ໂລຓໂສວີຣກກຖາ

ໂລຓໂສວີຣກກຖາຍໍ ‘‘ອນຸຊານາມິ, ຠິກ຺ຂເວ, ຄິລານສ຺ສ ໂລຓໂສວີຣກໍ, ອຄິລານສ຺ສ ອຸທກສມ຺ຠິນ຺ນໍ ປານປຣິໂຠເຄນ ປຣິຠຸຎ຺ຊິຕຸ’’ນ຺ຕິ (ມຫາວ. ໒໗໓) ວຈນໂຕ ຄິລາເນນ ຠິກ຺ຂຸນາ ໂລຓໂສວີຣກໍ ປາຕພ຺ພໍ, ອຄິລາເນນ ອຸທກສມ຺ຠິນ຺ນໍ ກຕ຺ວາ ປຣິຠຸຎ຺ຊິຕພ຺ພໍ, ຕຎ຺ຈ ‘‘ປານປຣິໂຠເຄນາ’’ຕິ ວຈນໂຕ ວິກາເລປິ ວຏ຺ຏຕິ.

ຕຕ຺ຖ ໂລຓໂສວີຣກໍ ນາມ ສພ຺ພຣສາຠິສງ຺ຂຕໍ ເອກໍ ເຠສຊ຺ຊໍ, ຕໍ ກິຣ ກໂຣນ຺ໂຕ ຫຣີຕກາມລກວິຠີຕກກສາເວ ສພ຺ພຘຎ຺ຎານິ ສພ຺ພອປຣຓ຺ຓານິ ສຕ຺ຕນ຺ນມ຺ປິ ຘຎ຺ຎານໍ ໂອທນໍ ກທລິຜລາທີນິ ສພ຺ພຜລານິ ເວຕ຺ຕເກຕກຂຊ຺ຊູຣິກຬີຣາທໂຍ ສພ຺ພກຬີເຣ ມຈ຺ຉມໍສຂຓ຺ຑານິ ອເນການິ ຈ ມຘຸຜາຓິຕສິນ຺ຘວໂລຓຕິກຏຸກາທີນິ ເຠສຊ຺ຊານິ ປກ຺ຂິປິຕ຺ວາ ກຸມ຺ຠິມຸຂໍ ລິມ຺ປິຕ຺ວາ ເອກໍ ທ຺ເວ ຕີຓິ ສໍວຈ຺ຉຣານິ ຐເປນ຺ຕິ, ຕໍ ປຣິປຈ຺ຈິຕ຺ວາ ຊມ຺ພຸຣສວຓ຺ຓໍ ໂຫຕິ, ວາຕກາສກຸຏ຺ຐປຓ຺ຑຸຠຄຓ຺ຑລາທີນໍ ສິນິທ຺ຘໂຠຊນຠຸຕ຺ຕານຎ຺ຈ ອຸຕ຺ຕຣປານໍ ຠຕ຺ຕຊີຣຓກເຠສຊ຺ຊໍ ຕາທິສໍ ນຕ຺ຖິ, ຕໍ ປເນຕໍ ຠິກ຺ຂູນໍ ປຈ຺ຉາຠຕ຺ຕມ຺ປິ ວຏ຺ຏຕິ, ຄິລານານໍ ປາກຕິກເມວ. ອຄິລານານໍ ປນ ອຸທກສມ຺ຠິນ຺ນໍ ປານປຣິໂຠເຄນາຕິ.

ສາຣຕ຺ຖທີປນິຍໍ (ສາຣຕ຺ຖ. ຏີ. ໒.໑໙໑-໑໙໒) ປນ ‘‘ປານປຣິໂຠເຄນາຕິ ວຸຕ຺ຕຕ຺ຕາ ໂລຓໂສວີຣກໍ ຍາມກາລິກ’’ນ຺ຕິ ວຸຕ຺ຕໍ. ວິມຕິວິໂນທນິຍໍ (ວິ. ວິ. ຏີ. ໑.໑໙໒) ປນ ‘‘ປານປຣິໂຠເຄນ ວຏ຺ຏຕີຕິ ສມ຺ພນ຺ໂຘ. ເອວໍ ປນ ວຸຕ຺ຕຕ຺ຕາ ໂລຓໂສວີຣກໍ ຍາມກາລິກນ຺ຕິ ເກຈິ ວທນ຺ຕິ, ເກຈິ ປນ ‘ຄິລານານໍ ປາກຕິກເມວ, ອຄິລານານໍ ປນ ອຸທກສມ຺ຠິນ຺ນ’ນ຺ຕິ ວຸຕ຺ຕຕ຺ຕາ ຄຸຬໍ ວິຍ ສຕ຺ຕາຫກາລິກ’’ນ຺ຕິ ວຸຕ຺ຕໍ. ວຊິຣພຸທ຺ຘິຏີກາຍໍ (ວຊິຣ. ຏີ. ມຫາວຄ຺ຄ ໒໖໓) ປນ ‘‘ອວິເສເສນ ສຕິປຈ຺ຈຍຕາ ວຸຕ຺ຕາ. ອິມສ຺ມິໍ ຂນ຺ຘເກ ‘ອນຸຊານາມິ, ຠິກ຺ຂເວ, ຄິລານສ຺ສ ຄຸຬໍ, ອຄິລານສ຺ສ ຄຸໂຬທກໍ, ຄິລານສ຺ສ ໂລຓໂສວີຣກໍ, ອຄິລານສ຺ສ ອຸທກສມ຺ຠິນ຺ນ’ນ຺ຕິ (ມຫາວ. ໒໘໔) ວຸຕ຺ຕໍ, ຕສ຺ມາ ສິທ຺ຘໍ ‘ສຕິປຈ຺ຈຍຕາ ຄິລານາຄິລານວເສນ ທຸວິຘາ’ຕິ’’ ວຸຕ຺ຕໍ.