ຠິກ຺ຂຸນີວິຠງ຺ໂຄ

໑໙໖໔. ຠິກ຺ຂຸນີນໍ ຫິຕຕ຺ຖາຍ, ວິຠງ຺ຄໍ ຍໍ ຊິໂນພ຺ຣວິ;

ຕສ຺ມິໍ ອປິ ສມາເສນ, ກິຎ຺ຈິມຕ຺ຕໍ ຠຓາມຫໍ.

ປາຣາຊິກກຖາ

໑໙໖໕. ຉນ຺ທໂສ ເມຖຸນໍ ຘມ຺ມໍ, ປຏິເສເວຍ຺ຍ ຍາ ປນ;

ໂຫຕິ ປາຣາຊິກາ ນາມ, ສມຓີ ສາ ປວຸຈ຺ຈຕິ.

໑໙໖໖. ມນຸສ຺ສປຸຣິສາທີນໍ, ນວນ຺ນໍ ຍສ຺ສ ກສ຺ສຈິ;

ສຊີວສ຺ສາປ຺ຍຊີວສ຺ສ, ສນ຺ຖຕໍ ວາ ອສນ຺ຖຕໍ.

໑໙໖໗. ອຕ຺ຕໂນ ຕິວິເຘ ມຄ຺ເຄ, ເຍຠຸຍ຺ຍກ຺ຂາຍິຕາທິກໍ;

ອງ຺ຄຊາຕໍ ປເວເສນ຺ຕີ, ອລ຺ໂລກາເສ ປຣາຊິຕາ.

໑໙໖໘. ອິໂຕ ປຣມວຕ຺ວາວ, ສາຘາຣຓວິນິຈ຺ຉຍໍ;

ອສາຘາຣຓເມວາຫໍ, ຠຓິສ຺ສາມິ ສມາສໂຕ.

໑໙໖໙. ອຘກ຺ຂກໍ ສຣີຣກໍ, ຍທຸພ຺ຠຊາຓຸມຓ຺ຑລໍ;

ສຣີຣເກນ ເຈ ເຕນ, ຜຸເສຍ຺ຍ ຠິກ຺ຂຸນີ ປນ.

໑໙໗໐. ອວສ຺ສຸຕສ຺ສາວສ຺ສຸຕາ, ມນຸສ຺ສປຸຄ຺ຄລສ຺ສ ຍາ;

ສຣີຣມສ຺ສ ເຕນ ວາ, ຜຸຏ຺ຐາ ປາຣາຊິກາ ສິຍາ.

໑໙໗໑. ກປ຺ປຣສ຺ສ ປນຸທ຺ຘມ຺ປິ, ຄຫິຕໍ ອຸພ຺ຠຊາຓຸນາ;

ຍຖາວຸຕ຺ຕປ຺ປກາເຣນ, ກາເຍນາເນນ ອຕ຺ຕໂນ.

໑໙໗໒. ປຸຣິສສ຺ສ ຕຖາ ກາຍ- ປຏິພທ຺ຘໍ ຜຸສນ຺ຕິຍາ;

ຕຖາ ຍຖາປຣິຈ຺ຉິນ຺ນ- ກາຍພທ຺ເຘນ ອຕ຺ຕໂນ.

໑໙໗໓. ອວເສເສນ ວາ ຕສ຺ສ, ກາຍໍ ກາເຍນ ອຕ຺ຕໂນ;

ໂຫຕິ ຖຸລ຺ລຈ຺ຈຍໍ ຕສ຺ສາ, ປໂຍເຄ ປຸຣິສສ຺ສ ຈ.

໑໙໗໔. ຍກ຺ຂເປຕຕິຣຈ຺ຉານ- ປຓ຺ຑການໍ ອຘກ຺ຂກໍ;

ອຸພ຺ຠຊາຓຸໍ ຕເຖວສ຺ສາ, ອຸຠໂຕວສ຺ສເວ ສຕິ.

໑໙໗໕. ເອກໂຕວສ຺ສເວ ຈາປິ, ຖຸລ຺ລຈ຺ຈຍມຸທີຣິຕໍ;

ອວເສເສ ຈ ສພ຺ພຕ຺ຖ, ໂຫຕິ ອາປຕ຺ຕິ ທຸກ຺ກຏໍ.

໑໙໗໖. ອຸພ຺ຠກ຺ຂກມໂຘຊາຓຸ-ມຓ຺ຑລໍ ປນ ຍໍ ອິຘ;

ກປ຺ປຣສ຺ສ ຈ ເຫຏ຺ຐາປິ, ຄຕໍ ເອຕ຺ເຖວ ສງ຺ຄຫໍ.

໑໙໗໗. ເກລາຍຕິ ສເຈ ຠິກ຺ຂຸ, ສທ຺ຘິໍ ຠິກ຺ຂຸນິຍາ ປນ;

ອຸຠິນ຺ນໍ ກາຍສໍສຄ຺ຄ-ຣາເຄ ສຕິ ຫິ ຠິກ຺ຂຸໂນ.

໑໙໗໘. ໂຫຕິ ສງ຺ຆາທິເສໂສວ, ນາໂສ ຠິກ຺ຂຸນິຍາ ສິຍາ;

ກາຍສໍສຄ຺ຄຣາໂຄ ຈ, ສເຈ ຠິກ຺ຂຸນິຍາ ສິຍາ.

໑໙໗໙. ຠິກ຺ຂຸໂນ ເມຖຸໂນ ຣາໂຄ, ເຄຫເປມມ຺ປິ ວາ ຠເວ;

ຕສ຺ສາ ຖຸລ຺ລຈ຺ຈຍໍ ວຸຕ຺ຕໍ, ຠິກ຺ຂຸໂນ ໂຫຕິ ທຸກ຺ກຏໍ.

໑໙໘໐. ອຸຠິນ຺ນໍ ເມຖຸເນ ຣາເຄ, ເຄຫເປເມປິ ວາ ສຕິ;

ອວິເສເສນ ນິທ຺ທິຏ຺ຐໍ, ອຸຠິນ຺ນໍ ທຸກ຺ກຏໍ ປນ.

໑໙໘໑. ຍສ຺ສ ຍຕ຺ຖ ມໂນສຸທ຺ຘໍ, ຕສ຺ສ ຕຕ຺ຖ ນ ໂທສຕາ;

ອຸຠິນ຺ນມ຺ປິ ອນາປຕ຺ຕິ, ອຸຠິນ຺ນໍ ຈິຕ຺ຕສຸທ຺ຘິຍາ.

໑໙໘໒. ກາຍສໍສຄ຺ຄຣາເຄນ, ຠິນ຺ທິຕ຺ວາ ປຐມໍ ປນ;

ປຈ຺ຉາ ທູເສຕິ ເຈ ເນວ, ໂຫຕິ ຠິກ຺ຂຸນິທູສໂກ.

໑໙໘໓. ອຖ ຠິກ຺ຂຸນິຍາ ຜຸຏ຺ໂຐ, ສາທິຍນ຺ໂຕວ ເຈຕສາ;

ນິຈ຺ຈໂລ ໂຫຕິ ເຈ ຠິກ຺ຂຸ, ນ ໂຫຕາປຕ຺ຕິ ຠິກ຺ຂຸໂນ.

໑໙໘໔. ຠິກ຺ຂຸນີ ຠິກ຺ຂຸນາ ຜຸຏ຺ຐາ, ສເຈ ໂຫຕິປິ ນິຈ຺ຈລາ;

ອຘິວາເສຕິ ສມ຺ຜສ຺ສໍ, ຕສ຺ສາ ປາຣາຊິກໍ ສິຍາ.

໑໙໘໕. ຕຖາ ຖຸລ຺ລຈ຺ຈຍໍ ເຂຕ຺ເຕ, ທຸກ຺ກຏຎ຺ຈ ວິນິທ຺ທິເສ;

ວຸຕ຺ຕຕ຺ຕາ ‘‘ກາຍສໍສຄ຺ຄໍ, ສາທິເຍຍ຺ຍາ’’ຕິ ສຕ຺ຖຸນາ.

໑໙໘໖. ຕສ຺ສາ ກ຺ຣິຍສມຸຏ຺ຐານໍ, ເອວໍ ສຕິ ນ ທິສ຺ສຕິ;

ອິທໍ ຕພ຺ພຫຸເລເນວ, ນເຍນ ປຣິທີປິຕໍ.

໑໙໘໗. ອນາປຕ຺ຕິ ອສຎ຺ຈິຈ຺ຈ, ອຊານິຕ຺ວາມສນ຺ຕິຍາ;

ສຕິ ອາມສເນ ຕສ຺ສາ, ຜສ຺ສໍ ວາສາທິຍນ຺ຕິຍາ.

໑໙໘໘. ເວທນຏ຺ຏາຍ ວາ ຂິຕ຺ຕ-ຈິຕ຺ຕາຍຸມ຺ມຕ຺ຕິກາຍ ວາ;

ສມຸຏ຺ຐານາທໂຍ ຕຸລ຺ຍາ, ປຐມນ຺ຕິມວຕ຺ຖຸນາ.

ອຸພ຺ຠຊາຓຸມຓ຺ຑລກຖາ.

໑໙໘໙. ປາຣາຊິກຕ຺ຕໍ ຊານນ຺ຕິ, ສລິງ຺ເຄ ຕຸ ຐິຕາຍ ຫິ;

‘‘ນ ກສ຺ສຈິ ປຣສ຺ສາຫໍ, ອາໂຣເຈສ຺ສາມິ ທານິ’’ຕິ.

໑໙໙໐. ຘຸເຣ ນິກ຺ຂິຕ຺ຕມຕ຺ຕສ຺ມິໍ, ສາ ຈ ປາຣາຊິກາ ສິຍາ;

ອຍໍ ວຊ຺ຊປຏິຈ຺ຉາທິ- ນາມິກາ ປນ ນາມໂຕ.

໑໙໙໑. ເສສໍ ສປ຺ປາຓວຄ຺ຄສ຺ມິໍ, ທຸຏ຺ຐຸລ຺ເລນ ສມໍ ນເຍ;

ວິເສໂສ ຕຕ຺ຣ ປາຈິຕ຺ຕິ, ອິຘ ປາຣາຊິກໍ ສິຍາ.

ວຊ຺ຊປຏິຈ຺ຉາທິກຖາ.

໑໙໙໒. ສງ຺ເຆນຸກ຺ຂິຕ຺ຕໂກ ຠິກ຺ຂຸ, ຐິໂຕ ອຸກ຺ເຂປເນ ປນ;

ຍໍທິຏ຺ຐິໂກ ຈ ໂສ ຕສ຺ສາ, ທິຏ຺ຐິຍາ ຄຫເຓນ ຕໍ.

໑໙໙໓. ອນຸວຕ຺ເຕຍ຺ຍ ຍາ ຠິກ຺ຂຸໍ, ຠິກ຺ຂຸນີ ສາ ວິສຸມ຺ປິ ຈ;

ສງ຺ຆມຊ຺ເຌປິ ອຎ຺ຎາຫິ, ວຸຈ຺ຈມານາ ຕເຖວ ຈ.

໑໙໙໔. ອຈຊນ຺ຕີວ ຕໍ ວຕ຺ຖຸໍ, ຄເຫຕ຺ວາ ຍທິ ຕິຏ຺ຐຕິ;

ຕສ຺ສ ກມ຺ມສ຺ສ ໂອສາເນ, ອຸກ຺ຂິຕ຺ຕສ຺ສານຸວຕ຺ຕິກາ.

໑໙໙໕. ໂຫຕິ ປາຣາຊິກາປນ຺ນາ, ໂຫຕາສາກິຍຘີຕຣາ;

ປຸນ ອປ຺ປຏິສນ຺ເຘຍາ, ທ຺ວິຘາ ຠິນ຺ນາ ສິລາ ວິຍ.

໑໙໙໖. ອຘມ຺ເມ ປນ ກມ຺ມສ຺ມິໍ, ນິທ຺ທິຏ຺ຐໍ ຕິກທຸກ຺ກຏໍ;

ສມຸຏ຺ຐານາທໂຍ ສພ຺ເພ, ວຸຕ຺ຕາ ສມນຸຠາສເນ.

ອຸກ຺ຂິຕ຺ຕານຸວຕ຺ຕິກກຖາ.

໑໙໙໗. ອປາຣາຊິກເຂຕ຺ຕສ຺ສ, ຄຫຓໍ ຍສ຺ສ ກສ຺ສຈິ;

ອງ຺ຄສ຺ສ ປນ ຕໍ ຫຕ຺ຖ-ຄ຺ຄຫຓນ຺ຕິ ປວຸຈ຺ຈຕິ.

໑໙໙໘. ປາຣຸຕສ຺ສ ນິວຕ຺ຖສ຺ສ, ຄຫຓໍ ຍສ຺ສ ກສ຺ສຈິ;

ເອຕໍ ສງ຺ຆາຏິຍາ ກຓ຺ຓ-ຄ຺ຄຫຓນ຺ຕິ ປວຸຈ຺ຈຕິ.

໑໙໙໙. ກາຍສໍສຄ຺ຄສງ຺ຂາຕ-ອສທ຺ຘມ຺ມສ຺ສ ກາຣຓາ;

ຠິກ຺ຂຸນີ ຫຕ຺ຖປາສສ຺ມິໍ, ຕິຏ຺ເຐຍ຺ຍ ປຸຣິສສ຺ສ ວາ.

໒໐໐໐. ສລ຺ລເປຍ຺ຍ ຕຖາ ຕຕ຺ຖ, ຐຕ຺ວາ ຕຸ ປຸຣິເສນ ວາ;

ສງ຺ເກຕໍ ວາປິ ຄຈ຺ເຉຍ຺ຍ, ອິຈ຺ເຉຍ຺ຍາ ຄມນສ຺ສ ວາ.

໒໐໐໑. ຕທຕ຺ຖາຍ ປຏິຈ຺ຉນ຺ນ-ຏ຺ຐານຎ຺ຈ ປວິເສຍ຺ຍ ວາ;

ອຸປສໍຫເຣຍ຺ຍ ກາຍໍ ວາ, ຫຕ຺ຖປາເສ ຐິຕາ ປນ.

໒໐໐໒. ອຍມສ຺ສມຓີ ໂຫຕິ, ວິນຏ຺ຐາ ອຏ຺ຐວຕ຺ຖຸກາ;

ອຠພ຺ພາ ປຸນຣຸຬ຺ຫາຍ, ຉິນ຺ໂນ ຕາໂລວ ມຕ຺ຖເກ.

໒໐໐໓. ອນຸໂລເມນ ວາ ວຕ຺ຖຸໍ, ປຏິໂລເມນ ວາ ຈຸຕາ;

ອຏ຺ຐມໍ ປຣິປູເຣນ຺ຕີ, ຕເຖກນ຺ຕຣິກາຍ ວາ.

໒໐໐໔. ອຖາທິໂຕ ປເນກໍ ວາ, ທ຺ເວ ວາ ຕີຓິປິ ສຕ຺ຕ ວາ;

ສຕກ຺ຂຕ຺ຕຸມ຺ປິ ປູເຣນ຺ຕີ, ເນວ ປາຣາຊິກາ ສິຍາ.

໒໐໐໕. ອາປຕ຺ຕິໂຍ ປນາປນ຺ນາ, ເທເສຕ຺ວາ ຕາຫິ ມຸຈ຺ຈຕິ;

ຘຸຣນິກ຺ເຂປນໍ ກຕ຺ວາ, ເທສິຕາ ຄຓນູປິກາ.

໒໐໐໖. ນ ໂຫຕາປຕ຺ຕິຍາ ອງ຺ຄໍ, ສອຸສ຺ສາຫາຍ ເທສິຕາ;

ເທສນາຄຓນໍ ເນຕິ, ເທສິຕາປິ ອເທສິຕາ.

໒໐໐໗. ອນາປຕ຺ຕິ ອສຎ຺ຈິຈ຺ຈ, ອຊານິຕ຺ວາ ກໂຣນ຺ຕິຍາ;

ສມຸຏ຺ຐານາທໂຍ ສພ຺ເພ, ອນນ຺ຕຣສມາ ມຕາ.

໒໐໐໘. ‘‘ອສທ຺ຘມ຺ໂມ’’ຕິ ນາເມຕ຺ຖ, ກາຍສໍສຄ຺ຄນາມໂກ;

ອຍມຸທ຺ທິສິໂຕ ອຕ຺ໂຖ, ສພ຺ພອຏ຺ຐກຖາສຸປິ.

໒໐໐໙. ວິຎ຺ຎູ ປຏິພໂລ ກາຍ-ສໍສຄ຺ຄໍ ປຏິປຊ຺ຊິຕຸໍ;

ກາຍສໍສຄ຺ຄຠາເວ ຕຸ, ສາຘກໍ ວຈນໍ ອິທໍ.

ອຏ຺ຐວຕ຺ຖຸກກຖາ.

໒໐໑໐. ອວສ຺ສຸຕາ ປຏິຈ຺ຉາທີ, ອຸກ຺ຂິຕ຺ຕາ ອຏ຺ຐວຕ຺ຖຸກາ;

ອສາຘາຣຓປຎ຺ຎຕ຺ຕາ, ຈຕສ຺ໂສວ ມເຫສິນາ.

ປາຣາຊິກກຖາ ນິຏ຺ຐິຕາ.

ສງ຺ຆາທິເສສກຖາ

໒໐໑໑. ຍາ ປນ ຠິກ຺ຂຸນີ ອຸສ຺ສຍວາທາ;

ອຏ຺ຏກຣີ ມຸຂຣີ ວິຫເຣຍ຺ຍ;

ເຍນ ເກນຈິ ນເຣນິຘ ສທ຺ຘິໍ;

ສາ ຄຣຸກໍ ກິຣ ໂທສມຸເປຕິ.

໒໐໑໒. ສກ຺ຂິໍ ວາປິ ສຫາຍໍ ວາ, ປຣິເຍສຕິ ທຸກ຺ກຏໍ;

ປເທ ປເທ ຕຖາ ອຏ຺ຏໍ, ກາຕຸໍ ຄຈ຺ຉນ຺ຕິຍາປິ ຈ.

໒໐໑໓. ອາໂຣເຈຕິ ສເຈ ປຸພ຺ພໍ, ຠິກ຺ຂຸນີ ອຕ຺ຕໂນ ກຖໍ;

ທິສ຺ວາ ໂວຫາຣິກໍ ຕສ຺ສາ, ໂຫຕິ ອາປຕ຺ຕິ ທຸກ຺ກຏໍ.

໒໐໑໔. ອາໂຣເຈຕິ ສເຈ ປຈ຺ຉາ, ອິຕໂຣ ອຕ຺ຕໂນ ກຖໍ;

ໂຫຕິ ຠິກ຺ຂຸນິຍາ ຕສ຺ສາ, ຖຸລ຺ລຈ຺ຈຍມນນ຺ຕຣໍ.

໒໐໑໕. ອາໂຣເຈຕິຕໂຣ ປຸພ຺ພໍ, ສເຈ ໂສ ອຕ຺ຕໂນ ກຖໍ;

ປຈ຺ຉາ ຠິກ຺ຂຸນີ ເຈ ປຸພ຺ພ-ສທິໂສວ ວິນິຈ຺ຉໂຍ.

໒໐໑໖. ‘‘ອາໂຣເຈຫີ’’ຕິ ວຸຕ຺ຕາ ເຈ, ‘‘ກຖໍ ຕວ ມມາປິ ຈ’’;

ອາໂຣເຈຕຸ ຍຖາກາມໍ, ປຐເມ ທຸກ຺ກຏໍ ສິຍາ.

໒໐໑໗. ທຸຕິຍາໂຣຈເນ ຕສ຺ສາ, ຖຸລ຺ລຈ຺ຈຍມຸທີຣິຕໍ;

ອຸປາສເກນ ວຸຕ຺ເຕປິ, ອຍເມວ ວິນິຈ຺ຉໂຍ.

໒໐໑໘. ອາໂຣຈິຕກຖໍ ສຸຕ຺ວາ, ອຸຠິນ຺ນມ຺ປິ ຍຖາ ຕຖາ;

ວິນິຈ຺ຉເຍ ກເຕ ເຕຫິ, ອຏ຺ເຏ ປນ ຈ ນິຏ຺ຐິເຕ.

໒໐໑໙. ອຏ຺ຏສ຺ສ ປຣິໂຍສາເນ, ຊເຍ ຠິກ຺ຂຸນິຍາ ປນ;

ປຣາຊເຍປິ ວາ ຕສ຺ສາ, ໂຫຕິ ສງ຺ຆາທິເສສຕາ.

໒໐໒໐. ທູຕໍ ວາປິ ປຫິຓິຕ຺ວາ, ອາຄນ຺ຕ຺ວານ ສຍມ຺ປິ ວາ;

ປຈ຺ຈຕ຺ຖິກມນຸສ຺ເສຫິ, ອາກຑ຺ຒີຍຕິ ຍາ ປນ.

໒໐໒໑. ອາຣາເມ ປນ ອຎ຺ເຎຫິ, ອນາຈາຣໍ ກຕໍ ສເຈ;

ອໂນທິສ຺ສ ປຣໍ ກິຎ຺ຈິ, ຣກ຺ຂໍ ຍາຈຕິ ຕຕ຺ຖ ຍາ.

໒໐໒໒. ຍາຍ ກິຎ຺ຈິ ອວຸຕ຺ຕາວ, ຘມ຺ມຏ຺ຐາ ສຍເມວ ຕຸ;

ສຸຕ຺ວາ ຕໍ ອຎ຺ຎໂຕ ອຏ຺ຏໍ, ນິຏ຺ຐາເປນ຺ຕິ ສເຈ ປນ.

໒໐໒໓. ຕສ຺ສາ, ອຸມ຺ມຕ຺ຕິກາທີນ-ມນາປຕ຺ຕິ ປກາສິຕາ;

ກຖິເນນ ສມຸຏ຺ຐານໍ, ຕຸລ຺ຍໍ ສກິຣິຍໍ ອິທໍ.

ອຏ຺ຏກາຣິກຖາ.

໒໐໒໔. ຊານນ຺ຕີ ຠິກ຺ຂຸນີ ໂຈຣິໍ, ວຊ຺ຌໍ ວິທິຕເມວ ຍາ;

ສງ຺ຆໍ ອນປໂລເກຕ຺ວາ, ຣາຊານໍ ຄຓເມວ ວາ.

໒໐໒໕. ວຸຏ຺ຐາເປຍ຺ຍ ວິນາ ກປ຺ປໍ, ໂຈຣິວຸຏ຺ຐາປນໍ ປນ;

ສງ຺ຆາທິເສສມາປຕ຺ຕິ-ມາປນ຺ນາ ນາມ ໂຫຕິ ສາ.

໒໐໒໖. ປຎ຺ຈມາສຄ຺ຆນໍ ຍາຍ, ຫຣິຕໍ ປຣສນ຺ຕກໍ;

ອຕິເຣກຄ຺ຆນໍ ວາປິ, ອຍໍ ‘‘ໂຈຣີ’’ຕິ ວຸຈ຺ຈຕິ.

໒໐໒໗. ຠິກ຺ຂຸນີສຸ ປນຎ຺ຎາສຸ, ຕິຕ຺ຖິເຍສຸປິ ວາ ຕຖາ;

ຍາ ປພ຺ພຊິຕປຸພ຺ພາ ສາ, ອຍໍ ‘‘ກປ຺ປາ’’ຕິ ວຸຈ຺ຈຕິ.

໒໐໒໘. ວຸຏ຺ຐາເປຕິ ຈ ຍາ ໂຈຣິໍ, ຐເປຕ຺ວາ ກປ຺ປເມວິທໍ;

ສເຈ ອາຈຣິນິໍ ປຕ຺ຕໍ, ຈີວຣໍ ປຣິເຍສຕິ.

໒໐໒໙. ສມ຺ມນ຺ນຕິ ຈ ສີມໍ ວາ, ຕສ຺ສາ ອາປຕ຺ຕິ ທຸກ຺ກຏໍ;

ຎຕ຺ຕິຍາ ທຸກ຺ກຏໍ ທ຺ວີຫິ, ກມ຺ມວາຈາຫິ ຈ ທ຺ວຍໍ.

໒໐໓໐. ຖຸລ຺ລຈ຺ຈຍສ຺ສ, ກມ຺ມນ຺ເຕ, ຄຣຸກໍ ນິທ຺ທິເສ ພຸໂຘ;

ຄໂຓ ອາຈຣິນີ ເຈວ, ນ ຈ ມຸຈ຺ຈຕິ ທຸກ຺ກຏໍ.

໒໐໓໑. ອນາປຕ຺ຕິ ອຊານນ຺ຕີ, ວຸຏ຺ຐາເປຕິ, ຕເຖວ ຈ;

ກປ຺ປໍ ວາ ອປໂລເກຕ຺ວາ, ຕສ຺ສາ ອຸມ຺ມຕ຺ຕິກາຍ ວາ.

໒໐໓໒. ໂຈຣິວຸຏ຺ຐາປນໍ ນາມ, ຊາຍເຕ ວາຈຈິຕ຺ຕໂຕ;

ກາຍວາຈາທິໂຕ ເຈວ, ສຈິຕ຺ຕຎ຺ຈ ກ຺ຣິຍາກ຺ຣິຍໍ.

ໂຈຣິວຸຏ຺ຐາປນກຖາ.