ຄຓ຺ຑາພາຘກຖາ

ຄຓ຺ຑາພາຘກຖາຍໍ ‘‘ອນຸຊານາມິ, ຠິກ຺ຂເວ, ສຕ຺ຖກມ຺ມ’’ນ຺ຕິ (ມຫາວ. ໒໖໗) ວຈນໂຕ ຄຓ຺ຑາພາເຘ ສຕິ ສຕ຺ຖກມ຺ມໍ ກາຕພ຺ພໍ. ‘‘ອນຸຊານາມິ, ຠິກ຺ຂເວ, ກສາໂວທກ’’ນ຺ຕິ (ມຫາວ. ໒໖໗) ວຈນໂຕ ກສາໂວທເກນ ອຕ຺ເຖ ສຕິ ກສາໂວທກໍ ທາຕພ຺ພໍ. ‘‘ອນຸຊານາມິ, ຠິກ຺ຂເວ, ຕິລກກ຺ກ’’ນ຺ຕິ (ມຫາວ. ໒໖໗) ວຈນໂຕ ຕິລກກ຺ເກນ ອຕ຺ເຖ ສຕິ ຕິລກກ຺ກໍ ທາຕພ຺ພໍ. ຕິລກກ຺ເກນ ອຕ຺ໂຖຕິ ປິຏ຺ເຐຫິ ຕິເລຫິ ອຕ຺ໂຖ. ‘‘ອນຸຊານາມິ ຠິກ຺ຂເວ ກພຬິກ’’ນ຺ຕິ (ມຫາວ. ໒໖໗) ວຈນໂຕ ກພຬິກາຍ ອຕ຺ເຖ ສຕິ ກພຬິກາ ທາຕພ຺ພາ. ຕຕ຺ຖ ກພຬິກນ຺ຕິ ວຓມຸເຂ ສຕ຺ຕຸປິຓ຺ຑໍ ປກ຺ຂິປິຕຸໍ. ‘‘ອນຸຊານາມິ, ຠິກ຺ຂເວ, ວຓພນ຺ຘນໂຈຬ’’ນ຺ຕິ (ມຫາວ. ໒໖໗) ວຈນໂຕ ວຓພນ຺ຘນໂຈເຬນ ອຕ຺ເຖ ສຕິ ວຓພນ຺ຘນໂຈຬໍ ທາຕພ຺ພໍ. ‘‘ອນຸຊານາມິ, ຠິກ຺ຂເວ, ສາສປກຸຏ຺ເຏນ ໂຜສິຕຸ’’ນ຺ຕິ (ມຫາວ. ໒໖໗) ວຈນໂຕ ສເຈ ວໂຓ ກຸຓ຺ຑວຕີ, ສາສປກຸຏ຺ເຏນ ໂຜສິຕພ຺ພໍ. ຕຕ຺ຖ ສາສປກຸຏ຺ເຏນາຕິ ສາສປປິຏ຺ເຐນ.

‘‘ອນຸຊານາມິ, ຠິກ຺ຂເວ, ຘູມໍ ກາຕຸ’’ນ຺ຕິ (ມຫາວ. ໒໖໗) ວຈນໂຕ ຍທິ ວໂຓ ກິລິຊ຺ຊິຕ຺ຖ, ຘູມໍ ກາຕຸໍ ວຏ຺ຏຕິ. ‘‘ອນຸຊານາມິ, ຠິກ຺ຂເວ, ໂລຓສກ຺ຂຣິກາຍ ຉິນ຺ທິຕຸ’’ນ຺ຕິ (ມຫາວ. ໒໖໗) ວຈນໂຕ ຍທິ ວຑ຺ຒມໍສໍ ວຸຏ຺ຐາຕິ, ຉິນ຺ທິຕພ຺ພໍ. ຕຕ຺ຖ ວຑ຺ຒມໍສນ຺ຕິ ອຘິກມໍສໍ ອາຓີ ວິຍ ອຸຏ຺ຐຫຕິ. ໂລຓສກ຺ຂຣິກາຍ ຉິນ຺ທິຕຸນ຺ຕິ ຂາເຣນ ຉິນ຺ທິຕຸໍ. ‘‘ອນຸຊານາມິ, ຠິກ຺ຂເວ, ວຓເຕລ’’ນ຺ຕິ (ມຫາວ. ໒໖໗) ວຈນໂຕ ຍທິ ວໂຓ ນ ຣຸຫຕິ, ວຓຣຸຫນເຕລໍ ປຈິຕພ຺ພໍ. ‘‘ອນຸຊານາມິ, ຠິກ຺ຂເວ, ວິກາສິກໍ ສພ຺ພໍ ວຓປຏິກມ຺ມ’’ນ຺ຕິ (ມຫາວ. ໒໖໗) ວຈນໂຕ ຍທິ ເຕລໍ ຄຬຕິ, ວິກາສິກໍ ທາຕພ຺ພໍ, ສພ຺ພໍ ວຓປຏິກມ຺ມໍ ກາຕພ຺ພໍ. ຕຕ຺ຖ ວິກາສິກນ຺ຕິ ເຕລຣຸນ຺ຘນປິໂລຕິກໍ. ສພ຺ພໍ ວຓປຏິກມ຺ມນ຺ຕິ ຍໍ ກິຎ຺ຈິ ວຓປຏິກມ຺ມໍ ນາມ ອຕ຺ຖິ, ສພ຺ພໍ ອນຸຊານາມີຕິ ອຕ຺ໂຖ. ມຫາວິກຏກຖາ ປຸພ຺ເພ ວຸຕ຺ຕາວ.

ສາມໍ ຄເຫຕ຺ວາຕິ ອິທໍ ນ ເກວລໍ ສປ຺ປທຏ຺ຐສ຺ເສວ, ອຎ຺ຎສ຺ມິມ຺ປິ ທຏ຺ຐວິເສ ສຕິ ສາມໍ ຄເຫຕ຺ວາ ປຣິຠຸຎ຺ຊິຕພ຺ພໍ, ອຎ຺ເຎສຸ ປນ ກາຣເຓສຸ ປຏິຄ຺ຄຫິຕເມວ ວຏ຺ຏຕິ.