ປາຈິຕ຺ຕິຍກຖາ

໘໘໙. ສມ຺ປຊານມຸສາວາເທ, ປາຈິຕ຺ຕິຍມຸທີຣິຕໍ;

ທວາ ຣວາ ຠຓນ຺ຕສ຺ສ, ນ ໂທສຸມ຺ມຕ຺ຕກາທິໂນ.

໘໙໐. ອຎ຺ຎຕ຺ຖາປຕ຺ຕິໂຍ ປຎ຺ຈ, ມຸສາວາທສ຺ສ ກາຣຓາ;

ສມຸຏ຺ຐານາທໂຍ ສພ຺ເພ, ອທິນ຺ນາທານຕຸລ຺ຍກາ.

ສມ຺ປຊານມຸສາວາທກຖາ.

໘໙໑. ຊາຕິອາທີສຸ ວຸຕ຺ເຕສຸ, ທສສ຺ວກ຺ໂກສວຕ຺ຖຸສຸ;

ຠູເຕນ ວາ ອຠູເຕນ, ເຍນ ເກນຈິ ວຕ຺ຖຸນາ.

໘໙໒. ຍາຍ ກາຍຈິ ຠາສາຍ, ຫຕ຺ຖມຸທ຺ທາຍ ວາ ປນ;

ປາຣາຊິກມນາປນ຺ນໍ, ຠິກ຺ຂຸມາປນ຺ນເມວ ວາ.

໘໙໓. ອຎ຺ຎຕ຺ຣຎ຺ຎາປເທເສນ, ໂອມສນ຺ຕສ຺ສ ຠິກ຺ຂຸໂນ;

ຕຕ຺ຖ ປາຈິຕ຺ຕິຍາປຕ຺ຕິ, ສມ຺ພຸທ຺ເຘນ ປກາສິຕາ.

໘໙໔. ເຕເຫວຎ຺ຎາປເທເສນ, ປາຬິມຸຕ຺ຕປເທຫິປິ;

ສພ຺ພຕ຺ຖານຸປສມ຺ປນ຺ນໍ, ອກ຺ໂກສນ຺ຕສ຺ສ ທຸກ຺ກຏໍ.

໘໙໕. ອນກ຺ໂກສິຕຸກາມສ຺ສ, ເກວລໍ ທວກມ຺ຍຕາ;

ວທໂຕ ປນ ສພ຺ພຕ຺ຖ, ທຸພ຺ຠາສິຕມຸທີຣິຕໍ.

໘໙໖. ປວິຏ຺ຐານຸປສມ຺ປນ຺ນ-ຏ຺ຐາເນ ອິຘ ຈ ຠິກ຺ຂຸນີ;

ອນາປຕ຺ຕິ ປຸຣກ຺ຂຕ຺ວາ, ອຕ຺ຖຘມ຺ມານຸສາສນິໍ.

໘໙໗. ວທໂຕ ປນ ຠິກ຺ຂຸສ຺ສ, ສມຸຏ຺ຐານາທໂຍ ນຍາ;

ອນນ຺ຕຣສມາ ວຸຕ຺ຕາ, ທຸກ຺ຂາ ໂຫເຕຕ຺ຖ ເວທນາ.

ໂອມສວາທກຖາ.

໘໙໘. ອາປຕ຺ຕິ ຠິກ຺ຂຸເປສຸຎ຺ເຎ, ທຸວິຘາກາຣໂຕ ສິຍາ;

ອຕ຺ຕໂນ ປິຍກາມສ຺ສ, ປຣເຠທຕ຺ຖິໂນປິ ວາ.

໘໙໙. ອກ຺ໂກສນ຺ຕສ຺ສ ປຣິຍາຍ-ປາຬິມຸຕ຺ຕນເຍຫິ ຈ;

ວຈນສ຺ສຸປສໍຫາເຣ, ໂຫຕິ ອາປຕ຺ຕິ ທຸກ຺ກຏໍ.

໙໐໐. ຕຖາ ອນຸປສມ຺ປນ຺ນ-ອກ຺ໂກສໍ ຫຣໂຕປິ ຈ;

ຐິຕາ ອນຸປສມ຺ປນ຺ນ-ຏ຺ຐາເນ ອິຘ ຈ ຠິກ຺ຂຸນີ.

໙໐໑. ນ ເຈວ ປິຍກາມສ຺ສ, ນ ຈ ເຠທຕ຺ຖິໂນປິ ວາ;

ປາປານໍ ຄຣຫຕ຺ຖາຍ, ວທນ຺ຕສ຺ສ ຈ ຠິກ຺ຂຸໂນ.

໙໐໒. ຕຖາ ອຸມ຺ມຕ຺ຕກາທີນໍ, ອນາປຕ຺ຕີຕິ ທີປິຕາ;

ສມຸຏ຺ຐານາທໂຍ ສພ຺ເພ, ອທິນ຺ນາທານສາທິສາ.

ເປສຸຎ຺ຎກຖາ.

໙໐໓. ຐເປຕ຺ວາ ຠິກ຺ຂຸນິໍ ຠິກ຺ຂຸໍ, ອຎ຺ເຎນ ປິຏກຕ຺ຕຍໍ;

ຘມ຺ມໍ ສຫ ຠຓນ຺ຕສ຺ສ, ຕສ຺ສ ປາຈິຕ຺ຕິຍໍ ສິຍາ.

໙໐໔. ຣາໂຊວາທາທໂຍ ວຸຕ຺ຕາ, ມຫາປຈ຺ຈຣິຍາທິສຸ;

ອນາຣຸຬ຺ເຫສຸ ສງ຺ຄີຕິໍ, ອາປຕ຺ຕິຊນກາຕິ ຫິ.

໙໐໕. ທຸກ຺ກຏໍ ໂຫຕິ ຠິກ຺ຂຸສ຺ມິໍ, ຕຖາ ຠິກ຺ຂຸນິຍາປິ ຈ;

ຠິກ຺ຂຸສ຺ສານຸປສມ຺ປນ຺ນ-ສຎ຺ຎິໂນ ວິມຕິສ຺ສ ວາ.

໙໐໖. ເອກໂຕ ອຸທ຺ທິສາເປຕິ, ສຊ຺ຌາຍໍ ວາ ກໂຣຕິ ໂຍ;

ຠຓນ຺ຕໍ ປຄຸຓໍ ຄນ຺ຖໍ, ໂອປາເຕຕິ ຈ ໂຍ ປນ.

໙໐໗. ຕສ຺ສ ຈານຸປສມ຺ປນ຺ນ-ສນ຺ຕິເກ ຄຓ຺ຫໂຕປິ ຈ;

ອຸທ຺ເທສໍ ຕຸ ອນາປຕ຺ຕິ, ຠຓເນ ເຕນ ເອກໂຕ.

໙໐໘. ວາຈໂຕ ຈ ສມຸຏ຺ຐາຕິ, ວາຈາຈິຕ຺ຕທ຺ວຍາປິ ຈ;

ສມຸຏ຺ຐານມິທໍ ວຸຕ຺ຕໍ, ປທໂສຘມ຺ມສຎ຺ຎິຕໍ.

ປທໂສຘມ຺ມກຖາ.

໙໐໙. ສພ຺ພຈ຺ຉນ຺ນປຣິຈ຺ຉນ຺ເນ, ນິປຊ຺ເຊຍ຺ຍ ສເຈ ປນ;

ເຍຠຸຍ຺ເຍນ ປຣິຈ຺ຉນ຺ເນ, ຉນ຺ເນ ເສນາສເນປິ ວາ.

໙໑໐. ຕິສ຺ສນ຺ນໍ ປນ ຣຕ຺ຕີນໍ, ອຸທ຺ຘໍ ໂຍ ປນ ຣຕ຺ຕິຍໍ;

ຐເປຕ຺ວາ ຠິກ຺ຂຸໍ ອຎ຺ເຎນ, ຕສ຺ສ ປາຈິຕ຺ຕິຍໍ ສິຍາ.

໙໑໑. ວຕ຺ຖຸໍ ຍໍ ປນ ນິທ຺ທິຏ຺ຐໍ, ເມຖຸນສ຺ສ ປໂຫນກໍ;

ອາປຕ຺ຍນ຺ຕມໂສ ເຕນ, ຕິຣຈ຺ຉານຄເຕນປິ.

໙໑໒. ນິປນ຺ເນ ອຸປສມ຺ປນ຺ເນ, ອິຕໂຣ ເຈ ນິປຊ຺ຊຕິ;

ອິຕຣສ຺ມິໍ ນິປນ຺ເນ ວາ, ສເຈ ຠິກ຺ຂຸ ນິປຊ຺ຊຕິ.

໙໑໓. ອຸຠິນ຺ນໍ ອຸຏ຺ຐຫິຕ຺ວາ ວາ, ນິປຊ຺ຊນປໂຍຄໂຕ;

ອາປຕ຺ຕານຸປສມ຺ປນ຺ນ-ຄຓນາຍປິ ວາ ສິຍາ.

໙໑໔. ສເຈ ປິຘາຍ ວາ ຄພ຺ຠໍ, ນິປຊ຺ຊຕິປິຘາຍ ວາ;

ອາປຕ຺ຕຕ຺ຖງ຺ຄເຕ ສູຣິເຍ, ຈຕຸຕ຺ຖທິວເສ ສິຍາ.

໙໑໕. ທິຍຑ຺ຒຫຕ຺ຖຸພ຺ເພເຘນ, ປາກາຣຈຍນາທິນາ;

ປຣິກ຺ຂິຕ຺ຕມ຺ປິ ຕໍ ສພ຺ພໍ, ປຣິກ຺ຂິຕ຺ຕນ຺ຕິ ວຸຈ຺ຈຕິ.

໙໑໖. ຠິກ຺ຂຸສ຺ສນ຺ຕມໂສ ທຸສ຺ສ-ກຸຏິຍໍ ວສໂຕປິ ຈ;

ສຫເສຍ຺ຍາຍ ອາປຕ຺ຕິ, ໂຫຕີຕິ ປຣິທີປິໂຕ.

໙໑໗. ສພ຺ພຈ຺ຉນ຺ນປຣິຈ຺ຉນ຺ນ-ເຍຠຸຍ຺ຍາທິປ຺ປເຠທໂຕ;

ສຕ຺ຕ ປາຈິຕ຺ຕິຍາເນຕ຺ຖ, ທຏ຺ຐພ຺ພານິ ສຸພຸທ຺ຘິນາ.

໙໑໘. ອຑ຺ຒຈ຺ຉນ຺ນປຣິຈ຺ຉນ຺ເນ, ທຸກ຺ກຏໍ ປຣິທີປິຕໍ;

ສພ຺ພຈູຬປຣິຈ຺ຉນ຺ນ-ຉນ຺ນາທີຫິປິ ປຎ຺ຈຘາ.

໙໑໙. ອນາປຕ຺ຕິ ທິຣຕ຺ຕໍ ວາ, ຕິຣຕ຺ຕໍ ວສໂຕ ສຫ;

ອຣຸຓສ຺ສ ປຸເຣເຍວ, ຕຕິຍາຍ ຈ ຣຕ຺ຕິຍາ.

໙໒໐. ນິກ຺ຂມິຕ຺ວາ ວສນ຺ຕສ຺ສ, ປຸນ ສທ຺ຘິຎ຺ຈ ຠິກ຺ຂຸໂນ;

ຕຖາ ສພ຺ພປຣິຈ຺ຉນ຺ນ-ສພ຺ພຈ຺ຉນ຺ນາທິເກປິ ຈ.

໙໒໑. ເອວໍ ອນຸປສມ຺ປນ຺ເນ, ນິປນ຺ເນປິ ນິສີທໂຕ;

ເສສາ ເອຬກໂລເມນ, ສມຸຏ຺ຐານາທໂຍ ສມາ.

ສຫເສຍ຺ຍກຖາ.

໙໒໒. ສເຈ ຕທຫຸຊາຕາຍ, ອປິ ໂຍ ມານຸສິຕ຺ຖິຍາ;

ສຫເສຍ຺ຍໍ ປກປ຺ເປຍ຺ຍ, ຕສ຺ສ ປາຈິຕ຺ຕິຍໍ ສິຍາ.

໙໒໓. ທິສ຺ສມານກຣູປາຍ, ຍກ຺ຂິຍາ ເປຕິຍາ ສຫ;

ຣຕ຺ຕິຍໍ ໂຍ ນິປຊ຺ເຊຍ຺ຍ, ເທວິຍາ ປຓ຺ຑເກນ ວາ.

໙໒໔. ເມຖຸນວຕ຺ຖຸຠູຕາຍ, ຕິຣຈ຺ຉານຄຕິຕ຺ຖິຍາ;

ວຕ຺ຖູນໍ ຄຓນາຍສ຺ສ, ໂຫຕິ ອາປຕ຺ຕິ ທຸກ຺ກຏໍ.

໙໒໕. ອິເຘກທິວເສເນວ, ອາປຕ຺ຕິ ປຣິທີປິຕາ;

ເສໂສ ອນນ຺ຕເຣ ວຸຕ຺ຕ-ສທິໂສວ ວິນິຈ຺ຉໂຍ.

ທຸຕິຍສຫເສຍ຺ຍກຖາ.

໙໒໖. ອຸທ຺ຘໍ ຉປ຺ປຎ຺ຈວາຈາຫິ, ວິຎ຺ຎຸໍ ປຸຣິສວິຄ຺ຄຫໍ;

ວິນາ ຘມ຺ມໍ ຠຓນ຺ຕສ຺ສ, ໂຫຕິ ປາຈິຕ຺ຕິ ອິຕ຺ຖິຍາ.

໙໒໗. ຄາຖາປາໂທ ປເນໂກວ, ເອກວາຈາຕິ ສຎ຺ຎິໂຕ;

ປທໂສຘມ຺ມໍ ນິທ຺ທິຏ຺ຐໍ, ຘມ຺ມມຏ຺ຐກຖມ຺ປິ ວາ.

໙໒໘. ຉນ຺ນໍ ອຸປຣິ ວາຈານໍ, ປທາທີນໍ ວສາ ປນ;

ເທເສນ຺ຕສ຺ສ ສິຍາປຕ຺ຕິ, ປທາທິຄຓນາຍ ຈ.

໙໒໙. ນິມ຺ມິນິຕ຺ວາ ຐິເຕນາປິ, ສທ຺ຘິໍ ປຸຣິສວິຄ຺ຄຫໍ;

ຍກ຺ເຂນປິ ຈ ເປເຕນ, ຕິຣຈ຺ຉານຄເຕນປິ.

໙໓໐. ຐິຕສ຺ສ ມາຕຸຄາມສ຺ສ, ຘມ຺ມໍ ໂຍ ປນ ຠາສຕິ;

ຉນ຺ນໍ ອຸປຣິ ວາຈານໍ, ຕສ຺ສ ປາຈິຕ຺ຕິຍໍ ສິຍາ.

໙໓໑. ປຸຣິເສ ອິຕ຺ຖິສຎ຺ຎິສ຺ສ, ວິມຕິສ຺ສ ຈ ປຓ຺ຑເກ;

ອຸຕ຺ຕຣິ ຉຫິ ວາຈາຫິ, ວທໂຕ ໂຫຕິ ທຸກ຺ກຏໍ.

໙໓໒. ອິຕ຺ຖິຣູປໍ ຄເຫຕ຺ວານ, ຐິຕານໍ ຠາສໂຕປິ ຈ;

ທຸກ຺ກຏໍ ຍກ຺ຂິເປຕີນໍ, ຕິຣຈ຺ຉານຄຕິຕ຺ຖິຍາ.

໙໓໓. ປຸຣິເສ ສຕິ ວິຎ຺ຎຸສ຺ມິໍ, ສຍໍ ອຸຏ຺ຐາຍ ວາ ປຸນ;

ເທເສນ຺ຕສ຺ສ ນິສີທິຕ຺ວາ, ມາຕຸຄາມສ຺ສ ວາ ຕຖາ.

໙໓໔. ອຎ຺ຎິສ຺ສາ ປຸນ ອຎ຺ຎິສ຺ສາ, ອິຕ຺ຖິຍາ ຠຓໂຕປິ ຈ;

ຉຫິ ປຎ຺ຈຫິ ວາຈາຫິ, ອນາປຕ຺ຕິ ປກາສິຕາ.

໙໓໕. ປທໂສຘມ຺ມຕຸລ຺ຍາວ, ສມຸຏ຺ຐານາທໂຍ ມຕາ;

ອຍເມວ ວິເສໂສຕິ, ກ຺ຣິຍາກ຺ຣິຍມິທໍ ປນ.

ຘມ຺ມເທສນາກຖາ.

໙໓໖. ມຫຄ຺ຄຕໍ ປຓີຕໍ ວາ, ອາໂຣເຈນ຺ຕສ຺ສ ຠິກ຺ຂຸໂນ;

ຐເປຕ຺ວາ ຠິກ຺ຂຸນິໍ ຠິກ຺ຂຸໍ, ຠູເຕ ປາຈິຕ຺ຕິຍໍ ສິຍາ.

໙໓໗. ໂນ ເຈ ຊານາຕິ ໂສ ວຸຕ຺ຕໍ, ອາໂຣເຈນ຺ຕສ຺ສ ຠິກ຺ຂຸໂນ;

ປຣິຍາຍວຈເນ ຈສ຺ສ, ໂຫຕິ ອາປຕ຺ຕິ ທຸກ຺ກຏໍ.

໙໓໘. ອນາປຕ຺ຕິ ຕຖາຣູເປ, ກາຣເຓ ສຕິ ຠາສໂຕ;

ສພ຺ພສ຺ສປິ ຈ ສີລາທິໍ, ວທໂຕ ອາທິກມ຺ມິໂນ.

໙໓໙. ອຸມ຺ມຕ຺ຕກປທໍ ເອຕ຺ຖ, ນ ວຸຕ຺ຕໍ ຕທສມ຺ຠວາ;

ຠູຕາໂຣຈນກໍ ນາມ, ສມຸຏ຺ຐານມິທໍ ມຕໍ.

໙໔໐. ກາຍໂຕ ວາຈໂຕ ກາຍ-ວາຈໂຕ ຈ ຕິຘາ ສິຍາ;

ກຸສລາພ຺ຍາກເຕເຫວ, ທ຺ວິຈິຕ຺ຕຎ຺ຈ ທ຺ວິເວທນໍ.

ຠູຕາໂຣຈນກຖາ.

໙໔໑. ອາປຕ຺ຕິໍ ປນ ທຸຏ຺ຐຸລ຺ລໍ, ອາໂຣເຈນ຺ຕສ຺ສ ຠິກ຺ຂຸໂນ;

ອາປຕ຺ຕານຸປສມ຺ປນ຺ເນ, ຐເປຕ຺ວາ ຠິກ຺ຂຸສມ຺ມຸຕິໍ.

໙໔໒. ສງ຺ຆາທິເສສມາປນ຺ໂນ, ໂມເຈຕ຺ວາ ອສຸຈິໍ ອຍໍ;

ຆເຏຕ຺ວາ ວຕ຺ຖຸນາປຕ຺ຕິໍ, ວທນ຺ຕສ຺ເສວ ວຊ຺ຊຕາ.

໙໔໓. ອິຘ ສງ຺ຆາທິເສສາວ, ທຸຏ຺ຐຸລ຺ລາປຕ຺ຕິໂຍ ມຕາ;

ຕສ຺ມາ ສຸທ຺ຘສ຺ສ ທຸຏ຺ຐຸລ຺ລໍ, ວທໍ ປາຈິຕ຺ຕິຍໍ ຜຸເສ.

໙໔໔. ອທຸຏ຺ຐຸລ຺ລາຍ ທຸຏ຺ຐຸລ຺ລ-ສຎ຺ຎິໂນ ວິມຕິສ຺ສ ວາ;

ອາປຕ຺ຕິໂຍປິ ວາ ເສສາ, ອາໂຣເຈນ຺ຕສ຺ສ ທຸກ຺ກຏໍ.

໙໔໕. ຕຖາ ອນຸປສມ຺ປນ຺ເນ, ທຸຏ຺ຐຸລ຺ລໍ ປຎ຺ຈຘາ ມຕໍ;

ອຊ຺ຌາຈາຣມທຸຏ຺ຐຸລ຺ລໍ, ອາໂຣເຈຕຸໍ ນ ວຏ຺ຏຕິ.

໙໔໖. ວຕ຺ຖຸໍ ວາ ປນ ອາປຕ຺ຕິໍ, ອາໂຣເຈນ຺ຕສ຺ສ ເກວລໍ;

ອນາປຕ຺ຕີຕິ ຎາຕພ຺ພໍ, ຠິກ຺ຂຸສມ຺ມຸຕິຍາ ຕຖາ.

໙໔໗. ເອວມຸມ຺ມຕ຺ຕກາທີນໍ, ສມຸຏ຺ຐານາທໂຍ ນຍາ;

ອທິນ຺ນາທານຕຸລ຺ຍາວ, ເວທນາ ທຸກ຺ຂເວທນາ.

ທຸຏ຺ຐຸລ຺ລາໂຣຈນກຖາ.

໙໔໘. ຂເຓຍ຺ຍ ວາ ຂຓາເປຍ຺ຍ, ປຖວິໍ ໂຍ ອກປ຺ປິຍໍ;

ເຠທາເປຍ຺ຍ ຈ ຠິນ຺ເທຍ຺ຍ, ຕສ຺ສ ປາຈິຕ຺ຕິຍໍ ສິຍາ.

໙໔໙. ສຍເມວ ຂຓນ຺ຕສ຺ສ, ປຖວິໍ ປນ ຠິກ຺ຂຸໂນ;

ປຫາຣສ຺ມິໍ ປຫາຣສ຺ມິໍ, ປາຈິຕ຺ຕິຍມຸທີຣິຕໍ.

໙໕໐. ອາຓາເປນ຺ຕສ຺ສ ເອກາວ, ທິວສໍ ຂຓໂຕປິ ຈ;

ປຸນປ຺ປຸນາຓາເປນ຺ຕສ຺ສ, ວາຈໂຕ ວາຈໂຕ ສິຍາ.

໙໕໑. ‘‘ຂຓ ໂປກ຺ຂຣຓິໍ ວາປິໍ, ອາວາຏໍ ຂຓ ກູປກໍ’’;

ອິຈ຺ເຈວໍ ຕຸ ວທນ຺ຕສ຺ສ, ໂກຈິ ໂທໂສ ນ ວິຊ຺ຊຕິ.

໙໕໒. ‘‘ອິມໍ ຂຓ ຈ ໂອກາສໍ, ອິຘ ໂປກ຺ຂຣຓິໍ ຂຓ;

ອິມສ຺ມິໍ ຂຓ ໂອກາເສ’’, ວຕ຺ຕຸເມວໍ ນ ວຏ຺ຏຕິ.

໙໕໓. ‘‘ກນ຺ທໍ ຂຓ ກຸຣຸນ຺ທໍ ວາ, ຖູຓໍ ຂຓ ຈ ຂາຓຸກໍ;

ມູລໍ ຂຓ ຈ ຕາລໍ ວາ’’, ເອວໍ ວທຕິ ວຏ຺ຏຕິ.

໙໕໔. ‘‘ອິມໍ ມູລໍ ອິມໍ ວລ຺ລິໍ, ອິມໍ ຕາລໍ ອິມໍ ນຬໍ;

ຂຓາ’’ຕິ ນິຍເມຕ຺ວານ, ວຕ຺ຕຸໍ ປນ ນ ວຏ຺ຏຕິ.

໙໕໕. ອຸສ຺ສິຎ຺ຈິຕຸໍ ສເຈ ສກ຺ກາ, ຆເຏຫິ ຕນຸກທ຺ທໂມ;

ຠິກ຺ຂຸນາ ອປເນຕພ຺ໂພ, ພຫລໍ ນ ຈ ວຏ຺ຏຕິ.

໙໕໖. ຠິຊ຺ຊິຕ຺ວາ ນທິຍາທີນໍ, ປຕິຕໍ ໂຕຍສນ຺ຕິເກ;

ຕຏໍ ວຏ຺ຐໍ ວິໂກເປຕຸໍ, ຈາຕຸມາສມ຺ປິ ວຏ຺ຏຕິ.

໙໕໗. ສເຈ ປຕຕິ ໂຕຍສ຺ມິໍ, ເທເວ ວຸຏ຺ເຐປິ ວຏ຺ຏຕິ;

ຈາຕຸມາສມຕິກ຺ກນ຺ເຕ, ໂຕເຍ ເທໂວ ຫິ ວສ຺ສຕິ.

໙໕໘. ປາສາຓປິຏ຺ຐິຍໍ ໂສຓ຺ຑິໍ, ຂຓນ຺ຕິ ຍທິ ຕຕ຺ຖ ຕຸ;

ຣຊໍ ປຕຕິ ເຈ ປຸພ຺ພໍ, ປຈ຺ຉາ ເທໂວຠິວສ຺ສຕິ.