ອຸປາຫນກຖາ

ອຸປາຫນກຖາຍໍ ‘‘ອທ຺ທາຣິຏ຺ຐກວຓ຺ຓາຕິ ອຠິນວາຣິຏ຺ຐຜລວຓ຺ຓາ, ອຸທເກນ ຕິນ຺ຕກາກປຕ຺ຕວຓ຺ຓາຕິປິ ວທນ຺ຕິ. ອຸຓ຺ຓາຫິ ກຕປາທຸກາຕິ ອຸຓ຺ຓາໂລມມຍກມ຺ພເລຫິ, ອຸຓ຺ຓາໂລເມຫິ ເອວ ວາ ກຕປາທຸກາ. ກາຬສີໂຫຕິ ກາຬມຸຂວານຣຊາຕິ. ເສສເມຕ຺ຖ ປາຬິໂຕ ຈ ອຏ຺ຐກຖາໂຕ ຈ ສຸວິຎ຺ເຎຍ຺ຍເມວາ’’ຕິ ສາຣຕ຺ຖທີປນິຍໍ (ສາຣຕ຺ຖ. ຏີ. ມຫາວຄ຺ຄ ໓.໒໔໖) ວຸຕ຺ຕໍ. ວິມຕິວິໂນທນິຍໍ (ວິ. ວິ. ຏີ. ມຫາວຄ຺ຄ ໒.໒໔໖) ປນ ‘‘ອທ຺ທາຣິຏ຺ຐກວຓ຺ຓາຕິ ອລ຺ລາຣິຏ຺ຐຜລວຓ຺ຓາ, ຕິນ຺ຕກາກປກ຺ຂວຓ຺ຓາຕິປິ ວທນ຺ຕິ. ຣຊນນ຺ຕິ ອຸປຣິລິຕ຺ຕນີລາທິວຓ຺ຓໍ ສນ຺ຘາຍ ວຸຕ຺ຕໍ. ເຕນາຫ ‘ໂຈຬເກນ ປຸຎ຺ຉິຕ຺ວາ’ຕິ. ຕຎ຺ຫິ ຕຖາ ປຸຎ຺ຉິເຕ ວິຄຈ຺ຉຕິ. ຍໍ ປນ ຈມ຺ມສ຺ສ ທຸຄ຺ຄນ຺ຘາປນຍນຕ຺ຖໍ ກາຬຣຕ຺ຕາທິຣຊເນຫິ ຣຎ຺ຊິຕຕ຺ຕາ ກາຬຣຕ຺ຕາທິວຓ຺ຓໍ ໂຫຕິ, ຕໍ ໂຈຬາທີຫິ ອປເນຕຸໍ ນ ສກ຺ກາ ຈມ຺ມຄຕິກເມວ, ຕສ຺ມາ ຕໍ ວຏ຺ຏຕີຕິ ທຏ຺ຐພ຺ພໍ. ຂລ຺ລກນ຺ຕິ ສພ຺ພປຓ຺ຫິປິຘານຈມ຺ມໍ ອປຣິຄຬນຕ຺ຖໍ ປຓ຺ຫິຍາ ອຸປຣິຠາເຄ ອປິຘາຍ ອາໂຣປນພນ຺ຘນມຕ຺ຕໍ ວຏ຺ຏຕິ. ວິຈິຕ຺ຣາຕິ ສຓ຺ຐານໂຕ ວິຈິຕ຺ຣປຏ຺ຏາ ອຘິປ຺ເປຕາ, ນ ວຓ຺ຓໂຕ ສພ຺ພໂສ ອປເນຕພ຺ເພສຸ ຂລ຺ລກາທີສຸ ປວິຏ຺ຐຕ຺ຕາ. ພິຬາລສທິສມຸຂຕ຺ຕາ ມຫາອຸລູກາ ປກ຺ຂິພິຬາລາຕິ ວຸຈ຺ຈນ຺ຕິ, ເຕສໍ ຈມ຺ມໍ ນາມ ປກ຺ຂໂລມເມວ. ອຸຓ຺ຓາຫິ ກຕປາທຸກາຕິ ເອຕ຺ຖ ອຸຓ຺ຓາມຍກມ຺ພເລຫິ ກຕປາທຸກາ ສງ຺ຄຍ຺ຫນ຺ຕິ. ກາຬສີໂຫຕິ ກາຬມຸຂວານຣຊາຕິ. ຈມ຺ມໍ ນ ວຏ຺ຏຕີຕິ ນິສີທນຕ຺ຖຣຓໍ ກາຕຸໍ ນ ວຏ຺ຏຕິ, ຠູມຕ຺ຖຣຓາທິວເສນ ປຣິໂຠໂຄ ວຏ຺ຏເຕວາ’’ຕິ ວຸຕ຺ຕໍ.

ວຊິຣພຸທ຺ຘິຏີກາຍໍ (ວຊິຣ. ຏີ. ມຫາວຄ຺ຄ ໒໕໙) ປນ ‘‘ມິຄມາຕຸໂກຕິ ຕສ຺ສ ນາມໍ, ວາຕມິໂຄຕິ ຈ ຕສ຺ສ ນາມໍ. ‘ກາຬສີໂຫ ກາຬມຸໂຂ ກປີ’ຕິ ລິຂິຕໍ. ຈມ຺ມໍ ນ ວຏ຺ຏຕີຕິ ເຍນ ປຣິຍາເຍນ ຈມ຺ມໍ ວຏ຺ຏິສ຺ສຕິ, ໂສ ປຣໂຕ ອາວິຠວິສ຺ສຕິ. ‘ອຕ຺ຕໂນ ປຸຄ຺ຄລິກວເສນ ປຈ຺ຈາຫາໂຣ ປຏິກ຺ຂິຕ຺ໂຕ’ຕິ ວຸຕ຺ຕໍ. ‘ນ, ຠິກ຺ຂເວ, ກິຎ຺ຈິ ຈມ຺ມໍ ຘາເຣຕພ຺ພ’ນ຺ຕິ ເອຕ຺ຕາວຕາ ສິທ຺ເຘ ‘ນ, ຠິກ຺ຂເວ, ໂຄຈມ຺ມ’ນ຺ຕິ ອິທໍ ປຣໂຕ ‘ອນຸຊານາມິ, ຠິກ຺ຂເວ, ສພ຺ພປຈ຺ຈນ຺ຕິເມສຸ ຊນປເທສຸ ຈມ຺ມານິ ອຕ຺ຖຣຓານີ’ຕິ (ມຫາວ. ໒໕໙) ເອຕ຺ຖ ອນຸມຕິປ຺ປສງ຺ຄຠຍາ ວຸຕ຺ຕນ຺ຕິ ເວທິຕພ຺ພ’’ນ຺ຕິ ວຸຕ຺ຕໍ.