ສນ຺ຕຣຸຕ຺ຕຣກຖາ

໖໑. ສນ຺ຕຣຸຕ຺ຕຣກຖາຍໍ ອນ຺ຕຣ-ສທ຺ໂທ ມຊ຺ຌວາຈໂກ. ວສຕິ ສີເລນາຕິ ວາສໂກ, ‘‘ອນ຺ຕເຣ ວາສໂກ ອນ຺ຕຣວາສໂກ’’ຕິ ວຕ຺ຕພ຺ເພ ‘‘ຣູປຠໂວ ຣູປ’’ນ຺ຕິອາທີສຸ ວິຍ ອຸຕ຺ຕຣປທໂລປີສມາສວເສນ ‘‘ອນ຺ຕໂຣ’’ຕິ ວຸຕ຺ໂຕ. ອຸຕ຺ຕຣສທ຺ໂທ ອຸປຣິວາຈໂກ, ອາຠຸໂສ ສຊ຺ຊຕີຕິ ອາສງ຺ໂຄ, ‘‘ອຸຕ຺ຕເຣ ອາສງ຺ໂຄ ອຸຕ຺ຕຣາສງ຺ໂຄ’’ຕິ ວຕ຺ຕພ຺ເພ ວຸຕ຺ຕນເຍນ ‘‘ອຸຕ຺ຕໂຣ’’ຕິ ວຸຕ຺ໂຕ, ອນ຺ຕໂຣ ຈ ອຸຕ຺ຕໂຣ ຈ ອນ຺ຕຣຸຕ຺ຕຣາ, ສຫ ອນ຺ຕຣຸຕ຺ຕເຣຫິ ໂຍ ວຕ຺ຕຕີຕິ ສນ຺ຕຣຸຕ຺ຕໂຣ, ສຫປຸພ຺ພປທຠິນ຺ນາຘິກຣຓທ຺ວິປທພຫຸພ຺ພີຫິສມາໂສ. ອຖ ວາ ສຫ ອນ຺ຕເຣນ ຈ ອຸຕ຺ຕເຣນ ຈ ໂຍ ວຕ຺ຕຕີຕິ ສນ຺ຕຣຸຕ຺ຕໂຣ, ຕິປທພຫຸພ຺ພີຫິສມາໂສ. ສງ຺ຆາຏິໍ ຐເປຕ຺ວາ ອນ຺ຕຣວາສກອຸຕ຺ຕຣາສງ຺ຄມຕ຺ຕຘໂຣ ຫຸຕ຺ວາ ຄາໂມ ນ ປວິສິຕພ຺ໂພຕິ ອຕ຺ໂຖ. ‘‘ປຣິພ຺ພາຊກມທກ຺ຂິ ຕິທຓ຺ຑເກນາ’’ຕິອາທີສຸ ວິຍ ອິຕ຺ຖມ຺ຠູຕລກ຺ຂເຓ ເຈຕໍ ກຣຓວຈນໍ, ຕສ຺ມາ ອນ຺ຕຣວາສກໍ ຕິມຓ຺ຑລໍ ປຏິຈ຺ຉາເທນ຺ເຕນ ປຣິມຓ຺ຑລໍ ນິວາເສຕ຺ວາ ກາຍພນ຺ຘນໍ ພນ຺ຘິຕ຺ວາ ສງ຺ຆາຏິຎ຺ຈ ອຸຕ຺ຕຣາສງ຺ຄຎ຺ຈ ທິຄຸຓໍ ກຕ຺ວາ ປາຣຸປິຕ຺ວາ ຄາໂມ ປວິສິຕພ຺ໂພ.