ຣຊນາທິກຖາ

ຣຊນາທິກຖາຍໍ ‘‘ອນຸຊານາມິ, ຠິກ຺ຂເວ, ຉ ຣຊນານິ ມູລຣຊນໍ ຂນ຺ຘຣຊນໍ ຕຈຣຊນໍ ປຕ຺ຕຣຊນໍ ປຸປ຺ຜຣຊນໍ ຜລຣຊນ’’ນ຺ຕິ ວຈນໂຕ ອິເມສຸ ຉສຸ ຣຊເນສຸ ເອກເກນ ຈີວຣໍ ຣຊິຕພ຺ພໍ, ນ ຉກເຓນ ວາ ປຓ຺ຑຸມຕ຺ຕິກາຍ ວາ ຣຊິຕພ຺ພໍ. ຕາຍ ຣຊິຕຈີວຣໍ ທຸພ຺ພຓ຺ຓໍ ໂຫຕິ. ຉຣຊນານໍ ສຣູປໍ ເຫຏ຺ຐາ ປຣິກ຺ຂາຣກຖາຍໍ ວຸຕ຺ຕເມວ. ຕຕ຺ຖ ຉກເຓນາຕິ ໂຄມເຍນ. ປຓ຺ຑຸມຕ຺ຕິກາຍາຕິ ຕມ຺ພມຕ຺ຕິກາຍ. ‘‘ອນຸຊານາມິ, ຠິກ຺ຂເວ, ຣຊນໍ ປຈິຕຸໍ ຈຸລ຺ລໍ ຣຊນກຸມ຺ຠິ’’ນ຺ຕິ (ມຫາວ. ໓໔໔) ວຈນໂຕ ສີຕຸທກາຍ ຈີວຣໍ ນ ຣຊິຕພ຺ພໍ. ຕາຍ ຫິ ຣຊິຕຈີວຣໍ ທຸຄ຺ຄນ຺ຘໍ ໂຫຕິ. ຕຕ຺ຖ ສີຕຸທກາຕິ ອປກ຺ກຣຊນໍ ວຸຈ຺ຈຕິ. ‘‘ອນຸຊານາມິ, ຠິກ຺ຂເວ, ອຸຕ຺ຕຣາຬຸມ຺ປໍ ພນ຺ຘິຕຸ’’ນ຺ຕິ ວຈນໂຕ ອຸຕ຺ຕຣາຬຸມ຺ປໍ ພນ຺ຘິຕຸໍ ວຏ຺ຏຕິ. ຕຕ຺ຖ ອຸຕ຺ຕຣາຬຸມ຺ປນ຺ຕິ ວຏ຺ຏາຘາຣກໍ, ຣຊນກຸມ຺ຠິຍາ ມຊ຺ເຌ ຐເປຕ຺ວາ ຕໍ ອາຘາຣກໍ ປຣິກ຺ຂິປິຕ຺ວາ ຣຊນໍ ປກ຺ຂິປິຕຸໍ ອນຸຊານາມີຕິ ອຕ຺ໂຖ. ເອວຎ຺ຫິ ກເຕ ຣຊນໍ ນ ອຸຕ຺ຕຣຕິ. ຕຕ຺ຖ ‘‘ຣຊນກຸມ຺ຠິຍາ ມຊ຺ເຌ ຐເປຕ຺ວາຕິ ອນ຺ໂຕຣຊນກຸມ຺ຠິຍາ ມຊ຺ເຌ ຐເປຕ຺ວາ. ເອວໍ ວຏ຺ຏາຘາຣເກ ອນ຺ໂຕຣຊນກຸມ຺ຠິຍາ ປກ຺ຂິຕ຺ເຕ ມຊ຺ເຌ ອຸທກໍ ຕິຏ຺ຐຕິ, ວຏ຺ຏາຘາຣກໂຕ ພຫິ ສມນ຺ຕາ ອນ຺ໂຕກຸມ຺ຠິຍໍ ຣຊນຈ຺ຉລ຺ລິ. ປກ຺ຂິປິຕຸນ຺ຕິ ຣຊນຈ຺ຉລ຺ລິໍ ປກ຺ຂິປິຕຸ’’ນ຺ຕິ ສາຣຕ຺ຖທີປນິຍໍ (ສາຣຕ຺ຖ. ຏີ. ມຫາວຄ຺ຄ ໓.໓໔໔) ວຸຕ຺ຕໍ. ວິມຕິວິໂນທນິຍໍ (ວິ. ວິ. ຏີ. ມຫາວຄ຺ຄ ໒.໓໔໔) ປນ ‘‘ເອວຎ຺ຫິ ກເຕຕິ ວຏ຺ຏາຘາຣສ຺ສ ອນ຺ໂຕ ຣຊໂນທກໍ, ພຫິ ຉລ຺ລິກຎ຺ຈ ກຕ຺ວາ ວິໂຍຊເນ ກເຕ. ນ ອຸຕ຺ຕຣຕີຕິ ເກວລໍ ອຸທກໂຕ ເຜຓຸຏ຺ຐານາຠາວາ ນ ອຸຕ຺ຕຣຕີ’’ຕິ ວຸຕ຺ຕໍ. ວຊິຣພຸທ຺ຘິຏີກາຍໍ (ວຊິຣ. ຏີ. ມຫາວຄ຺ຄ ໓໔໔) ປນ ‘‘ໂຄມເຍ ອາປຕ຺ຕິ ນຕ຺ຖິ, ວິຣູປຕ຺ຕາ ວາຣິຕໍ. ກຸງ຺ກຸມປຸປ຺ຜໍ ນ ວຏ຺ຏຕີຕິ ວທນ຺ຕີ’’ຕິ ວຸຕ຺ຕໍ.

‘‘ອນຸຊານາມິ, ຠິກ຺ຂເວ, ອຸທເກ ວາ ນຂປິຏ຺ຐິກາຍ ວາ ເຖວກໍ ທາຕຸ’’ນ຺ຕິ (ມຫາວ. ໓໔໔) ວຈນໂຕ ຕຖາ ກຕ຺ວາ ຣຊນສ຺ສ ປກ຺ກາປກ຺ກຠາໂວ ຊານິຕພ຺ໂພ. ຕຕ຺ຖ ອຸທເກ ວາ ນຂປິຏ຺ຐິກາຍ ວາຕິ ສເຈ ປຣິປກ຺ກໍ ໂຫຕິ, ອຸທກປາຕິຍາ ທິນ຺ໂນ ເຖໂວ ສຫສາ ນ ວິສຣຕິ, ນຂປິຏ຺ຐິຍມ຺ປິ ອວິສຣນ຺ໂຕ ຕິຏ຺ຐຕິ. ‘‘ອນຸຊານາມິ, ຠິກ຺ຂເວ, ຣຊນຸຬຸງ຺ກໍ ທຓ຺ຑກຖາລກ’’ນ຺ຕິ (ມຫາວ. ໓໔໔) ວຈນໂຕ ຣຊນສ຺ສ ໂອໂລກນກາເລ ກຸມ຺ຠິຍາ ຣກ຺ຂຓຕ຺ຖໍ ອຸຬຸງ຺ກທຓ຺ຑກຖາລິການິ ອິຈ຺ຉິຕພ຺ພານິ. ຕຕ຺ຖ ຣຊນຸຬຸງ຺ກນ຺ຕິ ຣຊນອຸຬຸງ຺ກໍ. ທຓ຺ຑກຖາລກນ຺ຕິ ທຓ຺ຑເມວ ທຓ຺ຑກໍ. ‘‘ອນຸຊານາມິ, ຠິກ຺ຂເວ, ຣຊນໂກລມ຺ພໍ ຣຊນຆຏ’’ນ຺ຕິ (ມຫາວ. ໓໔໔) ວຈນໂຕ ຕານິປິ ອິຈ຺ຉິຕພ຺ພານິ. ຕຕ຺ຖ ຣຊນໂກລມ຺ພນ຺ຕິ ຣຊນກຸຓ຺ຑໍ. ຕຕ຺ຖ ຣຊນກຸຓ຺ຑນ຺ຕິ ປກ຺ກຣຊນຏ຺ຐປນກໍ ມຫາຆຏໍ. ‘‘ອນຸຊານາມິ, ຠິກ຺ຂເວ, ຣຊນໂທຓິກ’’ນ຺ຕິ (ມຫາວ. ໓໔໔) ວຈນໂຕ ປາຕິຍມ຺ປິ ປຕ຺ເຕ ຈີວເຣ ມທ຺ທນ຺ເຕ ຈີວຣສ຺ສ ປຣິຠິຊ຺ຊນໂຕ ຈີວຣຣກ຺ຂຓຕ຺ຖໍ ຣຊນໂທຓິກາ ອິຈ຺ຉິຕພ຺ພາ. ‘‘ອນຸຊານາມິ, ຠິກ຺ຂເວ, ຕິຓສນ຺ຖຣກ’’ນ຺ຕິ (ມຫາວ. ໓໔໔) ວຈນໂຕ ຉມາຍ ຈີວເຣ ປຕ຺ຖຣິຍມາເນ ຈີວຣສ຺ສ ປໍສຸກິຕຕ຺ຕາ ຕໂຕ ຣກ຺ຂຓຕ຺ຖໍ ຕິຓສນ຺ຖຣໍ ກາຕພ຺ພໍ. ‘‘ອນຸຊານາມິ, ຠິກ຺ຂເວ, ຈີວຣວໍສໍ ຈີວຣຣຊ຺ຊຸ’’ນ຺ຕິ (ມຫາວ. ໓໔໔) ວຈນໂຕ ຕິຓສນ຺ຖາຣເກ ອຸປຈິກາທີຫິ ຂຊ຺ຊມາເນ ຈີວຣວໍເສ ວາ ຈີວຣຣຊ຺ຊຸຍາ ວາ ຈີວຣໍ ປຕ຺ຖຣິຕພ຺ພໍ ມຊ຺ເຌນ ຈີວເຣ ລຄ຺ຄິເຕ ຣຊນສ຺ສ ອຸຠໂຕ ຄຬິຕຕ຺ຕາ.

‘‘ອນຸຊານາມິ, ຠິກ຺ຂເວ, ກຓ຺ເຓ ພນ຺ຘິຕຸ’’ນ຺ຕິ (ມຫາວ. ໓໔໔) ວຈນໂຕ ກຓ຺ເຓ ພນ຺ຘິຕພ຺ພໍ ຈີວຣສ຺ສ ກຓ຺ເຓ ພນ຺ຘິຍມາເນ ກຓ຺ຓສ຺ສ ຊິຓ຺ຓຕ຺ຕາ. ‘‘ອນຸຊານາມິ, ຠິກ຺ຂເວ, ກຓ຺ຓສຸຕ຺ຕກ’’ນ຺ຕິ (ມຫາວ. ໓໔໔) ວຈນໂຕ ກຓ຺ຓສຸຕ຺ຕເກນ ພນ຺ຘິຕພ຺ພໍ ເອວໍ ພນ຺ຘນ຺ເຕ ຣຊນສ຺ສ ເອກໂຕ ຄຬິຕຕ຺ຕາ. ‘‘ອນຸຊານາມິ, ຠິກ຺ຂເວ, ສມ຺ປຣິວຕ຺ຕກໍ ສມ຺ປຣິວຕ຺ຕກໍ ຣເຊຕຸໍ, ນ ຈ ອຈ຺ຉິນ຺ເນ ເຖເວ ປກ຺ກມິຕຸ’’ນ຺ຕິ (ມຫາວ. ໓໔໔) ວຈນໂຕ ຕຖາ ຣຊິຕພ຺ພໍ. ຍາວ ຣຊນພິນ຺ທຸ ຄຬິຕໍ ນ ຉິຊ຺ຊຕິ, ຕາວ ນ ອຎ຺ຎຕ຺ຣ ຄນ຺ຕພ຺ພໍ. ‘‘ອນຸຊານາມິ, ຠິກ຺ຂເວ, ອຸທເກ ໂອສາເຣຕຸ’’ນ຺ຕິ (ມຫາວ. ໓໔໔) ວຈນໂຕ ປຕ຺ຖິນ຺ນໍ ຈີວຣໍ ອຸທເກ ໂອສາເຣຕພ຺ພໍ. ຕຕ຺ຖ ປຕ຺ຖິນ຺ນນ຺ຕິ ອຕິຣຊິຕຕ຺ຕາ ຖທ຺ຘໍ. ອຸທເກ ໂອສາເຣຕຸນ຺ຕິ ອຸທເກ ປກ຺ຂິປິຕ຺ວາ ຐເປຕຸໍ. ຣຊເນ ປນ ນິກ຺ຂນ຺ເຕ ຕໍ ອຸທກໍ ຉຑ຺ເຑຕ຺ວາ ຈີວຣໍ ມທ຺ທິຕພ຺ພໍ. ‘‘ອນຸຊານາມິ, ຠິກ຺ຂເວ, ປາຓິນາ ອາໂກເຏຕຸ’’ນ຺ຕິ (ມຫາວ. ໓໔໔) ວຈນໂຕ ຜຣຸສໍ ຈີວຣໍ ປາຓິນາ ອາໂກເຏຕພ຺ພໍ. ‘‘ນ, ຠິກ຺ຂເວ, ອຈ຺ຉິນ຺ນການິ ຈີວຣານິ ຘາເຣຕພ຺ພານິ, ໂຍ ຘາເຣຍ຺ຍ, ອາປຕ຺ຕິ ທຸກ຺ກຏສ຺ສາ’’ຕິ (ມຫາວ. ໓໔໔) ວຈນໂຕ ອຈ຺ຉິນ຺ນການິ ຈີວຣານິ ທນ຺ຕກາສາວານິ ນ ຘາເຣຕພ຺ພານິ. ຕຕ຺ຖ ທນ຺ຕກາສາວານີຕິ ເອກໍ ວາ ທ຺ເວ ວາ ວາເຣ ຣຊິຕ຺ວາ ທນ຺ຕວຓ຺ຓານິ ຘາເຣນ຺ຕິ.