ຈູຬວຄ຺ໂຄ

ປາຣິວາສິກກ຺ຂນ຺ຘກກຖາ

໒໗໔໘. ຕຊ຺ຊນີຍໍ ນິຍສ຺ສຎ຺ຈ, ປພ຺ພາຊໍ ປຏິສາຣຓໍ;

ຕິວິຘຸກ຺ເຂປນຎ຺ຈາຕິ, ສຕ຺ຕ ກມ຺ມານິ ທີປເຍ.

໒໗໔໙. ເຕຈຕ຺ຕາລີສ ວຕ຺ຕານິ, ຂນ຺ຘເກ ກມ຺ມສຎ຺ຎິເຕ;

ນວາຘິການິ ຕິໍເສວ, ຂນ຺ຘເກ ຕທນນ຺ຕເຣ.

໒໗໕໐. ເອວໍ ສພ຺ພານິ ວຕ຺ຕານິ, ທ຺ວາສີເຕວ ມເຫສິນາ;

ໂຫນ຺ຕິ ຂນ຺ຘກວຕ຺ຕານິ, ຄຫິຕາຄຫເຓນ ຕຸ.

໒໗໕໑. ປາຣິວາສຎ຺ຈ ວຕ຺ຕຎ຺ຈ, ສມາທິນ຺ນສ຺ສ ຠິກ຺ຂຸໂນ;

ຣຕ຺ຕິຈ຺ເຉໂທ ກຖໍ ວຸຕ຺ໂຕ, ວຕ຺ຕເຠໂທ ກຖໍ ຠເວ?

໒໗໕໒. ສຫວາໂສ ວິນາວາໂສ, ອນາໂຣຈນເມວ ຈ;

ປາຣິວາສິກຠິກ຺ຂຸສ຺ສ, ຣຕ຺ຕິຈ຺ເຉໂທ ຈ ທຸກ຺ກຏໍ.

໒໗໕໓. ເອກຈ຺ຉນ຺ເນ ປນາວາເສ, ປກຕຕ຺ເຕນ ຠິກ຺ຂຸນາ;

ນິວາໂສ ທກປາເຕນ, ອຸກ຺ຂິຕ຺ຕສ຺ສ ນິວາຣິໂຕ.

໒໗໕໔. ປາຣິວາສິກຠິກ຺ຂຸສ຺ສ, ອນ຺ໂຕເຍວ ນ ລພ຺ຠຕິ;

ອິຈ຺ເຈວໍ ປນ ນິທ຺ທິຏ຺ຐໍ, ມຫາປຈ຺ຈຣິຍໍ ປນ.

໒໗໕໕. ‘‘ອວິເສເສນ ນິທ຺ທິຏ຺ຐໍ, ມຫາອຏ຺ຐກຖາທິສຸ;

ອຸຠິນ຺ນໍ ທກປາເຕນ, ນິວາໂສ ວາຣິໂຕ’’ຕິ ຫິ.

໒໗໕໖. ອຠິກ຺ຂຸເກ ປນາວາເສ, ອນາວາເສປິ ກຕ຺ຖຈິ;

ວິປ຺ປວາສໍ ວສນ຺ຕສ຺ສ, ຣຕ຺ຕິຈ຺ເຉໂທ ຈ ທຸກ຺ກຏໍ.

໒໗໕໗. ປາຣິວາສິກຠິກ຺ຂຸສ຺ສ, ຠິກ຺ຂຸໍ ທິສ຺ວານ ຕງ຺ຂເຓ;

ນາໂຣເຈນ຺ຕສ຺ສ ເຈຕສ຺ສ, ຣຕ຺ຕິຈ຺ເຉໂທ ຈ ທຸກ຺ກຏໍ.

໒໗໕໘. ປຎ຺ເຈວ ຈ ຍຖາວຸຑ຺ຒໍ, ລຠເຕ ປາຣິວາສິໂກ;

ກາຕຸໍ ຕຕ຺ເຖວ ຈ ຐຕ຺ວາ, ອຸໂປສຖປວາຣຓໍ.

໒໗໕໙. ວສ຺ສສາຏິໍ ຍຖາວຸຑ຺ຒໍ, ເທນ຺ຕິ ເຈ ສງ຺ຆທາຍກາ;

ໂອໂຓຊນໍ ຕຖາ ຠຕ຺ຕໍ, ລຠເຕ ປຎ຺ຈິເມ ປນ.

ປາຣິວາສິກກ຺ຂນ຺ຘກກຖາ.

ສມຖກ຺ຂນ຺ຘກກຖາ

໒໗໖໐. ວິວາທາຘາຣຕາ ຈານຸ-ວາທາຘິກຣຓມ຺ປິ ຈ;

ອາປຕ຺ຕາຘາຣຕາ ເຈວ, ກິຈ຺ຈາຘິກຣຓມ຺ປິ ຈ.

໒໗໖໑. ເອຕານິ ປນ ຈຕ຺ຕາຣິ, ວຸຕ຺ຕານິ ຈ ມເຫສິນາ;

ເຠທກາຣກວຕ຺ຖູນິ, ວິວາໂທ ຕຕ຺ຖ ນິສ຺ສິໂຕ.

໒໗໖໒. ວິປຕ຺ຕິໂຍ ຈຕສ຺ໂສວ, ອນຸວາໂທ ອຸປາຄໂຕ;

ອາປຕ຺ຕາຘາຣຕາ ນາມ, ສຕ຺ຕ ອາປຕ຺ຕິໂຍ ມຕາ.

໒໗໖໓. ສງ຺ຆກິຈ຺ຈານິ ນິສ຺ສາຍ, ກິຈ຺ຈາຘິກຣຓໍ ສິຍາ;

ເອເຕສໍ ຕຸ ຈຕຸນ຺ນມ຺ປິ, ສມຕ຺ຕາ ສມຖາ ມຕາ.

໒໗໖໔. ສມ຺ມຸຂາ ສຕິ ຈາມູຬ຺ໂຫ, ປຏິຎ຺ຎາວິນໂຍປິ ຈ;

ຕສ຺ສປາປິຍສີ ເຈວ, ຕຖາ ເຍຠຸຍ຺ຍສີປິ ຈ.

໒໗໖໕. ຕິຓວຕ຺ຖາຣໂກ ເຈວ, ສຕ຺ຕໂມ ວິນໂຍ ມໂຕ;

ສຕ຺ຕິເມ ສມຖາ ວຸຕ຺ຕາ, ພຸທ຺ເຘນາທິຈ຺ຈພນ຺ຘຸນາ.

໒໗໖໖. ວິວາໂທ ສມ຺ມຕິ ທ຺ວີຫິ, ອນຸວາໂທ ຈຕູຫິ ຈ;

ອາປຕ຺ຕິ ປນ ຕີເຫວ, ກິຈ຺ຈເມເກນ ສມ຺ມຕິ.

໒໗໖໗. ຉຏ຺ເຐນ ປຐເມນາປິ, ວິວາໂທ ເອຕ຺ຖ ສມ຺ມຕິ;

ສມ຺ມຸຂາວິນຍາທີຫິ, ອນຸປຸພ຺ເພນ ຕີຫິປິ.

໒໗໖໘. ຕເຖວ ປຎ຺ຈເມນາປິ, ອນຸວາໂທ ຫິ ສມ຺ມຕິ;

ສມ຺ມຸເຂນ ປຏິຎ຺ຎາຍ, ຕິຓວຕ຺ຖາຣເກນ ຈ.

໒໗໖໙. ອາປຕ຺ຕູປສມໍ ຍາຕິ, ຕີເຫວ ສມເຖຫິ ສາ;

ສມ຺ມຸຂາວິນເຍເນວ, ກິຈ຺ຈເມເກນ ສມ຺ມຕິ.

໒໗໗໐. ເຍຠຸຍ຺ຍສິກກມ຺ເມ ຕຸ, ສລາກໍ ຄາຫເຍ ພຸໂຘ;

ຄູຬ຺ເຫນ ວິວເຏນາປິ, ກຓ຺ຓຊປ຺ເປນ ວາ ປນ.

໒໗໗໑. ອລຊ຺ຊຸສ຺ສເທ ຄູຬ຺ເຫນ, ວິວເຏເນວ ລຊ຺ຊິສຸ;

ພາເລສຸ ກຓ຺ຓຊປ຺ເປນ, ສລາກໍ ຄາຫເຍ ພຸໂຘ.

໒໗໗໒. ລຊ຺ຊີ ອລຊ຺ຊີ ພາໂລຕິ, ເກນ ສກ຺ກາ ວິຊານິຕຸໍ?

ສເກນ ກມ຺ມຸນາເຍວ, ເຕນ ສກ຺ກາ ວິຊານິຕຸໍ.

໒໗໗໓. ອາປຊ຺ຊຕິ ຈ ສຎ຺ຈິຈ຺ຈ, ອາປຕ຺ຕິໍ ປຣິຄູຫຕິ;

ຉນ຺ທາທິອຄຕິໍ ຍາຕິ, ອລຊ຺ຊີ ເອທິໂສ ສິຍາ.

໒໗໗໔. ນາປຊ຺ຊຕິ ຈ ສຎ຺ຈິຈ຺ຈ, ອາປຕ຺ຕິໍ ນ ຈ ຄູຫຕິ;

ນ ຄຈ຺ຉຕິຄຕິຎ຺ຈາປິ, ເອທິໂສ ລຊ຺ຊິ ປຸຄ຺ຄໂລ.

໒໗໗໕. ທຸຈ຺ຈິນ຺ຕິໂຕ ຈ ທຸພ຺ຠາສີ, ຕຖາ ທຸກ຺ກຏກາຣິໂກ;

ເອທິໂສ ປນ ‘‘ພາໂລ’’ຕິ, ລກ຺ຂເຓເນວ ຎາຍຕິ.

໒໗໗໖. ຕິຘາ ສລາກຄາເຫນ, ພຫຸກາ ຘມ຺ມວາທິໂນ;

ເຍຠຸຍ຺ຍສິກກມ຺ເມນ, ກຕ຺ຕພ຺ພນ຺ຕິ ຊິໂນພ຺ຣວິ.

໒໗໗໗. ອລຊ຺ຊີ ສານຸວາໂທ ຈ, ອສຸຈີ ກມ຺ມໂຕ ຈ ໂຍ;

ຕສ຺ສປາປິຍສີກມ຺ມ-ໂຍຄ຺ໂຄ ໂສ ໂຫຕິ ປຸຄ຺ຄໂລ.

໒໗໗໘. ຠຓ຺ຑເນ ກລເຫ ຊາເຕ, ວິວາທສ຺ມິໍ ອນປ຺ປເກ;

ພຫຸອສ຺ສາມເຓ ຈິຓ຺ເຓ, ອນຄ຺ເຄປິ ຈ ຠສ຺ສເກ.

໒໗໗໙. ມູລມູລໍ ຄເວສນ຺ຕໍ, ໂຫຕິ ວາຬຎ຺ຈ ກກ຺ຂຬໍ;

ຕິຓວຕ຺ຖາຣເກເນວ, ກາຕພ຺ພນ຺ຕິ ປກາສິຕໍ.

໒໗໘໐. ຍຖາ ຈ ຕິຓປຓ຺ເຓນ, ຉນ຺ນໍ ຄູຖຎ຺ຈ ມຸຕ຺ຕກໍ;

ນ ຈ ວາຍຕິ ທຸຄ຺ຄນ຺ຘໍ, ວູປສມ຺ມຕິ ຕງ຺ຂເຓ.

໒໗໘໑. ຐເປຕ຺ວາ ຖຸລ຺ລວຊ຺ຊຎ຺ຈ, ຄິຫີຫິ ປຏິສໍຍຸຕໍ;

ທິຏ຺ຐາວິກມ຺ມິກຎ຺ເຈວ, ໂຍ ຈ ຕຕ຺ຖ ນ ໂຫຕິ ຕໍ.

໒໗໘໒. ເສສາຍາປຕ຺ຕິຍາ ຍາວ, ອຸປສມ຺ປທມາຬໂຕ;

ສຸທ຺ໂຘ ໂຫຕິ ນິຣາປຕ຺ຕິ, ຕິຓວຕ຺ຖາຣເກ ຕຖາ.

ສມຖກ຺ຂນ຺ຘກກຖາ.

ຂຸທ຺ທກວຕ຺ຖຸກ຺ຂນ຺ຘກກຖາ

໒໗໘໓. ຣຸກ຺ເຂ ວາ ປນ ກຸຏ຺ເຏວາ, ອຏ຺ຏາເນ ຖມ຺ຠເກສຸ ວາ;

ນ຺ຫາຍມາໂນ ສກໍ ກາຍໍ, ອຸຄ຺ຆໍເສຍ຺ຍສ຺ສ ທຸກ຺ກຏໍ.

໒໗໘໔. ກາຍໍ ຄນ຺ຘພ຺ພຫຕ຺ເຖນ, ກຸຣຸວິນ຺ທກສຸຕ຺ຕິຍາ;

ມລ຺ລເກນ ນ ຆໍເສຍ຺ຍ, ນາຎ຺ຎມຎ຺ຎຎ຺ຈ ກາຍໂຕ.

໒໗໘໕. ອກຕໍ ມລ຺ລກໍ ນາມ, ຄິລານສ຺ເສວ ວຏ຺ຏຕິ;

ກຕໍ ຕໍ ມລ຺ລກໍ ນາມ, ສພ຺ເພສມ຺ປິ ນ ວຏ຺ຏຕິ.

໒໗໘໖. ກປາລິຏ຺ຐກຂຓ຺ຑານິ, ສພ຺ພສ຺ສ ປຸຖຸປາຓິກໍ;

ຄິລານສ຺ສາຄິລານສ຺ສ, ວຕ຺ຖວຏ຺ຏິ ຈ ວຏ຺ຏຕິ.

໒໗໘໗. ວຸຕ຺ຕາ ເຜຓກປາສາຓ-ກຖລາ ປາທຆໍສເນ;

ວຏ຺ຏໍ ວາ ຈຕຸຣສ຺ສໍ ວາ, ກຕກໍ ນ ຈ ວຏ຺ຏຕິ.

໒໗໘໘. ຍໍ ກິຎ຺ຈິປິ ອລງ຺ກາຣໍ, ຘາເຣນ຺ຕສ຺ສປິ ທຸກ຺ກຏໍ;

ໂຫຕິ ອນ຺ຕມໂສ ຕາລ-ປຓ຺ຓມຕ຺ຕມ຺ປິ ຠິກ຺ຂຸໂນ.

໒໗໘໙. ໂອສຓ຺ເຫຍ຺ຍ ສເກ ເກເສ, ໂຍ ຫຕ຺ຖຜຓເກນ ວາ;

ຜຓເກນປິ ໂກຈ຺ເຉນ, ທຸກ຺ກຏໍ ຕສ຺ສ ນິທ຺ທິເສ.

໒໗໙໐. ສິຕ຺ຖເຕໂລທເຕເລຫິ, ມຓ຺ຑນຕ຺ຖໍ ນ ວຏ຺ຏຕິ;

ອນຸໂລມນິປາຕຕ຺ຖໍ, ອຸທ຺ຘໍໂລເມນ ຠິກ຺ຂຸນາ.

໒໗໙໑. ຫຕ຺ຖໍ ເຕເລນ ເຕເມຕ຺ວາ, ປຸຎ຺ຉິຕພ຺ພາ ສິໂຣຣຸຫາ;

ວຏ຺ຏຕຸຓ຺ຫາຠິຕຕ຺ຕສ຺ສ, ອລ຺ລຫຕ຺ເຖນ ປຸຎ຺ຉິຕຸໍ.

໒໗໙໒. ອາທາເສ ອຸທປຕ຺ເຕ ວາ, ຍຕ຺ຖ ກຕ຺ຖຈິ ອຕ຺ຕໂນ;

ມຸຂພິມ຺ພໍ ວິນາ ເຫຕຸໍ, ໂອໂລເກນ຺ຕສ຺ສ ທຸກ຺ກຏໍ.

໒໗໙໓. ‘‘ສຎ຺ຉວິໍ ຕຸ ມຸຂໍ, ໂນ’’ຕິ, ທຏ຺ຐຸມາພາຘປຈ຺ຈຍາ;

‘‘ຊິຓ຺ໂຓ ໂນ’’ຕາຍຸສງ຺ຂາຣ-ຊານນຕ຺ຖຎ຺ຈ ວຏ຺ຏຕິ.

໒໗໙໔. ນຈ຺ຈໍ ວາ ປນ ຄີຕໍ ວາ, ວາທິຕໍ ວາປິ ຠິກ຺ຂຸໂນ;

ທຏ຺ຐຸໍ ວາ ປນ ໂສຕຸໍ ວາ, ຄຈ຺ຉໂຕ ໂຫຕິ ທຸກ຺ກຏໍ.

໒໗໙໕. ທຏ຺ຐຸມນ຺ຕມໂສ ໂມຣ-ນຈ຺ຈມ຺ປິ ຈ ນ ວຏ຺ຏຕິ;

ໂສຕຸມນ຺ຕມໂສ ທນ຺ຕ-ຄີຕມ຺ປິ ຈ ນ ວຏ຺ຏຕິ.

໒໗໙໖. ນຈ຺ຈນ຺ຕສ຺ສ ສຍໍ ວາປິ, ນຈ຺ຈາເປນ຺ຕສ຺ສ ທຸກ຺ກຏໍ;

ອນາປຕ຺ຕນ຺ຕຣາຣາເມ, ຐຕ຺ວາ ສຸຓາຕິ ປສ຺ສຕິ.

໒໗໙໗. ‘‘ປສ຺ສິສ຺ສາມີ’’ຕິ ນຈ຺ຈໍ ວາ, ຄີຕໍ ວາ ປນ ວາທິຕໍ;

ວິຫາຣໂຕ ວິຫາຣໍ ວາ, ຄຈ຺ຉໂຕ ໂຫຕິ ທຸກ຺ກຏໍ.

໒໗໙໘. ອາປຕ຺ຕນ຺ໂຕວິຫາເຣປິ, ອຸຏ຺ຐຫິຕ຺ວານ ຄຈ຺ຉໂຕ;

ຐຕ຺ວາ ຄີວໍ ປສາເຣຕ຺ວາ, ປສ຺ສໂຕປິ ຈ ວີຖິຍໍ.

໒໗໙໙. ເກສາ ທີຆາ ນ ຘາເຣຍ຺ຍາ, ໂຍ ຘາເຣຍ຺ຍສ຺ສ ທຸກ຺ກຏໍ;

ທ຺ວງ຺ຄຸລໍ ວາ ທຸມາສໍ ວາ, ຕໂຕ ອຸທ຺ຘໍ ນ ວຏ຺ຏຕິ.

໒໘໐໐. ນເຂ ນາສິກໂລມານິ, ທີຆານິ ນ ຕຸ ຘາຣເຍ;

ນ ຈ ວີສຕິມຏ຺ຐໍ ວາ, ກາຕຸໍ ວຏ຺ຏຕິ ຠິກ຺ຂຸໂນ.

໒໘໐໑. ກປ຺ປາເປຍ຺ຍ ວິສຸໍ ມສ຺ສຸໍ, ທາຐິກໍ ວາ ຐເປຍ຺ຍ ໂຍ;

ສໍຫຣາເປຍ຺ຍ ວາ ໂລມໍ, ສມ຺ພາເຘ ຕສ຺ສ ທຸກ຺ກຏໍ.

໒໘໐໒. ຉິນ຺ທໂຕ ທຸກ຺ກຏໍ ວຸຕ຺ຕໍ, ເກເສ ກຕ຺ຕຣິກາຍ ວາ;

ອຄິລານສ຺ສ ອຎ຺ເຎນ, ຉິນ຺ທາເປນ຺ຕສ຺ສ ວາ ຕຖາ.

໒໘໐໓. ຉິນ຺ທໂຕ ອຕ຺ຕໂນ ອງ຺ຄ-ຊາຕໍ ຖຸລ຺ລຈ຺ຈຍໍ ສິຍາ;

ເສສງ຺ຄເຉທເນ ອຕ຺ຕ-ວເຘ ອາປຕ຺ຕິ ທຸກ຺ກຏໍ.

໒໘໐໔. ອຫິກີຏາທິທຏ຺ຐສ຺ສ, ຕາທິສາພາຘປຈ຺ຈຍາ;

ນ ໂທໂສ ຉິນ຺ທໂຕ ອງ຺ຄໍ, ໂມເຈນ຺ຕສ຺ສ ຈ ໂລຫິຕໍ.

໒໘໐໕. ອປຣິສ຺ສາວໂນ ມຄ຺ຄໍ, ສເຈ ຄຈ຺ຉຕິ ທຸກ຺ກຏໍ;

ຍາຈມານສ຺ສ ວາ ມຄ຺ເຄ, ຕເຖວາທທໂຕປິ ຕໍ.

໒໘໐໖. ນ ຠຸຎ຺ເຊ ນ ປິເວ ນຄ຺ໂຄ, ນ ຂາເທ ນ ຈ ສາຍເຍ;

ນ ທເທ ນ ຈ ຄຓ຺ເຫຍ຺ຍ, ນ ຄຈ຺ເຉຍ຺ຍປິ ອຎ຺ຊສໍ.

໒໘໐໗. ວນ຺ທິຕພ຺ພໍ ນ ນຄ຺ເຄນ, ວນ຺ທາເປຕພ຺ພເມວ ວາ;

ປຣິກມ຺ມໍ ນ ກາຕພ຺ພໍ, ນ ນຄ຺ເຄນ ຈ ກາຣເຍ.

໒໘໐໘. ປຣິກມ຺ເມ ປຏິຈ຺ຉາທີ, ຕິສ຺ໂສ ຊນ຺ຕາຆຣາທິກາ;

ວຸຕ຺ຕາ, ວຕ຺ຖປຏິຈ຺ຉາທີ, ສພ຺ພຕ຺ຖ ປນ ວຏ຺ຏຕິ.

໒໘໐໙. ຍຕ຺ຖ ກຕ຺ຖຈິ ເປຬາຍໍ, ຠຸຎ຺ຊິຕຸໍ ນ ຈ ວຏ຺ຏຕິ;

ເອກໂຕ ຠຸຎ຺ຊໂຕ ໂຫຕິ, ທຸກ຺ກຏໍ ເອກຠາຊເນ.

໒໘໑໐. ເອກປາວຸຣຓາ ເອກ-ຕ຺ຖຣຓາ ວາ ນິປຊ຺ຊເຣ;

ເອກມຎ຺ເຈປິ ວາ ເຕສໍ, ໂຫຕິ ອາປຕ຺ຕິ ທຸກ຺ກຏໍ.

໒໘໑໑. ນ ນິສີເທຍ຺ຍ ສງ຺ຆາຏິ-ປລ຺ລຕ຺ຖິກມຸປາຄໂຕ;

ກິຎ຺ຈິ ກີຬໍ ນ ກີເຬຍ຺ຍ, ປລິຕໍ ນ ຈ ຄາຫເຍ.

໒໘໑໒. ຠມຸກາຍ ນລາເຏ ວາ, ທາຐິກາຍປິ ອຸຄ຺ຄຕໍ;

ຕາທິສໍ ປລິຕໍ ຈຎ຺ຎໍ, ຄາຫາເປຕຸມ຺ປິ ວຏ຺ຏຕິ.

໒໘໑໓. ອຄິລາໂນ ສເຈ ຠິກ຺ຂຸ, ຉຕ຺ຕໍ ຘາເຣຍ຺ຍ ທຸກ຺ກຏໍ;

ອຕ຺ຕໂນ ຈີວຣາທີນໍ, ຄຸຕ຺ຕຕ຺ຖໍ ປນ ວຏ຺ຏຕິ.

໒໘໑໔. ຫຕ຺ຖິໂສຓ຺ຑໍ ຈຕຸກ຺ກຓ຺ຓໍ, ວສນໍ ມຈ຺ຉວາຬກໍ;

ເວລ຺ລິຍໍ ຕາລວຓ຺ຏຎ຺ຈ, ນິວາເສນ຺ຕສ຺ສ ທຸກ຺ກຏໍ.

໒໘໑໕. ຄຫິປາຣຸປນໍ ວາປິ, ປາຣຸປນ຺ຕສ຺ສ ທຸກ຺ກຏໍ;

ນິວາສເນ ປາຣຸປເນ, ປຣິມຓ຺ຑລຕາ ມຕາ.

໒໘໑໖. ໂລກາຍຕໍ ນ ວາເຈຍ຺ຍ, ນ ຈ ຕໍ ປຣິຍາປຸເຓ;

ນ ຕິຣຈ຺ຉານວິຊ຺ຊາ ວາ, ວາເຈຕພ຺ພາວ ຠິກ຺ຂຸນາ.

໒໘໑໗. ນ ຈ ວຏ຺ຏຕິ ຘາເຣຕຸໍ, ສພ຺ພາ ຈາມຣິພີຊນີ;

ນ ຈາລິມ຺ເປຍ຺ຍ ທາຍໍ ວາ, ນ ຈ ລຎ຺ເຊ ມຸຂມ຺ປິ ຈ.

໒໘໑໘. ນ ວເຫ ອຸຠໂຕກາຊໍ, ວຏ຺ຏຕນ຺ຕຣກາຊກໍ;

ສີສກ຺ຂນ຺ຘກໂຏລມ຺ພ-ຠາເຣ ໂທໂສ ນ ວິຊ຺ຊຕິ.

໒໘໑໙. ອຏ຺ຐງ຺ຄຸລາທິກໍ ຠິກ຺ຂຸ, ປຈ຺ຉິມໍ ຈຕຸຣງ຺ຄຸລາ;

ຂາທໂຕ ທນ຺ຕກຏ຺ຐຎ຺ຈ, ໂຫຕິ ອາປຕ຺ຕິ ທຸກ຺ກຏໍ.