ຠິກ຺ຂຸວິຠງ຺ໂຄ

ປາຣາຊິກກຖາ

ປຐມປາຣາຊິກກຖາ

໖. ຕິວິເຘ ຕິລມຕ຺ຕມ຺ປິ, ມຄ຺ເຄ ເສວນເຈຕໂນ;

ອງ຺ຄຊາຕໍ ປເວເສນ຺ໂຕ, ອລ຺ໂລກາເສ ປຣາຊິໂຕ.

໗. ປເວສນໍ ປວິຏ຺ຐໍ ວາ, ຐິຕມຸທ຺ຘຣຓມ຺ປິ ວາ;

ສສິກ຺ໂຂ ສາທິຍນ຺ໂຕ ໂສ, ຐເປຕ຺ວາ ກິຣິຍໍ ຈຸໂຕ.

໘. ສນ຺ຖເຕນງ຺ຄຊາເຕນ, ສນ຺ຖຕໍ ວາ ອສນ຺ຖຕໍ;

ມຄ຺ຄໍ ປນ ປເວເສນ຺ໂຕ, ຕເຖວາສນ຺ຖເຕນ ຈ.

໙. ອຸປາທິນ຺ເນນຸປາທິນ຺ເນ, ອນຸປາທິນ຺ນເກນ ວາ;

ຆຏ຺ຏິເຕ ອນຸປາທິນ຺ເນ, ສເຈ ສາທິຍເຕຕ຺ຖ ໂສ.

໑໐. ໂຫຕິ ປາຣາຊິກກ຺ເຂຕ຺ເຕ, ປວິຏ຺ເຐ ຕຸ ປຣາຊິໂຕ;

ເຂຕ຺ເຕ ຖຸລ຺ລຈ຺ຈຍໍ ຕສ຺ສ, ທຸກ຺ກຏຎ຺ຈ ວິນິທ຺ທິເສ.

໑໑. ມເຕ ອກ຺ຂາຍິເຕ ຈາປິ, ເຍຠຸຍ຺ຍກ຺ຂາຍິເຕປິ ຈ;

ເມຖຸນໍ ປຏິເສວນ຺ໂຕ, ໂຫຕິ ປາຣາຊິໂກ ນໂຣ.

໑໒. ເຍຠຸຍ຺ຍກ຺ຂາຍິເຕ ຈາປິ, ອຸປຑ຺ຒກ຺ຂາຍິເຕປິ ຈ;

ໂຫຕິ ຖຸລ຺ລຈ຺ຈຍາປຕ຺ຕິ, ເສເສ ອາປຕ຺ຕິ ທຸກ຺ກຏໍ.

໑໓. ນິມິຕ຺ຕມຕ຺ຕໍ ເສເສຕ຺ວາ, ຂາຍິເຕປິ ສຣີຣເກ;

ນິມິຕ຺ເຕ ເມຖຸນໍ ຕສ຺ມິໍ, ເສວໂຕປິ ປຣາຊໂຍ.

໑໔. ອຸທ຺ຘຸມາຕາທິສມ຺ປຕ຺ເຕ, ສພ຺ພຕ຺ຖາປິ ຈ ທຸກ຺ກຏໍ;

ຂາຍິຕາກ຺ຂາຍິຕໍ ນາມ, ສພ຺ພໍ ມຕສຣີຣເກ.

໑໕. ຉິນ຺ທິຕ຺ວາ ປນ ຕຈ຺ເຉຕ຺ວາ, ນິມິຕ຺ຕຸປ຺ປາຏິເຕ ປນ;

ວຓສງ຺ເຂປໂຕ ຕສ຺ມິໍ, ເສວໍ ຖຸລ຺ລຈ຺ຈຍໍ ຜຸເສ.

໑໖. ຕໂຕ ເມຖຸນຣາເຄນ, ປຕິຕາຍ ນິມິຕ຺ຕໂຕ;

ຕາຍໍ ອຸປກ຺ກມນ຺ຕສ຺ສ, ທຸກ຺ກຏໍ ມໍສເປສິຍໍ.

໑໗. ນຂປິຏ຺ຐິປ຺ປມາເຓປິ, ມໍເສ ນ຺ຫາຣຸມ຺ຫິ ວາ ສຕິ;

ເມຖຸນໍ ປຏິເສວນ຺ໂຕ, ຊີວມາເນ ປຣາຊິໂຕ.

໑໘. ກຓ຺ຓຈ຺ຉິທ຺ທກ຺ຂິນາສາສຸ, ວຕ຺ຖິໂກເສ ວເຓສຸ ວາ;

ອງ຺ຄຊາຕໍ ປເວເສນ຺ໂຕ, ຣາຄາ ຖຸລ຺ລຈ຺ຈຍໍ ຜຸເສ.

໑໙. ອວເສສສຣີຣສ຺ມິໍ, ອຸປກຈ຺ຉູຣຸກາທິສຸ;

ວສາ ເມຖຸນຣາຄສ຺ສ, ເສວມານສ຺ສ ທຸກ຺ກຏໍ.

໒໐. ອສ຺ສໂຄມຫິສາທີນໍ, ໂອຏ຺ຐຄທ຺ຣຠທນ຺ຕິນໍ;

ນາສາສຸ ວຕ຺ຖິໂກເສສຸ, ເສວໍ ຖຸລ຺ລຈ຺ຈຍໍ ຜຸເສ.

໒໑. ຕຖາ ສພ຺ພຕິຣຈ຺ຉານໍ, ອກ຺ຂິກຓ຺ຓວເຓສຸປິ;

ອວເສສສຣີເຣສຸ, ເສວມານສ຺ສ ທຸກ຺ກຏໍ.

໒໒. ເຕສໍ ອລ຺ລສຣີເຣສຸ, ມຕານໍ ເສວໂຕ ປນ;

ຕິວິຘາປິ ສິຍາປຕ຺ຕິ, ເຂຕ຺ຕສ຺ມິໍ ຕິວິເຘ ສຕິ.

໒໓. ພຫິ ເມຖຸນຣາເຄນ, ນິມິຕ຺ຕໍ ອິຕ຺ຖິຍາ ປນ;

ນິມິຕ຺ເຕນ ຉຸປນ຺ຕສ຺ສ, ຕສ຺ສ ຖຸລ຺ລຈ຺ຈຍໍ ສິຍາ.

໒໔. ກາຍສໍສຄ຺ຄຣາເຄນ, ນິມິຕ຺ເຕນ ມຸເຂນ ວາ;

ນິມິຕ຺ຕໍ ອິຕ຺ຖິຍາ ຕສ຺ສ, ຉຸປໂຕ ຄຣຸກໍ ສິຍາ.

໒໕. ຕເຖໂວຠຍຣາເຄນ, ນິມິຕ຺ຕໍ ປຸຣິສສ຺ສປິ;

ນິມິຕ຺ເຕນ ຉຸປນ຺ຕສ຺ສ, ໂຫຕິ ອາປຕ຺ຕິ ທຸກ຺ກຏໍ.

໒໖. ນິມິຕ຺ເຕນ ນິມິຕ຺ຕໍ ຕຸ, ຕິຣຈ຺ຉານຄຕິຕ຺ຖິຍາ;

ຖຸລ຺ລຈ຺ຈຍໍ ຉຸປນ຺ຕສ຺ສ, ໂຫຕິ ເມຖຸນຣາຄໂຕ.

໒໗. ກາຍສໍສຄ຺ຄຣາເຄນ, ຕິຣຈ຺ຉານຄຕິຕ຺ຖິຍາ;

ນິມິຕ຺ເຕນ ນິມິຕ຺ຕສ຺ສ, ຉຸປເນ ທຸກ຺ກຏໍ ມຕໍ.

໒໘. ອງ຺ຄຊາຕໍ ປເວເສຕ຺ວາ, ຕມາວຏ຺ຏກເຕ ມຸເຂ;

ຕຕ຺ຖາກາສຄຕໍ ກຕ຺ວາ, ນີຫຣນ຺ຕສ຺ສ ທຸກ຺ກຏໍ.

໒໙. ຕຖາ ຈຕູຫິ ປສ຺ເສຫິ, ອິຕ຺ຖິຍາ ເຫຏ຺ຐິມຕ຺ຕລໍ;

ອຉຸປນ຺ຕໍ ປເວເສຕ຺ວາ, ນີຫຣນ຺ຕສ຺ສ ທຸກ຺ກຏໍ.

໓໐. ອຸປ຺ປາຏິໂຕຏ຺ຐມໍເສສຸ, ພຫິ ນິກ຺ຂນ຺ຕເກສຸ ວາ;

ທນ຺ເຕສຸ ວາຍມນ຺ຕສ຺ສ, ຕສ຺ສ ຖຸລ຺ລຈ຺ຈຍໍ ສິຍາ.

໓໑. ອຏ຺ຐິສງ຺ຆຏ຺ຏນໍ ກຕ຺ວາ, ມຄ຺ເຄ ທຸວິຘຣາຄໂຕ;

ສຸກ຺ເກ ມຸຕ຺ເຕປິ ວາມຸຕ຺ເຕ, ວາຍມນ຺ຕສ຺ສ ທຸກ຺ກຏໍ.

໓໒. ອິຕ຺ຖິໍ ເມຖຸນຣາເຄນ, ອາລິງ຺ຄນ຺ຕສ຺ສ ທຸກ຺ກຏໍ;

ຫຕ຺ຖຄ຺ຄາຫປຣາມາສ-ຈຸມ຺ພນາທີສ຺ວຍໍ ນໂຍ.

໓໓. ອປເທ ອຫໂຍ ມຈ຺ຉາ, ກໂປຕາ ທ຺ວິປເທປິ ຈ;

ໂຄຘາ ຈຕຸປ຺ປເທ ເຫຏ຺ຐາ, ວຕ຺ຖຸ ປາຣາຊິກສ຺ສິເມ.

໓໔. ເສເວຕຸກາມຕາຈິຕ຺ຕໍ, ມຄ຺ເຄ ມຄ຺ຄປ຺ປເວສນໍ;

ອິທມງ຺ຄທ຺ວຍໍ ວຸຕ຺ຕໍ, ປຐມນ຺ຕິມວຕ຺ຖຸໂນ.

໓໕. ທຸກ຺ກຏໍ ປຐມສ຺ເສວ, ສາມນ຺ຕມິຕິ ວຓ຺ຓິຕໍ;

ເສສານໍ ປນ ຕິຓ຺ຓມ຺ປິ, ຖຸລ຺ລຈ຺ຈຍມຸທີຣິຕໍ.

໓໖. ‘‘ອນາປຕ຺ຕີ’’ຕິ ຎາຕພ຺ພໍ, ອຊານນ຺ຕສ຺ສ ຠິກ຺ຂຸໂນ;

ຕເຖວາສາທິຍນ຺ຕສ຺ສ, ຊານນ຺ຕສ຺ສາທິກມ຺ມິໂນ.

໓໗. ວິນເຍ ອນຍູປຣເມ ປຣເມ;

ສຸຊນສ຺ສ ສຸຂານຍເນ ນຍເນ;

ປຏຸ ໂຫຕິ ປຘານຣໂຕ ນ ຣໂຕ;

ອິຘ ໂຍ ປນ ສາຣມເຕ ຣມເຕ.

໓໘. ອິມໍ ຫິຕວິຠາວນໍ ຠາວນໍ;

ອເວທິ ສຸຣສມ຺ຠວໍ ສມ຺ຠວໍ;

ສ ມາຣພຬິສາສເນ ສາສເນ;

ສໂມ ຠວຕຸປາລິນາ ປາລິນາ.

ອິຕິ ວິນຍວິນິຈ຺ຉເຍ ປຐມປາຣາຊິກກຖາ ນິຏ຺ຐິຕາ.

ທຸຕິຍປາຣາຊິກກຖາ

໓໙. ອາທິຍນ຺ໂຕ ຫຣນ຺ໂຕວ-ຫຣນ຺ໂຕ ອິຣິຍາປຖໍ;

ວິໂກເປນ຺ໂຕ ຕຖາ ຐານາ, ຈາເວນ຺ໂຕປິ ປຣາຊິໂຕ.

໔໐. ຕຕ຺ຖ ນາເນກຠຓ຺ຑານໍ, ປຎ຺ຈການໍ ວສາ ປນ;

ອວຫາຣາ ທເສເວເຕ, ວິຎ຺ຎາຕພ຺ພາ ວິຠາວິນາ.

໔໑. ສາຫຕ຺ຖາຓຕ຺ຕິໂກ ເຈວ, ນິສ຺ສຄ຺ໂຄ ອຕ຺ຖສາຘໂກ;

ຘຸຣນິກ຺ເຂປນຎ຺ຈາຕິ, ອິທໍ ສາຫຕ຺ຖປຎ຺ຈກໍ.

໔໒. ປຸພ຺ພສຫປໂຍໂຄ ຈ, ສໍວິທາຫຣຓມ຺ປິ ຈ;

ສງ຺ເກຕກມ຺ມໍ ເນມິຕ຺ຕໍ, ປຸພ຺ພໂຍຄາທິປຎ຺ຈກໍ.

໔໓. ເຖຍ຺ຍປສຍ຺ຫປຣິກປ຺ປ-ປຏິຈ຺ຉນ຺ນກຸສາທິກາ;

ອວຫາຣາ ອິເມ ປຎ຺ຈ, ເວທິຕພ຺ພາວ ວິຎ຺ຎຸນາ.

໔໔. ວຕ຺ຖຸກາລຄ຺ຆເທເສ ຈ, ປຣິໂຠຄຎ຺ຈ ປຎ຺ຈປິ;

ຎຕ຺ວາ ເອຕານິ ກາຕພ຺ໂພ, ປຓ຺ຑິເຕນ ວິນິຈ຺ຉໂຍ.

໔໕. ທຸຕິຍໍ ວາປິ ກຸທ຺ທາລໍ, ປິຏກໍ ປຣິເຍສໂຕ;

ຄຈ຺ຉໂຕ ເຖຍ຺ຍຈິຕ຺ເຕນ, ທຸກ຺ກຏໍ ປຸພ຺ພໂຍຄໂຕ.

໔໖. ຕຕ຺ຖຊາຕກກຏ຺ຐໍ ວາ, ລຕໍ ວາ ຉິນ຺ທໂຕ ປນ;

ທຸກ຺ກຏໍ ອຸຠຍຕ຺ຖາປິ, ວຸຕ຺ຕໍ ສຫປໂຍຄໂຕ.

໔໗. ປຖວິໍ ຂຓໂຕ ວາປິ, ພ຺ຍູຫໂຕ ປໍສຸເມວ ວາ;

ອາມສນ຺ຕສ຺ສ ວາ ກຸມ຺ຠິໍ, ໂຫຕິ ອາປຕ຺ຕິ ທຸກ຺ກຏໍ.

໔໘. ມຸເຂ ປາສໍ ປເວເສຕ຺ວາ, ຂາຓຸເກ ພທ຺ຘກຸມ຺ຠິຍາ;

ພນ຺ຘນານໍ ວສາ ເຎຍ຺ໂຍ, ຐານເຠໂທ ວິຊານຕາ.

໔໙. ທ຺ເວ ຐານານິ ປເນກສ຺ມິໍ, ຂາຓຸເກ ພທ຺ຘກຸມ຺ຠິຍາ;

ວລຍໍ ຣຸກ຺ຂມູລສ຺ມິໍ, ປເວເສຕ຺ວາ ກຕາຍ ວາ.

໕໐. ອຸທ຺ຘຣນ຺ຕສ຺ສ ຂາຓຸໍ ວາ, ຉິນ຺ທໂຕ ສງ຺ຂລິມ຺ປິ ວາ;

ຖຸລ຺ລຈ຺ຈຍໍ ຕໂຕ ກຸມ຺ຠິໍ, ຐານາ ຈາເວຕິ ເຈ ຈຸໂຕ.

໕໑. ປຐມໍ ປນ ກຸມ຺ຠິໍ ວາ, ອຸທ຺ຘຣິຕ຺ວາ ຕຖາ ປຸນ;

ຐານາ ຈາເວຕິ ຂາຓຸໍ ວາ, ສງ຺ຂລິໍ ວາປິ ໂສ ນໂຍ.

໕໒. ອິໂຕ ຈິໂຕ ຈ ຆໍສນ຺ໂຕ, ມູເລ ສາເຣຕິ ຣກ຺ຂຕິ;

ວລຍໍ ເຂຄຕໍ ຕຕ຺ຖ, ກໂຣນ຺ໂຕວ ປຣາຊິໂຕ.

໕໓. ຊາຕໍ ຉິນ຺ທຕິ ເຈ ຣຸກ຺ຂໍ, ທຸກ຺ກຏໍ ກຸມ຺ຠິມຕ຺ຖເກ;

ສມີເປ ຉິນ຺ທໂຕ ຕສ຺ສ, ປາຈິຕ຺ຕິຍມຕຕ຺ຖຊໍ.

໕໔. ອນ຺ໂຕກຸມ຺ຠິຄຕໍ ຠຓ຺ຑໍ, ຜນ຺ທາເປຕິ ສເຈ ປນ;

ອປພ຺ຍູເຫຕິ ຕຕ຺ເຖວ, ຕສ຺ສ ຖຸລ຺ລຈ຺ຈຍໍ ສິຍາ.

໕໕. ຫຣນ຺ໂຕ ກຸມ຺ຠິຍາ ຠຓ຺ຑໍ, ມຸຏ຺ຐິໍ ຉິນ຺ທຕິ ອຕ຺ຕໂນ;

ຠາຊເນ ວາ ຄຕໍ ກຕ຺ວາ, ໂຫຕິ ຠິກ຺ຂຸ ປຣາຊິໂຕ.

໕໖. ຫາຣໍ ວາ ປນ ປາມງ຺ຄໍ, ສຸຕ຺ຕາຣຸຬ຺ຫໍ ຕຸ ກຸມ຺ຠິຍາ;

ຜນ຺ທາເປຕິ ຍຖາວຕ຺ຖຸໍ, ຐານາ ຈາເວຕິ ເຈ ຈຸໂຕ.

໕໗. ສປ຺ປິອາທີສຸ ຍໍ ກິຎ຺ຈິ, ປິວໂຕ ປາທປູຣຓໍ;

ເອເກເນວ ປໂຍເຄນ, ປີຕມຕ຺ເຕ ປຣາຊໂຍ.

໕໘. ກຕ຺ວາວ ຘຸຣນິກ຺ເຂປໍ, ປິວນ຺ຕສ຺ສ ປຸນປ຺ປຸນໍ;

ສກລມ຺ປິ ຈ ຕໍ ກຸມ຺ຠິໍ, ປິວໂຕ ນ ປຣາຊໂຍ.

໕໙. ສເຈ ຂິປຕິ ຍໍ ກິຎ຺ຈິ, ຠຓ຺ຑກໍ ເຕລກຸມ຺ຠິຍໍ;

ຕໍ ປາທຄ຺ຆນກໍ ເຕລໍ, ຘຸວໍ ປິວຕິ ຕາວເທ.

໖໐. ຫຕ຺ຖໂຕ ມຸຕ຺ຕມຕ຺ເຕວ, ເຖຍ຺ຍຈິຕ຺ໂຕ ວິນສ຺ສຕິ;

ອາວິຎ຺ເຊຕ຺ວາປິ ວາ ກຸມ຺ຠິໍ, ເຕລໍ ຄາເຬຕິ ເຈ ຕຖາ.

໖໑. ເຕລສ຺ສາກິຣຓໍ ຎຕ຺ວາ, ຂິຕ຺ຕໍ ຣິຕ຺ຕາຍ ກຸມ຺ຠິຍາ;

ປີຕໍ ເຕລຎ຺ຈ ຕໍ ຠຓ຺ຑໍ, ອຸທ຺ຘຣນ຺ໂຕວ ຘໍສິໂຕ.

໖໒. ຕຕ຺ເຖວ ຠິນ຺ທໂຕ ເຕລໍ, ຉຑ຺ເຑນ຺ຕສ຺ສ ຕເຖວ ຈ;

ຌາເປນ຺ຕສ຺ສ ອໂຠຄໍ ວາ, ກໂຣນ຺ຕສ຺ສ ຈ ທຸກ຺ກຏໍ.

ຠູມຏ຺ຐກຖາ.

໖໓. ຐປິຕໍ ປຕ຺ຖຣິຕ຺ວາ ຈ, ສາຏກຕ຺ຖຣຓາທິກໍ;

ເວເຐຕ຺ວາ ອຸທ຺ຘຣນ຺ຕສ຺ສ, ມຸຕ຺ເຕ ຐານາ ປຣາຠໂວ.

໖໔. ໂອຣິມນ຺ເຕນ ວາ ຜຸຏ຺ຐ-ໂມກາສໍ ປາຣິມນ຺ຕໂຕ;

ປາຣາຊິກມຕິກ຺ກນ຺ເຕ, ກຑ຺ຒໂຕ ອຸຊຸກມ຺ປິ ວາ.

ຖລຏ຺ຐກຖາ.

໖໕. ປຸຣໂຕ ມຸຂຕຸຓ຺ຑຎ຺ຈ, ກລາປຄ຺ຄຎ຺ຈ ປຈ຺ຉໂຕ;

ທ຺ວີສຸ ປສ຺ເສສຸ ປກ຺ຂນ຺ໂຕ, ເຫຏ຺ຐາ ປາທນຂາ ຕຖາ.

໖໖. ອຸທ຺ຘຎ຺ຈາປິ ສິຂຄ຺ຄນ຺ຕິ, ຄຄເນ ຄຈ຺ຉໂຕ ປນ;

ໂມຣສ຺ສ ຉ ປຣິຈ຺ເຉທາ, ເວທິຕພ຺ພາ ວິຠາວິນາ.

໖໗. ຠິກ຺ຂຸ ‘‘ສສ຺ສາມິກໍ ໂມຣໍ, ຄເຫສ຺ສາມີ’’ຕິ ເຂຄຕໍ;

ຫຕ຺ຖໍ ວາປິ ປສາເຣຕິ, ປຸຣໂຕ ວາສ຺ສ ຕິຏ຺ຐຕິ.

໖໘. ໂມໂຣປິ ຄຄເນ ປກ຺ເຂ, ຈາເຣຕິ ນ ຈ ຄຈ຺ຉຕິ;

ທຸກ຺ກຏໍ ຄມນຈ຺ເຉເທ, ອາມສນ຺ຕສ຺ສ ເຈວ ຕໍ.

໖໙. ຐານາ ໂມຣມໂມເຈນ຺ໂຕ, ຜນ຺ທາເປຕິ ສເຈ ປນ;

ເອວໍ ຜນ຺ທາປເນ ຕສ຺ສ, ຖຸລ຺ລຈ຺ຈຍມຸທີຣິຕໍ.

໗໐. ອຄ຺ຄເຫຕ຺ວາ ຄເຫຕ຺ວາ ວາ, ຫຕ຺ເຖນ ປນ ອຕ຺ຕໂນ;

ຐານາ ຈາເວຕິ ເຈ ໂມຣໍ, ສຍໍ ຐານາ ຈຸໂຕ ສິຍາ.

໗໑. ຜຸຏ຺ໂຐກາສໍ ມຸຂຄ຺ເຄນ, ກລາປຄ຺ເຄນ ວາ ປນ;

ກລາປຄ຺ເຄນ ວາ ຜຸຏ຺ຐໍ, ມຸຂຕຸຓ຺ເຑນ ຠິກ຺ຂຸ ເຈ.

໗໒. ອຕິກ຺ກາເມຍ຺ຍ ໂຍ ໂມຣໍ, ຐານາ ຈາເວຕິ ນາມ ໂສ;

ເອເສວ ຈ ນໂຍ ປາທ-ສິຂາປກ຺ເຂສຸ ທີປິໂຕ.

໗໓. ຄຄເນ ປນ ຄຈ຺ຉນ຺ໂຕ, ກເຣ ໂມໂຣ ນິລີຍຕິ;

ຕໍ ກເຣເນວ ຈາເຣນ຺ໂຕ, ຜນ຺ທາເປຕີຕິ ວຸຈ຺ຈຕິ.

໗໔. ສເຈ ຄຓ຺ຫາຕິ ຕໍ ໂມຣໍ, ອິຕເຣນ ກເຣນ ໂສ;

ຈາວິຕຕ຺ຕາ ປນ ຐານາ, ຠິກ຺ຂຸ ຐານາ ຈຸໂຕ ສິຍາ.

໗໕. ອິຕຣໍ ປນ ໂມຣສ຺ສ, ອຸປເນຕິ ສເຈ ກຣໍ;