫໍສຸ. ມຫາປຊາປຕິ ຈ ຕາ ອິຕ຺ຖິໂຍ ຄເຫຕ຺ວາ ເຍນ ຠຄວາ ເຕນຸປສງ຺ກມິ, ເສຕຈ຺ຉຕ຺ຕສ຺ສ ເຫຏ຺ຐາ ຣຎ຺ໂຎ ປຣິນິພ຺ພຸຕກາເລ ອຸປສງ຺ກມີຕິປິ ວທນ຺ຕິເຍວ. ປກ຺ກາມີຕິ ປຸນ ກປິລປຸຣເມວ ປາວິສິ.

ຍຖາຠິຣນ຺ຕໍ ວິຫຣິຕ຺ວາຕິ ໂພຘເນຍ຺ຍສຕ຺ຕານໍ ອຸປນິສ຺ສຍໍ ໂອໂລເກນ຺ໂຕ ຍຖາຊ຺ຌາສເຍນ ວິຫຣິຕ຺ວາ. ຈາຣິກໍ ປກ຺ກາມີຕິ ມຫາຊນສງ຺ຄຫໍ ກໂຣນ຺ໂຕ ອຸຕ຺ຕມາຍ ພຸທ຺ຘສິຣິຍາ ອໂນປເມນ ພຸທ຺ຘວິລາເສນ ອຕຸຣິຕຈາຣິກໍ ປກ຺ກາມິ. ສມ຺ພຫຸລາຫິ ສາກິຍານີຫິ ສທ຺ຘິນ຺ຕິ ອນ຺ໂຕນິເວສນສ຺ມິໍເຍວ ທສພລໍ ອຸທ຺ທິສ຺ສ ປພ຺ພຊ຺ຊາເວສໍ ຄເຫຕ຺ວາ ຕາປິ ປຎ຺ຈສຕາ ສາກິຍານິໂຍ ປພ຺ພຊ຺ຊາເວສໍເຍວ ຄາຫາເປຕ຺ວາ ສພ຺ພາຫິປິ ຕາຫິ ສມ຺ພຫຸລາຫິ ສາກິຍານີຫິ ສທ຺ຘິໍ. ປກ຺ກາມີຕິ ຄມນໍ ອຠິນີຫຣິ. ຄມນາຠິນີຫຣຓກາເລ ປນສ຺ສາ ‘‘ສຸກຸມາຣາ ຣາຊິຕ຺ຖິໂຍ ປທສາ ຄນ຺ຕຸໍ ນ ສກ຺ຂິສ຺ສນ຺ຕີ’’ຕິ ສາກິຍໂກລິຍຣາຊາໂນ ສຸວຓ຺ຓສິວິກາໂຍ ອຸປຏ຺ຐາປຍິໍສຸ, ຕາ ປນ ‘‘ຍາເນ ອາຣຸຍ຺ຫ ຄຈ຺ຉນ຺ຕີຫິ ສຕ຺ຖຣິ ອຄາຣໂວ ກໂຕ ໂຫຕີ’’ຕິ ເອກປຓ຺ຓາສໂຍຊນິກໍ ມຄ຺ຄໍ ປທສາວ ປຏິປຊ຺ຊິໍສຸ. ຣາຊາໂນປິ ປຸຣໂຕ ຈ ປຈ຺ຉໂຕ ຈ ອາຣກ຺ຂໍ ສໍວິທຫາເປຕ຺ວາ ຕຓ຺ຑຸລສປ຺ປິເຕລາທີນໍ ສກຏານິ ປູເຣຕ຺ວາ ‘‘ຄຕຄຕຏ຺ຐາເນ ອາຫາຣໍ ປຏິຍາເທຖາ’’ຕິ ປຸຣິເສ ເປສຍິໍສຸ. ສູເນຫິ ປາເທຫີຕິ ຕາສຎ຺ຫິ ສຸຂຸມາລຕ຺ຕາ ປາເທສຸ ເອໂກ ໂຜໂຏ ອຸຏ຺ເຐຕິ, ເອໂກ ຠິຊ຺ຊຕິ, ອຸໂຠ ປາທາ ກຏກຏ຺ຐິສມ຺ປຣິກິຓ຺ຓາ ວິຍ ຫຸຕ຺ວາ ອຸທ຺ຘຸມາຕາ. ເຕນ ວຸຕ຺ຕໍ ‘‘ສູເນຫິ ປາເທຫີ’’ຕິ. ພຫິທ຺ວາຣໂກຏ຺ຐເກຕິ ທ຺ວາຣໂກຏ຺ຐກສ຺ສ ພຫິ. ກສ຺ມາ ປເນວໍ ຐິຕາຕິ? ເອວໍ ກິຣສ຺ສາ ອໂຫສິ ‘‘ອຫໍ ຕຖາຄເຕນ ອນຸຎ຺ຎາຕາ ສຍເມວ ປພ຺ພຊ຺ຊາເວສໍ ອຄ຺ຄເຫສິໍ, ເອວໍ ຄຫິຕຠາໂວ ຈ ປນ ເມ ສກລຊມ຺ພຸທີເປ ປາກໂຏ ຊາໂຕ, ສເຈ ສຕ຺ຖາ ປພ຺ພຊ຺ຊໍ ອນຸຊານິສ຺ສຕິ, ອິຈ຺ເຈຕໍ ກຸສລໍ. ສເຈ ນານຸຊານິສ຺ສຕິ, ມຫຕີ ຄຣຫາ ຠວິສ຺ສຕີ’’ຕິ ວິຫາຣໍ ປວິສິຕຸໍ ອສກ຺ໂກນ຺ຕີ ໂຣທມານາ ອຏ຺ຐາສິ. ກິໍ ນຸ ຕ຺ວໍ ໂຄຕມີຕິ ກິໍ ນຸ ຣາຊກຸລານໍ ວິປຕ຺ຕິ ອຸປ຺ປນ຺ນາ, ເກນ ນຸ ຕ຺ວໍ ກາຣເຓນ ເອວໍ ວິວຓ຺ຓຠາວໍ ປຕ຺ຕາ ສູເນຫິ ປາເທຫິ…ເປ… ຐິຕາຕິ.

ອຎ຺ເຎນປິ ປຣິຍາເຍນາຕິ ອຎ຺ເຎນປິ ກາຣເຓນ. ອາປາທິກາຕິ ສໍວຑ຺ຒິກາ, ຕຸມ຺ຫາກໍ ຫຕ຺ຖປາເທສຸ ຫຕ຺ຖປາທກິຈ຺ຈໍ ອສາເຘນ຺ເຕສຸ ຫຕ຺ເຖ ຈ ປາເທ ຈ ວຑ຺ເຒຕ຺ວາ ປຏິຊຄ຺ຄິກາຕິ ອຕ຺ໂຖ. ໂປສິກາຕິ ທິວສສ຺ສ ທ຺ເວ ຕໂຍ ວາເຣ ນຫາເປຕ຺ວາ ໂຠເຊຕ຺ວາ ປາເຍຕ຺ວາ ຕຸມ຺ເຫ ໂປເສສິ. ຖຎ຺ຎໍ ປາເຍສີຕິ ນນ຺ທກຸມາໂຣ ກິຣ ໂພຘິສຕ຺ຕໂຕ ກຕິປາເຫເນວ ທຫຣຕໂຣ. ຕສ຺ມິໍ ຊາເຕ ມຫາປຊາປຕິ ອຕ຺ຕໂນ ປຸຕ຺ຕໍ ຘາຕີນໍ ທຕ຺ວາ ສຍໍ ໂພຘິສຕ຺ຕສ຺ສ ຘາຕິກິຈ຺ຈໍ ສາຘຍມານາ ອຕ຺ຕໂນ ຖຎ຺ຎໍ ປາເຍສິ. ຕໍ ສນ຺ຘາຍ ເຖໂຣ ເອວມາຫ. ສາຘຸ ຠນ຺ເຕຕິ ‘‘ພຫຸກາຣາ’’ຕິອາທີຫິ ຕສ຺ສາ ຄຸຓໍ ກເຖຕ຺ວາ ປຸນ ປພ຺ພຊ຺ຊໍ ຍາຈນ຺ໂຕ ເອວມາຫ.

ມຫາປຊາປຕິໂຄຕມີວຕ຺ຖຸກຖາວຓ຺ຓນາ ນິຏ຺ຐິຕາ.