ປຎ຺ຈເຠສຊ຺ຊກຖາ

ປຎ຺ຈເຠສຊ຺ຊກຖາຍໍ ‘‘ອນຸຊານາມິ, ຠິກ຺ຂເວ, ຕານິ ປຎ຺ຈ ເຠສຊ຺ຊານິ ກາເລ ປຏິຄ຺ຄເຫຕ຺ວາ ກາເລ ປຣິຠຸຎ຺ຊິຕຸ’’ນ຺ຕິ (ມຫາວ. ໒໖໑) ວຈນໂຕ ສາຣທິເກນ ອາພາເຘນ ຜຸຏ຺ຐານໍ ຠິກ຺ຂູນໍ ຍາຄຸປິ ປີຕາ ອຸຄ຺ຄຈ຺ຉຕິ, ຠຕ຺ຕມ຺ປິ ຠຸຕ຺ຕໍ ອຸຄ຺ຄຈ຺ຉຕິ, ເຕ ເຕນ ກິສາ ໂຫນ຺ຕິ ລູຂາ ທຸພ຺ພຓ຺ຓາ ອຸປ຺ປຓ຺ຑຸປ຺ປຓ຺ຑຸກຊາຕາ ຘມນິສນ຺ຖຕຄຕ຺ຕາ. ເຕສໍ ຍໍ ເຠສຊ຺ຊຎ຺ເຈວ ອສ຺ສ ເຠສຊ຺ຊສມ຺ມຕຎ຺ຈ, ໂລກສ຺ສ ອາຫາຣຕ຺ຖຎ຺ຈ ຜເຣຍ຺ຍ, ນ ຈ ໂອຬາຣິໂກ ອາຫາໂຣ ປຎ຺ຎາເຍຍ຺ຍ. ຕຕ຺ຣິມານິ ປຎ຺ຈ ເຠສຊ຺ຊານິ. ເສຍ຺ຍຖິທໍ – ສປ຺ປິ ນວນີຕໍ ເຕລໍ ມຘຸ ຜາຓິຕໍ, ຕານິ ເຠສຊ຺ຊານິ ກາເລ ປຏິຄ຺ຄເຫຕ຺ວາ ກາເລ ປຣິຠຸຎ຺ຊິຕຸໍ ວຏ຺ຏຕິ. ຕຕ຺ຖ ‘‘ສາຣທິເກນ ອາພາເຘນາຕິ ສຣທກາເລ ອຸປ຺ປນ຺ເນນ ປິຕ຺ຕາພາເຘນ. ຕສ຺ມິຎ຺ຫິ ກາເລ ວສ຺ໂສທເກນປິ ເຕເມນ຺ຕິ, ກທ຺ທມມ຺ປິ ມທ຺ທນ຺ຕິ, ອນ຺ຕຣນ຺ຕຣາ ອາພາໂຘປິ ຂໂຣ ໂຫຕິ, ເຕນ ເຕສໍ ປິຕ຺ຕໍ ໂກຏ຺ຐພ຺ຠນ຺ຕຣຄຕໍ ໂຫຕິ. ອາຫາຣຕ຺ຖຎ຺ຈ ຜເຣຍ຺ຍາຕິ ອາຫາຣຕ຺ຖໍ ສາເຘຍ຺ຍາ’’ຕິ ອຏ຺ຐກຖາຍໍ (ມຫາວ. ອຏ຺ຐ. ໒໖໐) ວຸຕ຺ຕໍ. ວິມຕິວິໂນທນິຍໍ (ວິ. ວິ. ຏີ. ມຫາວຄ຺ຄ ໒.໒໖໐) ‘‘ປິຕ຺ຕໍ ໂກຏ຺ຐພ຺ຠນ຺ຕຣຄຕໍ ໂຫຕີຕິ ພຫິສຣີເຣ ພ຺ຍາເປຕ຺ວາ ຐິຕໍ ອພທ຺ຘປິຕ຺ຕໍ ໂກຏ຺ຐພ຺ຠນ຺ຕຣຄຕໍ ໂຫຕິ, ເຕນ ປິຕ຺ຕໍ ກຸປິຕໍ ໂຫຕີຕິ ອຘິປ຺ປາໂຍ’’ຕິ ວຸຕ຺ຕໍ.

ວຊິຣພຸທ຺ຘິຏີກາຍໍ (ວຊິຣ. ຏີ. ມຫາວຄ຺ຄ ໒໖໐) ‘‘ຍໍ ເຠສຊ຺ຊຎ຺ເຈວ ອສ຺ສາຕິ ປຣໂຕ ‘ຕທຸຠເຍນ ຠິຍ຺ໂຍໂສມຕ຺ຕາຍ ກິສາ ໂຫນ຺ຕີ’ຕິອາທິນາ ວິໂຣຘທສ຺ສນໂຕ ນິທານານເປກ຺ຂໍ ຍຖາລາຠວເສນ ວຸຕ຺ຕນ຺ຕິ ເວທິຕພ຺ພໍ. ຍຖານິທານໍ ກສ຺ມາ ນ ວຸຕ຺ຕນ຺ຕິ ເຈ? ຕທຎ຺ຎາເປກ຺ຂາຘິປ຺ປາຍໂຕ. ສພ຺ພພຸທ຺ຘກາເລປິ ຫິ ສປ຺ປິອາທີນໍ ສຕ຺ຕາຫກາລິກຠາວາເປກ຺ໂຂຕິ. ຕຖາ ວຈເນນ ຠຄວໂຕ ອຘິປ຺ປາໂຍ. ເຕເນວ ‘ອາຫາຣຕ຺ຖຎ຺ຈ ຜເຣຍ຺ຍ, ນ ຈ ໂອຬາຣິໂກ ອາຫາໂຣ ປຎ຺ຎາເຍຍ຺ຍາ’ຕິ ວຸຕ຺ຕໍ. ຕຖາ ຫິ ກາເລ ປຏິຄ຺ຄເຫຕ຺ວາ ກາເລ ປຣິຠຸຎ຺ຊິຕຸນ຺ຕິ ເອຕ຺ຖ ຈ ກາລປຣິຈ຺ເຉໂທ ນ ກໂຕ, ກຸໂຕເຍວ ປນ ລພ຺ຠາ ຕທຎ຺ຎາເປກ຺ຂາຘິປ຺ປາໂຍ ຠຄວຕາ ມູລເຠສຊ຺ຊາທີນິ ຕານິ ປຏິຄ຺ຄເຫຕ຺ວາ ຍາວຊີວນ຺ຕິ ກາລປຣິຈ຺ເຉໂທ. ຍໍ ປນ ‘ອນຸຊານາມິ, ຠິກ຺ຂເວ, ຕານິ ເຠສຊ຺ຊານິ ກາເລ ປຏິຄ຺ຄເຫຕ຺ວາ ກາເລ ປຣິຠຸຎ຺ຊິຕຸ’ນ຺ຕິ (ມຫາວ. ໒໖໐) ວຈນໍ, ຕໍ ‘ສນ຺ນິຘິໍ ກຕ຺ວາ ອປຣາປຣສ຺ມິໍ ທິວເສ ກາເລ ເອວ ປຣິຠຸຎ຺ຊິຕຸໍ ອນຸຊານາມີ’ຕິ ອຘິປ຺ປາຍໂຕ ວຸຕ຺ຕນ຺ຕິ ເວທິຕພ຺ພໍ. ອຎ຺ຎຖາ ອຕິສຍຕ຺ຕາ ຠຄວໂຕ ‘ຍໍ ເຠສຊ຺ຊຎ຺ເຈວ ອສ຺ສາ’ຕິອາທິວິຕກ຺ກຸປ຺ປາໂທ ນ ສມ຺ຠວຕິ. ປຓີຕໂຠຊນານຸມຕິຍາ ປສິທ຺ຘຕ຺ຕາ ອາພາຘານຸຣູປສປ຺ປາຍາເປກ຺ຂາຍ ວຸຕ຺ຕານີຕິ ເຈ? ຕຎ຺ຈ ນ, ‘ຠິຍ຺ໂຍໂສມຕ຺ຕາຍາ’ຕິ ກິສາທິຠາວາປຕ຺ຕິທສ຺ສນໂຕ. ຍຖາ ອຸຈ຺ຉຸຣສໍ ອຸປາທາຍ ຜາຓິຕນ຺ຕິ ວຸຕ຺ຕໍ, ຕຖາ ນວນີຕໍ ອຸປາທາຍ ສປ຺ປີຕິ ວຕ຺ຕພ຺ພໂຕ ນວນີຕໍ ວິສຸໍ ນ ວຕ຺ຕພ຺ພນ຺ຕິ ເຈ? ນ ວິເສສທສ຺ສນາຘິປ຺ປາຍໂຕ. ຍຖາ ຜາຓິຕຄ຺ຄຫເຓນ ສິທ຺ເຘປິ ປຣໂຕ ອຸຈ຺ຉຸຣໂສ ວິສຸໍ ອນຸຎ຺ຎາໂຕ ອຸຈ຺ຉຸສາມຎ຺ຎໂຕ ຄຸໂຬທກຏ຺ຐາເນ ຐປນາຘິປ຺ປາຍໂຕ, ຕຖາ ນວນີເຕ ວິເສສວິຘິທສ຺ສນາຘິປ຺ປາຍໂຕ ນວນີຕໍ ວິສຸໍ ອນຸຎ຺ຎາຕນ຺ຕິ ເວທິຕພ຺ພໍ. ວິເສສວິຘິ ປນສ຺ສ ເຠສຊ຺ຊສິກ຺ຂາປທຏ຺ຐກຖາວເສນ (ປາຣາ. ອຏ຺ຐ. ໒.໖໑໙-໖໒໑) ເວທິຕພ຺ໂພ. ວຸຕ຺ຕຎ຺ຫິ ຕຕ຺ຖ ‘ປຈິຕ຺ວາ ສປ຺ປິໍ ກຕ຺ວາ ປຣິຠຸຎ຺ຊິຕຸກາເມນ ອໂຘຕມ຺ປິ ປຈິຕຸໍ ວຏ຺ຏຕີ’ຕິ. ຕຕ຺ຖ ສປ຺ປິ ປກ຺ກາວ ໂຫຕິ, ນາປກ຺ກາ, ຕຖາ ຜາຓິຕມ຺ປິ. ນວນີຕໍ ອປກ຺ກເມວາ’’ຕິອາທິ.