໓. ນຄ຺ຄວຄ຺ໂຄ

໑. ປຐມາທິສິກ຺ຂາປທວຓ຺ຓນາ

໘໘໓-໘໘໗. ຕຕິຍວຄ຺ຄສ຺ສ ປຐມທຸຕິຍານິ ອຸຕ຺ຕານານິ.

໘໙໓. ຕຕິເຍ ວິສິພ຺ເພຕ຺ວາຕິ ວິຊເຏຕ຺ວາ. ຘຸຣໍ ນິກ຺ຂິຕ຺ຕມຕ຺ເຕຕິ ວິສິພ຺ພນທິວສໂຕ ປຎ຺ຈ ທິວເສ ອຕິກ຺ກາເມຕ຺ວາ ຘຸຣໍ ນິກ຺ຂິຕ຺ຕມຕ຺ເຕ. ອນ຺ໂຕປຎ຺ຈາເຫ ປນ ຘຸຣນິກ຺ເຂເປປິ ອນາປຕ຺ຕິ ເອວ ‘‘ອຎ຺ຎຕ຺ຣ ຈຕູຫປຎ຺ຈາຫາ’’ຕິ ວຸຕ຺ຕຕ຺ຕາ. ອຸປສມ຺ປນ຺ນາຍ ຈີວຣໍ ສິພ຺ພນຕ຺ຖາຍ ວິສິພ຺ເພຕ຺ວາ ປຎ຺ຈຫາຕິກ຺ກໂມ, ອນນຸຎ຺ຎາຕກາຣຓາ ຘຸຣນິກ຺ເຂໂປຕິ ທ຺ເວ ອງ຺ຄານິ.

໙໐໐. ຈຕຸຕ຺ເຖ ປຎ຺ຈນ຺ນໍ ຈີວຣານໍ ອປຣິວຕ຺ຕນໍ, ອນນຸຎ຺ຎາຕກາຣຓາ ປຎ຺ຈາຫາຕິກ຺ກໂມຕິ ທ຺ເວ ອງ຺ຄານິ.

໙໐໓. ປຎ຺ຈມໍ ອຸຕ຺ຕານເມວ.

໙໐໙. ຉຏ຺ເຐ ວິກປ຺ປນຸປຄສ຺ສ ສງ຺ເຆ ປຣິຓຕຕາ, ວິນາ ອານິສໍສທສ຺ສເນນ ອນ຺ຕຣາຍກຣຓນ຺ຕິ ທ຺ເວ ອງ຺ຄານິ.

໙໑໑. ສຕ຺ຕມໍ ອຸຕ຺ຕານເມວ.

໙໑໖. ອຏ຺ຐເມ ກຸມ຺ຠຖູຓໍ ນາມ ກຸມ຺ຠສທ຺ໂທ, ເຕນ ກີຬນ຺ຕີຕິ ກຸມ຺ຠຖູຓິກາ. ເຕນາຫ ‘‘ຆຏເກນ ກີຬນກາ’’ຕິ. ທີຆນິກາຍຏ຺ຐກຖາຍໍ ປນ ‘‘ຈຕຸຣສ຺ສອມ຺ພຓກຕາຬ’’ນ຺ຕິ ວຸຕ຺ຕໍ. ຕຎ຺ຫິ ຣຸກ຺ຂສາຣາທິມຍໍ ອນ຺ໂຕຉິທ຺ທໍ ຈຕູສຸ ປສ຺ເສສຸ ຈມ຺ໂມນທ຺ຘໍ ວາທິຕຠຓ຺ຑໍ, ຍໍ ‘‘ພິມ຺ພິສກ’’ນ຺ຕິປິ ວຸຈ຺ຈຕິ, ຕໍ ວາເທນ຺ຕາປິ ກຸມ຺ຠຖູຓິກາ. ເຕນາຫ ‘‘ພິມ຺ພິສກວາທິຕກາຕິປິ ວທນ຺ຕີ’’ຕິ.

໙໑໘. ປາຬິຍໍ ກປ຺ປກຕນ຺ຕິ ກປ຺ປກຕໍ ນິວາສນປາຣຸປນູປຄໍ. ສມຓຈີວຣຕາ, ອນນຸຎ຺ຎາຕານໍ ທານນ຺ຕິ ທ຺ເວ ອງ຺ຄານິ.

໙໒໑-໙໓໑. ນວມທສມານິ ອຸຕ຺ຕານາເນວ.

ນິຏ຺ຐິໂຕ ນຄ຺ຄວຄ຺ໂຄ ຕຕິໂຍ.