ປາຏິເທສນີຍກຖາ

໑໘໓໐. ໂຍ ຈນ຺ຕຣຆຣໍ ຠິກ຺ຂຸ, ປວິຏ຺ຐາຍ ຕຸ ຫຕ຺ຖໂຕ;

ອຎ຺ຎາຕິກາຍ ຍໍ ກິຎ຺ຈິ, ຕສ຺ສ ຠິກ຺ຂຸນິຍາ ປນ.

໑໘໓໑. ສຫຕ຺ຖາ ປຏິຄ຺ຄຓ຺ເຫຍ຺ຍ, ຂາທນໍ ໂຠຊນມ຺ປິ ວາ;

ຄຫເຓ ທຸກ຺ກຏໍ ໂຠເຄ, ປາຏິເທສນິຍໍ ສິຍາ.

໑໘໓໒. ຣຖິກາຍປິ ວາ ພ຺ຍູເຫ, ສນ຺ຘິສິງ຺ຆາຏເກສຸ ວາ;

ຫຕ຺ຖິສາລາທິເກ ຐຕ຺ວາ, ຄຓ຺ຫໂຕປິ ອຍໍ ນໂຍ.

໑໘໓໓. ຣຖິກາຍ ສເຈ ຐຕ຺ວາ, ເທຕິ ຠິກ຺ຂຸນິ ໂຠຊນໍ;

ອາປຕ຺ຕິ ອນ຺ຕຣາຣາເມ, ຐຕ຺ວາ ຄຓ຺ຫາຕິ ຠິກ຺ຂຸ ເຈ.

໑໘໓໔. ເອຕ຺ຖນ຺ຕຣຆຣໍ ຕສ຺ສາ, ປວິຏ຺ຐາຍ ຫິ ວາກ຺ຍໂຕ;

ຠິກ຺ຂຸສ຺ສ ຈ ຐິຕຏ຺ຐານໍ, ນປ຺ປມາຓນ຺ຕິ ວຓ຺ຓິຕໍ.

໑໘໓໕. ຕສ຺ມາ ຠິກ຺ຂຸນິຍາ ຐຕ຺ວາ, ອາຣາມາທີສຸ ເທນ຺ຕິຍາ;

ວີຖິຍາທີສຸ ເຈ ຐຕ຺ວາ, ນ ໂທໂສ ປຏິຄຓ຺ຫໂຕ.

໑໘໓໖. ຍາມກາລິກສຕ຺ຕາຫ-ກາລິກໍ ຍາວຊີວິກໍ;

ອາຫາຣຕ຺ຖາຍ ຄຫເຓ, ອຊ຺ໂຌຫາເຣ ຈ ທຸກ຺ກຏໍ.

໑໘໓໗. ອາມິເສນ ອສມ຺ຠິນ຺ນ-ຣສໍ ສນ຺ຘາຍ ຠາສິຕໍ;

ປາຏິເທສນິຍາປຕ຺ຕິ, ສມ຺ຠິນ຺ເນກຣເສ ສິຍາ.

໑໘໓໘. ເອກໂຕອຸປສມ຺ປນ຺ນ-ຫຕ຺ຖໂຕ ປຏິຄຓ຺ຫໂຕ;

ກາລິການໍ ຈຕຸນ຺ນມ຺ປິ, ອາຫາຣຕ຺ຖາຍ ທຸກ຺ກຏໍ.

໑໘໓໙. ຎາຕິກາຍປິ ອຎ຺ຎາຕິ-ສຎ຺ຎິໂນ ວິມຕິສ຺ສ ວາ;

ທຸກ຺ກຏໍ ຎາຕິສຎ຺ຎິສ຺ສ, ຕຖາ ອຎ຺ຎາຕິກາຍ ວາ.

໑໘໔໐. ທາເປນ຺ຕິຍາ ອນາປຕ຺ຕິ, ທທມານາຍ ວາ ປນ;

ນິກ຺ຂິປິຕ຺ວານ຺ຕຣາຣາມາ-ທີສຸ ຐຕ຺ວາປິ ເທນ຺ຕິຍາ.

໑໘໔໑. ຄາມໂຕ ນີຫຣິຕ຺ວາ ວາ, ເທຕິ ເຈ ພຫິ ວຏ຺ຏຕິ;

‘‘ປຈ຺ຈເຍ ສຕິ ຠຸຎ຺ຊາ’’ຕິ, ເທຕິ ເຈ ກາລິກຕ຺ຕຍໍ.

໑໘໔໒. ຫຕ຺ຖໂຕ ສາມເຓຣີນໍ, ສິກ຺ຂມານາຍ ວາ ຕຖາ;

ອິທໍ ເອຬກໂລເມນ, ສມຸຏ຺ຐານໍ ສມໍ ມຕໍ.

ປຐມປາຏິເທສນີຍກຖາ.

໑໘໔໓. ອວຸຕ຺ເຕ ‘‘ອປສກ຺ກາ’’ຕິ, ເອເກນາປິ ຈ ຠິກ຺ຂຸນາ;

ສເຈຊ຺ໂຌຫຣຓຕ຺ຖາຍ, ອາມິສໍ ປຏິຄຓ຺ຫຕິ.

໑໘໔໔. ຄຫເຓ ທຸກ຺ກຏໍ ໂຠເຄ, ປາຏິເທສນິຍໍ ສິຍາ;

ເອກໂຕອຸປສມ຺ປນ຺ນໍ, ນ ວາເຣນ຺ຕສ຺ສ ທຸກ຺ກຏໍ.

໑໘໔໕. ຕເຖວານຸປສມ຺ປນ຺ນາ-ຍຸປສມ຺ປນ຺ນສຎ຺ຎິໂນ;

ຕຕ຺ຖ ເວມຕິກສ຺ສາປິ, ໂຫຕິ ອາປຕ຺ຕິ ທຸກ຺ກຏໍ.

໑໘໔໖. ອນາປຕ຺ຕິຕ຺ຕໂນ ຠຕ຺ຕໍ, ປທາເປຕິ ນ ເທຕິ ເຈ;

ຕຖາ ອຎ຺ຎສ຺ສ ຠຕ຺ຕໍ ວາ, ນ ທາເປຕິ ປເທຕິ ເຈ.

໑໘໔໗. ຍໍ ນ ທິນ຺ນໍ ຕໍ ທາເປຕິ, ນ ທິນ຺ນໍ ຍຕ຺ຖ ວາປິ ຈ;

ຕຕ຺ຖ ຕມ຺ປິ ຈ ສພ຺ເພສໍ, ສມໍ ທາເປຕິ ຠິກ຺ຂຸນີ.

໑໘໔໘. ໂວສາສນ຺ຕີ ຐິຕາ ສິກ຺ຂ-ມານາ ວາ ສາມເຓຣິກາ;

ໂຠຊນານິ ຈ ປຎ຺ເຈວ, ວິນາ, ອຸມ຺ມຕ຺ຕກາທິໂນ.

໑໘໔໙. ກຖິເນນ ສມຸຏ຺ຐານໍ, ສມານນ຺ຕິ ປກາສິຕໍ;

ກ຺ຣິຍາກ຺ຣິຍມິທໍ ວຸຕ຺ຕໍ, ຕິຈິຕ຺ຕຎ຺ຈ ຕິເວທນໍ.

ທຸຕິຍປາຏິເທສນີຍກຖາ.

໑໘໕໐. ເສກ຺ຂນ຺ຕິ ສມ຺ມເຕ ຠິກ຺ຂຸ, ລທ຺ຘສມ຺ມຸຕິເກ ກຸເລ;

ຆຣູປຈາໂຣກ຺ກມນາ, ປຸພ຺ເພວ ອນິມນ຺ຕິໂຕ.

໑໘໕໑. ອຄິລາໂນ ຄເຫຕ຺ວາ ເຈ, ປຣິຠຸຎ຺ເຊຍ຺ຍ ອາມິສໍ;

ຄຫເຓ ທຸກ຺ກຏໍ ໂຠເຄ, ປາຏິເທສນິຍໍ ສິຍາ.

໑໘໕໒. ຍາມກາລິກສຕ຺ຕາຫ-ກາລິເກ ຍາວຊີວິເກ;

ຄຫເຓ ປຣິໂຠເຄ ຈ, ໂຫຕິ ອາປຕ຺ຕິ ທຸກ຺ກຏໍ.

໑໘໕໓. ອເສກ຺ຂສມ຺ມເຕ ເສກ຺ຂ-ສມ຺ມຕນ຺ຕິ ຈ ສຎ຺ຎິໂນ;

ຕຕ຺ຖ ເວມຕິກສ຺ສາປິ, ຕເຖວ ປຣິທີປິຕໍ.

໑໘໕໔. ອນາປຕ຺ຕິ ຄິລານສ຺ສ, ຄິລານສ຺ສາວເສສເກ;

ນິມນ຺ຕິຕສ຺ສ ວາ ຠິກ຺ຂາ, ອຎ຺ເຎສໍ ຕຕ຺ຖ ທີຍຕິ.

໑໘໕໕. ຆຣໂຕ ນີຫຣິຕ຺ວາ ວາ, ເທນ຺ຕິ ເຈ ຍຕ຺ຖ ກຕ຺ຖຈິ;

ນິຈ຺ຈຠຕ຺ຕາທິເກ ວາປິ, ຕຖາ ອຸມ຺ມຕ຺ຕກາທິໂນ.

໑໘໕໖. ອນາຄເຕ ຫິ ຠິກ຺ຂຸມ຺ຫິ, ຆຣໂຕ ປຐມໍ ປນ;

ນີຫຣິຕ຺ວາ ສເຈ ທ຺ວາເຣ, ສມ຺ປຕ຺ເຕ ເທນ຺ຕິ ວຏ຺ຏຕິ.

໑໘໕໗. ຠິກ຺ຂຸໍ ປນ ຈ ທິສ຺ວາວ, ນີຫຣິຕ຺ວານ ເຄຫໂຕ;

ນ ວຏ຺ຏຕິ ສເຈ ເທນ຺ຕິ, ສມຸຏ຺ຐາເນຬກູປມໍ.

ຕຕິຍປາຏິເທສນີຍກຖາ.

໑໘໕໘. ຄຫຏ຺ເຐນາຄຫຏ຺ເຐນ, ອິຕ຺ຖິຍາ ປຸຣິເສນ ວາ;

ອາຣາມໍ ອຸປຈາຣໍ ວາ, ປວິສິຕ຺ວາ ສເຈ ປນ.

໑໘໕໙. ‘‘ອິຕ຺ຖນ຺ນາມສ຺ສ ເຕ ຠຕ຺ຕໍ, ຍາຄຸ ວາ ອາຫຣີຍຕິ’’;

ເອວມາໂຣຈິຕໍ ວຸຕ຺ຕໍ, ປຏິສໍວິທິຕນ຺ຕິ ຫິ.

໑໘໖໐. ອາຫຣີຍຕຸ ຕໍ ປຈ຺ຉາ, ຍຖາໂຣຈິຕເມວ ວາ;

ຕສ຺ສ ວາ ປຣິວາຣມ຺ປິ, ອຎ຺ຎໍ ກຕ຺ວາ ພຫຸໍ ປນ.

໑໘໖໑. ຍາຄຸຍາ ວິທິຕໍ ກຕ຺ວາ, ປູວໍ ຠຕ຺ຕໍ ຫຣນ຺ຕິ ເຈ;

ອິທມ຺ປິ ວິທິຕໍ ວຸຕ຺ຕໍ, ວຏ຺ຏຕີຕິ ກຸຣຸນ຺ທິຍໍ.

໑໘໖໒. ກຸລານິ ປນ ອຎ຺ຎານິ, ເທຍ຺ຍຘມ຺ມໍ ປນຕ຺ຕໂນ;

ຫຣນ຺ຕິ ເຕນ ສທ຺ຘິໍ ເຈ, ສພ຺ພໍ ວຏ຺ຏຕິ ຕມ຺ປິ ຈ.

໑໘໖໓. ອນາໂຣຈິຕເມວໍ ຍໍ, ຍໍ ອາຣາມມນາຠຕໍ;

ຕໍ ອສໍວິທິຕໍ ນາມ, ສຫຘມ຺ມິກຎາປິຕໍ.

໑໘໖໔. ຍໍ ອສໍວິທິຕໍ ກຕ຺ວາ, ອາຠຕໍ ປນ ຕໍ ພຫິ;

ອາຣາມໍ ປນ ເປເສຕ຺ວາ, ກາຣາເປຕ຺ວາ ຕມາຫເຣ.

໑໘໖໕. ຄນ຺ຕ຺ວາ ວາ ອນ຺ຕຣາມຄ຺ເຄ, ຄເຫຕພ຺ພໍ ຕຸ ຠິກ຺ຂຸນາ;

ສເຈ ເອວມກຕ຺ວາ ຕໍ, ອາຣາເມ ອຸປຈາຣໂຕ.

໑໘໖໖. ຄເຫຕ຺ວາຊ຺ໂຌຫຣນ຺ຕສ຺ສ, ຄຫເຓ ທຸກ຺ກຏໍ ສິຍາ;

ອຊ຺ໂຌຫາຣປໂຍເຄສຸ, ປາຏິເທສນິຍໍ ມຕໍ.

໑໘໖໗. ປຏິສໍວິທິເຕເຍວ, ອສໍວິທິຕສຎ຺ຎິໂນ;

ຕຕ຺ຖ ເວມຕິກສ຺ສາປິ, ໂຫຕິ ອາປຕ຺ຕິ ທຸກ຺ກຏໍ.

໑໘໖໘. ປຏິສໍວິທິເຕ ຕສ຺ສ, ຄິລານສ຺ສາວເສສເກ;

ພຫາຣາເມ ຄເຫຕ຺ວາ ວາ, ອນ຺ໂຕເຍວສ຺ສ ຠຸຎ຺ຊໂຕ.

໑໘໖໙. ຕຕ຺ຖຊາຕຜລາທີນິ, ອນາປຕ຺ເຕວ ຂາທໂຕ;

ສມຸຏ຺ຐານາທໂຍ ສພ຺ເພ, ກຖິເນນ ສມາ ມຕາ.

ຈຕຸຕ຺ຖປາຏິເທສນີຍກຖາ.

ອິຕິ ວິນຍວິນິຈ຺ຉເຍ ປາຏິເທສນີຍກຖາ ນິຏ຺ຐິຕາ.