໑໔. ປຖວີຂຓນວິນິຈ຺ຉຍກຖາ

໗໒. ປຖວີຕິ ທ຺ເວ ປຖວີ ຊາຕາ ຈ ປຖວີ ອຊາຕາ ຈ ປຖວີຕິ. ຕຕ຺ຖ ຊາຕາ ນາມ ປຖວີ ສຸທ຺ຘປໍສຸກາ ສຸທ຺ຘມຕ຺ຕິກາ ອປ຺ປປາສາຓາ ອປ຺ປສກ຺ຂຣາ ອປ຺ປກຐລາ ອປ຺ປມຣຸມ຺ພາ ອປ຺ປວາລຸກາ ເຍຠຸຍ຺ເຍນປໍສຸກາ ເຍຠຸຍ຺ເຍນມຕ຺ຕິກາ, ອທຑ຺ຒາປິ ວຸຈ຺ຈຕິ ‘‘ຊາຕາ ປຖວີ’’ຕິ. ໂຍປິ ປໍສຸປຸຎ຺ໂຊ ວາ ມຕ຺ຕິກາປຸຎ຺ໂຊ ວາ ອຕິເຣກຈາຕຸມາສໍ ໂອວຏ຺ໂຐ, ໂສປິ ວຸຈ຺ຈຕິ ‘‘ຊາຕາ ປຖວີ’’ຕິ. ອຊາຕາ ນາມ ປຖວີ ສຸທ຺ຘປາສາຓາ ສຸທ຺ຘສກ຺ຂຣາ ສຸທ຺ຘກຐລາ ສຸທ຺ຘມຣຸມ຺ພາ ສຸທ຺ຘວາລຸກາ ອປ຺ປປໍສຸກາ ອປ຺ປມຕ຺ຕິກາ ເຍຠຸຍ຺ເຍນປາສາຓາ ເຍຠຸຍ຺ເຍນສກ຺ຂຣາ ເຍຠຸຍ຺ເຍນກຐລາ ເຍຠຸຍ຺ເຍນມຣຸມ຺ພາ ເຍຠຸຍ຺ເຍນວາລຸກາ, ທຑ຺ຒາປິ ວຸຈ຺ຈຕິ ‘‘ອຊາຕາ ປຖວີ’’ຕິ. ໂຍປິ ປໍສຸປຸຎ຺ໂຊ ວາ ມຕ຺ຕິກາປຸຎ຺ໂຊ ວາ ໂອມກຈາຕຸມາສໍ ໂອວຏ຺ໂຐ, ໂສປິ ວຸຈ຺ຈຕິ ‘‘ອຊາຕາ ປຖວີ’’ຕິ (ປາຈິ. ໘໔-໘໖).

ຕຕ຺ຖ ຊາຕປຖວິໍ ຂຓນ຺ຕສ຺ສ ຂຓາເປນ຺ຕສ຺ສ ວາ ປາຈິຕ຺ຕິຍໍ. ຕຕ຺ຣາຍໍ ວິນິຈ຺ຉໂຍ (ປາຈິ. ອຏ຺ຐ. ໘໖) – ສເຈ ສຍໍ ຂຓຕິ, ປຫາເຣ ປຫາເຣ ປາຈິຕ຺ຕິຍໍ. ສເຈ ອຎ຺ຎໍ ອາຓາເປຕິ, ສກິໍ ອາຓຕ຺ໂຕ ສເຈປິ ສກລທິວສໍ ຂຓຕິ, ອາຓາປກສ຺ສ ເອກເມວ ປາຈິຕ຺ຕິຍໍ. ສເຈ ປນ ກຸສີໂຕ ໂຫຕິ, ປຸນປ຺ປຸນໍ ອາຓາເປຕພ຺ໂພ, ຕໍ ອາຓາເປຕ຺ວາ ຂຓາເປນ຺ຕສ຺ສ ວາຈາຍ ວາຈາຍ ປາຈິຕ຺ຕິຍໍ. ສເຈ ‘‘ໂປກ຺ຂຣຓິໍ ຂຓາຫີ’’ຕິ ວທຕິ, ວຏ຺ຏຕິ. ຂຕາເຍວ ຫິ ໂປກ຺ຂຣຓີ ນາມ ໂຫຕິ. ຕສ຺ມາ ອຍໍ ກປ຺ປິຍໂວຫາໂຣ. ເອສ ນໂຍ ‘‘ວາປິໍ ຕຬາກໍ ອາວາຏໍ ຂຓາ’’ຕິອາທີສຸປິ. ‘‘ອິມໍ ໂອກາສໍ ຂຓ, ອິມສ຺ມິໍ ໂອກາເສ ໂປກ຺ຂຣຓິໍ ຂຓາ’’ຕິ ວຕ຺ຕຸໍ ປນ ນ ວຏ຺ຏຕິ. ‘‘ກນ຺ທໍ ຂຓ, ມູລໍ ຂຓາ’’ຕິ ອນິຍເມຕ຺ວາ ວຕ຺ຕຸໍ ວຏ຺ຏຕິ, ‘‘ອິມໍ ວລ຺ລິໍ ຂຓ, ອິມສ຺ມິໍ ໂອກາເສ ກນ຺ທໍ ວາ ມູລໍ ວາ ຂຓາ’’ຕິ ວຕ຺ຕຸໍ ນ ວຏ຺ຏຕິ.

໗໓. ໂປກ຺ຂຣຓິໍ ໂສເຘນ຺ເຕຫິ ໂຍ ກຸເຏຫິ ອຸສ຺ສິຎ຺ຈິຕຸໍ ສກ຺ກາ ໂຫຕິ ຕນຸກກທ຺ທໂມ, ຕໍ ອປເນຕຸໍ ວຏ຺ຏຕິ, ພຫໂລ ນ ວຏ຺ຏຕິ. ອາຕເປນ ສຸກ຺ຂກທ຺ທໂມ ຜລຕິ, ຕຕ຺ຣ ໂຍ ເຫຏ຺ຐາ ປຖວິຍາ ອສມ຺ພນ຺ໂຘ, ຕເມວ ອປເນຕຸໍ ວຏ຺ຏຕິ. ອຸທເກນ ຄຕຏ຺ຐາເນ ອຸທກປປ຺ປຏໂກ ນາມ ໂຫຕິ, ວາຕປຫາເຣນ ຈລຕິ, ຕໍ ອປເນຕຸໍ ວຏ຺ຏຕິ. ໂປກ຺ຂຣຓີອາທີນໍ ຕຏໍ ຠິຊ຺ຊິຕ຺ວາ ອຸທກສາມນ຺ຕາ ປຕຕິ. ສເຈ ໂອມກຈາຕຸມາສໍ ໂອວຏ຺ຐໍ, ຉິນ຺ທິຕຸໍ ຠິນ຺ທິຕຸໍ ວາ ວຏ຺ຏຕິ, ຈາຕຸມາສໂຕ ອຸທ຺ຘໍ ນ ວຏ຺ຏຕິ. ສເຈ ປນ ອຸທເກເຍວ ປຕຕິ, ເທເວນ ອຕິເຣກຈາຕຸມາສໍ ໂອວຏ຺ເຐປິ ອຸທເກເຍວ ອຸທກສ຺ສ ປຕິຕຕ຺ຕາ ວຏ຺ຏຕິ.

ປາສາຓປິຏ຺ຐິຍໍ ໂສຓ຺ຑິໍ ຂຓນ຺ຕິ, ສເຈ ຕຕ຺ຖ ປຐມເມວ ສຸຂຸມຣຊໍ ປຕຕິ, ຕໍ ເທເວນ ໂອວຏ຺ຐໍ ໂຫຕິ, ຈາຕຸມາສຈ຺ຈເຍນ ອກປ຺ປິຍປຖວີສງ຺ຂ຺ຍໍ ຄຈ຺ຉຕິ. ອຸທເກ ປຣິຍາທິນ຺ເນ ໂສຓ຺ຑິໍ ໂສເຘນ຺ເຕຫິ ວິໂກເປຕຸໍ ນ ວຏ຺ຏຕິ. ສເຈ ປຐມເມວ ອຸທເກນ ປູຣຕິ, ປຈ຺ຉາ ຣຊໍ ປຕຕິ, ຕໍ ວິໂກເປຕຸໍ ວຏ຺ຏຕິ. ຕຕ຺ຖ ຫິ ເທເວ ວສ຺ສນ຺ເຕປິ ອຸທເກເຍວ ອຸທກໍ ປຕຕິ. ປິຏ຺ຐິປາສາເຓ ສຸຂຸມຣຊໍ ໂຫຕິ, ເທເວ ຜຸສາຍນ຺ເຕ ອລ຺ລີຍຕິ, ຕມ຺ປິ ຈາຕຸມາສຈ຺ຈເຍນ ວິໂກເປຕຸໍ ນ ວຏ຺ຏຕິ. ອກຕປພ຺ຠາເຣ ວມ຺ມິໂກ ອຸຏ຺ຐິໂຕ ໂຫຕິ, ຍຖາສຸຂໍ ວິໂກເປຕຸໍ ວຏ຺ຏຕິ. ສເຈ ອພ຺ໂຠກາເສ ອຸຏ຺ຐຫຕິ, ໂອມກຈາຕຸມາສໍ ໂອວຏ຺ໂຐເຍວ ວຏ຺ຏຕິ. ຣຸກ຺ຂາທີສຸ ອາຣຸຬ຺ຫອຸປຈິກມຕ຺ຕິກາຍມ຺ປິ ເອເສວ ນໂຍ. ຄຓ຺ຑຸປ຺ປາທຄູຖມູສິກຸກ຺ກຣໂຄກຓ຺ຏກາທີສຸປິ ເອເສວ ນໂຍ. ໂຄກຓ຺ຏໂກ ນາມ ຄາວີນໍ ຂຸຣຈ຺ຉິນ຺ນກທ຺ທໂມ ວຸຈ຺ຈຕິ. ສເຈ ປນ ເຫຏ຺ຐິມຕເລນ ຠູມິສມ຺ພນ຺ໂຘ ໂຫຕິ, ເອກທິວສມ຺ປິ ນ ວຏ຺ຏຕິ. ກສິຕຏ຺ຐາເນ ນງ຺ຄລຈ຺ຉິນ຺ນມຕ຺ຕິກາປິຓ຺ຑໍ ຄຓ຺ຫນ຺ຕສ຺ສ ເອເສວ ນໂຍ.

ປຸຣາຓເສນາສນໍ ໂຫຕິ ອຈ຺ຉທນໍ ວາ ວິນຏ຺ຐຈ຺ຉທນໍ ວາ ອຕິເຣກຈາຕຸມາສໍ ໂອວຏ຺ຐໍ ຊາຕປຖວີສງ຺ຂ຺ຍເມວ ຄຈ຺ຉຕິ, ຕໂຕ ອວເສສໍ ຉທນິຏ຺ຐກໍ ວາ ໂຄປານສີອາທິກໍ ອຸປກຣຓໍ ວາ ‘‘ອິຏ຺ຐກໍ ຄຓ຺ຫາມິ, ໂຄປານສິໍ ຠິຕ຺ຕິປາທໍ ປທຣຕ຺ຖຣຓໍ ປາສາທຕ຺ຖມ຺ຠໍ ຄຓ຺ຫາມີ’’ຕິ ສຎ຺ຎາຍ ຄຓ຺ຫິຕຸໍ ວຏ຺ຏຕິ, ເຕນ ສທ຺ຘິໍ ມຕ຺ຕິກາ ປຕຕິ, ອນາປຕ຺ຕິ, ຠິຕ຺ຕິມຕ຺ຕິກໍ ຄຓ຺ຫນ຺ຕສ຺ສ ປນ ອາປຕ຺ຕິ. ສເຈ ຍາ ຍາ ອຕິນ຺ຕາ, ຕໍ ຕໍ ຄຓ຺ຫາຕິ, ອນາປຕ຺ຕິ. ອນ຺ໂຕເຄເຫ ມຕ຺ຕິກາປຸຎ຺ໂຊ ໂຫຕິ, ຕສ຺ມິໍ ເອກທິວສໍ ໂອວຏ຺ເຐ ເຄຫໍ ຉາເທນ຺ຕິ. ສເຈ ສພ຺ໂພ ຕິນ຺ໂຕ, ຈາຕຸມາສຈ຺ຈເຍນ ຊາຕປຖວີເຍວ. ອຖສ຺ສ ອຸປຣິຠາໂຄເຍວ ຕິນ຺ໂຕ, ອນ຺ໂຕ ອຕິນ຺ໂຕ, ຍຕ຺ຕກໍ ຕິນ຺ຕໍ, ຕໍ ກປ຺ປິຍກາຣເກຫິ ກປ຺ປິຍໂວຫາເຣນ ອປນາເມຕ຺ວາ ເສສໍ ຍຖາສຸຂໍ ວຬຎ຺ເຊຕຸໍ ວຏ຺ຏຕິ ອຸທເກນ ເຕມິຕຕ຺ຕາ. ເອກາພທ຺ຘາເຍວ ຫິ ຊາຕປຖວີ ໂຫຕິ, ນ ອິຕຣາຕິ. ອພ຺ໂຠກາເສ ມຕ຺ຕິກາປາກາໂຣ ໂຫຕິ, ອຕິເຣກຈາຕຸມາສໍ ໂອວຏ຺ໂຐ ຊາຕປຖວີສງ຺ຂ຺ຍໍ ຄຈ຺ຉຕິ, ຕຕ຺ຖ ລຄ຺ຄປໍສຸໍ ປນ ອລ຺ລຫຕ຺ເຖນ ຉຸປິຕ຺ວາ ຄເຫຕຸໍ ວຏ຺ຏຕິ. ສເຈ ອິຏ຺ຐກປາກາໂຣ ໂຫຕິ, ເຍຠຸຍ຺ເຍນກຐລຏ຺ຐາເນ ຕິຏ຺ຐຕິ, ຍຖາສຸຂໍ ວິໂກເປຕຸໍ ວຏ຺ຏຕິ. ອພ຺ໂຠກາເສ ຐິຕມຓ຺ຑປຕ຺ຖມ຺ຠໍ ອິໂຕ ຈິໂຕ ຈ ສຎ຺ຈາເລຕ຺ວາ ປຖວິໍ ວິໂກເປນ຺ເຕນ ຄເຫຕຸໍ ນ ວຏ຺ຏຕິ, ອຸຊຸກເມວ ອຸທ຺ຘຣິຕຸໍ ວຏ຺ຏຕິ. ອຎ຺ຎມ຺ປິ ສຸກ຺ຂຣຸກ຺ຂໍ ສຸກ຺ຂຂາຓຸກໍ ວາ ຄຓ຺ຫນ຺ຕສ຺ສ ເອເສວ ນໂຍ.

໗໔. ນວກມ຺ມຕ຺ຖໍ ຖມ຺ຠໍ ວາ ປາສາຓໍ ວາ ຣຸກ຺ຂໍ ວາ ທຓ຺ຑເກຫິ ອຸຈ຺ຈາເລຕ຺ວາ ປວຏ຺ເຏນ຺ຕາ ຄຈ຺ຉນ຺ຕິ, ຕຕ຺ຖ ຊາຕປຖວີ ຠິຊ຺ຊຕິ, ສເຈ ສຸທ຺ຘຈິຕ຺ຕາ ປວຏ຺ເຏນ຺ຕິ, ອນາປຕ຺ຕິ. ອຖ ປນ ເຕນ ອປເທເສນ ປຖວິໍ ຠິນ຺ທິຕຸກາມາເຍວ ໂຫນ຺ຕິ, ອາປຕ຺ຕິ. ສາຂາທີນິ ກຑ຺ຒນ຺ຕານມ຺ປິ ປຖວິຍໍ ທາຣູນິ ຜາເລນ຺ຕານມ຺ປິ ເອເສວ ນໂຍ. ປຖວິຍໍ ອຏ຺ຐິສູຈິກຓ຺ຏກາທີສຸປິ ຍໍ ກິຎ຺ຈິ ອາໂກເຏຕຸໍ ວາ ປເວເສຕຸໍ ວາ ນ ວຏ຺ຏຕິ, ‘‘ປສ຺ສາວຘາຣາຍ ເວເຄນ ປຖວິໍ ຠິນ຺ທິສ຺ສາມີ’’ຕິ ເອວໍ ປສ຺ສາວມ຺ປິ ກາຕຸໍ ນ ວຏ຺ຏຕິ. ກໂຣນ຺ຕສ຺ສ ຠິຊ຺ຊຕິ, ອາປຕ຺ຕິ, ‘‘ວິສມຠູມິໍ ສມໍ ກຣິສ຺ສາມີ’’ຕິ ສມ຺ມຊ຺ຊນິຍາ ຆໍສິຕຸມ຺ປິ ນ ວຏ຺ຏຕິ. ວຕ຺ຕສີເສເນວ ຫິ ສມ຺ມຊ຺ຊິຕພ຺ພໍ. ເກຈິ ກຕ຺ຕຣຍຏ຺ຐິຍາ ຠູມິໍ ໂກຏ຺ເຏນ຺ຕິ, ປາທງ຺ຄຸຏ຺ຐເກນ ວິລິຂນ຺ຕິ, ‘‘ຈງ຺ກມິຕຏ຺ຐານໍ ທສ຺ເສສ຺ສາມາ’’ຕິ ປຸນປ຺ປຸນໍ ຠູມິໍ ຠິນ຺ທນ຺ຕາ ຈງ຺ກມນ຺ຕິ, ສພ຺ພໍ ນ ວຏ຺ຏຕິ, ວີຣິຍສມ຺ປຄ຺ຄຫຕ຺ຖໍ ປນ ສມຓຘມ຺ມໍ ກໂຣນ຺ເຕນ ສຸທ຺ຘຈິຕ຺ເຕນ ຈງ຺ກມິຕຸໍ ວຏ຺ຏຕິ. ‘‘ຫຕ຺ຖໍ ໂຂວິສ຺ສາມາ’’ຕິ ປຖວິຍໍ ຆໍສນ຺ຕິ, ນ ວຏ຺ຏຕິ, ອຆໍສນ຺ເຕນ ປນ ອລ຺ລຫຕ຺ຖໍ ປຖວິຍໍ ຐເປຕ຺ວາ ຣຊໍ ຄເຫຕຸໍ ວຏ຺ຏຕິ.

ເກຈິ ກຓ຺ຑຸກຈ຺ຉຸອາທີຫິ ອາພາຘິກາ ຉິນ຺ນຕຏາທີສຸ ອງ຺ຄປຈ຺ຈງ຺ຄານິ ຆໍສນ຺ຕິ, ນ ວຏ຺ຏຕິ. ຊາຕປຖວິໍ ທຫຕິ ວາ ທຫາເປຕິ ວາ, ປາຈິຕ຺ຕິຍໍ, ອນ຺ຕມໂສ ປຕ຺ຕມ຺ປິ ປຈນ຺ໂຕ ຍຕ຺ຕເກສຸ ຐາເນສຸ ອຄ຺ຄິໍ ເທຕິ ວາ ທາເປຕິ ວາ, ຕຕ຺ຕການິ ປາຈິຕ຺ຕິຍານິ, ຕສ຺ມາ ປຕ຺ຕໍ ປຈນ຺ເຕນປິ ປຸພ຺ເພ ປກ຺ກຏ຺ຐາເນເຍວ ປຈິຕພ຺ໂພ. ອທຑ຺ຒາຍ ປຖວິຍາ ອຄ຺ຄິໍ ຐເປຕຸໍ ນ ວຏ຺ຏຕິ, ປຕ຺ຕປຈນກປາລສ຺ສ ປນ ອຸປຣິ ອຄ຺ຄິໍ ຐເປຕຸໍ ວຏ຺ຏຕິ. ທາຣູນໍ ອຸປຣິ ຐເປຕິ, ໂສ ອຄ຺ຄິ ຕານິ ທຫນ຺ໂຕ ຄນ຺ຕ຺ວາ ປຖວິໍ ທຫຕິ, ນ ວຏ຺ຏຕິ. ອິຏ຺ຐກກປາລາທີສຸປິ ເອເສວ ນໂຍ. ຕຕ຺ຣາປິ ຫິ ອິຏ຺ຐກາທີນໍເຍວ ອຸປຣິ ຐເປຕຸໍ ວຏ຺ຏຕິ. ກສ຺ມາ? ເຕສໍ ອນຸປາທານຕ຺ຕາ. ນ ຫິ ຕານິ ອຄ຺ຄິສ຺ສ ອຸປາທານສງ຺ຂ຺ຍໍ ຄຈ຺ຉນ຺ຕິ, ສຸກ຺ຂຂາຓຸສຸກ຺ຂຣຸກ຺ຂາທີສຸປິ ອຄ຺ຄິໍ ທາຕຸໍ ນ ວຏ຺ຏຕິ. ສເຈ ປນ ‘‘ປຖວິໍ ອປ຺ປຕ຺ຕເມວ ນິພ຺ພາເປຕ຺ວາ ຄມິສ຺ສາມີ’’ຕິ ເທຕິ, ວຏ຺ຏຕິ. ປຈ຺ຉາ ນິພ຺ພາເປຕຸໍ ນ ສກ຺ໂກຕິ, ອວິສຍຕ຺ຕາ ອນາປຕ຺ຕິ. ຕິຓຸກ຺ກໍ ຄເຫຕ຺ວາ ຄຈ຺ຉນ຺ໂຕ ຫຕ຺ເຖ ຑຍ຺ຫມາເນ ຠູມິຍໍ ປາເຕຕິ, ອນາປຕ຺ຕິ. ປຕິຕຏ຺ຐາເນເຍວ ອຸປາທານໍ ທຕ຺ວາ ອຄ຺ຄິໍ ກາຕຸໍ ວຏ຺ຏຕິ. ທຑ຺ຒປຖວິຍາ ຈ ຍຕ຺ຕກໍ ຐານໍ ອຸສຸມາຍ ອນຸຄຕໍ, ສພ຺ພໍ ວິໂກເປຕຸໍ ວຏ຺ຏຕິ.

ໂຍ ປນ ອຊານນໂກ ຠິກ຺ຂຸ ອຣຓິສຫິເຕນ ອຄ຺ຄິໍ ນິພ຺ພຕ຺ເຕຕ຺ວາ ຫຕ຺ເຖນ ອຸກ຺ຂິປິຕ຺ວາ ‘‘ກິໍ ກໂຣມີ’’ຕິ ວທຕິ, ‘‘ຊາເລຫີ’’ຕິ ວຕ຺ຕພ຺ໂພ. ‘‘ຫຕ຺ໂຖ ຑຍ຺ຫຕີ’’ຕິ ວທຕິ, ‘‘ຍຖາ ນ ຑຍ຺ຫຕິ, ຕຖາ ກໂຣຫີ’’ຕິ ວຕ຺ຕພ຺ໂພ. ‘‘ຠູມິຍໍ ປາເຕຫີ’’ຕິ ປນ ນ ວຕ຺ຕພ຺ໂພ. ສເຈ ຫຕ຺ເຖ ຑຍ຺ຫມາເນ ປາເຕຕິ, ‘‘ປຖວິໍ ທຫິສ຺ສາມີ’’ຕິ ອປາຕິຕຕ຺ຕາ ອນາປຕ຺ຕິ, ປຕິຕຏ຺ຐາເນ ປນ ອຄ຺ຄິໍ ກາຕຸໍ ວຏ຺ຏຕິ. ‘‘ອິມສ຺ສ ຖມ຺ຠສ຺ສ ອາວາຏໍ ຊານ, ມຫາມຕ຺ຕິກໍ ຊານ, ຖຸສມຕ຺ຕິກໍ ຊານ, ມຫາມຕ຺ຕິກໍ ເທຫິ, ຖຸສມຕ຺ຕິກໍ ເທຫິ, ມຕ຺ຕິກໍ ອາຫຣ, ປໍສຸໍ ອາຫຣ, ມຕ຺ຕິກາຍ ອຕ຺ໂຖ, ປໍສຸນາ ອຕ຺ໂຖ, ອິມສ຺ສ ຖມ຺ຠສ຺ສ ອາວາຏໍ ກປ຺ປິຍໍ ກໂຣຫິ, ອິມໍ ມຕ຺ຕິກໍ ກປ຺ປິຍໍ ກໂຣຫິ, ອິມໍ ປໍສຸໍ ກປ຺ປິຍໍ ກໂຣຫີ’’ຕິ ເອວໍ ກປ຺ປິຍໂວຫາເຣນ ຍໍ ກິຎ຺ຈິ ກາຣາເປຕຸໍ ວຏ຺ຏຕິ. ອຎ຺ຎວິຫິໂຕ ເກນຈິ ສທ຺ຘິໍ ກິຎ຺ຈິ ກເຖນ຺ໂຕ ປາທງ຺ຄຸຏ຺ຐເກນ ກຕ຺ຕຣຍຏ຺ຐິຍາ ວາ ປຖວິໍ ວິລິຂນ຺ໂຕ ຕິຏ຺ຐຕິ, ເອວໍ ອສຕິຍາ ວິລິຂນ຺ຕສ຺ສ ຠິນ຺ທນ຺ຕສ຺ສ ວາ ອນາປຕ຺ຕິ.

ອິຕິ ປາຬິມຸຕ຺ຕກວິນຍວິນິຈ຺ຉຍສງ຺ຄເຫ

ປຖວີຂຓນວິນິຈ຺ຉຍກຖາ ສມຕ຺ຕາ.