ເສຂິຍກຖາ

໑໘໗໐. ໂຍ ອນາທຣິເຍເນວ, ປຸຣໂຕ ປຈ຺ຉໂຕປິ ວາ;

ໂອລມ຺ເພຕ຺ວາ ນິວາເສຍ຺ຍ, ຕສ຺ສ ຈາປຕ຺ຕິ ທຸກ຺ກຏໍ.

໑໘໗໑. ຫຕ຺ຖິໂສຓ຺ຑາທິຕຸລ຺ຍໍ ຕຸ, ນິວາເສນ຺ຕສ຺ສ ທຸກ຺ກຏໍ;

ອາປຕ຺ຕິຠີຣຸນາ ນິຈ຺ຈໍ, ວຕ຺ຖພ຺ພໍ ປຣິມຓ຺ຑລໍ.

໑໘໗໒. ຊາຓຸມຓ຺ຑລໂຕ ເຫຏ຺ຐາ, ອຏ຺ຐງ຺ຄຸລປ຺ປມາຓກໍ;

ໂອຕາເຣຕ຺ວາ ນິວຕ຺ຖພ຺ພໍ, ຕໂຕ ອູນໍ ນ ວຏ຺ຏຕິ.

໑໘໗໓. ອສຎ຺ຈິຈ຺ຈາສຕິສ຺ສາປິ, ອຊານນ຺ຕສ຺ສ ເກວລໍ;

ອນາປຕ຺ຕິ ຄິລານສ຺ສາ-ປທາສຸມ຺ມຕ຺ຕກາທິໂນ.

ປຣິມຓ຺ຑລກຖາ.

໑໘໗໔. ອຸໂຠ ໂກເຓ ສມໍ ກຕ຺ວາ, ສາທຣໍ ປຣິມຓ຺ຑລໍ;

ກຕ຺ວາ ປາຣຸປິຕພ຺ເພວໍ, ອກໂຣນ຺ຕສ຺ສ ທຸກ຺ກຏໍ.

໑໘໗໕. ອວິເສເສນ ວຸຕ຺ຕໍ ຕຸ, ອິທໍ ສິກ຺ຂາປທທ຺ວຍໍ;

ຕສ຺ມາ ຆເຣ ວິຫາເຣ ວາ, ກຕ຺ຕພ຺ພໍ ປຣິມຓ຺ຑລໍ.

ທຸຕິຍໍ.

໑໘໗໖. ຄຓ຺ຐິກໍ ປຏິມຸຎ຺ຈິຕ຺ວາ, ກຕ຺ວາ ໂກເຓ ອຸໂຠ ສມໍ;

ຉາເທຕ຺ວາ ມຓິພນ຺ຘຎ຺ຈ, ຄນ຺ຕພ຺ພໍ ຄີວເມວ ຈ.

໑໘໗໗. ຕຖາ ອກຕ຺ວາ ຠິກ຺ຂຸສ຺ສ, ຊຕ຺ຕູນິປິ ອຸຣມ຺ປິ ຈ;

ວິວຣິຕ຺ວາ ຍຖາກາມໍ, ຄຈ຺ຉໂຕ ໂຫຕິ ທຸກ຺ກຏໍ.

ຕຕິຍໍ.

໑໘໗໘. ຄລວາຏກໂຕ ອຸທ຺ຘໍ, ສີສຎ຺ຈ ມຓິພນ຺ຘໂຕ;

ຫຕ຺ເຖ ປິຓ຺ຑິກມໍສມ຺ຫາ, ເຫຏ຺ຐາ ປາເທ ອຸໂຠປິ ຈ.

໑໘໗໙. ວິວຣິຕ຺ວາວເສສຎ຺ຈ, ຉາເທຕ຺ວາ ເຈ ນິສີທຕິ;

ໂຫຕິ ໂສ ສຸປ຺ປຏິຈ຺ຉນ຺ໂນ, ໂທໂສ ວາສູປຄສ຺ສ ນ.

ຈຕຸຕ຺ຖໍ.

໑໘໘໐. ຫຕ຺ຖໍ ວາ ປນ ປາທໍ ວາ, ອຈາເລນ຺ເຕນ ຠິກ຺ຂຸນາ;

ສຸວິນີເຕນ ຄນ຺ຕພ຺ພໍ, ຉຏ຺ເຐ ນຕ຺ຖິ ວິເສສຕາ.

ປຎ຺ຈມຉຏ຺ຐານິ.

໑໘໘໑. ສຕີມຕາວິກາເຣນ, ຍຸຄມຕ຺ຕຎ຺ຈ ເປກ຺ຂິນາ;

ສຸສໍວຸເຕນ ຄນ຺ຕພ຺ພໍ, ຠິກ຺ຂຸໂນກ຺ຂິຕ຺ຕຈກ຺ຂຸນາ.

໑໘໘໒. ຍຕ຺ຖ ກຕ຺ຖຈິ ຫິ ຏ຺ຐາເນ, ເອກສ຺ມິໍ ອນ຺ຕເຣ ຆເຣ;

ຐຕ຺ວາ ປຣິສ຺ສຍາຠາວໍ, ໂອໂລເກຕຸມ຺ປິ ວຏ຺ຏຕິ.

໑໘໘໓. ໂຍ ອນາທຣິຍໍ ກຕ຺ວາ, ໂອໂລເກນ຺ໂຕ ຕຫິໍ ຕຫິໍ;

ສເຈນ຺ຕຣຆເຣ ຍາຕິ, ທຸກ຺ກຏໍ ອຏ຺ຐມໍ ຕຖາ.

ສຕ຺ຕມຏ຺ຐມານິ.

໑໘໘໔. ເອກໂຕ ອຸຠໂຕ ວາປິ, ຫຸຕ຺ວາ ອຸກ຺ຂິຕ຺ຕຈີວໂຣ;

ອິນ຺ທຂີລກໂຕ ອນ຺ໂຕ, ຄຈ຺ຉໂຕ ໂຫຕິ ທຸກ຺ກຏໍ.

ນວມໍ.

໑໘໘໕. ຕຖາ ນິສິນ຺ນກາເລປິ, ນີຫຣນ຺ເຕນ ກຸຓ຺ຑິກໍ;

ອນຸກ຺ຂິປິຕ຺ວາ ທາຕພ຺ພາ, ໂທໂສ ວາສູປຄສ຺ສ ນ.

ທສມໍ.

ປຐໂມ ວຄ຺ໂຄ.

໑໘໘໖. ນ ວຏ຺ຏຕິ ຫສນ຺ເຕນ, ຄນ຺ຕຸຎ຺ເຈວ ນິສີທິຕຸໍ;

ວຕ຺ຖຸສ຺ມິໍ ຫສນີຍສ຺ມິໍ, ສິຕມຕ຺ຕໍ ຕຸ ວຏ຺ຏຕິ.

ປຐມທຸຕິຍານິ.

໑໘໘໗. ອປ຺ປສທ຺ເທນ ຄນ຺ຕພ຺ພໍ, ຈຕຸຕ຺ເຖປິ ອຍໍ ນໂຍ;

ມຫາສທ຺ທໍ ກໂຣນ຺ຕສ຺ສ, ອຸຠຍຕ຺ຖາປິ ທຸກ຺ກຏໍ.

ຕຕິຍຈຕຸຕ຺ຖານິ.

໑໘໘໘. ກາຍປ຺ປຈາລກໍ ກຕ຺ວາ, ພາຫຸສີສປ຺ປຈາລກໍ;

ຄຈ຺ຉໂຕ ທຸກ຺ກຏໍ ໂຫຕິ, ຕເຖວ ຈ ນິສີທໂຕ.

໑໘໘໙. ກາຍໍ ພາຫຸຎ຺ຈ ສີສຎ຺ຈ, ປຄ຺ຄເຫຕ຺ວາ ອຸຊຸໍ ປນ;

ຄນ຺ຕພ຺ພມາສິຕພ຺ພຎ຺ຈ, ສເມນິຣິຍາປເຖນ ຕຸ.

໑໘໙໐. ນິສີທເນນ ຍຸຕ຺ເຕສຸ, ຕີສຸ ວາສູປຄສ຺ສ ຫິ;

ອນາປຕ຺ຕີຕິ ຎາຕພ຺ພໍ, ວິຎ຺ຎຸນາ ວິນຍຎ຺ຎຸນາ.

ທຸຕິໂຍ ວຄ຺ໂຄ.

໑໘໙໑. ຂມ຺ຠໍ ກຕ຺ວາ ສສີສໍ ວາ, ປາຣຸປິຕ຺ວານ ຄຈ຺ຉໂຕ;

ທຸກ຺ກຏໍ ມຸນິນາ ວຸຕ຺ຕໍ, ຕຖາ ອຸກ຺ກຸຏິກາຍ ວາ.

໑໘໙໒. ຫຕ຺ຖປລ຺ລຕ຺ຖິກາຍາປິ, ທຸສ຺ສປລ຺ລຕ຺ຖິກາຍ ວາ;

ຕສ຺ສນ຺ຕຣຆເຣ ໂຫຕິ, ນິສີທນ຺ຕສ຺ສ ທຸກ຺ກຏໍ.

໑໘໙໓. ທຸຕິເຍ ຈ ຈຕຸຕ຺ເຖ ຈ, ຉຏ຺ເຐ ວາສູປຄສ຺ສ ຕຸ;

ອນາປຕ຺ຕີຕິ ສາຣຸປ຺ປາ, ຉພ຺ພີສຕິ ປກາສິຕາ.

ຉຏ຺ຐໍ.

໑໘໙໔. ສກ຺ກຈ຺ຈໍ ສຕິຍຸຕ຺ເຕນ, ຠິກ຺ຂຸນາ ປຕ຺ຕສຎ຺ຎິນາ;

ປິຓ຺ຑປາໂຕ ຄເຫຕພ຺ໂພ, ສມສູໂປວ ວິຎ຺ຎຸນາ.

໑໘໙໕. ສູໂປ ຠຕ຺ຕຈຕຸພ຺ຠາໂຄ, ‘‘ສມສູໂປ’’ຕິ ວຸຈ຺ຈຕິ;

ມຸຄ຺ຄມາສກຸລຕ຺ຖານໍ, ສູໂປ ‘‘ສູໂປ’’ຕິ ວຸຈ຺ຈຕິ.

໑໘໙໖. ອນາປຕ຺ຕິ ອສຎ຺ຈິຈ຺ຈ, ຄິລານສ຺ສ ຣເສຣເສ;

ຕເຖວ ຎາຕກາທີນໍ, ອຎ຺ຎຕ຺ຖາຍ ຘເນນ ວາ.

ສຕ຺ຕມຏ຺ຐມນວມານິ.

໑໘໙໗. ອນ຺ໂຕເລຂາປມາເຓນ, ປຕ຺ຕສ຺ສ ມຸຂວຏ຺ຏິຍາ;

ປູຣິໂຕວ ຄເຫຕພ຺ໂພ, ອຘິຏ຺ຐານູປຄສ຺ສ ຕຸ.

໑໘໙໘. ຕຕ຺ຖ ຖູປີກຕໍ ກຕ຺ວາ, ຄຓ຺ຫໂຕ ຍາວກາລິກໍ;

ຍໍ ກິຎ຺ຈິ ປນ ຠິກ຺ຂຸສ຺ສ, ໂຫຕິ ອາປຕ຺ຕິ ທຸກ຺ກຏໍ.

໑໘໙໙. ອຘິຏ຺ຐານູປເຄ ປຕ຺ເຕ, ກາລິກຕ຺ຕຍເມວ ຈ;

ເສເສ ຖູປີກຕໍ ສພ຺ພໍ, ວຏ຺ຏເຕວ ນ ສໍສໂຍ.

໑໙໐໐. ທ຺ວີສຸ ປຕ຺ເຕສຸ ຠຕ຺ຕໍ ຕຸ, ຄເຫຕ຺ວາ ປຕ຺ຕເມກກໍ;

ປູເຣຕ຺ວາ ຍທິ ເປເສຕິ, ຠິກ຺ຂູນໍ ປນ ວຏ຺ຏຕິ.

໑໙໐໑. ປຕ຺ເຕ ປກ຺ຂິປ຺ປມານໍ ຍໍ, ອຸຈ຺ຉຸຂຓ຺ຑຜລາທິກໍ;

ໂອໂຣຫຕິ ສເຈ ເຫຏ຺ຐາ, ນ ຕໍ ຖູປີກຕໍ ສິຍາ.

໑໙໐໒. ປຸປ຺ຜຕກ຺ໂກລກາທີນໍ, ຐເປຕ຺ວາ ເຈ ວຏໍສກໍ;

ທິນ຺ນໍ ອຍາວກາລິຕ຺ຕາ, ນ ຕໍ ຖູປີກຕໍ ສິຍາ.

໑໙໐໓. ວຏໍສກໍ ຕຸ ປູວສ຺ສ, ຐເປຕ຺ວາ ໂອທໂນປຣິ;

ປິຓ຺ຑປາຕໍ ສເຈ ເທນ຺ຕິ, ອິທໍ ຖູປີກຕໍ ສິຍາ.

໑໙໐໔. ຠຕ຺ຕສ຺ສູປຣິ ປຓ຺ຓໍ ວາ, ຖາລກໍ ວາປິ ກິຎ຺ຈິປິ;

ຐເປຕ຺ວາ ປຣິປູເຣຕ຺ວາ, ສເຈ ຄຓ຺ຫາຕິ ວຏ຺ຏຕິ.

໑໙໐໕. ປຏິຄ຺ຄເຫຕຸເມວສ຺ສ, ຕໍ ຕຸ ສພ຺ພໍ ນ ວຏ຺ຏຕິ;

ຄຫິຕໍ ສຸຄຫິຕໍ, ປຈ຺ຉາ, ຠຸຎ຺ຊິຕພ຺ພໍ ຍຖາສຸຂໍ.

ຕຕິໂຍ ວຄ຺ໂຄ.

໑໙໐໖. ປຐມໍ ທຸຕິຍໍ ວຸຕ຺ຕ-ນຍໍ ຕຸ ຕຕິເຍ ປນ;

ອຸປໂຣຘິມທສ຺ເສຕ຺ວາ, ໂຠຕ຺ຕພ຺ພໍ ປຏິປາຏິຍາ.

໑໙໐໗. ອຎ຺ເຎສໍ ອຕ຺ຕໂນ ຠຕ຺ຕໍ, ອາກິຣໍ ປນ ຠາຊເນ;

ນຕ຺ໂຖມສຕິ ເຈ ໂທໂສ, ຕຖາ ອຸຕ຺ຕຣິຠງ຺ຄກໍ.

ຕຕິຍໍ.

໑໙໐໘. ຈຕຸຕ຺ເຖ ຍໍ ຕຸ ວຕ຺ຕພ຺ພໍ, ວຸຕ຺ຕໍ ປຸພ຺ເພ ອເສສໂຕ;

ປຎ຺ຈເມ ມຕ຺ຖກໍ ໂທໂສ, ມທ຺ທິຕ຺ວາ ປຣິຠຸຎ຺ຊໂຕ.

໑໙໐໙. ອນາປຕ຺ຕິ ຄິລານສ຺ສ, ປຣິຕ຺ເຕປິ ຈ ເສສເກ;

ເອກໂຕ ປນ ມທ຺ທິຕ຺ວາ, ສໍກຑ຺ຒິຕ຺ວານ ຠຸຎ຺ຊໂຕ.

ຈຕຸຕ຺ຖປຎ຺ຈມານິ.

໑໙໑໐. ໂຍ ຠິຍ຺ໂຍກມ຺ຍຕາເຫຕຸ, ສູປໍ ວາ ພ຺ຍຎ຺ຊນມ຺ປິ ວາ;

ປຏິຈ຺ຉາເທຍ຺ຍ ຠຕ຺ເຕນ, ຕສ຺ສ ຈາປຕ຺ຕິ ທຸກ຺ກຏໍ.

ຉຏ຺ຐໍ.

໑໙໑໑. ວິຎ຺ຎຕ຺ຕິຍໍ ຕຸ ວຕ຺ຕພ຺ພໍ, ອປຸພ຺ພໍ ນຕ຺ຖິ ກິຎ຺ຈິປິ;

ອຏ຺ຐເມ ປນ ອຸຊ຺ຌາເນ, ຄິລາໂນປິ ນ ມຸຈ຺ຈຕິ.

໑໙໑໒. ‘‘ທສ຺ສາມິ ທາເປສ຺ສາມີ’’ຕິ, ໂອໂລເກນ຺ຕສ຺ສ ຠິກ຺ຂຸໂນ;

ອນາປຕ຺ຕີຕິ ຎາຕພ຺ພໍ, ນ ຈ ອຸຊ຺ຌານສຎ຺ຎິໂນ.

ອຏ຺ຐມໍ.

໑໙໑໓. ມຫນ຺ຕໍ ປນ ໂມຣຓ຺ຑໍ, ກຸກ຺ກຸຏຓ຺ຑຎ຺ຈ ຂຸທ຺ທກໍ;

ເຕສໍ ມຊ຺ຌປ຺ປມາເຓນ, ກຕ຺ຕພ຺ໂພ ກພໂຬ ປນ.

໑໙໑໔. ຂຊ຺ຊເກ ປນ ສພ຺ພຕ຺ຖ, ມູລຂາທນິຍາທິເກ;

ຜລາຜເລ ອນາປຕ຺ຕິ, ຄິລານຸມ຺ມຕ຺ຕກາທິໂນ.

ນວມໍ.

໑໙໑໕. ອທີໂຆ ປນ ກາຕພ຺ໂພ, ອາໂລໂປ ປຣິມຓ຺ຑໂລ;

ຂຊ຺ຊຕຸຕ຺ຕຣິຠງ຺ຄສ຺ມິໍ, ອນາປຕ຺ຕິ ຜລາຜເລ.

ທສມໍ.

ຈຕຸຕ຺ໂຖ ວຄ຺ໂຄ.

໑໙໑໖. ອນາຫເຏ ມຸຂທ຺ວາຣໍ, ອປ຺ປຕ຺ເຕ ກພເຬ ປນ;

ອຕ຺ຕໂນ ຈ ມຸຂທ຺ວາຣໍ, ວິວຣນ຺ຕສ຺ສ ທຸກ຺ກຏໍ.

ປຐມໍ.

໑໙໑໗. ມຸເຂ ຈ ສກລໍ ຫຕ຺ຖໍ, ປກ຺ຂິປນ຺ຕສ຺ສ ທຸກ຺ກຏໍ;

ມຸເຂ ຈ ກພຬໍ ກຕ຺ວາ, ກເຖຕຸໍ ນ ຈ ວຏ຺ຏຕິ.

໑໙໑໘. ວຈນໍ ຍຕ຺ຕເກນສ຺ສ, ປຣິປຸຓ຺ຓໍ ນ ໂຫຕິ ຫິ;

ມຸຂສ຺ມິໍຕຕ຺ຕເກ ສນ຺ເຕ, ພ຺ຍາຫຣນ຺ຕສ຺ສ ທຸກ຺ກຏໍ.

໑໙໑໙. ມຸເຂ ຫຣີຕກາທີນິ, ປກ຺ຂິປິຕ຺ວາ ກເຖຕິ ໂຍ;

ວຈນໍ ປຣິປຸຓ຺ຓໍ ເຈ, ກເຖຕຸໍ ປນ ວຏ຺ຏຕິ.

ທຸຕິຍຕຕິຍານິ.

໑໙໒໐. ໂຍ ປິຓ຺ຑຸກ຺ເຂປກໍ ຠິກ຺ຂຸ, ກພຬຈ຺ເຉທກມ຺ປິ ວາ;

ມກ຺ກໂຏ ວິຍ ຄຓ຺ເຑ ວາ, ກຕ຺ວາ ຠຸຎ຺ເຊຍ຺ຍ ທຸກ຺ກຏໍ.

ຈຕຸຕ຺ຖປຎ຺ຈມຉຏ຺ຐານິ.

໑໙໒໑. ນິທ຺ຘຸນິຕ຺ວານ ຫຕ຺ຖໍ ວາ, ຠຕ຺ຕໍ ສິຕ຺ຖາວກາຣກໍ;

ຊິວ຺ຫານິຈ຺ຉາຣກໍ ວາປິ, ຕຖາ ‘‘ຈປຸ ຈປູ’’ຕິ ວາ.

໑໙໒໒. ອນາທຣວເສເນວ, ຠຸຎ຺ຊໂຕ ໂຫຕິ ທຸກ຺ກຏໍ;

ສຕ຺ຕເມ ອຏ຺ຐເມ ນຕ຺ຖິ, ໂທໂສ ກຈວຣຸຊ຺ຌເນ.

ສຕ຺ຕມທສມານິ.

ປຎ຺ຈໂມ ວຄ຺ໂຄ.

໑໙໒໓. ກຕ຺ວາ ເອວໍ ນ ໂຠຕ຺ຕພ຺ພໍ, ສທ຺ທໍ ‘‘ສຸຣຸ ສຸຣູ’’ຕິ ຈ;

ຫຕ຺ຖນິລ຺ເລຫກໍ ວາປິ, ນ ຈ ວຏ຺ຏຕິ ຠຸຎ຺ຊິຕຸໍ.

໑໙໒໔. ຜາຓິຕໍ ຆນຍາຄຸໍ ວາ, ຄເຫຕ຺ວາ ອງ຺ຄຸລີຫິ ຕໍ;

ມຸເຂ ອງ຺ຄຸລິໂຍ ໂຠຕ຺ຕຸໍ, ປເວເສຕ຺ວາປິ ວຏ຺ຏຕິ.

໑໙໒໕. ນ ປຕ຺ໂຕ ເລຫິຕພ຺ໂພວ, ເອກາຍງ຺ຄຸລິກາຍ ວາ;

ເອກໂອຏ຺ໂຐປິ ຊິວ຺ຫາຍ, ນ ຈ ນິລ຺ເລຫິຕພ຺ພໂກ.

ຈຕຸຕ຺ຖໍ.

໑໙໒໖. ສາມິເສນ ຕຸ ຫຕ຺ເຖນ, ນ ຈ ປານີຍຖາລກໍ;

ຄເຫຕພ຺ພໍ, ປຏິກ຺ຂິຕ຺ຕໍ, ປຏິກ຺ກູລວເສນ ຫິ.

໑໙໒໗. ປຸຄ຺ຄລສ຺ສ ຈ ສງ຺ຆສ຺ສ, ຄຫຏ຺ຐສ຺ສຕ຺ຕໂນປິ ຈ;

ສນ຺ຕໂກ ປນ ສງ຺ໂຂ ວາ, ສຣາວໍ ວາປິ ຖາລກໍ.

໑໙໒໘. ຕສ຺ມາ ນ ຈ ຄເຫຕພ຺ພໍ, ຄຓ຺ຫໂຕ ໂຫຕິ ທຸກ຺ກຏໍ;

ອນາມິເສນ ຫຕ຺ເຖນ, ຄຫຓໍ ປນ ວຏ຺ຏຕິ.

ປຎ຺ຈມໍ.

໑໙໒໙. ອຸທ຺ຘຣິຕ຺ວາປິ ຠິນ຺ທິຕ຺ວາ, ຄເຫຕ຺ວາ ວາ ປຏິຄ຺ຄເຫ;

ນີຫຣິຕ຺ວາ ອນາປຕ຺ຕິ, ຉຑ຺ເຑນ຺ຕສ຺ສ ຆຣາ ພຫິ.