ເຕລປາກກຖາ

ເຕລປາກກຖາຍໍ ‘‘ອນຸຊານາມິ, ຠິກ຺ຂເວ, ເຕລປາກ’’ນ຺ຕິ (ມຫາວ. ໒໖໗) ວຈນໂຕ ວາຕາພາເຘ ສຕິ ເຕລປາໂກ ວຏ຺ຏຕິ. ຕຕ຺ຖ ອນຸຊານາມິ, ຠິກ຺ຂເວ, ເຕລປາກນ຺ຕິ ຍໍ ກິຎ຺ຈິ ເຠສຊ຺ຊປກ຺ຂິຕ຺ຕໍ ສພ຺ພໍ ອນຸຎ຺ຎາຕເມວ ໂຫຕິ. ‘‘ນ, ຠິກ຺ຂເວ, ອຕິປກ຺ຂິຕ຺ຕມຊ຺ຊໍ ເຕລໍ ປາຕພ຺ພໍ, ໂຍ ປິເວຍ຺ຍ, ຍຖາຘມ຺ໂມ ກາເຣຕພ຺ໂພ. ອນຸຊານາມິ, ຠິກ຺ຂເວ, ຍສ຺ມິໍ ເຕລປາເກ ມຊ຺ຊສ຺ສ ນ ວຓ຺ໂຓ ນ ຄນ຺ໂຘ ນ ຣໂສ ປຎ຺ຎາຍຕິ, ເອວຣູປໍ ມຊ຺ຊປກ຺ຂິຕ຺ຕໍ ເຕລໍ ປາຕຸ’’ນ຺ຕິ (ມຫາວ. ໒໖໗) ວຈນໂຕ ຍສ຺ມິໍ ເຕລປາເກ ປກ຺ຂິຕ຺ຕສ຺ສ ມຊ຺ຊສ຺ສ ວຓ຺ໂຓ ວາ ຄນ຺ໂຘ ວາ ຣໂສ ວາ ນ ປຎ຺ຎາຍຕິ, ຕາທິສໍ ເຕລໍ ປິວິຕພ຺ພໍ. ຕຕ຺ຖ ອຕິປກ຺ຂິຕ຺ຕມຊ຺ຊານີຕິ ອຕິວິຍ ຂິຕ຺ຕມຊ຺ຊານິ, ພຫຸໍ ມຊ຺ຊໍ ປກ຺ຂິປິຕ຺ວາ ໂຍຊິຕານີຕິ ອຕ຺ໂຖ. ‘‘ອນຸຊານາມິ, ຠິກ຺ຂເວ, ອພ຺ຠຎ຺ຊນໍ ອຘິຏ຺ຐາຕຸ’’ນ຺ຕິ (ມຫາວ. ໒໖໗) ວຈນໂຕ ອຕິປກ຺ຂິຕ຺ຕມຊ຺ຊຕ຺ຕາ ອປິວິຕພ຺ເພ ເຕເລ ສຕິ ອພ຺ຠຎ຺ຊນໍ ອຘິຏ຺ຐາຕຸໍ ວຏ຺ຏຕິ. ‘‘ອນຸຊານາມິ, ຠິກ຺ຂເວ, ຕີຓິ ຕຸມ຺ພານິ ໂລຫຕຸມ຺ພໍ ກຏ຺ຐຕຸມ຺ພໍ ຜລຕຸມ຺ພ’’ນ຺ຕິ (ມຫາວ. ໒໖໗) ວຈນໂຕ ເຕລປກ຺ກຠາຊນານິ ອິມານິ ຕີຓິ ຕຸມ຺ພານິ ວຏ຺ຏນ຺ຕິ.