໙. ຈີວຣວິປ຺ປວາສວິນິຈ຺ຉຍກຖາ

໕໑. ເອວໍ ອຘິຏ຺ຐານວິກປ຺ປນວິນິຈ຺ຉຍກຖໍ ທສ຺ເສຕ຺ວາ ອິທານິ ຈີວເຣນ ວິນາວາສວິນິຈ຺ຉຍກຣຓໍ ທສ຺ເສຕຸໍ ‘‘ຈີວເຣນວິນາວາໂສ’’ຕ຺ຍາທິມາຫ. ຕຕ຺ຖ ຈີຍຕີຕິ ຈີວຣໍ, ຈຍໍ ສຎ຺ຈຍໍ ກຣີຍຕີຕິ ອຕ຺ໂຖ, ອຣິຍທ຺ຘໂຊ ວຕ຺ຖວິເສໂສ. ອິຘ ປນ ຕິຈີວຣາຘິຏ຺ຐາເນນ ອຘິຏ຺ຐຫິຕ຺ວາ ຘາຣິຕໍ ຈີວຣຕ຺ຕຍເມວ. ວິນາຕິ ວຊ຺ຊນຕ຺ເຖ ນິປາໂຕ. ວສນໍ ວາໂສ, ວິນາ ວາໂສ ວິນາວາໂສ, ຈີວເຣນ ວິນາວາໂສ ຈີວຣວິນາວາໂສ, ‘‘ຈີວຣວິປ຺ປວາໂສ’’ຕິ ວຕ຺ຕພ຺ເພ ວຕ຺ຕິຈ຺ຉາວເສນ, ຄາຖາປາທປູຣຓຕ຺ຖາຍ ວາ ອລຸຕ຺ຕສມາສໍ ກຕ຺ວາ ເອວໍ ວຸຕ຺ຕນ຺ຕິ ທຏ຺ຐພ຺ພໍ. ຕຖາ ຈ ວກ຺ຂຕິ ‘‘ຕິຈີວຣາຘິຏ຺ຐາເນນ…ເປ… ວິປ຺ປວາໂສ’’ຕິ, ‘‘ອິມໍ ສງ຺ຆາຏິໍ ອຘິຏ຺ຐາມິ, ອິມໍ ອຸຕ຺ຕຣາສງ຺ຄໍ ອຘິຏ຺ຐາມິ, ອິມໍ ອນ຺ຕຣວາສກໍ ອຘິຏ຺ຐາມີ’’ຕິ ເອວໍ ນາເມນ ອຘິຏ຺ຐິຕານໍ ຕິຓ຺ຓໍ ຈີວຣານໍ ເອເກເກນ ວິປ຺ປວາໂສຕິ ອຕ຺ໂຖ, ເອເກນປິ ວິນາ ວສິຕຸໍ ນ ວຏ຺ຏຕິ, ວສນ຺ຕສ຺ສ ຠິກ຺ຂຸໂນ ສຫ ອຣຸຓຸຄ຺ຄມນາ ຈີວຣໍ ນິສ຺ສຄ຺ຄິຍໍ ໂຫຕິ, ປາຈິຕ຺ຕິຍຎ຺ຈ ອາປຊ຺ຊຕີຕິ ສມ຺ພນ຺ໂຘ. ວສິຕພ຺ພນ຺ຕິ ເອຕ຺ຖ ວສນກິຣິຍາ ຈຕຸອິຣິຍາປຖສາຘາຣຓາ, ຕສ຺ມາ ກາຍລຄ຺ຄໍ ວາ ໂຫຕຸ ອລຄ຺ຄໍ ວາ, ອຑ຺ຒເຕຍ຺ຍຣຕນສ຺ສ ປເທສສ຺ສ ອນ຺ໂຕ ກຕ຺ວາ ຕິຏ຺ຐນ຺ໂຕປິ ຈຣນ຺ໂຕປິ ນິສິນ຺ໂນປິ ນິປນ຺ໂນປິ ຫຕ຺ຖປາເສ ກຕ຺ວາ ວສນ຺ໂຕ ນາມ ໂຫຕິ.

ເອວໍ ສາມຎ຺ຎໂຕ ອວິປ຺ປວາສລກ຺ຂຓໍ ທສ຺ເສຕ຺ວາ ອິທານິ ຄາມາທິປນ຺ນຣໂສກາສວເສນ ວິເສສໂຕ ທສ຺ເສຕຸມາຫ ‘‘ຄາມິ’’ຈ຺ຈາທິ. ຕຕ຺ຖ ຄາມນິເວສນານິ ປາກຏາເນວ. ອຸໂທສິໂຕ ນາມ ຍານາທີນໍ ຠຓ຺ຑານໍ ສາລາ. ອຏ຺ໂຏ ນາມ ປຏິຣາຊາທິປຏິພາຫນຕ຺ຖໍ ອິຏ຺ຐກາຫິ ກໂຕ ພຫລຠິຕ຺ຕິໂກ ຈຕຸປຎ຺ຈຠູມິໂກ ປຕິສ຺ສຍວິເສໂສ. ມາໂຬ ນາມ ເອກກູຏສງ຺ຄຫິໂຕ ຈຕຸຣສ຺ສປາສາໂທ. ປາສາໂທ ນາມ ທີຆປາສາໂທ. ຫມ຺ມິຍໍ ນາມ ມຸຓ຺ຑຈ຺ຉທນປາສາໂທ, ມຸຓ຺ຑຈ຺ຉທນປາສາໂທຕິ ຈ ຈນ຺ທິກງ຺ຄຓຍຸຕ຺ໂຕ ປາສາໂທຕິ ວຸຈ຺ຈຕິ. ສຕ຺ໂຖ ນາມ ຊງ຺ຆສຕ຺ໂຖ ວາ ສກຏສຕ຺ໂຖ ວາ. ເຂຕ຺ຕໍ ນາມ ປຸພ຺ພຓ຺ຓາປຣຓ຺ຓານໍ ວິຣຸຫນຏ຺ຐານໍ. ຘຎ຺ຎກຣຓໍ ນາມ ຂລມຓ຺ຑລໍ. ອາຣາໂມ ນາມ ປຸປ຺ຜາຣາໂມ ຜລາຣາໂມ. ວິຫາຣາທໂຍ ປາກຏາ ເອວ. ຕຕ຺ຖ ນິເວສນາທີນິ ຄາມໂຕ ພຫິ ສນ຺ນິວິຏ຺ຐານິ ຄຫິຕານີຕິ ເວທິຕພ຺ພໍ. ອນ຺ໂຕຄາເມ ຐິຕານຎ຺ຫິ ຄາມຄ຺ຄຫເຓນ ຄຫິຕຕ຺ຕາ ຄາມປຣິຫາໂຣເຍວາຕິ. ຄາມຄ຺ຄຫເຓນ ຈ ນິຄມນຄຣານິປິ ຄຫິຕາເນວ ໂຫນ຺ຕິ.

ປຣິຂາຍ ວາ ປຣິກ຺ຂິຕ຺ໂຕຕິ ອິມິນາ ສມນ຺ຕາ ນທີຕຬາກາທິອຸທເກນ ປຣິກ຺ຂິຕ຺ໂຕປິ ປຣິກ຺ຂິຕ຺ໂຕເຍວາຕິ ທສ຺ເສຕິ. ຕໍ ປມາຓໍ ອຕິກ຺ກມິຕ຺ວາຕິ ຆຣສ຺ສ ອຸປຣິ ອາກາເສ ອຑ຺ຒເຕຍ຺ຍຣຕນປ຺ປມາຓໍ ອຕິກ຺ກມິຕ຺ວາ. ສຠາເຍ ວາ ວຕ຺ຖພ຺ພນ຺ຕິ ອິມິນາ ສຠາສທ຺ທສ຺ສ ປຣິຍາໂຍ ສຠາຍສທ຺ໂທ ນປຸໍສກລິງ຺ໂຄ ອຕ຺ຖີຕິ ທສ຺ເສຕິ. ສຠາສທ຺ໂທ ຫິ ອິຕ຺ຖິລິງ຺ໂຄ, ສຠາຍສທ຺ໂທ ນປຸໍສກລິງ຺ໂຄຕິ. ທ຺ວາຣມູເລ ວາຕິ ນຄຣສ຺ສ ທ຺ວາຣມູເລ ວາ. ເຕສນ຺ຕິ ສຠາຍນຄຣທ຺ວາຣມູລານໍ. ຕສ຺ສາ ວີຖິຍາ ສຠາຍທ຺ວາຣານໍ ຄຫເຓເນວ ຕຕ຺ຖ ສພ຺ພານິປິ ເຄຫານິ, ສາ ຈ ອນ຺ຕຣວີຖິ ຄຫິຕາເຍວ ໂຫຕິ. ເອຕ຺ຖ ຈ ທ຺ວາຣວີຖິຆເຣສຸ ວສນ຺ເຕນ ຄາມປ຺ປເວສນສຫເສຍ຺ຍາທິໂທສໍ ປຣິຫຣິຕ຺ວາ ສຸປ຺ປຏິຈ຺ຉນ຺ນຕາທິຍຸຕ຺ເຕເນວ ຠວິຕພ຺ພໍ. ສຠາ ປນ ຍທິ ສພ຺ເພສໍ ວສນຕ຺ຖາຍ ປປາສທິສາ ກຕາ, ອນ຺ຕຣາຣາເມ ວິຍ ຍຖາສຸຂໍ ວສິຕຸໍ ວຏ຺ຏຕີຕິ ເວທິຕພ຺ພໍ. ອຕິຫຣິຕ຺ວາ ຆເຣ ນິກ຺ຂິປຕີຕິ ວີຖິໍ ມຸຎ຺ຈິຕ຺ວາ ຐິເຕ ອຎ຺ຎສ຺ມິໍ ຆເຣ ນິກ຺ຂິປຕິ. ເຕນາຫ ‘‘ວີຖິຫຕ຺ຖປາໂສ ນ ຣກ຺ຂຕີ’’ຕິ. ປຸຣໂຕ ວາ ປຈ຺ຉໂຕ ວາ ຫຕ຺ຖປາເສຕິ ຆຣສ຺ສ ຫຕ຺ຖປາສໍ ສນ຺ຘາຍ ວທຕິ.

ເອວໍ ຄາມວເສນ ວິປ຺ປວາສາວິປ຺ປວາສໍ ທສ຺ເສຕ຺ວາ ອິທານິ ນິເວສນວເສນ ທສ຺ເສນ຺ໂຕ ‘‘ສເຈ ເອກກຸລສ຺ສ ສນ຺ຕກໍ ນິເວສນໍ ໂຫຕີ’’ຕິອາທິມາຫ. ຕຕ຺ຖ ໂອວຣໂກ ນາມ ຄພ຺ຠສ຺ສ ອພ຺ຠນ຺ຕເຣ ອຎ຺ໂຎ ຄພ຺ໂຠຕິ ວທນ຺ຕິ, ຄພ຺ຠສ຺ສ ວາ ປຣິຍາຍວຈນເມຕໍ. ອິທານິ ອຸໂທສິຕາທິວເສນ ທສ຺ເສນ຺ໂຕ ‘‘ອຸໂທສິຕິ’’ຈ຺ຈາທິມາຫ. ຕຕ຺ຖ ວຸຕ຺ຕນເຍເນວາຕິ ‘‘ເອກກຸລສ຺ສ ສນ຺ຕໂກ ອຸໂທສິໂຕ ໂຫຕິ ປຣິກ຺ຂິຕ຺ໂຕ ຈາ’’ຕິອາທິນາ ນິເວສເນ ວຸຕ຺ຕນເຍນ. ເອວ-ສທ຺ໂທ ວິເສສນິວຕ຺ຕິ ອຕ຺ໂຖ. ເຕນ ວິເສໂສ ນຕ຺ຖີຕິ ທສ຺ເສຕິ.

ອິທານິ ເຍສຸ ວິເສໂສ ອຕ຺ຖິ, ເຕ ທສ຺ເສນ຺ໂຕ ‘‘ສເຈ ເອກກຸລສ຺ສ ນາວາ’’ຕິອາທິມາຫ. ຕຕ຺ຖ ປຣິຍາທິຍິຕ຺ວາຕິ ວິນິວິຊ຺ຌິຕ຺ວາ, ອຊ຺ໂຌຕ຺ຖຣິຕ຺ວາ ວາ. ວຸຕ຺ຕເມວຕ຺ຖໍ ວິຠາເວຕິ ‘‘ອນ຺ໂຕປວິຏ຺ເຐນາ’’ຕິອາທິນາ. ຕຕ຺ຖ ອນ຺ໂຕປວິຏ຺ເຐນາຕິ ຄາມສ຺ສ, ນທິຍາ ວາ ອນ຺ໂຕປວິຏ຺ເຐນ. ‘‘ສຕ຺ເຖນາ’’ຕິ ປາຐເສໂສ. ນທີປຣິຫາໂຣ ລພ຺ຠຕີຕິ ເອຕ຺ຖ ‘‘ວິສຸໍ ນທີປຣິຫາຣສ຺ສ ອວຸຕ຺ຕຕ຺ຕາ ຄາມາທີຫິ ອຎ຺ຎຕ຺ຖ ວິຍ ຈີວຣຫຕ຺ຖປາໂສເຍວ ນທີປຣິຫາໂຣ’’ຕິ ຕີສຸປິ ຄຓ຺ຐິປເທສຸ ວຸຕ຺ຕໍ. ອຎ຺ເຎ ປນ ‘‘ອິມິນາ ອຏ຺ຐກຖາວຈເນນ ນທີປຣິຫາໂຣປິ ວິສຸໍ ສິທ຺ໂຘຕິ ນທີຫຕ຺ຖປາໂສ ນ ວິຊຫິຕພ຺ໂພ’’ຕິ ວທນ຺ຕິ. ຍຖາ ປນ ອຊ຺ໂຌກາເສ ສຕ຺ຕພ຺ຠນ຺ຕຣວເສນ ອຣຎ຺ຎປຣິຫາໂຣ ລພ຺ຠຕິ, ເອວໍ ນທິຍໍ ອຸທກຸກ຺ເຂປວເສນ ນທີປຣິຫາໂຣ ລພ຺ຠຕີຕິ ກຕ຺ວາ ອຏ຺ຐກຖາຍໍ ນທີປຣິຫາໂຣ ວິສຸໍ ອວຸຕ຺ໂຕ ສິຍາ ສຕ຺ຕພ຺ຠນ຺ຕຣອຸທກຸກ຺ເຂປສີມານໍ ອຣຎ຺ຎນທີສຸ ອພທ຺ຘສີມາວເສນ ລພ຺ຠມານຕ຺ຕາ. ເອວຎ຺ຈ ສຕິ ສມຸທ຺ທຊາຕສ຺ສເຣສຸປິ ປຣິຫາໂຣ ອວຸຕ຺ຕສິທ຺ໂຘ ໂຫຕິ ນທິຍາ ສມານລກ຺ຂຓຕ຺ຕາ, ນທີຫຕ຺ຖປາໂສ ນ ວິຊຫິຕພ຺ໂພຕິ ປນ ອຕ຺ເຖ ສຕິ ນທິຍາ ອຕິວິຕ຺ຖາຣຕ຺ຕາ ພຫຸສາຘາຣຓຕ຺ຕາ ຈ ອນ຺ໂຕນທິຍໍ ຈີວຣໍ ຐເປຕ຺ວາ ນທີຫຕ຺ຖປາເສ ຐິເຕນ ຈີວຣສ຺ສ ປວຕ຺ຕິໍ ຊານິຕຸໍ ນ ສກ຺ກາ ຠເວຍ຺ຍ. ເອສ ນໂຍ ສມຸທ຺ທຊາຕສ຺ສເຣສຸປິ. ອນ຺ໂຕອຸທກຸກ຺ເຂເປ ວາ ຕສ຺ສ ຫຕ຺ຖປາເສ ວາ ຐິເຕນ ປນ ສກ຺ກາຕິ ອຍໍ ອມ຺ຫາກໍ ອຕ຺ຕໂນມຕິ, ວິຈາເຣຕ຺ວາ ຄເຫຕພ຺ພໍ. ວິຫາຣສີມນ຺ຕິ ອວິປ຺ປວາສສີມໍ ສນ຺ຘາຍາຫ. ເອຕ຺ຖ ຈ ວິຫາຣສ຺ສ ນານາກຸລສນ຺ຕກຠາເວປິ ອວິປ຺ປວາສສີມາປຣິຈ຺ເຉທພ຺ຠນ຺ຕເຣ ສພ຺ພຕ຺ຖ ຈີວຣອວິປ຺ປວາສສມ຺ຠວໂຕ ປຘານຕ຺ຕາ ຕຕ຺ຖ ສຕ຺ຖປຣິຫາໂຣ ນ ລພ຺ຠຕີຕິ ‘‘ວິຫາຣໍ ຄນ຺ຕ຺ວາ ວສິຕພ຺ພ’’ນ຺ຕິ ວຸຕ຺ຕໍ. ສຕ຺ຖສມີເປຕິ ອິທໍ ຍຖາວຸຕ຺ຕອພ຺ຠນ຺ຕຣປຣິຈ຺ເຉທວເສນ ວຸຕ຺ຕໍ.

ຍສ຺ມາ ‘‘ນານາກຸລສ຺ສ ປຣິກ຺ຂິຕ຺ເຕ ເຂຕ຺ເຕ ຈີວຣໍ ນິກ຺ຂິປິຕ຺ວາ ເຂຕ຺ຕທ຺ວາຣມູເລ ວາ ຕສ຺ສ ຫຕ຺ຖປາເສ ວາ ວຕ຺ຖພ຺ພ’’ນ຺ຕິ ວຸຕ຺ຕໍ, ຕສ຺ມາ ທ຺ວາຣມູລໂຕ ອຎ຺ຎຕ຺ຖ ເຂຕ຺ເຕປິ ວສນ຺ເຕນ ຈີວຣໍ ນິກ຺ຂິປິຕ຺ວາ ຫຕ຺ຖປາເສ ກຕ຺ວາເຍວ ວສິຕພ຺ພໍ.

ວິຫາໂຣ ນາມ ສປຣິກ຺ຂິຕ຺ໂຕ ວາ ອປຣິກ຺ຂິຕ຺ໂຕ ວາ ສກໂລ ອາວາໂສຕິ ວທນ຺ຕິ. ຍສ຺ມິໍ ວິຫາເຣຕິ ເອຕ຺ຖ ປນ ເອກເຄຫເມວ ວຸຕ຺ຕໍ. ວິມຕິວິໂນທນິຍໍ (ວິ. ວິ. ຏີ. ໑.໔໙໑-໔໙໔) ປນ ‘‘ວິຫາໂຣ ນາມ ອຸປຈາຣສີມາ. ຍສ຺ມິໍ ວິຫາເຣຕິ ຕສ຺ສ ອນ຺ໂຕປຣິເວຓາທິໍ ສນ຺ຘາຍ ວຸຕ຺ຕ’’ນ຺ຕິ ວຸຕ຺ຕໍ. ເອກກຸລາທິສນ຺ຕກຕາ ເຈຕ຺ຖ ກາຣາປການໍ ວເສນ ເວທິຕພ຺ພາ.

ຍໍ ມຊ຺ຌນ຺ຫິເກ ກາເລ ສມນ຺ຕາ ຉາຍາ ຜຣຕີຕິ ຍທາ ມຫາວີຖິຍໍ ອຸຊຸກເມວ ຄຈ຺ຉນ຺ຕໍ ສູຣິຍມຓ຺ຑລໍ ມຊ຺ຌນ຺ຫິກໍ ປາປຸຓາຕິ, ຕທາ ຍໍ ໂອກາສໍ ຉາຍາ ຜຣຕິ, ຕໍ ສນ຺ຘາຍ ວຸຕ຺ຕໍ. ວິມຕິວິໂນທນິຍໍ ປນ ‘‘ຉາຍາຍ ຜຸຏ຺ໂຐກາສສ຺ສາຕິ ອຸຊຸກໍ ອວິກ຺ຂິຕ຺ຕເລຑ຺ຑຸປາຕພ຺ຠນ຺ຕຣໍ ສນ຺ຘາຍ ວທຕີ’’ຕິ ວຸຕ຺ຕໍ. ອຄມນປເຖຕິ ຕທເຫວ ຄນ຺ຕ຺ວາ ນິວຕ຺ເຕຕຸໍ ອສກ຺ກຸເຓຍ຺ຍເກ ສມຸທ຺ທມຊ຺ເຌ ເຍ ທີປກາ, ເຕສູຕິ ໂຍຊນາ. ອິຕຣສ຺ມິນ຺ຕິ ປຸຣຕ຺ຖິມທິສາຍ ຈີວເຣ.

໕໒. ນທິໍ ໂອຕຣຕີຕິ ຫຕ຺ຖປາສໍ ມຸຎ຺ຈິຕ຺ວາ ໂອຕຣຕິ. ນາປຊ຺ຊຕີຕິ ປຣິໂຠຄປຈ຺ຈຍາ ທຸກ຺ກຏໍ ນາປຊ຺ຊຕິ. ເຕນາຫ ‘‘ໂສ ຫີ’’ຕິອາທິ. ອປຣິໂຠຄາຣຫຕ຺ຕາຕິ ອິມິນາ ນິສ຺ສຄ຺ຄິຍຈີວຣໍ ອນິສ຺ສຊ຺ຊິຕ຺ວາ ປຣິຠຸຎ຺ຊນ຺ຕສ຺ສ ທຸກ຺ກຏໍ ອຈິຕ຺ຕກນ຺ຕິ ສິທ຺ຘໍ. ເອກໍ ປາຣຸປິຕ຺ວາ ເອກໍ ອໍສກູເຏ ຐເປຕ຺ວາ ຄນ຺ຕພ຺ພນ຺ຕິ ອິທໍ ພຫູນໍ ສຎ຺ຈຣຓຏ຺ຐາເນ ເອວໍ ອກຕ຺ວາ ຄມນໍ ນ ສາຣຸປ຺ປນ຺ຕິ ກຕ຺ວາ ວຸຕ຺ຕໍ, ນ ອາປຕ຺ຕິອງ຺ຄຕ຺ຕາ. ພຫິຄາເມ ຐເປຕ຺ວາປິ ອປາຣຸປິຕພ຺ພຕາຍ ວຸຕ຺ຕໍ ‘‘ວິນຍກມ຺ມໍ ກາຕພ຺ພ’’ນ຺ຕິ. ອຖ ວາ ວິຫາເຣ ສຠາຄໍ ຠິກ຺ຂຸໍ ນ ປສ຺ສຕິ, ເອວໍ ສຕິ ອາສນສາລໍ ຄນ຺ຕ຺ວາ ວິນຍກມ຺ມໍ ກາຕພ຺ພນ຺ຕິ ໂຍຊນາ. ອາສນສາລໍ ຄຈ຺ຉນ຺ເຕນ ກິໍ ຕີຫິ ຈີວເຣຫິ ຄນ຺ຕພ຺ພນ຺ຕິ ອາຫ ‘‘ສນ຺ຕຣຸຕ຺ຕເຣນາ’’ຕິ ນຏ຺ຐຈີວຣສ຺ສ ສນ຺ຕຣຸຕ຺ຕຣສາທິຍນໂຕ. ສງ຺ຆາຏິ ປນ ກິໍ ກາຕພ຺ພາຕິ ອາຫ ‘‘ສງ຺ຆາຏິໍ ພຫິຄາເມ ຐເປຕ຺ວາ’’ຕິ. ອຸຕ຺ຕຣາສງ຺ເຄ ຈ ພຫິຄາເມ ຐປິຕສງ຺ຆາຏິຍຎ຺ຈ ປຐມໍ ວິນຍກມ຺ມໍ ກຕ຺ວາ ປຈ຺ຉາ ອຸຕ຺ຕຣາສງ຺ຄໍ ນິວາເສຕ຺ວາ ອນ຺ຕຣວາສເກ ກາຕພ຺ພໍ. ເອຕ຺ຖ ຈ ພຫິຄາເມ ຐປິຕສ຺ສປິ ວິນຍກມ຺ມວຈນໂຕ ປຣມ຺ມຸຂາປິ ຐິຕໍ ນິສ຺ສຊ຺ຊິຕຸໍ, ນິສ຺ສຏ຺ຐໍ ທາຕຸຎ຺ຈ ວຏ຺ຏຕີຕິ ເວທິຕພ຺ພໍ.

ທຫຣານໍ ຄມເນ ສອຸສ຺ສາຫຕ຺ຕາ ‘‘ນິສ຺ສໂຍ ປນ ນ ປຏິປ຺ປສ຺ສມ຺ຠຕີ’’ຕິ ວຸຕ຺ຕໍ. ມຸຫຸຕ຺ຕໍ…ເປ… ປຏິປ຺ປສ຺ສມ຺ຠຕີຕິ ສອຸສ຺ສາຫຕ຺ເຕ ຄມນສ຺ສ ອຸປຈ຺ຉິນ຺ນຕ຺ຕາ ວຸຕ຺ຕໍ, ເຕສໍ ປນ ປຸຣາຣຸຓາ ອຸຏ຺ຐຫິຕ຺ວາ ສອຸສ຺ສາເຫນ ຄຈ຺ຉນ຺ຕານໍ ອຣຸເຓ ອນ຺ຕຣາ ອຸຏ຺ຐິເຕປິ ນ ປຏິປ຺ປສ຺ສມ຺ຠຕິ ‘‘ຍາວ ອຣຸຓຸຄ຺ຄມນາ ສຍນ຺ຕີ’’ຕິ ວຸຕ຺ຕຕ຺ຕາ. ເຕເນວ ‘‘ຄາມໍ ປວິສິຕ຺ວາ…ເປ… ນ ປຏິປ຺ປສ຺ສມ຺ຠຕີ’’ຕິ ວຸຕ຺ຕໍ. ອຎ຺ຎມຎ຺ຎສ຺ສ ວຈນໍ ອຄ຺ຄເຫຕ຺ວາຕິອາທິມ຺ຫິ ສອຸສ຺ສາຫຕ຺ຕາ ຄມນກ຺ຂເຓ ປຏິປ຺ປສ຺ສທ຺ຘິ ນ ວຸຕ຺ຕາ. ເຘນຸຠເຍນາຕິ ຕຣຸຓວຈ຺ຉຄາວີນໍ ອາຘາວິຕ຺ວາ ສິງ຺ເຄນ ປຫຣຓຠເຍນ. ນິສ຺ສໂຍ ຈ ປຏິປ຺ປສ຺ສມ຺ຠຕີຕິ ເອຕ຺ຖ ເຘນຸຠຍາທີຫິ ຐິຕານໍ ຍາວ ຠຍວູປສມາ ຐາຕພ຺ພໂຕ ‘‘ອນ຺ໂຕອຣຸເຓເຍວ ຄມິສ຺ສາມີ’’ຕິ ນິຍເມຕຸໍ ອສກ຺ກຸເຓຍ຺ຍຕ຺ຕາ ວຸຕ຺ຕໍ. ຍຕ຺ຖ ປນ ເອວໍ ນິຍເມຕຸໍ ສກ຺ກາ, ຕຕ຺ຖ ອນ຺ຕຣາ ອຣຸເຓ ອຸຄ຺ຄເຕປິ ນິສ຺ສໂຍ ນ ປຏິປ຺ປສ຺ສມ຺ຠຕິ ເຠສຊ຺ຊຕ຺ຖາຍ ຄາມໍ ປວິຏ຺ຐທຫຣານໍ ວິຍ.

ອນ຺ໂຕສີມາຍໍ ຄາມນ຺ຕິ ອວິປ຺ປວາສສີມາສມ຺ມຸຕິໂຕ ປຈ຺ຉາ ປຕິຏ຺ຐາປິຕຄາມໍ ສນ຺ຘາຍ ວທຕິ ຄາມຎ຺ຈ ຄາມູປຈາຣຎ຺ຈ ຐເປຕ຺ວາ ສມ຺ມນ຺ນິຕພ຺ພໂຕ. ປວິຏ຺ຐານນ຺ຕິ ອາຈຣິຍນ຺ເຕວາສິການໍ ວິສຸໍ ວິສຸໍ ຄຕານໍ ອວິປ຺ປວາສສີມຕ຺ຕາ ເນວ ຈີວຣານິ ນິສ຺ສຄ຺ຄິຍານິ ໂຫນ຺ຕິ, ສອຸສ຺ສາຫຕາຍ ນ ນິສ຺ສໂຍ ປຏິປ຺ປສ຺ສມ຺ຠຕິ. ອນ຺ຕຣາມຄ຺ເຄຕິ ຘມ຺ມໍ ສຸຕ຺ວາ ອາຄຈ຺ຉນ຺ຕານໍ ອນ຺ຕຣາມຄ຺ເຄ.

ອິຕິ ວິນຍສງ຺ຄຫສໍວຓ຺ຓນາຠູເຕ ວິນຍາລງ຺ກາເຣ

ຈີວຣວິປ຺ປວາສວິນິຈ຺ຉຍກຖາລງ຺ກາໂຣ ນາມ

ນວໂມ ປຣິຈ຺ເຉໂທ.