ມຫາວຄ຺ໂຄ

ມຫາຂນ຺ຘກກຖາ

ປພ຺ພຊ຺ຊາກຖາ

໒໔໔໔. ສີລກ຺ຂນ຺ຘາທິຍຸຕ຺ເຕນ, ສຸຠກ຺ຂນ຺ເຘນ ເທສິເຕ;

ຂນ຺ຘເກປິ ປວກ຺ຂາມິ, ສມາເສນ ວິນິຈ຺ຉຍໍ.

໒໔໔໕. ມາຕຣາ ອນນຸຎ຺ຎາຕໍ, ປິຕຣາ ວາປິ ຠິກ຺ຂຸໂນ;

ຠຓ຺ຑຸກມ຺ມມປຸຈ຺ຉິຕ຺ວາ, ປພ຺ພາເຊນ຺ຕສ຺ສ ທຸກ຺ກຏໍ.

໒໔໔໖. ອຸທ຺ເທສປຣິປຸຈ຺ຉາຍ, ສຍໍ ເຈ ພ຺ຍາວໂຏ ສິຍາ;

ທຫໂຣ ອາຓາເປຕພ຺ໂພ, ປພ຺ພາເຊຕ຺ວານຍາຕິ ຈ.

໒໔໔໗. ອຸປຊ຺ຌາຍມຖຸທ຺ທິສ຺ສ, ອວຸຕ຺ໂຕ ທຫໂຣ ປນ;

ປພ຺ພາເຊຕິ ສເຈ ຕໍ ໂສ, ສຍເມວາປິ ວຏ຺ຏຕິ.

໒໔໔໘. ສາມເຓໂຣປິ ວຕ຺ຕພ຺ໂພ, ທຫໂຣ ນຕ຺ຖິ ຕຕ຺ຖ ເຈ;

‘‘ຂຓ຺ຑສີມມິມໍ ເນຕ຺ວາ, ປພ຺ພາເຊຕ຺ວານຍາ’’ຕິ ຈ.

໒໔໔໙. ສຣຓານິ ປເນຕສ຺ສ, ທາຕພ຺ພາເນວ ອຕ຺ຕນາ;

ເອວມ຺ປິ ຠິກ຺ຂຸນາເຍວ, ໂຫຕິ ປພ຺ພາຊິໂຕ ນໂຣ.

໒໔໕໐. ປຸຣິສໍ ຠິກ຺ຂຸໂຕ ອຎ຺ໂຎ, ປພ຺ພາເຊຕິ ນ ວຏ຺ຏຕິ;

ອິຕ຺ຖິໍ ຠິກ຺ຂຸນິໂຕ ອຎ຺ໂຎ, ປພ຺ພາເຊຕິ ນ ວຏ຺ຏຕິ.

໒໔໕໑. ສາມເຓໂຣປິ ວາ ທາຕຸໍ, ສາມເຓຣີປິ ວາ ຕຖາ;

ອາຓຕ຺ຕິຍາ ອຸຠິນ຺ນມ຺ປິ, ກາສາຍານິ ລຠນ຺ຕິ ເຕ.

໒໔໕໒. ສຍເມວ ຈ ຍໍ ກິຎ຺ຈິ, ປພ຺ພາເຊນ຺ເຕນ ຠິກ຺ຂຸນາ;

ເກສາປນຍນໍ ກຕ຺ວາ, ປຐມໍ ອຸທເກ ປຸນ.

໒໔໕໓. ນ຺ຫາເປຕພ຺ໂພ ສິຍາ ສຸຏ຺ຐຸ, ຆໍສິຕ຺ວາ ໂຄມຍາທິນາ;

ສຣີເຣ ປີຬກາ ວາປິ, ກຈ຺ຉຸ ວາ ຕສ຺ສ ໂຫນ຺ຕິ ເຈ.

໒໔໕໔. ມາຕາ ຍຖາ ນິຍໍປຸຕ຺ຕໍ, ນ ຊິຄຸຈ຺ຉຕິ ສພ຺ພໂສ;

ນ຺ຫາເປຕພ຺ໂພວ ຍຕິນາ, ຕເຖວ ອຊິຄຸຈ຺ຉຕາ.

໒໔໕໕. ກສ຺ມາ? ປເນຕ຺ຕເກນາປິ, ອຸປກາເຣນ ສາສເນ;

ໂສ ສທາ ພລວສ຺ເນໂຫ, ໂຫຕຸປຊ຺ຌາຍກາທິສຸ.

໒໔໕໖. ວິໂນເທຕ຺ວາ ປນຸປ຺ປນ຺ນໍ, ອຸກ຺ກຓ຺ຐໍ ກຸລປຸຕ຺ຕກາ;

ສິກ຺ຂາໂຍ ປຣິປູເຣຕ຺ວາ, ນິພ຺ພານໍ ປາປຸຓນ຺ຕິ ຫິ.

໒໔໕໗. ຄນ຺ຘຈຸຓ຺ເຓນ ວາ ປຈ຺ຉາ, ຈຸຓ຺ເຓນປິ ຫລິທ຺ທິຍາ;

ສຣີຣໍ ຕສ຺ສ ສີສຎ຺ຈ, ອຸພ຺ພຏ຺ເຏຕ຺ວາ ປຸນປ຺ປຸນໍ.

໒໔໕໘. ຄິຫິຄນ຺ຘໍ ວິໂນເທຕ຺ວາ, ກາສາຍານິ ປເນກໂຕ;

ທ຺ວຕ຺ຕິກ຺ຂຕ຺ຕຸໍ ສກິໍ ວາປິ, ທາຕພ຺ພານິສ຺ສ ຠິກ຺ຂຸນາ.

໒໔໕໙. ອຖ ຫຕ຺ເຖປິ ວາ ຕສ຺ສ, ອທຕ຺ວາ ສຍເມວ ຕໍ;

ອຈ຺ຉາເທຕິ ອຸປຊ຺ຌາໂຍ, ວຏ຺ຏຕາຈຣິໂຍປິ ວາ.

໒໔໖໐. ນິວາເສຕິ ອນາຓຕ຺ໂຕ, ໂສ ປາຣຸປຕິ ວາ ສຍໍ;

ອປເນຕ຺ວາ ຕໂຕ ສພ຺ພໍ, ປຸນ ທາຕພ຺ພເມວ ຕໍ.

໒໔໖໑. ຠິກ຺ຂຸນາ ຕຸ ສຫຕ຺ເຖນ, ຕຖາ ອາຓຕ຺ຕິຍາປິ ວາ;

ທິນ຺ນໍ ວຏ຺ຏຕິ ກາສາວໍ, ນາທິນ຺ນໍ ປນ ວຏ຺ຏຕິ.

໒໔໖໒. ຕສ຺ເສວ ສນ຺ຕກໍ ວາປິ, ກາ ກຖາ ອຕ຺ຕສນ຺ຕເກ;

ວນ຺ທາເປຕ຺ວາ ຕຕ຺ຖ ຠິກ຺ຂູ, ກາຣາເປຕ຺ວານ ອຸກ຺ກຸຏິໍ.

໒໔໖໓. ອຎ຺ຊລິໍ ປຄ຺ຄຫາເປຕ຺ວາ, ທາຕພ຺ພໍ ສຣຓຕ຺ຕຍໍ;

ປຏິປາຏິວເສເນວ, ນ ຈ ອຸປ຺ປຏິປາຏິຍາ.

໒໔໖໔. ສເຈ ເອກປທໍ ວາປິ, ເທຕິ ເອກກ຺ຂຣມ຺ປິ ວາ;

ປຏິປາຏິໍ ວິຣຊ຺ຌິຕ຺ວາ, ຄຫິຕໍ ເຈ ນ ວຏ຺ຏຕິ.

໒໔໖໕. ຕິກ຺ຂຕ຺ຕຸໍ ຍທິ ວາ ເທຕິ, ພຸທ຺ຘໍ ສຣຓເມວ ວາ;

ຕຖາ ເສເສສຸ ເຈວມ຺ປິ, ນ ທິນ຺ນາເນວ ໂຫນ຺ຕິ ຫິ.

໒໔໖໖. ກຕ຺ວານຸນາສິກນ຺ຕານິ, ເອກາພທ຺ຘານິ ວາ ປນ;

ວິຈ຺ຉິນ຺ທິຕ຺ວາຖ ມ-ນ຺ຕານິ, ທາຕພ຺ພານິ ວິຊານຕາ.

໒໔໖໗. ອຸປສມ຺ປທກມ຺ມໍ ຕຸ, ເອກໂຕສຸທ຺ຘິຍາ ສິຍາ;

ນ ໂຫຕິ ປນ ປພ຺ພຊ຺ຊາ, ອຸຠໂຕສຸທ຺ຘິຍາ ວິນາ.

໒໔໖໘. ຕສ຺ມາ ອາຈຣິເຍນາປິ, ຕຖານ຺ເຕວາສິເກນປິ;

ພຸ-ທ຺ຘ-ກາຣາທໂຍ ວຓ຺ຓາ, ຐານກຣຓສມ຺ປທໍ.

໒໔໖໙. ອຫາເປນ຺ເຕນ ວຕ຺ຕພ຺ພາ, ປພ຺ພຊ຺ຊາຄຸຓມິຈ຺ຉຕາ;

ເອກວຓ຺ຓວິນາເສນ, ປພ຺ພຊ຺ຊາ ຫິ ນ ຣູຫຕິ.

໒໔໗໐. ຍທິ ສິທ຺ຘາປິ ປພ຺ພຊ຺ຊາ, ສຣຓາຄມນໂຕວ ຫິ;

ທາຕພ຺ພາ ທສ ສີລານິ, ປູຣຓຕ຺ຖາຍ ຠິກ຺ຂຸນາ.

ປພ຺ພຊ຺ຊາກຖາ.

໒໔໗໑. ອຸປຊ຺ຌາຍມຖາຈຣິຍໍ, ນິສ຺ສາຍ ວສຕາ ປນ;

ກຕ຺ຕພ຺ພາເນວ ວຕ຺ຕານິ, ປິຍສີເລນ ຠິກ຺ຂຸນາ.

໒໔໗໒. ອາສນໍ ປຎ຺ຎເປຕພ຺ພໍ, ທນ຺ຕກຏ຺ຐໍ ມຸໂຂທກໍ;

ທາຕພ຺ພໍ ຕສ຺ສ ກາເລນ, ສເຈ ຍາຄຸ ຠວິສ຺ສຕິ.

໒໔໗໓. ຍາຄຸ ຕສ຺ສຸປເນຕພ຺ພາ, ສງ຺ຆໂຕ ກຸລໂຕປິ ວາ;

ປຕ຺ເຕ ວຕ຺ຕຎ຺ຈ ກາຕພ຺ພໍ, ວຕ຺ຕໍ ຄາມປ຺ປເວສເນ.

໒໔໗໔. ຈີວເຣ ຍານິ ວຕ຺ຕານິ, ວຸຕ຺ຕານິ ຫິ ມເຫສິນາ;

ເສນາສເນ ຕຖາ ປາທ-ປີຐກຖລິກາທິສຸ.

໒໔໗໕. ເອວມາທີນິ ວຕ຺ຕານິ, ສພ຺ພານິ ປນ ໂຣຄໂຕ;

ວຸຏ຺ຐານາຄມນນ຺ຕານິ, ສຕ຺ຕຕິໍສສຕໍ ສິຍຸໍ.

໒໔໗໖. ວຕ຺ຕເຠເທນ ສພ຺ພຕ຺ຖ, ທຸກ຺ກຏໍ ຕຸ ປກາສິຕໍ;

ອນາທຣວເສເນວ, ອກໂຣນ຺ຕສ຺ສ ຠິກ຺ຂຸໂນ.

ອຸປຊ຺ຌາຍາຈຣິຍວຕ຺ຕກຖາ.

໒໔໗໗. ອຸປຊ຺ຌາຍສ຺ສ ວຕ຺ຕານິ, ຕຖາ ສທ຺ຘິວິຫາຣິເກ;

ສຕໍ ເຕຣສ ໂຫນ຺ເຕວ, ຕຖານ຺ເຕວາສິເກປິ ຈ.

ສທ຺ຘິວິຫາຣິກນ຺ເຕວາສິກວຕ຺ຕກຖາ.

໒໔໗໘. ປກ຺ກນ຺ເຕ ວາປິ ວິພ຺ຠນ຺ເຕ, ປກ຺ຂສງ຺ກນ຺ຕເກ ມເຕ;

ອາຓຕ຺ຕິຍາ ອຸປຊ຺ຌາຍາ, ປສ຺ສມ຺ຠຕິ ຈ ນິສ຺ສໂຍ.

໒໔໗໙. ໂຫຕິ ອາຈຣິຍມ຺ຫາປິ, ຉຘາ ນິສ຺ສຍເຠທນໍ;

ປກ຺ກນ຺ເຕ ວາປິ ວິພ຺ຠນ຺ເຕ, ປກ຺ຂສງ຺ກນ຺ຕເກ ມເຕ.

໒໔໘໐. ອາຓຕ຺ຕິຍໍ ອຸຠິນ຺ນມ຺ປິ, ຘຸຣນິກ຺ເຂປເນປິ ຈ;

ເອເກກສ຺ສ ອຸຠິນ຺ນໍ ວາ, ນາລເຍ ສຕິ ຠິຊ຺ຊຕິ.

໒໔໘໑. ອຸປຊ຺ຌາຍສໂມຘານ-ຄຕສ຺ສາປິ ຈ ຠິຊ຺ຊຕິ;

ທສ຺ສນໍ ສວນຎ຺ຈາຕິ, ສໂມຘານໍ ທ຺ວິຘາ ມຕໍ.

໒໔໘໒. ອທ຺ຘິກສ຺ສ ຄິລານສ຺ສ, ຄິລານຸປຏ຺ຐກສ຺ສ ຈ;

ຍາຈິຕສ຺ສ ນ ໂທໂສວ, ວສິຕຸໍ ນິສ຺ສຍໍ ວິນາ.

໒໔໘໓. ຊານຕາ ອຕ຺ຕໂນ ເຈວ, ວເນ ຜາສຸວິຫາຣຕໍ;

ສຠາເຄ ທາຍເກສນ຺ເຕ, ວສິຕຸມ຺ປິ ຈ ວຏ຺ຏຕິ.

ນິສ຺ສຍປຏິປ຺ປສ຺ສມ຺ຠນກຖາ.

໒໔໘໔. ກຸຏ຺ຐິໍ ຄຓ຺ຑິໍ ກິລາສິຎ຺ຈ, ໂສສິຎ຺ຈ ອປມາຣິກໍ;

ຕຖາ ຣາຊຠຏໍ ໂຈຣໍ, ລິຂິຕໍ ກາຣເຠທກໍ.

໒໔໘໕. ກສາຫຕໍ ນຣຎ຺ເຈວ, ປຸຣິສໍ ລກ຺ຂຓາຫຕໍ;

ອິຓາຍິກຎ຺ຈ ທາສຎ຺ຈ, ປພ຺ພາເຊນ຺ຕສ຺ສ ທຸກ຺ກຏໍ.

໒໔໘໖. ຫຕ຺ຖຈ຺ຉິນ຺ນມຬຈ຺ຉິນ຺ນໍ, ປາທຈ຺ຉິນ຺ນຎ຺ຈ ປຸຄ຺ຄລໍ;

ກຓ຺ຓນາສງ຺ຄຸລິຈ຺ຉິນ຺ນໍ, ກຓ຺ຑຣຈ຺ຉິນ຺ນເມວ ຈ.

໒໔໘໗. ກາຓໍ ກຸຓິຎ຺ຈ ຂຸຊ຺ຊຎ຺ຈ, ວາມນໍ ຜຓຫຕ຺ຖກໍ;

ຂຎ຺ຊໍ ປກ຺ຂຫຕຎ຺ເຈວ, ສີປທິໍ ປາປໂຣຄິນໍ.

໒໔໘໘. ຊຣາຍ ທຸພ຺ພລໍ ອນ຺ຘໍ, ພຘິຣຎ຺ເຈວ ມມ຺ມນໍ;

ປີຐສປ຺ປິໍ ຕຖາ ມູຄໍ, ປພ຺ພາເຊນ຺ຕສ຺ສ ທຸກ຺ກຏໍ.

໒໔໘໙. ອຕິທີໂຆຕິຣສ຺ໂສ ວາ, ອຕິກາໂລປິ ວາ ຕຖາ;

ອຈ຺ໂຈທາໂຕປິ ວາ ມຏ຺ຐ-ຕມ຺ພໂລຫນິທສ຺ສໂນ.

໒໔໙໐. ອຕິຖູໂລ ອຕິກິສ຺ໂສ, ມຫາສີໂສປິ ວາ ຕຖາ;

ອຕິຂຸທ຺ທກສີເສນ, ສຫິເຕນ ຍຸຕ຺ໂຕປິ ວາ.

໒໔໙໑. ກຸຏກຸຏກສີໂສ ວາ, ຕຖາ ສິຂຣສີສໂກ;

ເວຬຸນາຬິສມາເນນ, ສີເສນ ຈ ຍຸໂຕ ນໂຣ.

໒໔໙໒. ກປ຺ປສີໂສປິ ປພ຺ຠາຣ-ສີໂສ ວາ ວຓສີສໂກ;

ຕຖາ ກຓ຺ຓິກເກໂສ ວາ, ຖູລເກໂສປິ ວາ ຕຖາ.

໒໔໙໓. ປູຕິນິລ຺ໂລມສີໂສ ວາ, ຊາຕິປຓ຺ຑຣເກສໂກ;

ຊາຕິຍາ ຕມ຺ພເກໂສ ວາ, ຕເຖວາວຏ຺ຏສີສໂກ.

໒໔໙໔. ສີສໂລເມກພທ຺ເຘຫິ, ຠມຸເກຫິ ຍຸໂຕປິ ວາ;

ສມ຺ພທ຺ຘຠມຸໂກ ວາປິ, ນິລ຺ໂລມຠມຸໂກປິ ວາ.

໒໔໙໕. ມຫນ຺ຕຂຸທ຺ທເນຕ຺ໂຕ ວາ, ຕຖາ ວິສມໂລຈໂນ;

ເກກໂຣ ວາປິ ຄມ຺ຠີຣ-ເນຕ຺ໂຕ ວິສມຈກ຺ກໂລ.

໒໔໙໖. ຊຕຸມູສິກກຓ຺ໂຓ ວາ, ຫຕ຺ຖິກຓ຺ໂຓປິ ວາ ປນ;

ຉິທ຺ທມຕ຺ຕກກຓ຺ໂຓ ວາ, ຕເຖວາວິທ຺ຘກຓ຺ຓໂກ.

໒໔໙໗. ຕຖາ ຏງ຺ກິຕກຓ຺ໂຓ ວາ, ປູຕິກຓ຺ໂຓປິ ວາ ປນ;

ໂຍນກາທິປ຺ປເຠໂທປິ, ນາຍໍ ປຣິສທູສໂກ.

໒໔໙໘. ອຕິປິງ຺ຄລເນຕ຺ໂຕ ວາ, ຕຖາ ນິປ຺ປຂຸມກ຺ຂິ ວາ;

ອສ຺ສຸປຄ຺ຆຣເນຕ຺ໂຕ ວາ, ປກ຺ກປຸປ຺ຜິຕໂລຈໂນ.

໒໔໙໙. ຕເຖວ ຈ ມຫານາໂສ, ອຕິຂຸທ຺ທກນາສິໂກ;

ຕຖາ ຈິປິຏນາໂສ ວາ, ນໂຣ ກຸຏິລນາສິໂກ.

໒໕໐໐. ນິຈ຺ຈວິສ຺ສວນາໂສ ວາ, ໂຍ ວາ ປນ ມຫາມຸໂຂ;

ວງ຺ກຠິນ຺ນມຸໂຂ ວາປິ, ມຫາໂອຏ຺ໂຐປິ ວາ ປນ.

໒໕໐໑. ຕຖາ ຕນຸກໂອຏ຺ໂຐ ວາ, ວິປຸລຸຕ຺ຕຣໂອຏ຺ຐໂກ;

ໂອຏ຺ຐຉິນ຺ໂນປິ ອຸປ຺ປກ຺ກ-ມຸໂຂ ເອຬມຸໂຂປິ ວາ.

໒໕໐໒. ສງ຺ຂຕຸຓ຺ໂຑປິ ທຸຄ຺ຄນ຺ຘ-ມຸໂຂ ວາ ປນ ປຸຄ຺ຄໂລ;

ມຫາທນ຺ໂຕປິ ອຈ຺ຈນ຺ຕໍ, ຕຖາ ອສຸຣທນ຺ຕໂກ.

໒໕໐໓. ເຫຏ຺ຐາ ອຸປຣິໂຕ ວາປິ, ພຫິນິກ຺ຂນ຺ຕທນ຺ຕໂກ;

ອທນ຺ໂຕ ປູຕິທນ຺ໂຕ ວາ, ອຕິຂຸທ຺ທກທນ຺ຕໂກ.

໒໕໐໔. ຍສ຺ສ ທນ຺ຕນ຺ຕເຣ ທນ຺ໂຕ, ກາຬກທນ຺ຕສນ຺ນິໂຠ;

ສຸຂຸໂມວ ຐິໂຕ, ຕໍ ເຈ, ປພ຺ພາເຊຕຸມ຺ປິ ວຏ຺ຏຕິ.

໒໕໐໕. ໂຍ ມຫາຫນຸໂກ ໂປໂສ;

ທີເຆນ ຫນຸນາ ຍຸໂຕ;

ຈິປິຏຫນຸໂກ ວາປິ;

ຣສ຺ເສນ ຫນຸນາ ຍຸໂຕ.

໒໕໐໖. ນິມ຺ມສ຺ສຸທາຐິໂກ ວາປິ, ອຕິທີຆຄໂລປິ ວາ;

ອຕິຣສ຺ສຄໂລປິ ວາ, ຠິນ຺ນຄຓ຺ຐິຄໂລປິ ວາ.

໒໕໐໗. ຕຖາ ຠຏ຺ຐໍສກູໂຏ ວາ, ຠິນ຺ນປິຏ຺ຐິອຸໂຣປິ ວາ;

ສຸທີຆຣສ຺ສຫຕ຺ໂຖ ວາ, ກຈ຺ຉຸກຓ຺ຑຸສມາຍຸໂຕ.

໒໕໐໘. ມຫານິສທມໍໂສ ວາ, ອຸທ຺ຘນຄ຺ຄຸປມາຍຸໂຕ;

ວາຕຓ຺ຑິໂກ ມຫາອູຣຸ, ສງ຺ຆຏ຺ຏນກຊາຓຸໂກ.

໒໕໐໙. ຠິນ຺ນຊາຓຸ ມຫາຊາຓຸ, ທີຆຊງ຺ໂຆ ວິຊງ຺ຆໂກ;

ວິກໂຏ ວາປິ ປຓ຺ໂຫ ວາ, ຕຖາ ອຸພ຺ພທ຺ຘປິຓ຺ຑິໂກ.

໒໕໑໐. ຍຏ຺ຐິຊງ຺ໂຆ ມຫາຊງ຺ໂຆ, ມຫາປາໂທປິ ໂຍ ນໂຣ;

ຕຖາ ປິຏ຺ຐິກປາໂທ ວາ, ມຫາປຓ຺ຫິປິ ວາ ປນ.

໒໕໑໑. ວງ຺ກປາໂທ ນໂຣ ໂຍ ວາ, ຄຓ຺ຐິກງ຺ຄຸລິໂກປິ ວາ;

ໂຍ ປນນ຺ຘນໂຂ ວາປິ, ກາຬປູຕິນໂຂປິ ຈ.

໒໕໑໒. ອິຈ຺ເຈວມາທິກໍ ກຎ຺ຈິ, ນຣໍ ປຣິສທູສກໍ;

ປພ຺ພາເຊນ຺ຕສ຺ສ ຠິກ຺ຂຸສ຺ສ, ໂຫຕິ ອາປຕ຺ຕິ ທຸກ຺ກຏໍ.

ປຣິສທູສກກຖາ.

໒໕໑໓. ‘‘ສາມເຓຣຊ຺ຊ ມາ ຂາທ, ມາ ຠຸຎ຺ຊ ຈ ປິວາ’’ຕິ ຈ;

ນິວາເຣນ຺ຕສ຺ສ ອາຫາຣໍ, ໂຫຕິ ອາປຕ຺ຕິ ທຸກ຺ກຏໍ.