໑໐. ຠຓ຺ຑປຏິສາມນວິນິຈ຺ຉຍກຖາ

໕໓. ຠຓ຺ຑສ຺ສ ປຏິສາມນນ຺ຕິ ປເຣສໍ ຠຓ຺ຑສ຺ສ ໂຄປນໍ. ປເຣສຎ຺ຫິ (ປາຈິ. ອຏ຺ຐ. ໕໐໖) ກປ຺ປິຍວຕ຺ຖຸ ວາ ໂຫຕຸ ອກປ຺ປິຍວຕ຺ຖຸ ວາ, ອນ຺ຕມໂສ ມາຕຸ ກຓ຺ຓປິຬນ຺ຘນໍ ກາລປຓ຺ຓມ຺ປິ ຄິຫິສນ຺ຕກໍ ຠຓ຺ຑາຄາຣິກສີເສນ ປຏິສາເມນ຺ຕສ຺ສ ປາຈິຕ຺ຕິຍໍ. ສເຈ ປນ ມາຕາປິຕູນໍ ສນ຺ຕກໍ ອວສ຺ສໍ ປຏິສາເມຕພ຺ພໍ ກປ຺ປິຍຠຓ຺ຑໍ ໂຫຕິ, ອຕ຺ຕໂນ ອຕ຺ຖາຍ ຄເຫຕ຺ວາ ປຏິສາເມຕພ຺ພໍ. ‘‘ອິທໍ ປຏິສາເມຕ຺ວາ ເທຫີ’’ຕິ ປນ ວຸຕ຺ເຕ ‘‘ນ ວຏ຺ຏຕີ’’ຕິ ປຏິກ຺ຂິປິຕພ຺ພໍ. ສເຈ ‘‘ປຏິສາເມຫີ’’ຕິ ປາເຕຕ຺ວາ ຄຈ຺ຉນ຺ຕິ, ປລິໂພໂຘ ນາມ ໂຫຕິ, ປຏິສາເມຕຸໍ ວຏ຺ຏຕິ. ວິຫາເຣ ກມ຺ມໍ ກໂຣນ຺ຕາ ວຑ຺ຒກີອາທໂຍ ວາ ຣາຊວລ຺ລຠາ ວາ ‘‘ອຕ຺ຕໂນ ອຸປກຣຓຠຓ຺ຑໍ ວາ ສຍນຠຓ຺ຑໍ ວາ ປຏິສາເມຕ຺ວາ ເທຖາ’’ຕິ ວທນ຺ຕິ, ຉນ຺ເທນປິ ຠເຍນປິ ນ ກາຕພ຺ພເມວ, ຄຸຕ຺ຕຏ຺ຐານໍ ປນ ທສ຺ເສຕຸໍ ວຏ຺ຏຕິ, ພລກ຺ກາເຣນ ປາເຕຕ຺ວາ ຄເຕສຸ ຈ ປຏິສາເມຕຸໍ.

ສເຈ (ປາຣາ. ອຏ຺ຐ. ໑.໑໑໑) ອຕ຺ຕໂນ ຫຕ຺ເຖ ປຏິສາມນຕ຺ຖາຍ ຐປິຕໍ ຠຓ຺ຑໍ ສາມິເກນ ‘‘ເທຫິ ເມ ຠຓ຺ຑ’’ນ຺ຕິ ຍາຈິໂຕ ອທາຕຸກາໂມ ‘‘ນາຫໍ ຄຓ຺ຫາມີ’’ຕິ ຠຓຕິ, ສມ຺ປຊານມຸສາວາເທປິ ອທິນ຺ນາທານສ຺ສ ປໂຍຄຕ຺ຕາ ທຸກ຺ກຏໍ. ‘‘ກິໍ ຕຸມ຺ເຫ ຠຓຖ, ເນວິທໍ ມຍ຺ຫໍ ອນຸຣູປໍ, ນ ຕຸມ຺ຫາກ’’ນ຺ຕິອາທີນິ ວທນ຺ຕສ຺ສປິ ທຸກ຺ກຏເມວ. ‘‘ຣໂຫ ມຍາ ເອຕສ຺ສ ຫຕ຺ເຖ ຐປິຕໍ, ນ ອຎ຺ໂຎ ໂກຈິ ຊານາຕິ, ທສ຺ສຕິ ນຸ ໂຂ ເມ, ໂນ’’ຕິ ສາມິໂກ ວິມຕິໍ ອຸປ຺ປາເທຕິ, ຠິກ຺ຂຸສ຺ສ ຖຸລ຺ລຈ຺ຈຍໍ. ຕສ຺ສ ຜຣຸສາທິຠາວໍ ທິສ຺ວາ ສາມິໂກ ‘‘ນ ມຍ຺ຫໍ ທສ຺ສຕີ’’ຕິ ຘຸຣໍ ນິກ຺ຂິປຕິ, ຕຕ຺ຣ ສຈາຍໍ ຠິກ຺ຂຸ ‘‘ກິລເມຕ຺ວາ ນໍ ທສ຺ສາມີ’’ຕິ ທາເນ ສອຸສ຺ສາໂຫ, ຣກ຺ຂຕິ ຕາວ. ສເຈປິ ໂສ ທາເນ ນິຣຸສ຺ສາໂຫ, ຠຓ຺ຑສາມິໂກ ປນ ຄຫເຓ ສອຸສ຺ສາໂຫ, ຣກ຺ຂຕິເຍວ. ຍທິ ປນ ຕສ຺ມິໍ ທາເນ ນິຣຸສ຺ສາໂຫ ຠຓ຺ຑສາມິໂກ ‘‘ນ ມຍ຺ຫໍ ທສ຺ສຕີ’’ຕິ ຘຸຣໍ ນິກ຺ຂິປຕິ, ເອວໍ ອຸຠິນ຺ນໍ ຘຸຣນິກ຺ເຂເປນ ຠິກ຺ຂຸໂນ ປາຣາຊິກໍ. ຍທິປິ ມຸເຂນ ‘‘ທສ຺ສາມີ’’ຕິ ວທຕິ, ຈິຕ຺ເຕນ ປນ ອທາຕຸກາໂມ, ເອວມ຺ປິ ສາມິກສ຺ສ ຘຸຣນິກ຺ເຂເປ ປາຣາຊິກໍ. ຕໍ ປນ ສງ຺ໂຄປນຕ຺ຖາຍ ອຕ຺ຕໂນ ຫຕ຺ເຖ ປເຣຫິ ຐປິຕໍ ຠຓ຺ຑໍ ອຄຸຕ຺ຕເທສໂຕ ຐານາ ຈາເວຕ຺ວາ ຄຸຕ຺ຕຏ຺ຐາເນ ຐປນຕ຺ຖາຍ ຫຣໂຕ ອນາປຕ຺ຕິ. ເຖຍ຺ຍຈິຕ຺ເຕນປິ ຐານາ ຈາເວນ຺ຕສ຺ສ ອວຫາໂຣ ນຕ຺ຖິ. ກສ຺ມາ? ອຕ຺ຕໂນ ຫຕ຺ເຖ ນິກ຺ຂິຕ຺ຕຕ຺ຕາ, ຠຓ຺ຑເທຍ຺ຍໍ ປນ ໂຫຕິ. ເຖຍ຺ຍຈິຕ຺ເຕນ ປຣິຠຸຎ຺ຊໂຕປິ ເອເສວ ນໂຍ.

໕໔. ປຎ຺ຈນ຺ນໍ ສຫຘມ຺ມິການໍ ສນ຺ຕກໍ ປນ ຍໍ ກິຎ຺ຈິ ປຣິກ຺ຂາຣໍ ປຏິສາເມຕຸໍ ວຏ຺ຏຕິ. ສເຈ ອາຄນ຺ຕຸໂກ ຠິກ຺ຂຸ ອາວາສິການໍ ຈີວຣກມ຺ມໍ ກໂຣນ຺ຕານໍ ສມີເປ ປຕ຺ຕຈີວຣໍ ຐເປຕ຺ວາ ‘‘ເອເຕ ສງ຺ໂຄເປສ຺ສນ຺ຕີ’’ຕິ ມຎ຺ຎມາໂນ ນຫາຍິຕຸໍ ວາ ອຎ຺ຎຕ຺ຣ ວາ ຄຈ຺ຉຕິ, ສເຈ ຕໍ ອາວາສິກາ ສງ຺ໂຄເປນ຺ຕິ, ອິຈ຺ເຈຕໍ ກຸສລໍ. ໂນ ເຈ, ນຏ຺ເຐ ຄີວາ ນ ໂຫຕິ. ສເຈປິ ໂສ ‘‘ອິທໍ, ຠນ຺ເຕ, ຐເປຖາ’’ຕິ ວຕ຺ວາ ຄຈ຺ຉຕິ, ອິຕເຣ ຈ ກິຈ຺ຈປສຸຕຕ຺ຕາ ນ ຊານນ຺ຕິ, ເອເສວ ນໂຍ. ອຖາປິ ເຕ ‘‘ອິທໍ, ຠນ຺ເຕ, ຐເປຖາ’’ຕິ ວຸຕ຺ຕາ ‘‘ມຍໍ ພ຺ຍາວຏາ’’ຕິ ປຏິກ຺ຂິປນ຺ຕິ, ອິຕໂຣ ຈ ‘‘ອວສ຺ສໍ ຐເປສ຺ສນ຺ຕີ’’ຕິ ອນາທິຍິຕ຺ວາ ຄຈ຺ຉຕິ, ເອເສວ ນໂຍ. ສເຈ ປນ ເຕ ເຕນ ຍາຈິຕາ ວາ ອຍາຈິຕາ ວາ ‘‘ມຍໍ ຐເປສ຺ສາມ, ຕ຺ວໍ ຄຈ຺ຉາ’’ຕິ ວທນ຺ຕິ, ຕໍ ສງ຺ໂຄປິຕພ຺ພໍ. ໂນ ເຈ ສງ຺ໂຄເປນ຺ຕິ, ນຏ຺ເຐ ຄີວາ. ກສ຺ມາ? ສມ຺ປຏິຈ຺ຉິຕຕ຺ຕາ.

ໂຍ ຠິກ຺ຂຸ ຠຓ຺ຑາຄາຣິໂກ ຫຸຕ຺ວາ ປຈ຺ຈູສສມເຍ ເອວ ຠິກ຺ຂູນໍ ປຕ຺ຕຈີວຣານິ ເຫຏ຺ຐາປາສາທໍ ໂອໂຣເປຕ຺ວາ ທ຺ວາຣໍ ອປິທຫິຕ຺ວາ ເຕສມ຺ປິ ອນາໂຣເຈຕ຺ວາວ ທູເຣ ຠິກ຺ຂາຈາຣໍ ຄຈ຺ຉຕິ, ຕານິ ເຈ ໂຈຣາ ຫຣນ຺ຕິ, ຕສ຺ເສວ ຄີວາ. ໂຍ ປນ ຠິກ຺ຂຸ ຠິກ຺ຂູຫິ ‘‘ໂອໂຣເປຖ, ຠນ຺ເຕ, ປຕ຺ຕຈີວຣານິ, ກາໂລ ສລາກຄ຺ຄຫຓສ຺ສາ’’ຕິ ວຸຕ຺ໂຕ ‘‘ສມາຄຕາຕ຺ຖາ’’ຕິ ປຸຈ຺ຉິຕ຺ວາ ‘‘ອາມ ສມາຄຕາມ຺ຫາ’’ຕິ ວຸຕ຺ເຕ ປຕ຺ຕຈີວຣານິ ນີຫຣິຕ຺ວາ ນິກ຺ຂິປິຕ຺ວາ ຠຓ຺ຑາຄາຣທ຺ວາຣໍ ພນ຺ຘິຕ຺ວາ ‘‘ຕຸມ຺ເຫ ປຕ຺ຕຈີວຣານິ ຄເຫຕ຺ວາ ເຫຏ຺ຐາປາສາທທ຺ວາຣໍ ປຏິຊຄ຺ຄິຕ຺ວາ ຄຈ຺ເຉຍ຺ຍາຖາ’’ຕິ ວຕ຺ວາ ຄຈ຺ຉຕິ. ຕຕ຺ຣ ເຈໂກ ອລສຊາຕິໂກ ຠິກ຺ຂຸ ຠິກ຺ຂູສຸ ຄເຕສຸ ປຈ຺ຉາ ອກ຺ຂີນິ ປຸຎ຺ຉນ຺ໂຕ ອຸຏ຺ຐຫິຕ຺ວາ ອຸທກຏ຺ຐານໍ ມຸຂໂຘວນຕ຺ຖໍ ຄຈ຺ຉຕິ, ຕໍ ຂຓໍ ທິສ຺ວາ ໂຈຣາ ຕສ຺ສ ປຕ຺ຕຈີວຣໍ ຫຣນ຺ຕິ, ສຸຫຏໍ, ຠຓ຺ຑາຄາຣິກສ຺ສ ຄີວາ ນ ໂຫຕິ.

ສເຈປິ ໂກຈິ ຠຓ຺ຑາຄາຣິກສ຺ສ ອນາໂຣເຈຕ຺ວາວ ຠຓ຺ຑາຄາເຣ ອຕ຺ຕໂນ ປຣິກ຺ຂາຣໍ ຐເປຕິ, ຕສ຺ມິມ຺ປິ ນຏ຺ເຐ ຠຓ຺ຑາຄາຣິກສ຺ສ ຄີວາ ນ ໂຫຕິ. ສເຈ ປນ ຠຓ຺ຑາຄາຣິໂກ ຕໍ ທິສ຺ວາ ‘‘ອຏ຺ຐາເນ ຐປິຕ’’ນ຺ຕິ ຄເຫຕ຺ວາ ຐເປຕິ, ນຏ຺ເຐ ຕສ຺ເສວ ຄີວາ. ສເຈປິ ຐປິຕຠິກ຺ຂຸນາ ‘‘ມຍາ, ຠນ຺ເຕ, ອີທິໂສ ນາມ ປຣິກ຺ຂາໂຣ ຐປິໂຕ, ອຸປຘາເຣຍ຺ຍາຖາ’’ຕິ ວຸຕ຺ໂຕ ‘‘ສາຘູ’’ຕິ ສມ຺ປຏິຈ຺ຉຕິ, ທຸນ຺ນິກ຺ຂິຕ຺ຕໍ ວາ ມຎ຺ຎມາໂນ ອຎ຺ຎສ຺ມິໍ ຐາເນ ຐເປຕິ, ນຏ຺ເຐ ຕສ຺ເສວ ຄີວາ. ‘‘ນາຫໍ ຊານາມີ’’ຕິ ປຏິກ຺ຂິປນ຺ຕສ຺ສ ປນ ນຕ຺ຖິ ຄີວາ. ໂຍປິ ຕສ຺ສ ປສ຺ສນ຺ຕສ຺ເສວ ຐເປຕິ, ຠຓ຺ຑາຄາຣິກຎ຺ຈ ນ ສມ຺ປຏິຈ຺ຉາເປຕິ, ນຏ຺ຐໍ ສຸນຏ຺ຐເມວ. ສເຈ ປນ ນໍ ຠຓ຺ຑາຄາຣິໂກ ອຎ຺ຎຕ຺ຣ ຐເປຕິ, ນຏ຺ເຐ ຄີວາ. ສເຈ ຠຓ຺ຑາຄາຣໍ ສຸຄຸຕ຺ຕໍ, ສພ຺ໂພ ສງ຺ຆສ຺ສ ເຈຕິຍສ຺ສ ຈ ປຣິກ຺ຂາໂຣ ຕຕ຺ເຖວ ຐປີຍຕິ, ຠຓ຺ຑາຄາຣິໂກ ຈ ພາໂລ ອພ຺ຍຕ຺ໂຕ ທ຺ວາຣໍ ວິວຣິຕ຺ວາ ຘມ຺ມກຖໍ ວາ ໂສຕຸໍ ອຎ຺ຎໍ ວາ ກິຎ຺ຈິ ກາຕຸໍ ກຕ຺ຖຈິ ຄຈ຺ຉຕິ, ຕໍ ຂຓໍ ທິສ຺ວາ ຍຕ຺ຕກໍ ໂຈຣາ ຫຣນ຺ຕິ, ສພ຺ພໍ ຕສ຺ສ ຄີວາ. ຠຓ຺ຑາຄາຣໂຕ ນິກ຺ຂມິຕ຺ວາ ພຫິ ຈງ຺ກມນ຺ຕສ຺ສ ວາ ທ຺ວາຣໍ ວິວຣິຕ຺ວາ ສຣີຣໍ ອຸຕຸໍ ຄາຫາເປນ຺ຕສ຺ສ ວາ ຕຕ຺ເຖວ ສມຓຘມ຺ມານຸໂຍເຄນ ນິສິນ຺ນສ຺ສ ວາ ຕຕ຺ເຖວ ນິສີທິຕ຺ວາ ເກນຈິ ກມ຺ເມນ ພ຺ຍາວຏສ຺ສ ວາ ອຸຈ຺ຈາຣປສ຺ສາວປີຬິຕສ຺ສປິ ສໂຕ ຕຕ຺ເຖວ ອຸປຈາເຣ ວິຊ຺ຊມາເນ ພຫິ ຄຈ຺ຉໂຕ ວາ ອຎ຺ເຎນ ວາ ເກນຈິ ອາກາເຣນ ປມຕ຺ຕສ຺ສ ສໂຕ ທ຺ວາຣໍ ວິວຣິຕ຺ວາ ວາ ວິວຏເມວ ປວິສິຕ຺ວາ ວາ ສນ຺ຘິໍ ຉິນ຺ທິຕ຺ວາ ວາ ຍຕ຺ຕກໍ ຕສ຺ສ ປມາທປຈ຺ຈຍາ ໂຈຣາ ຫຣນ຺ຕິ, ສພ຺ພໍ ຕສ຺ເສວ ຄີວາ. ‘‘ອຸຓ຺ຫສມເຍ ປນ ວາຕປານໍ ວິວຣິຕ຺ວາ ນິປຊ຺ຊິຕຸໍ ວຏ຺ຏຕີ’’ຕິ ວທນ຺ຕິ. ອຸຈ຺ຈາຣປີຬິຕສ຺ສ ປນ ຕສ຺ມິໍ ອຸປຈາເຣ ອສຕິ ອຎ຺ຎຕ຺ຖ ຄຈ຺ຉນ຺ຕສ຺ສ ຄິລານປກ຺ເຂ ຐິຕຕ຺ຕາ ອວິສໂຍ, ຕສ຺ມາ ຄີວາ ນ ໂຫຕິ.

໕໕. ໂຍ ປນ ອນ຺ໂຕ ອຸຓ຺ຫປີຬິໂຕ ທ຺ວາຣໍ ສຸຄຸຕ຺ຕໍ ກຕ຺ວາ ພຫິ ນິກ຺ຂມຕິ, ໂຈຣາ ຕໍ ຄເຫຕ຺ວາ ‘‘ທ຺ວາຣໍ ວິວຣາ’’ຕິ ວທນ຺ຕິ, ຍາວຕຕິຍໍ ນ ວິວຣິຕພ຺ພໍ. ຍທິ ປນ ເຕ ໂຈຣາ ‘‘ສເຈ ນ ວິວຣສິ, ຕຎ຺ຈ ມາເຣສ຺ສາມ, ທ຺ວາຣຎ຺ຈ ຠິນ຺ທິຕ຺ວາ ປຣິກ຺ຂາຣໍ ຫຣິສ຺ສາມາ’’ຕິ ຜຣສຸອາທີນິ ອຸກ຺ຂິປນ຺ຕິ, ‘‘ມຍິ ຈ ມເຕ ສງ຺ຆສ຺ສ ຈ ເສນາສເນ ວິນຏ຺ເຐ ຄຸໂຓ ນຕ຺ຖີ’’ຕິ ວິວຣິຕຸໍ ວຏ຺ຏຕິ. ອິຘາປິ ‘‘ອວິສຍຕ຺ຕາ ຄີວາ ນຕ຺ຖີ’’ຕິ ວທນ຺ຕິ. ສເຈ ໂກຈິ ອາຄນ຺ຕຸໂກ ກຸຎ຺ຈິກໍ ວາ ເທຕິ, ທ຺ວາຣໍ ວາ ວິວຣຕິ, ຍຕ຺ຕກໍ ໂຈຣາ ຫຣນ຺ຕິ, ສພ຺ພໍ ຕສ຺ສ ຄີວາ. ສງ຺ເຆນ ຠຓ຺ຑາຄາຣໍ ຄຸຕ຺ຕຕ຺ຖາຍ ສູຈິຍນ຺ຕກຎ຺ຈ ກຸຎ຺ຈິກມຸທ຺ທິກາ ຈ ໂຍເຊຕ຺ວາ ທິນ຺ນາ ໂຫຕິ, ຠຓ຺ຑາຄາຣິໂກ ຆຏິກມຕ຺ຕໍ ທຕ຺ວາ ນິປຊ຺ຊຕິ, ໂຈຣາ ວິວຣິຕ຺ວາ ປຣິກ຺ຂາຣໍ ຫຣນ຺ຕິ, ຕສ຺ເສວ ຄີວາ. ສູຈິຍນ຺ຕກຎ຺ຈ ກຸຎ຺ຈິກມຸທ຺ທິກຎ຺ຈ ໂຍເຊຕ຺ວາ ນິປນ຺ນໍ ປເນຕໍ ສເຈ ໂຈຣາ ອາຄນ຺ຕ຺ວາ ‘‘ທ຺ວາຣໍ ວິວຣາຫີ’’ຕິ ວທນ຺ຕິ, ຕຕ຺ຖ ປຸຣິມນເຍເນວ ປຏິປຊ຺ຊິຕພ຺ພໍ. ເອວໍ ສຸຄຸຕ຺ຕໍ ກຕ຺ວາ ນິປນ຺ເນ ປນ ສເຈ ຠິຕ຺ຕິໍ ວາ ຉທນໍ ວາ ຠິນ຺ທິຕ຺ວາ ອຸມງ຺ເຄນ ວາ ປວິສິຕ຺ວາ ຫຣນ຺ຕິ, ນ ຕສ຺ສ ຄີວາ.

ສເຈ ຠຓ຺ຑາຄາເຣ ອຎ຺ເຎປິ ເຖຣາ ວສນ຺ຕິ, ວິວເຏ ທ຺ວາເຣ ອຕ຺ຕໂນ ອຕ຺ຕໂນ ປຣິກ຺ຂາຣໍ ຄເຫຕ຺ວາ ຄຈ຺ຉນ຺ຕິ, ຠຓ຺ຑາຄາຣິໂກ ເຕສຸ ຄເຕສຸ ທ຺ວາຣໍ ນ ຊຄ຺ຄຕິ, ສເຈ ຕຕ຺ຖ ກິຎ຺ຈິ ອວຫຣີຍຕິ, ຠຓ຺ຑາຄາຣິກສ຺ສ ອິສ຺ສຣວຕາຍ ຠຓ຺ຑາຄາຣິກສ຺ເສວ ຄີວາ, ເຖເຣຫິ ປນ ສຫາເຍຫິ ຠວິຕພ຺ພໍ. ອຍຎ຺ຫິ ສາມີຈິ. ຍທິ ຠຓ຺ຑາຄາຣິໂກ ‘‘ຕຸມ຺ເຫ ພຫິ ຐຕ຺ວາ ຕຸມ຺ຫາກໍ ປຣິກ຺ຂາຣໍ ຄຓ຺ຫຖ, ມາ ປວິສິຕ຺ຖາ’’ຕິ ວທຕິ, ເຕສຎ຺ຈ ເອໂກ ໂລລມຫາເຖໂຣ ສາມເຓເຣຫິ ເຈວ ອຸປຏ຺ຐາເກຫິ ຈ ສທ຺ຘິໍ ຠຓ຺ຑາຄາຣໍ ປວິສິຕ຺ວາ ນິສີທຕິ ເຈວ ນິປຊ຺ຊຕິ ຈ, ຍຕ຺ຕກໍ ຠຓ຺ຑໍ ນສ຺ສຕິ, ສພ຺ພໍ ຕສ຺ສ ຄີວາ, ຠຓ຺ຑາຄາຣິເກນ ປນ ອວເສສເຖເຣຫິ ຈ ສຫາເຍຫິ ຠວິຕພ຺ພໍ. ອຖ ຠຓ຺ຑາຄາຣິໂກວ ໂລລສາມເຓເຣ ຈ ອຸປຏ຺ຐາເກ ຈ ຄເຫຕ຺ວາ ຠຓ຺ຑາຄາເຣ ນິສີທຕິ ເຈວ ນິປຊ຺ຊຕິ ຈ, ຍຕ຺ຕກໍ ນສ຺ສຕິ, ສພ຺ພໍ ຕສ຺ເສວ ຄີວາ. ຕສ຺ມາ ຠຓ຺ຑາຄາຣິເກເນວ ຕຕ຺ຖ ວສິຕພ຺ພໍ, ອວເສເສຫິ ອປ຺ເປວ ຣຸກ຺ຂມູເລ ວສິຕພ຺ພໍ, ນ ຈ ຠຓ຺ຑາຄາເຣຕິ.

໕໖. ເຍ ປນ ອຕ຺ຕໂນ ອຕ຺ຕໂນ ສຠາຄຠິກ຺ຂູນໍ ວສນຄພ຺ເຠສຸ ປຣິກ຺ຂາຣໍ ຐເປນ຺ຕິ, ປຣິກ຺ຂາເຣ ນຏ຺ເຐ ເຍຫິ ຐປິໂຕ, ເຕສໍເຍວ ຄີວາ, ອິຕເຣຫິ ປນ ສຫາເຍຫິ ຠວິຕພ຺ພໍ. ຍທິ ປນ ສງ຺ໂຆ ຠຓ຺ຑາຄາຣິກສ຺ສ ວິຫາເຣເຍວ ຍາຄຸຠຕ຺ຕໍ ທາເປຕິ, ໂສ ຈ ຠິກ຺ຂາຈາຣຕ຺ຖາຍ ຄາມໍ ຄຈ຺ຉຕິ, ນຏ຺ຐໍ ຕສ຺ເສວ ຄີວາ. ຠິກ຺ຂາຈາຣໍ ປວິສນ຺ເຕຫິ ອຕິເຣກຈີວຣໍ ຣກ຺ຂຓຕ຺ຖາຍ ຐປິຕວິຫາຣວາຣິກສ຺ສປິ ຍາຄຸຠຕ຺ຕໍ ວາ ນິວາປໍ ວາ ລຠມານສ຺ເສວ ຠິກ຺ຂາຈາຣໍ ຄຈ຺ຉໂຕ ຍໍ ຕຕ຺ຖ ນສ຺ສຕິ, ສພ຺ພໍ ຄີວາ. ນ ເກວລຎ຺ຈ ເອຕ຺ຕກເມວ, ຠຓ຺ຑາຄາຣິກສ຺ສ ວິຍ ຍໍ ຕສ຺ສ ປມາທປຈ຺ຈຍາ ນສ຺ສຕິ, ສພ຺ພໍ ຄີວາ.

ສເຈ ວິຫາໂຣ ມຫາ ໂຫຕິ, ອຎ຺ຎໍ ປເທສໍ ຣກ຺ຂິຕຸໍ ຄຈ຺ຉນ຺ຕສ຺ສ ອຎ຺ຎສ຺ມິໍ ປເທເສ ນິກ຺ຂິຕ຺ຕໍ ຫຣນ຺ຕິ, ອວິສຍຕ຺ຕາ ຄີວາ ນ ໂຫຕິ. ອີທິເສ ປນ ວິຫາເຣ ເວມຊ຺ເຌ ສພ຺ເພສໍ ໂອສຣຓຏ຺ຐາເນ ປຣິກ຺ຂາເຣ ຐເປຕ຺ວາ ນິສີທິຕພ຺ພໍ, ວິຫາຣວາຣິກາ ວາ ທ຺ເວ ຕໂຍ ຐເປຕພ຺ພາ. ສເຈ ເຕສມ຺ປິ ອປ຺ປມຕ຺ຕານໍ ອິໂຕ ຈິໂຕ ຈ ຣກ຺ຂຕໍເຍວ ກິຎ຺ຈິ ນສ຺ສຕິ, ຄີວາ ນ ໂຫຕິ. ວິຫາຣວາຣິເກ ພນ຺ຘິຕ຺ວາ ຫຣິຕຠຓ຺ຑມ຺ປິ ໂຈຣານໍ ປຏິປຖໍ ຄເຕສຸ ອຎ຺ເຎນ ມຄ຺ເຄນ ຫຣິຕຠຓ຺ຑມ຺ປິ ນ ເຕສໍ ຄີວາ. ສເຈ ວິຫາຣວາຣິການໍ ວິຫາເຣ ທາຕພ຺ພໍ ຍາຄຸຠຕ຺ຕໍ ວາ ນິວາໂປ ວາ ນ ໂຫຕິ, ເຕຫິ ປຕ຺ຕພ຺ພລາຠໂຕ ອຕິເຣກາ ທ຺ເວ ຕິສ຺ໂສ ຍາຄຸສລາກາ ເຕສໍ ປໂຫນກຠຕ຺ຕສລາກາ ຈ ຐເປຕຸໍ ວຏ຺ຏຕິ, ນິພທ຺ຘໍ ກຕ຺ວາ ປນ ນ ຐເປຕພ຺ພາ. ມນຸສ຺ສາ ຫິ ວິປ຺ປຏິສາຣິໂນ ໂຫນ຺ຕິ ‘‘ວິຫາຣວາຣິກາເຍວ ອມ຺ຫາກໍ ຠຕ຺ຕໍ ຠຸຎ຺ຊນ຺ຕີ’’ຕິ, ຕສ຺ມາ ປຣິວຕ຺ເຕຕ຺ວາ ປຣິວຕ຺ເຕຕ຺ວາ ຐເປຕພ຺ພາ. ສເຈ ເຕສໍ ສຠາຄາ ສລາກຠຕ຺ຕາທີນິ ອາຫຣິຕ຺ວາ ເທນ຺ຕິ, ອິຈ຺ເຈຕໍ ກຸສລໍ. ໂນ ເຈ ເທນ຺ຕິ, ວາຣໍ ຄາຫາເປຕ຺ວາ ນີຫຣາເປຕພ຺ພານິ. ສເຈ ວິຫາຣວາຣິໂກ ທ຺ເວ ຕິສ຺ໂສ ຍາຄຸສລາກາ ຈ ຈຕ຺ຕາຣິ ປຎ຺ຈ ສລາກຠຕ຺ຕານິ ຈ ລຠມາໂນ ຠິກ຺ຂາຈາຣໍ ຄຈ຺ຉຕິ, ຠຓ຺ຑາຄາຣິກສ຺ສ ວິຍ ສພ຺ພໍ ນຏ຺ຐໍ ຄີວາ ໂຫຕິ. ສເຈ ສງ຺ຆສ຺ສ ວິຫາຣປາລານໍ ທາຕພ຺ພໍ ຠຕ຺ຕໍ ວາ ນິວາໂປ ວາ ນຕ຺ຖິ, ຠິກ຺ຂູ ວິຫາຣວາຣໍ ຄເຫຕ຺ວາ ອຕ຺ຕໂນ ອຕ຺ຕໂນ ນິສ຺ສິຕເກ ວິຫາຣໍ ຊຄ຺ຄາເປນ຺ຕິ, ສມ຺ປຕ຺ຕວາຣໍ ອຄ຺ຄເຫຕຸໍ ນ ລຠຕິ. ຍຖາ ອຎ຺ເຎ ຠິກ຺ຂູ ກໂຣນ຺ຕິ, ຕເຖວ ກາຕພ຺ພໍ. ຠິກ຺ຂູຫິ ປນ ອສຫາຍສ຺ສ ວາ ອທຸຕິຍສ຺ສ ວາ ຍສ຺ສ ສຠາໂຄ ຠິກ຺ຂຸ ຠຕ຺ຕໍ ອາເນຕ຺ວາ ທາຕາ ນຕ຺ຖິ, ເອວຣູປສ຺ສ ວາໂຣ ນ ປາເປຕພ຺ໂພ.

ຍມ຺ປິ ປາກວຏ຺ຏຕ຺ຖາຍ ວິຫາເຣ ຐເປນ຺ຕິ, ຕໍ ຄເຫຕ຺ວາ ອຸປຊີວນ຺ເຕນ ຐາຕພ຺ພໍ. ໂຍ ຕໍ ນ ອຸປຊີວຕິ, ໂສ ວາຣໍ ນ ຄາຫາເປຕພ຺ໂພ. ຜລາຜລຕ຺ຖາຍປິ ວິຫາເຣ ຠິກ຺ຂຸໍ ຐເປນ຺ຕິ, ຊຄ຺ຄິຕ຺ວາ ໂຄເປຕ຺ວາ ຜລວາເຣນ ຠາເຊຕ຺ວາ ຂາທນ຺ຕິ. ໂຍ ຕານິ ຂາທຕິ, ເຕນ ຐາຕພ຺ພໍ, ອນຸປຊີວນ຺ໂຕ ນ ຄາຫາເປຕພ຺ໂພ. ເສນາສນມຎ຺ຈປີຐປຈ຺ຈຕ຺ຖຣຓຣກ຺ຂຓຕ຺ຖາຍປິ ຐເປນ຺ຕິ, ອາວາເສ ວສນ຺ເຕນ ຐາຕພ຺ພໍ, ອພ຺ໂຠກາສິໂກ ປນ ຣຸກ຺ຂມູລິໂກ ວາ ນ ຄາຫາເປຕພ຺ໂພ. ເອໂກ ນວໂກ ໂຫຕິ, ພຫຸສ຺ສຸໂຕ ປນ ພຫູນໍ ຘມ຺ມໍ ວາເຈຕິ, ປຣິປຸຈ຺ຉໍ ເທຕິ, ປາຬິໍ ວຓ຺ເຓຕິ, ຘມ຺ມກຖໍ ກເຖຕິ, ສງ຺ຆສ຺ສ ຠາຣໍ ນິຕ຺ຖຣຕິ, ອຍໍ ລາຠໍ ປຣິຠຸຎ຺ຊນ຺ໂຕປິ ອາວາເສ ວສນ຺ໂຕປິ ວາຣໍ ນ ຄາຫາເປຕພ຺ໂພ. ‘‘ປຸຣິສວິເສໂສ ນາມ ຎາຕພ຺ໂພ’’ຕິ ວທນ຺ຕິ. ອຸໂປສຖາຄາຣປຏິມາຆຣຊຄ຺ຄນກສ຺ສ ປນ ທິຄຸຓໍ ຍາຄຸຠຕ຺ຕໍ, ເທວສິກໍ ຕຓ຺ຑຸລນາຬິ, ສໍວຈ຺ຉເຣ ຕິຈີວຣໍ ທສວີສຄ຺ຆນກໍ ກປ຺ປິຍຠຓ຺ຑຎ຺ຈ ທາຕພ຺ພໍ. ສເຈ ປນ ຕສ຺ສ ຕໍ ລຠມານສ຺ເສວ ປມາເທນ ຕຕ຺ຖ ກິຎ຺ຈິ ນສ຺ສຕິ, ສພ຺ພໍ ຄີວາ. ພນ຺ຘິຕ຺ວາ ພລກ຺ກາເຣນ ອຈ຺ຉິນ຺ນໍ, ນ ຄີວາ. ຕຕ຺ຖ ເຈຕິຍສ຺ສ ວາ ສງ຺ຆສ຺ສ ວາ ສນ຺ຕເກນ ເຈຕິຍສ຺ສ ສນ຺ຕກໍ ຣກ຺ຂາເປຕຸໍ ວຏ຺ຏຕິ, ເຈຕິຍສ຺ສ ສນ຺ຕເກນ ສງ຺ຆສ຺ສ ສນ຺ຕກໍ ຣກ຺ຂາເປຕຸໍ ນ ວຏ຺ຏຕິ. ຍໍ ປນ ເຈຕິຍສ຺ສ ສນ຺ຕເກນ ສທ຺ຘິໍ ສງ຺ຆສ຺ສ ສນ຺ຕກໍ ຐປິຕໍ ໂຫຕິ, ຕໍ ເຈຕິຍສນ຺ຕເກ ຣກ຺ຂາປິເຕ ຣກ຺ຂິຕເມວ ໂຫຕີຕິ ເອວໍ ວຏ຺ຏຕິ. ປກ຺ຂວາເຣນ ອຸໂປສຖາຄາຣາທີນິ ຣກ຺ຂໂຕປິ ປມາທວເສນ ນຏ຺ຐໍ ຄີວາເຍວາຕິ.

ອິຕິ ປາຬິມຸຕ຺ຕກວິນຍວິນິຈ຺ຉຍສງ຺ຄເຫ

ຠຓ຺ຑປຏິສາມນວິນິຈ຺ຉຍກຖາ ສມຕ຺ຕາ.