ສິກ຺ຂາກຣຓີຍກຖາວຓ຺ຓນາ
໒໔໓໘. ປາຏິເທສນີຍານນ຺ຕຣໍ ອຸທ຺ທິຏ຺ຐານິ ປຎ຺ຈສຕ຺ຕຕິ ເສຂິຍານິ ມຫາວິຠງ຺ເຄ ວຸຕ຺ຕວິນິຈ຺ຉຍາເນວາຕິ ຕເທວ ອຕິທິສນ຺ໂຕ ອາຫ ‘‘ເສຂິຍາ ປນ ເຍ ຘມ຺ມາ’’ຕິອາທິ. ເຍ ປນ ປຎ຺ຈສຕ຺ຕຕິ ເສຂິຍາ ຘມ຺ມາ ປາຏິເທສນີຍານນ຺ຕຣໍ ອຸທ຺ທິຏ຺ຐາ, ເຕສໍ ອຕ຺ຖວິນິຈ຺ຉໂຍ ມຫາວິຠງ຺ເຄ ວຸຕ຺ໂຕວາຕິ ໂຍຊນາ, ອຕ຺ຖິເກຫິ ຕໂຕວ ຄເຫຕພ຺ໂພ, ນ ປຸນ ອິຘ ທສ຺ເສສ຺ສາມີຕິ ອຘິປ຺ປາໂຍ.
ອິຕິ ວິນຍຕ຺ຖສາຣສນ຺ທີປນິຍາ ວິນຍວິນິຈ຺ຉຍວຓ຺ຓນາຍ
ສິກ຺ຂາກຣຓີຍກຖາວຓ຺ຓນາ ນິຏ຺ຐິຕາ.
໒໔໓໙-໔໐. ສວິຠງ຺ຄານໍ ອຸຠໂຕວິຠງ຺ຄສຫິຕານໍ ອຸຠໂຕປາຕິໂມກ຺ຂານໍ ຠິກ຺ຂູນໍ, ຠິກ຺ຂຸນີນຎ຺ຈ ປາຕິໂມກ຺ຂານໍ ອຏ຺ຐກຖາສາໂຣ ສພ຺ພຏ຺ຐກຖານໍ ສາຣຠູໂຕ ໂຍ ໂສ ອຕ຺ໂຖ ວິເສສໂຕ ສມນ຺ຕປາສາທິກາຍໍ ວຸຕ຺ໂຕ. ຕໍ ສພ຺ພໍ ສາຣຠູຕໍ ອຕ຺ຖໍ ສມາທາຍ ໂຍ ວິນຍສ຺ສວິນິຈ຺ຉໂຍ ຠິກ຺ຂູນໍ, ຠິກ຺ຂຸນີນຎ຺ຈ ຫິຕຕ຺ຖາຍ ມຍາ ກໂຕ ວິຣຈິໂຕຕິ ສມ຺ພນ຺ໂຘ.
໒໔໔໑. ໂນ ອມ຺ຫາກໍ ປຏິຠາຓຊໍ ປຏິຠາຓໂຕ ຊາຕໍ ອິມໍ ຕຸ ອິມໍ ວິນຍວິນິຈ຺ຉຍໍ ປນ ເຍ ຊນ຺ຕຸໂນ ສຕ຺ຕາ ສຸຓນ຺ຕິ, ເຕ ຊນ຺ຕຸໂນ ຊນສ຺ສ ສຕ຺ຕໂລກສ຺ສ ຫິເຕ ອຘິສີລສິກ຺ຂາປກາສກຕ຺ຕາ ອຸປກາຣເກ ສຸມຕສ຺ສ ໂສຠຓນ຺ຕິ ພຸທ຺ຘາທີຫິ ມຕສ຺ສ, ໂສຠເຓຫິ ວາ ພຸທ຺ຘາທີຫິ ມຕສ຺ສ ປຏິວິທ຺ຘສ຺ສ ອມຕມຫານິພ຺ພານສ຺ສ ອຍເນ ອຎ຺ຊສຠູເຕ ຊນສ຺ສ ຕາຍເນ ກາຍິກວາຈສິກວີຕິກ຺ກມປຏິປກ຺ຂຕ຺ຕາ ອປາຍຠຍນິວາຣຓຏ຺ເຐນ ຕາຓຠູເຕ ວິນເຍ ວິນຍປິຏເກ ປກຕຎ຺ຎຸໂນ ຍຖາສຠາວໍ ຊານນ຺ຕາ ຕຎ຺ຎຸໂນ ຠວນ຺ຕິ ຕໍ ຕໍ ກປ຺ປິຍາກປ຺ປິຍໍ ເສວິຕພ຺ພາເສວິຕພ຺ພໍ ຊານນ຺ຕາ ຠວນ຺ເຕວາຕິ ອຕ຺ໂຖ.
໒໔໔໒. ພຫໂວ ສາຣຠູຕາ ນຍາ ເອຕ຺ຖາຕິ ພຫຸສາຣນໂຍ, ຕສ຺ມິໍ ພຫຸສາຣນເຍ. ປຣເມ ອຸຕ຺ຕເມ ວິນເຍ ວິນຍປິຏເກ ວິສາຣທຕໍ ເວສາຣຊ຺ຊໍ ອສໍຫີຣຎາຓໍ ອຠິປຕ຺ຖຍຕາ ວິເສສໂຕ ອິຈ຺ຉນ຺ເຕນ ພຸທ຺ຘິມຕາ ຎາຓາຕິສຍມນ຺ເຕນ ຍຕິນາ ສພ຺ພກາລໍ ຕິວິຘສິກ຺ຂາປຣິປູຣເຓ ອສິຖິລປວຕ຺ຕສມ຺ມາວາຍາເມນ ຠິກ຺ຂຸນາ ອິມສ຺ມິໍ ວິນຍວິນິຈ຺ຉເຍ ປຣມາ ອຸຕ຺ຕຣິຕຣາ ມຫຕີ ອາທຣຕາ ກຣຓີຍຕມາ ວິເສເສນ ກາຕພ຺ພາເຍວາຕິ ອຕ຺ໂຖ.
໒໔໔໓. ອິຈ຺ເຈວໍ ສີລວິສຸທ຺ຘິສາຘເນ ວິນຍປິຏເກ ເວສາຣຊ຺ຊເຫຕຸຕາຍ ອິມສ຺ສ ວິນຍວິນິຈ຺ຉຍສ຺ສ ສີລວິສຸທ຺ຘິອາທິສຕ຺ຕວິສຸທ຺ຘິປຣມ຺ປຣາຍ ອຘິຄນ຺ຕພ຺ພສ຺ສ ອມຕມຫານິພ຺ພານສ຺ສ ປຕ຺ຕິຍາປິ ມູລຠູຕຕໍ ທສ຺ເສຕຸມາຫ ‘‘ອວຄຈ຺ຉຕີ’’ຕິອາທິ.
ໂຍ ປນ ຠິກ຺ຂຸ ອຕ຺ຖຍຸຕ຺ຕໍ ມຫຕາ ປໂຍຊນຕ຺ເຖນ, ອຠິເຘຍ຺ຍຕ຺ເຖນ ຈ ສມນ຺ນາຄຕໍ ອິມໍ ວິນຍສ຺ສວິນິຈ຺ຉຍໍ ອວຄຈ຺ຉຕິ ອເວຈ຺ຈ ຍາຖາວໂຕ ຊານາຕິ, ໂສ ອປຣມ຺ປຣໍ ມຣຓາຠາວາ ອມຣໍ ຊຣາຍາຠາວາ ອຊຣໍ ຣາຄາທິກິເລສຣຊປຏິປກ຺ຂຕ຺ຕາ ອຣຊໍ ອເນກປ຺ປກາຣໂຣຄານໍ ອປ຺ປວຕ຺ຕິເຫຕຸຕ຺ຕາ ອຣຸຊໍ ສນ຺ຕິປທໍ ສພ຺ພກິເລສທຣຖປຣິຬາຫານໍ ວູປສມເຫຕຸຕ຺ຕາ ສນ຺ຕິສງ຺ຂາຕໍ ນິພ຺ພານປທໍ ອຘິຄຈ຺ຉຕິ ສີລວິສຸທ຺ຘິອາທິສຕ຺ຕວິສຸທ຺ຘິປຣມ຺ປຣາຍ ຄນ຺ຕ຺ວາ ປຏິວິຊ຺ຌຕີຕິ ໂຍຊນາ.
ອິຕິ ວິນຍຕ຺ຖສາຣສນ຺ທີປນິຍາ ວິນຍວິນິຈ຺ຉຍວຓ຺ຓນາຍ
ຠິກ຺ຂຸນິວິຠງ຺ຄກຖາວຓ຺ຓນາ ນິຏ຺ຐິຕາ.