ຈີວຣວິຈາຣຓກຖາ

ຈີວຣວິຈາຣຓກຖາຍໍ ‘‘ປຓ຺ຑິໂຕ, ຠິກ຺ຂເວ, ອານນ຺ໂທ, ມຫາປຎ຺ໂຎ, ຠິກ຺ຂເວ, ອານນ຺ໂທ. ຍຕ຺ຣ ຫິ ນາມ ມຍາ ສໍຂິຕ຺ເຕນ ຠາສິຕສ຺ສ ວິຕ຺ຖາເຣນ ອຕ຺ຖໍ ອາຊານິສ຺ສຕິ, ກຸສິມ຺ປິ ນາມ ກຣິສ຺ສຕິ, ອຑ຺ຒກຸສິມ຺ປິ ນາມ ກຣິສ຺ສຕິ, ມຓ຺ຑລມ຺ປິ ນາມ ກຣິສ຺ສຕິ, ອຑ຺ຒມຓ຺ຑລມ຺ປິ ນາມ ກຣິສ຺ສຕິ, ວິວຏ຺ຏມ຺ປິ ນາມ ກຣິສ຺ສຕິ, ອນຸວິວຏ຺ຏມ຺ປິ ນາມ ກຣິສ຺ສຕິ, ຄີເວຍ຺ຍກມ຺ປິ ນາມ ກຣິສ຺ສຕິ, ຊງ຺ເຆຍ຺ຍກມ຺ປິ ນາມ ກຣິສ຺ສຕິ, ພາຫນ຺ຕມ຺ປິ ນາມ ກຣິສ຺ສຕິ, ຉິນ຺ນກໍ ຠວິສ຺ສຕິ, ສຕ຺ຖລູຂໍ ສມຓສາຣຸປ຺ປໍ ປຈ຺ຈຕ຺ຖິການຎ຺ຈ ອນຠິຈ຺ຉິຕ’’ນ຺ຕິ (ມຫາວ. ໓໔໕) ວຈນໂຕ ‘‘ປສ຺ສສິ ຕ຺ວໍ, ອານນ຺ທ, ມຄຘເຂຕ຺ຕໍ ອຈ຺ຉິພທ຺ຘໍ ປາຬິພທ຺ຘໍ ມຣິຍາທພທ຺ຘໍ ສິງ຺ຆາຏກພທ຺ຘ’’ນ຺ຕິ ຠຄວໂຕ ສໍຂິຕ຺ເຕນ ວຸຕ຺ຕວຈນໍ ສຸຕ຺ວາ ອາຍສ຺ມາ ອານນ຺ໂທ ຠຄວໂຕ ອຊ຺ຌາສຍານຸຣູປໍ ສມ຺ພຫຸລານໍ ຠິກ຺ຂູນໍ ຈີວຣໍ ສໍວິທຫິ. ຕຖາ ອິທານິປິ ເອວຣູປໍ ຈີວຣໍ ສໍວິທຫິຕພ຺ພໍ.

ຕຕ຺ຖ ‘‘ອຈ຺ຉິພທ຺ຘນ຺ຕິ ຈຕຸຣສ຺ສເກທາຣພທ຺ຘໍ. ປາຬິພທ຺ຘນ຺ຕິ ອາຍາມໂຕ ຈ ວິຕ຺ຖາຣໂຕ ຈ ທີຆມຣິຍາທພທ຺ຘໍ. ມຣິຍາທພທ຺ຘນ຺ຕິ ອນ຺ຕຣນ຺ຕຣາ ຣສ຺ສມຣິຍາທພທ຺ຘໍ. ສິງ຺ຆາຏກພທ຺ຘນ຺ຕິ ມຣິຍາທາຍ ມຣິຍາທໍ ວິນິວິຊ຺ຌິຕ຺ວາ ຄຕຏ຺ຐາເນ ສິງ຺ຆາຏກພທ຺ຘໍ, ຈຕຸກ຺ກສຓ຺ຐານນ຺ຕິ ອຕ຺ໂຖ. ຍຕ຺ຣ ຫິ ນາມາຕິ ໂຍ ນາມ. ກຸສິມ຺ປິ ນາມາຕິອາທີສຸ ກຸສີຕິ ອາຍາມໂຕ ຈ ວິຕ຺ຖາຣໂຕ ຈ ອນຸວາຕາທີນໍ ທີຆປຏ຺ຏານເມຕໍ ອຘິວຈນໍ. ອຑ຺ຒກຸສີຕິ ອນ຺ຕຣນ຺ຕຣາຣສ຺ສປຏ຺ຏານໍ ນາມໍ. ມຓ຺ຑລນ຺ຕິ ປຎ຺ຈຂຓ຺ຑິກສ຺ສ ຈີວຣສ຺ສ ເອເກກສ຺ມິໍ ຂຓ຺ເຑ ມຫາມຓ຺ຑລໍ. ອຑ຺ຒມຓ຺ຑລນ຺ຕິ ຂຸທ຺ທກມຓ຺ຑລໍ. ວິວຏ຺ຏນ຺ຕິ ມຓ຺ຑລຎ຺ຈ ອຑ຺ຒມຓ຺ຑລຎ຺ຈ ເອກໂຕ ກຕ຺ວາ ສິພ຺ພິຕໍ ມຊ຺ຌິມຂຓ຺ຑໍ. ອນຸວິວຏ຺ຏນ຺ຕິ ຕສ຺ສ ອຸໂຠສຸ ປສ຺ເສສຸ ທ຺ເວ ຂຓ຺ຑານິ. ຄີເວຍ຺ຍກນ຺ຕິ ຄີວາເວຐນຏ຺ຐາເນ ທຬ຺ຫີກຣຓຕ຺ຖໍ ອຎ຺ຎສຸຕ຺ຕສໍສິພ຺ພິຕໍ ອາຄນ຺ຕຸກປຏ຺ຏໍ. ຊງ຺ເຆຍ຺ຍກນ຺ຕິ ຊງ຺ຆປາປຸຓນຏ຺ຐາເນ ຕເຖວ ສໍສິພ຺ພິຕໍ ປຏ຺ຏໍ. ຄີວາຏ຺ຐາເນ ຈ ຊງ຺ຆຏ຺ຐາເນ ຈ ປຏ຺ຏານເມຕໍ ນາມນ຺ຕິ. ພາຫນ຺ຕນ຺ຕິ ອນຸວິວຏ຺ຏານໍ ພຫິ ເອເກກໍ ຂຓ຺ຑໍ. ອິຕິ ປຎ຺ຈຂຓ຺ຑິກຈີວເຣເນຕໍ ວິຈາຣິຕນ຺ຕິ. ອຖ ວາ ອນຸວິວຏ຺ຏນ຺ຕິ ວິວຏ຺ຏສ຺ສ ເອກປສ຺ສໂຕ ທ຺ວິນ຺ນໍ ເອກປສ຺ສໂຕ ທ຺ວິນ຺ນນ຺ຕິ ຈຕຸນ຺ນມ຺ປິ ຂຓ຺ຑານເມຕໍ ນາມໍ. ພາຫນ຺ຕນ຺ຕິ ສຸປ຺ປມາຓໍ ຈີວຣໍ ປາຣຸປນ຺ເຕນ ສໍຫຣິຕ຺ວາ ພາຫາຍ ອຸປຣິ ຐປິຕາ ອຸໂຠ ອນ຺ຕາ ພຫິມຸຂາ ຕິຏ຺ຐນ຺ຕິ, ເຕສໍ ເອຕໍ ນາມໍ. ອຍເມວ ຫິ ນໂຍ ມຫາອຏ຺ຐກຖາຍໍ ວຸຕ຺ໂຕ’’ຕິ ອຏ຺ຐກຖາຍໍ (ມຫາວ. ອຏ຺ຐ. ໓໔໕) ອາຄໂຕ.