ປຓ຺ຓເຠສຊ຺ຊກຖາ

ປຓ຺ຓເຠສຊ຺ຊກຖາຍໍ ‘‘ອນຸຊານາມິ, ຠິກ຺ຂເວ, ປຓ຺ຓານິ ເຠສຊ຺ຊານິ ນິມ຺ພປຓ຺ຓໍ ກຸຏຊປຓ຺ຓໍ ປໂຏລປຓ຺ຓໍ ນຕ຺ຕມາລປຓ຺ຓໍ ຜຄ຺ຄວປຓ຺ຓໍ ສຸລສິປຓ຺ຓໍ ກປ຺ປາສປຓ຺ຓໍ, ຍານິ ວາ ປນຎ຺ຎານິປິ ອຕ຺ຖິ ປຓ຺ຓານິ ເຠສຊ຺ຊານິ ເນວ ຂາທນີເຍ ຂາທນີຍຕ຺ຖໍ ຜຣນ຺ຕິ, ນ ໂຠຊນີເຍ ໂຠຊນີຍຕ຺ຖໍ ຜຣນ຺ຕິ, ຕານິ ປຏິຄ຺ຄເຫຕ຺ວາ ຍາວຊີວໍ ປຣິຫຣິຕຸໍ, ສຕິ ປຈ຺ຈເຍ ປຣິຠຸຎ຺ຊິຕຸໍ, ອສຕິ ປຈ຺ຈເຍ ປຣິຠຸຎ຺ຊນ຺ຕສ຺ສ ອາປຕ຺ຕິ ທຸກ຺ກຏສ຺ສາ’’ຕິ (ມຫາວ. ໒໖໓) ວຈນໂຕ ຂາທນີຍໂຠຊນີຍຕ຺ຖໍ ອຜຣນ຺ຕານິ ຕານິປິ ປຓ຺ຓານິ ປຏິຄ຺ຄເຫຕ຺ວາ ຍາວຊີວໍ ປຣິຫຣິຕຸໍ, ສຕິ ປຈ຺ຈເຍ ປຣິຠຸຎ຺ຊິຕຸໍ ວຏ຺ຏຕິ. ອຈ຺ຉວສນ຺ຕິອາທີສຸ ນິສ຺ສຄ຺ຄິຍວຓ຺ຓນາຍໍ (ປາຣາ. ອຏ຺ຐ. ໒.໖໒໓) ວຸຕ຺ຕນເຍເນວ ອຕ຺ໂຖ ເວທິຕພ຺ໂພ. ມູລເຠສຊ຺ຊາທິວິນິຈ຺ຉໂຍປິ ຂຸທ຺ທກວຓ຺ຓນາຍໍ ວຸຕ຺ໂຕເຍວ, ຕສ຺ມາ ອິຘ ຍໍ ຍໍ ປຸພ຺ເພ ອວຸຕ຺ຕໍ, ຕໍ ຕເທວ ວຓ຺ຓຍິສ຺ສາມ.