໑. ລສຸຓວຄ຺ໂຄ

໑. ປຐມລສຸຓາທິສິກ຺ຂາປທວຓ຺ຓນາ

໗໙໗. ປາຈິຕ຺ຕິເຍສຸ ລສຸຓວຄ຺ຄສ຺ສ ປຐເມ ພທຣສາຬວໍ ນາມ ພທຣຜລານິ ສຸກ຺ຂາເປຕ຺ວາ ເຕຫິ ກຕ຺ຕພ຺ພພ຺ຍຎ຺ຊນວິກຕິ. ອາມກມາຄຘລສຸຓຎ຺ເຈວ, ອຊ຺ໂຌຫຣຓຎ຺ຈາຕິ ທ຺ເວ ອງ຺ຄານິ.

໗໙໙-໘໑໒. ທຸຕິຍາທີນິ ອຸຕ຺ຕານຕ຺ຖານິ.

໘໑໕. ຉຏ຺ເຐ ປາຬິຍໍ ອາສຸມ຺ຠິຕ຺ວາຕິ ປາເຕຕ຺ວາ.

໘໑໗. ທຘິມຕ຺ຖູຕິ ທຘິມ຺ຫິ ປສນ຺ໂນທກໍ. ຣສຂີຣາທີນນ຺ຕິ ມໍສຣສຂີຣາທີນໍ. ຠຸຎ຺ຊນ຺ຕສ຺ສ ຠິກ຺ຂຸໂນ ຫຕ຺ຖປາເສ ຐານໍ, ປານີຍສ຺ສ ວາ ວິຘູປນສ຺ສ ວາ ຄຫຓນ຺ຕິ ທ຺ເວ ອງ຺ຄານິ.

໘໒໒. ສຕ຺ຕເມ ອວິຎ຺ຎຕ຺ຕິຍາ ລທ຺ຘນ຺ຕິ ອຕ຺ຕໂນ ວິຎ຺ຎຕ຺ຕິໍ ວິນາ ລທ຺ຘໍ. ປຸພ຺ພາປຣວິຣຸທ຺ຘນ຺ຕິ ສຍໍ ກຣເຓ ປາຈິຕ຺ຕິຍນ຺ຕິ ອິທໍ ກາຣາປເນ ທຸກ຺ກຏວຈເນນ ວິຣຸຊ຺ຌນໍ ສນ຺ຘາຍ ວຸຕ຺ຕໍ. ເຕນາຫ ‘‘ນ ຫີ’’ຕິອາທິ, ‘‘ອວິຎ຺ຎຕ຺ຕິຍາ ລທ຺ຘ’’ນ຺ຕິອາທິວຈເນນ ວາ ວິຣຸຊ຺ຌນໍ ສນ຺ຘາຍ ວຸຕ຺ຕໍ. ອຎ຺ຎາຍ ວິຎ຺ຎຕ຺ຕິປິ ຫິ ອິມິສ຺ສາ ອວິຎ຺ຎຕ຺ຕິຍາ ລທ຺ຘເມວາຕິ. ອາມກຘຎ຺ຎວິຎ຺ຎາປນາທິ, ຕໍ ຠຊ຺ຊນາທິນາ ອຊ຺ໂຌຫຣຓນ຺ຕິ ທ຺ເວ ອງ຺ຄານິ.

໘໒໔. ອຏ຺ຐເມ ນິພ຺ພິຏ຺ໂຐຕິ ລທ຺ໂຘ. ເກຓີຕິ ຣຎ຺ໂຎ ທາຕພ຺ໂພ ອາໂຍ, ອາຍຸປ຺ປຕ຺ຕິຏ຺ຐານນ຺ຕິ ອຕ຺ໂຖ. ເຕນາຫ ‘‘ເອກໍ ຐານນ຺ຕຣ’’ນ຺ຕິອາທິ. ຐານນ຺ຕຣນ຺ຕິ ຈ ຄາມຊນປທາຓາຍຕ຺ຕໍ. ວຬຎ຺ຊິຍມານຕິໂຣກຸຏ຺ຏາທິຕາ, ອນປໂລເກຕ຺ວາ ອຸຈ຺ຈາຣາທີນໍ ຉຑ຺ຑນາທີຕິ ທ຺ເວ ອງ຺ຄານິ.

໘໓໐. ນວເມ ‘‘ມຕ຺ຖກຈ຺ຉິນ຺ນນາຬິເກຣມ຺ປີ’’ຕິ ວຸຕ຺ຕຕ຺ຕາ ຫຣິຕູປຣິ ຉຑ຺ຑນເມວ ປຏິກ຺ຂິຕ຺ຕໍ. ເຕນາຫ ‘‘ອນິກ຺ຂິຕ຺ຕພີເຊສູ’’ຕິອາທິ. ຍຕ຺ຖ ຈ ຉຑ຺ເຑຕຸໍ ວຏ຺ຏຕິ, ຕຕ຺ຖ ຫຣິເຕ ວຈ຺ຈາທິໍ ກາຕຸມ຺ປິ ວຏ຺ຏຕິ ເອວ. ສພ຺ເພສນ຺ຕິ ຠິກ຺ຂຸຠິກ຺ຂຸນີນໍ.

໘໓໖-໗. ທສເມ ເຕສໍເຍວາຕິ ເຍສໍ ນິຈ຺ຈໍ ປສ຺ສຕິ. ອາຣາເມ ຐຕ຺ວາຕິ ຐິຕນິສນ຺ນຏ຺ຐາເນ ເອວ ຐຕ຺ວາ ສມນ຺ຕໂຕ ຄີວໍ ປຣິວຕ຺ເຕຕ຺ວາປິ ປສ຺ສຕິ, ອນາປຕ຺ຕິ. ຐິຕຏ຺ຐານໂຕ ຄນ຺ຕ຺ວາ ປສ຺ສິຕຸໍ ນ ວຏ຺ຏຕິ. ເກຈິ ປນ ‘‘ວຏ຺ຏຕີ’’ຕິ ວທນ຺ຕິ. ຕໍ ປນ ‘‘ທສ຺ສນາຍ ຄຈ຺ເຉຍ຺ຍ, ປາຈິຕ຺ຕິຍ’’ນ຺ຕິ ສາມຎ຺ຎໂຕ ຄມນສ຺ສ ປຏິກ຺ຂິຕ຺ຕຕ຺ຕາ, ອນາປຕ຺ຕິຍມ຺ປິ ຄມນາຍ ອວຸຕ຺ຕຕ຺ຕາ ຈ ນ ຄເຫຕພ຺ພໍ. ນຈ຺ຈາທິຕາ, ອນນຸຎ຺ຎາຕກາຣຓາ ຄມນໍ, ທສ຺ສນາທິ ຈາຕິ ຕີຓິ ອງ຺ຄານິ.

ນິຏ຺ຐິໂຕ ລສຸຓວຄ຺ໂຄ ປຐໂມ.