໑໑. ກຍວິກ຺ກຍສມາປຕ຺ຕິວິນິຈ຺ຉຍກຖາ

໕໗. ເອວໍ ຠຓ຺ຑປຏິສາມນວິນິຈ຺ຉຍໍ ກເຖຕ຺ວາ ອິທານິ ກຍວິກ຺ກຍວິນິຈ຺ຉຍໍ ກເຖນ຺ໂຕ ‘‘ກຍວິກ຺ກຍສມາປຕ຺ຕີ’’ຕິອາທິມາຫ. ຕຕ຺ຖ ກຍນໍ ກໂຍ, ປຣຠຓ຺ຑສ຺ສ ຄຫຓໍ, ວິກ຺ກຍນໍ ວິກ຺ກໂຍ, ສກຠຓ຺ຑສ຺ສ ທານໍ, ກໂຍ ຈ ວິກ຺ກໂຍ ຈ ກຍວິກ຺ກຍໍ. ສມາປຊ຺ຊນໍ ສມາປຕ຺ຕິ, ຕສ຺ສ ທຸວິຘສ຺ສ ກິຣິຍສ຺ສ ກຣຓໍ. ຕສ຺ສຣູປໍ ທສ຺ເສຕິ ‘‘ອິມິນາ’’ຕິອາທິນາ.

ເສສຎາຕເກສຸ ສທ຺ຘາເທຍ຺ຍວິນິປາຕສມ຺ຠວໂຕ ຕທຠາວຏ຺ຐານມ຺ປິ ທສ຺ເສຕຸໍ ‘‘ມາຕຣໍ ວາ ປນ ປິຕຣໍ ວາ’’ຕິອາທິ ວຸຕ຺ຕໍ. ເຕນ ວິຎ຺ຎຕ຺ຕິສທ຺ຘາເທຍ຺ຍວິນິປາຕນຎ຺ຈ ນ ໂຫຕິ ‘‘ອິມິນາ ອິທໍ ເທຫີ’’ຕິ ວທນ຺ໂຕຕິ ທສ຺ເສຕິ, ກຍວິກ຺ກຍໍ ປນ ອາປຊ຺ຊຕິ ‘‘ອິມິນາ ອິທໍ ເທຫີ’’ຕິ ວທນ຺ໂຕຕິ ທສ຺ເສຕິ. ອິມິນາ ຈ ອຸປຣິ ອຎ຺ຎາຕກນ຺ຕ຺ຍາທິນາ ຈ ເສສຎາຕກໍ ‘‘ອິມໍ ເທຫີ’’ຕິ ວທໂຕ ວິຎ຺ຎຕ຺ຕິ ນ ໂຫຕິ, ‘‘ອິມໍ ຄຓ຺ຫາຫີ’’ຕິ ປນ ທທໂຕ ສທ຺ຘາເທຍ຺ຍວິນິປາຕນໍ, ‘‘ອິມິນາ ອິມໍ ເທຫີ’’ຕິ ກຍວິກ຺ກຍໍ ອາປຊ຺ຊໂຕ ນິສ຺ສຄ຺ຄິຍນ຺ຕິ ອຍມ຺ປິ ອຕ຺ໂຖ ທສ຺ສິໂຕ ໂຫຕິ ມິຄປທວລຎ຺ຊນນ຺ຍາເຍນ. ຕສ຺ມາອິຈ຺ຈາທິເກປິ ‘‘ມາຕາປິຕູຫິ ສທ຺ຘິໍ ກຍວິກ຺ກຍໍ, ເສສຎາຕເກຫິ ສທ຺ຘິໍ ທ຺ເວ ອາປຕ຺ຕິໂຍ, ອຎ຺ຎາຕເກຫິ ສທ຺ຘິໍ ຕິສ຺ໂສ ອາປຕ຺ຕິໂຍ’’ຕິ ວຕ຺ຕພ຺ເພ ເຕເນວ ນ຺ຍາເຍນ ຎາຕຸໍ ສກ຺ກາຕິ ກຕ຺ວາ ນ ວຸຕ຺ຕນ຺ຕິ ທຏ຺ຐພ຺ພໍ, ອຎ຺ຎຖາ ອພ຺ຍາປິຕໂທໂສ ສິຍາ.

‘‘ອິທໍ ຠຕ຺ຕໍ ຠຸຎ຺ຊິຕ຺ວາ ອິທໍ ກໂຣຖາ’’ຕິ ວຸຕ຺ເຕ ປຸພ຺ພາປຣສມ຺ພນ຺ຘາຍ ກິຣິຍາຍ ວຸຕ຺ຕຕ຺ຕາ ‘‘ອິມິນາ ອິທໍ ເທຫີ’’ຕິ ວຸຕ຺ຕສທິສໍ ໂຫຕິ. ອິທໍ ຠຕ຺ຕໍ ຠຸຎ຺ຊ, ອິທໍ ນາມ ກໂຣຫີ’’ຕິ ວາ, ‘‘ອິທໍ ຠຕ຺ຕໍ ຠຸຕ຺ໂຕສິ, ອິທໍ ນາມ ກໂຣຫິ, ອິທໍ ຠຕ຺ຕໍ ຠຸຎ຺ຊິສ຺ສສິ, ອິທໍ ນາມ ກໂຣຫີ’’ຕິ ປນ ວຸຕ຺ເຕ ອສມ຺ພນ຺ຘາຍ ກິຣິຍາຍ ວຸຕ຺ຕຕ຺ຕາ ກຍວິກ຺ກໂຍ ນ ໂຫຕິ. ວິຆາສາທານໍ ຠຕ຺ຕທາເນ ຈ ອນເປກ຺ຂຕ຺ຕາ ສທ຺ຘາເທຍ຺ຍວິນິປາຕນໍ ນ ໂຫຕິ, ກາຣາປເນ ຫຕ຺ຖກມ຺ມມຕ຺ຕຕ຺ຕາ ວິຎ຺ຎຕ຺ຕິ ນ ໂຫຕິ, ຕສ຺ມາ ວຏ຺ຏຕິ. ‘‘ເອຕ຺ຖ ຈາ’’ຕິອາທິນາ ອສຕິປິ ນິສ຺ສຄ຺ຄິຍວຕ຺ຖຸມ຺ຫິ ປາຈິຕ຺ຕິຍໍ ເທເສຕພ຺ພນ຺ຕິ ທສ຺ເສຕິ.

ອຄ຺ຆໍ ປຸຈ຺ຉິຕຸໍ ວຏ຺ຏຕິ, ເອຕ຺ຕາວຕາ ກຍວິກ຺ກໂຍ ນ ໂຫຕີຕິ ອຕ຺ໂຖ. ຄຓ຺ຫິຕຸໍ ວຏ຺ຏຕີຕິ ‘‘ອິມິນາ ອິທໍ ເທຫີ’’ຕິ ອວຸຕ຺ຕຕ຺ຕາ ກຍວິກ຺ກໂຍ ນ ໂຫຕິ, ມູລສ຺ສ ອຕ຺ຖິຕາຍ ວິຎ຺ຎຕ຺ຕິປິ ນ ໂຫຕິ. ປຕ຺ໂຕ ນ ຄເຫຕພ຺ໂພ ປຣຠຓ຺ຑສ຺ສ ມຫຄ຺ຆຕາຍ. ເອວໍ ສຕິ ກຖໍ ກາຕພ຺ໂພຕິ ອາຫ ‘‘ມມ ວຕ຺ຖຸ ອປ຺ປຄ຺ຆນ຺ຕິ ອາຈິກ຺ຂິຕພ຺ພ’’ນ຺ຕິ. ຠຓ຺ຑໍ ອຄ຺ຆາເປຕ຺ວາ ກາເຣຕພ຺ພຕໍ ອາປຊ຺ຊຕິ ເຖຍ຺ຍາວຫາຣສມ຺ຠວໂຕ, ອູນມາສກໍ ເຈ ອຄ຺ຆຕິ, ທຸກ຺ກຏໍ. ມາສກໂຕ ປຏ຺ຐາຍ ຍາວ ອູນປຎ຺ຈມາສກໍ ເຈ ອຄ຺ຆຕິ, ຖຸລ຺ລຈ຺ຈຍໍ. ປຎ຺ຈມາສກໍ ເຈ ອຄ຺ຆຕິ, ປາຣາຊິກນ຺ຕິ ວຸຕ຺ຕໍ ໂຫຕິ. ເທຕິ, ວຏ຺ຏຕິ ປຸຎ຺ຎຕ຺ຖາຍ ທິນ຺ນຕ຺ຕາ ອຘິກສ຺ສ. ກປ຺ປິຍກາຣກສ຺ສ ປນ…ເປ… ວຏ຺ຏຕິ ອຸຠໂຕ ກປ຺ປິຍຠຓ຺ຑຕ຺ຕາ. ເອກໂຕ ອຸຠໂຕ ວາ ເຈ ອກປ຺ປິຍຠຓ຺ຑໍ ໂຫຕິ, ນ ວຏ຺ຏຕິ. ‘‘ມາ ຄຓ຺ຫາຫີ’’ຕິ ວຕ຺ຕພ຺ໂພ, ກສ຺ມາ? ກປ຺ປິຍກາຣກສ຺ສ ອເຉກຕ຺ຕາ.

ອຎ຺ເຎນ ອປ຺ປຏິຄ຺ຄຫິເຕນ ອຕ຺ໂຖ, ກສ຺ມາ? ສຕ຺ຕາຫກາລິກຕ຺ຕາ ເຕລສ຺ສ. ປຏິຄ຺ຄຫິຕເຕລໍ ສຕ຺ຕາຫປຣມໍ ເອວ ຐເປຕພ຺ພໍ, ຕສ຺ມາ ຕໂຕ ປຣໍ ຐປິຕຸກາມສ຺ສ ອປ຺ປຏິຄ຺ຄຫິຕເຕເລນ ອຕ຺ໂຖ ໂຫຕິ. ອປ຺ປຏິຄ຺ຄຫິຕໍ ທູເສຍ຺ຍ, ອນິຍມິຕກາລໍ ອປ຺ປຏິຄ຺ຄຫິຕເຕລໍ ນາຬິຍໍ ອວສິຏ຺ຐປຏິຄ຺ຄຫິຕເຕລໍ ອຕ຺ຕໂນ ກາລໍ ວຕ຺ຕາເປຍ຺ຍ.

໕໘. ອິທໍ ປຕ຺ຕຈຕຸກ຺ກໍ ເວທິຕພ຺ພນ຺ຕິ ອກປ຺ປິຍປຕ຺ຕຈຕຸກ຺ກໍ ວຸຕ຺ຕໍ, ປຎ຺ຈໂມ ປນ ກປ຺ປິໂຍ. ເຕນ ວກ຺ຂຕິ ‘‘ອຍໍ ປຕ຺ໂຕ ສພ຺ພກປ຺ປິໂຍ ພຸທ຺ຘານມ຺ປິ ປຣິໂຠຄາຣໂຫ’’ຕິ. ອຍໍ ປຕ຺ໂຕ ມຫາອກປ຺ປິໂຍ ນາມ, ກສ຺ມາ? ຣູປິຍໍ ອຸຄ຺ຄຓ຺ຫິຕ຺ວາ ອຍພີຊໍ ສມຸຏ຺ຐາເປຕ຺ວາ ເຕນ ໂລເຫນ ປຕ຺ຕສ຺ສ ກາຣິຕຕ຺ຕາ, ເອວໍ ພີຊໂຕ ປຏ຺ຐາຍ ທູສິຕຕ຺ຕາ. ຍຖາ ຈ ຕຕິຍປາຣາຊິກວິສເຍ ຖາວຣປໂຍເຄສຸ ປາສສູລາທີສຸ ມູລໂຕ ປຏ຺ຐາຍ ກາຣິເຕສຸ ກິສ຺ມິຎ຺ຈິ ທຓ຺ຑມຕ຺ເຕ ວາ ວາກມຕ຺ເຕ ວາ ອວສິຏ຺ເຐ ສຕິ ນ ມຸຈ຺ຈຕິ, ສພ຺ພສ຺ມິໍ ນຏ຺ເຐເຍວ ມຸຈ຺ຈຕິ, ເອວມິຘາປິ ພີຊໂຕ ປຏ຺ຐາຍ ກຕຕ຺ຕາ ຕສ຺ມິໍ ປຕ຺ເຕ ກິສ຺ມິຎ຺ຈິ ປຕ຺ເຕ ອວສິຏ຺ເຐປິ ກປ຺ປິໂຍ ຠວິຕຸໍ ນ ສກ຺ກາ. ຕຖາ ຈ ວກ຺ຂຕິ ‘‘ສເຈປິ ຕໍ ວິນາເສຕ຺ວາ ຖາລກໍ ກາເຣຕິ, ຕມ຺ປິ ອກປ຺ປິຍ’’ນ຺ຕ຺ຍາທິ. ເອວໍ ສນ຺ເຕປິ ທຸຕິຍປຕ຺ເຕ ວິຍ ມູເລ ຈ ມູລສ຺ສາມິການໍ, ປຕ຺ເຕ ຈ ປຕ຺ຕສ຺ສາມິການໍ ທິນ຺ເນ ກປ຺ປິໂຍ ກາຕຸໍ ສກ຺ກາ ຠເວຍ຺ຍ ນຸ ໂຂຕິ ອາສງ຺ກາຍມາຫ ‘‘ນ ສກ຺ກາ ເກນຈິ ອຸປາເຍນ ກປ຺ປິໂຍ ກາຕຸ’’ນ຺ຕິ. ຕສ຺ສຕ຺ໂຖ – ທຸຕິຍປຕ຺ຕໍ ຣູປິຍໍ ປຏິຄ຺ຄຓ຺ຫິຕ຺ວາ ຄິຫີຫິ ປຣິນິຏ຺ຐາປິຕເມວ ກິຓາຕິ, ນ ພີຊໂຕ ປຏ຺ຐາຍ ທູເສຕິ, ຕສ຺ມາ ທຸຕິຍປຕ຺ໂຕ ກປ຺ປິໂຍ ກາຕຸໍ ສກ຺ກາ, ອິຘ ປນ ພີຊໂຕ ປຏ຺ຐາຍ ທູສິຕຕ຺ຕາ ເຕນ ຠິກ຺ຂຸນາ ຕໍ ປຕ຺ຕໍ ປຸນ ອຍປາສາຓພີຊໍ ກາຕຸໍ ອສກ຺ກຸເຓຍ຺ຍຕ຺ຕາ, ປຏິຄ຺ຄຫິຕຣູປິຍສ຺ສ ຈ ວຬຎ຺ຊິຕຕ຺ຕາ ປຸນ ສາມິການໍ ທາຕຸໍ ອສກ຺ກຸເຓຍ຺ຍຕ຺ຕາ ນ ສກ຺ກາ ເກນຈິ ອຸປາເຍນ ກປ຺ປິໂຍ ກາຕຸນ຺ຕິ.

ອິທານິ ຕໍ ອສກ຺ກຸເຓຍ຺ຍຕ຺ຕໍ ອຎ຺ເຎນ ປກາເຣນ ວິຕ຺ຖາເຣຕຸໍ ‘‘ສເຈປີ’’ຕິອາທິມາຫ. ອິມິນາ ກິຎ຺ຈິປິ ອຍວຕ຺ຖຸມ຺ຫິ ອວສິຏ຺ເຐ ສຕິ ອກປ຺ປິໂຍວ ໂຫຕີຕິ ທສ຺ເສຕິ. ເຕນ ວຸຕ຺ຕໍ ວິມຕິວິໂນທນິຍໍ (ວິ. ວິ. ຏີ. ໑.໕໙໑) ‘‘ຣູປິຍໍ ອຸຄ຺ຄຓ຺ຫິຕ຺ວາຕິ ອິທໍ ອຸກ຺ກຏ຺ຐວເສນ ວຸຕ຺ຕໍ, ມຸຕ຺ຕາທິທຸກ຺ກຏວຕ຺ຖຸມ຺ປິ ອຸຄ຺ຄຓ຺ຫິຕ຺ວາ ກາຣິຕມ຺ປິ ປຎ຺ຈນ຺ນໍ ນ ວຏ຺ຏຕິ ເອວ. ສມຸຏ຺ຐາເປຕີຕິ ສຍໍ ຄນ຺ຕ຺ວາ ວາ ‘ອິມໍ ກຫາປຓາທິໍ ກມ຺ມກາຣານໍ ທຕ຺ວາ ພີຊໍ ສມຸຏ຺ຐາເປຫີ’ຕິ ອຎ຺ຎໍ ອາຓາເປຕ຺ວາ ວາ ສມຸຏ຺ຐາເປຕິ. ມຫາອກປ຺ປິໂຍຕິ ອຕ຺ຕນາວ ພີຊໂຕ ປຏ຺ຐາຍ ທູສິຕຕ຺ຕາ ອຎ຺ຎສ຺ສ ມູລສ຺ສາມິກສ຺ສ ອຠາວໂຕ ວຸຕ຺ຕໍ. ໂສ ຫິ ໂຈເຣຫິ ອຈ຺ຉິນ຺ໂນປິ ປຸນ ລທ຺ໂຘ ຊານນ຺ຕສ຺ສ ກສ຺ສຈີປິ ນ ວຏ຺ຏຕິ. ຍທິ ຫິ ວຏ຺ເຏຍ຺ຍ, ຕຬາກາທີສຸ ວິຍ ‘ອຈ຺ຉິນ຺ໂນ ວຏ຺ຏຕີ’ຕິ ອາຈຣິຍາ ວເທຍ຺ຍຸໍ. ນ ສກ຺ກາ ເກນຈິ ອຸປາເຍນາຕິ ສງ຺ຆສ຺ສ ວິສ຺ສຊ຺ຊເນນ ໂຈຣາທິອຈ຺ຉິນ຺ທເນນປິ ກປ຺ປິໂຍ ກາຕຸໍ ນ ສກ຺ກາ, ອິທຎ຺ຈ ເຕນ ຣູເປນ ຐິຕໍ ຕມ຺ມູລເກນ ວຕ຺ຖມຸຕ຺ຕາທິຣູເປນ ຐິຕຎ຺ຈ ສນ຺ຘາຍ ວຸຕ຺ຕໍ. ທຸກ຺ກຏວຕ຺ຖຸມ຺ປິ ຫິ ຕມ຺ມູລກກປ຺ປິຍວຕ຺ຖຸ ຈ ນ ສກ຺ກາ ເກນຈິ ເຕນ ຣູເປນ ກປ຺ປິຍໍ ກາຕຸໍ. ຍທິ ປນ ໂສ ຠິກ຺ຂຸ ເຕນ ກປ຺ປິຍວຕ຺ຖຸນາ, ທຸກ຺ກຏວຕ຺ຖຸນາ ວາ ປຸນ ຣູປິຍໍ ເຈຕາເປຍ຺ຍ, ຕໍ ຣູປິຍໍ ນິສ຺ສຊ຺ຊາເປຕ຺ວາ ອຎ຺ເຎສໍ ກປ຺ປິຍໍ ກາຕຸມ຺ປິ ສກ຺ກາ ຠເວຍ຺ຍາຕິ ທຏ຺ຐພ຺ພ’’ນ຺ຕິ. ຍໍ ປນ ສາຣຕ຺ຖທີປນິຍໍ ປປຎ຺ຈິຕໍ, ຍຎ຺ຈ ຕເມວ ຄເຫຕ຺ວາ ໂປຣາຓຏີກາຍໍ ປປຎ຺ຈິຕໍ, ຕໍ ວິຕ຺ຖາເຣຕ຺ວາ ວຸຈ຺ຈມານໍ ອຕິວິຕ຺ຖາຣິຕຎ຺ຈ ຠວິສ຺ສຕິ, ໂສຕູນຎ຺ຈ ທຸພ຺ພິຎ຺ເຎຍ຺ຍໍ, ຕສ຺ມາ ເອຕ຺ຕກເມວ ວທິມ຺ຫ, ອຕ຺ຖິເກຫິ ປນ ເຕສຸ ເຕສຸ ປກຣເຓສຸ ໂອໂລເກຕ຺ວາ ຄເຫຕພ຺ພນ຺ຕິ.

ທຸຕິຍປຕ຺ເຕ ປຎ຺ຈນ຺ນມ຺ປິ ສຫຘມ຺ມິການໍ ນ ກປ຺ປຕີຕິ ຣູປິຍສ຺ສ ປຏິຄ຺ຄຫິຕຕ຺ຕາ, ກຍວິກ຺ກຍສ຺ສ ຈ ກຕຕ຺ຕາ. ສກ຺ກາ ປນ ກປ຺ປິໂຍ ກາຕຸນ຺ຕິ ຄິຫີຫິ ປຣິນິຏ຺ຐາປິຕປຕ຺ຕສ຺ເສວ ກິຓິຕຕ຺ຕາ, ພີຊໂຕ ປຏ຺ຐາຍ ອທູສິຕຕ຺ຕາ, ມູລມູລສ຺ສາມິການຎ຺ຈ ປຕ຺ຕປຕ຺ຕສ຺ສາມິການຎ຺ຈ ວິຊ຺ຊມານຕ຺ຕາ. ຍຖາ ປນ ສກ຺ກາ ໂຫຕິ, ຕໍ ທສ຺ເສຕຸໍ ‘‘ມູເລ’’ຕິອາທິມາຫ.

ຕຕິຍປຕ຺ເຕ ສທິໂສເຍວາຕິ ‘‘ປຎ຺ຈນ຺ນມ຺ປິ ສຫຘມ຺ມິການໍ ນ ວຏ຺ຏຕິ, ສກ຺ກາ ປນ ກປ຺ປິໂຍ ກາຕຸ’’ນ຺ຕິ ອິມໍ ນຍໍ ນິທ຺ທິສຕິ. ນນຸ ຕຕິຍປຕ຺ໂຕ ກປ຺ປິຍໂວຫາເຣນ ຄຫິໂຕ, ອຖ ກສ຺ມາ ອກປ຺ປິໂຍຕິ ໂຈທນໍ ສນ຺ຘາຍາຫ ‘‘ກປ຺ປິຍໂວຫາເຣນ ຄຫິໂຕປິ ທຸຕິຍປຕ຺ຕສທິໂສເຍວ, ມູລສ຺ສ ສມ຺ປຏິຈ຺ຉິຕຕ຺ຕາ ອກປ຺ປິໂຍ’’ຕິ. ທຸຕິຍໂຈທນໍ ປນ ສຍເມວ ວທຕິ. ເອຕ຺ຖ ຈ ‘‘ທຸຕິຍປຕ຺ຕສທິໂສເຍວາ’’ຕິ ວຸຕ຺ຕຕ຺ຕາ ມູເລ ຈ ມູລສ຺ສາມິການໍ, ປຕ຺ເຕ ຈ ປຕ຺ຕສ຺ສາມິການໍ ທິນ຺ເນ ກປ຺ປິໂຍ ໂຫຕິ, ກປ຺ປິຍຠຓ຺ຑໍ ທຕ຺ວາ ຄເຫຕ຺ວາ ປຣິຠຸຎ຺ຊິຕຸໍ ວຏ຺ຏຕີຕິ ທຏ຺ຐພ຺ໂພ. ມູລສ຺ສ ອນິສ຺ສຏ຺ຐຕ຺ຕາຕິ ເຍນ ອຸຄ຺ຄຫິຕມູເລນ ປຕ຺ໂຕ ກີໂຕ, ຕສ຺ສ ມູລສ຺ສ ສງ຺ຆມຊ຺ເຌ ອນິສ຺ສຏ຺ຐຕ຺ຕາ. ເອເຕນ ຣູປິຍເມວ ນິສ຺ສຊ຺ຊິຕພ຺ພໍ, ນ ຕມ຺ມູລກໍ ອຣູປິຍນ຺ຕິ ທສ຺ເສຕິ. ຍທິ ຫິ ເຕນ ສມ຺ປຏິຈ຺ຉິຕມູລໍ ສງ຺ຆມຊ຺ເຌ ນິສ຺ສຏ຺ຐໍ ສິຍາ, ເຕນ ກປ຺ປິເຍນ ກມ຺ເມນ ອາຣາມິກາທີຫິ ຄເຫຕ຺ວາ ທິນ຺ນປຕ຺ໂຕ ຣູປິຍປຏິຄ຺ຄາຫກໍ ຐເປຕ຺ວາ ເສສານໍ ວຏ຺ເຏຍ຺ຍ.

ຈຕຸຕ຺ຖປຕ຺ເຕ ທຸພ຺ພິຈາຣິຕຕ຺ຕາຕິ ‘‘ອິເມ ກຫາປເຓ ທຕ຺ວາ ອິທໍ ເທຫີ’’ຕິ ຄຫິຕຕ຺ຕາ ຄິຫິສນ຺ຕການໍ ກຫາປຓານໍ ທຸຏ຺ຐຸວິຈາຣິຕຕ຺ຕາ ເອຕສ຺ສ ວິຈາຣຓກສ຺ສ ຠິກ຺ຂຸໂນ ເອວ ນ ວຏ຺ຏຕີຕິ ອຕ຺ໂຖ. ມູລສ຺ສ ອສມ຺ປຏິຈ຺ຉິຕຕ຺ຕາຕິ ເອເຕນ ມູລສ຺ສ ຄິຫິສນ຺ຕກຕ຺ຕໍ ທສ຺ເສຕິ, ເຕເນວ ປຕ຺ຕສ຺ສ ຣູປິຍສໍໂວຫາເຣນ ອນຸປ຺ປນ຺ນຕຎ຺ຈ ທສ຺ເສຕິ, ເຕນ ຈ ຕສ຺ສ ປຕ຺ຕສ຺ສ ນິສ຺ສຊ຺ຊິຍາຠາວໍ, ຠິກ຺ຂຸສ຺ສ ຈ ປາຈິຕ຺ຕິຍາຠາວໍ ທີເປຕິ, ເຕນ ຈ ທຸພ຺ພິຈາຣິຕມຕ຺ເຕນ ທຸກ຺ກຏມຕ຺ຕຠາວໍ ປກາເສຕິ. ນິສ຺ສຊ຺ຊີຕິ ອິທຎ຺ຈ ທານວເສນ ວຸຕ຺ຕໍ, ນ ວິນຍກມ຺ມວເສນ. ເຕເນວ ຈ ‘‘ສປ຺ປິສ຺ສ ປູຣາເປຕ຺ວາ’’ຕິ ວຸຕ຺ຕໍ.

ປຎ຺ຈມປຕ຺ເຕ ສພ຺ພກປ຺ປິໂຍຕິ ອຕ຺ຕໂນ ຈ ປຎ຺ຈນ຺ນໍ ສຫຘມ຺ມິການຎ຺ຈ ພຸທ຺ຘປຈ຺ເຈກພຸທ຺ຘານຎ຺ຈ ກປ຺ປິໂຍ. ເຕນາຫ ‘‘ພຸທ຺ຘານມ຺ປິ ປຣິໂຠຄາຣໂຫ’’ຕິ.

ອິຕິ ວິນຍສງ຺ຄຫສໍວຓ຺ຓນາຠູເຕ ວິນຍາລງ຺ກາເຣ

ກຍວິກ຺ກຍສມາປຕ຺ຕິວິນິຈ຺ຉຍກຖາລງ຺ກາໂຣ ນາມ

ເອກາທສໂມ ປຣິຈ຺ເຉໂທ.