໒. ສງ຺ຆາທິເສສກຓ຺ຑໍ

໑. ປຐມສງ຺ຆາທິເສສສິກ຺ຂາປທວຓ຺ຓນາ

໖໗໙. ສງ຺ຆາທິເສສກຓ຺ເຑ ‘‘ທຸຕິຍສ຺ສ ອາໂຣເຈຕີ’’ຕິ ເອຕ຺ຖາປິ ທ຺ວີສຸປິ ອຑ຺ຑກາຣເກສຸ ຍສ຺ສ ກສ຺ສຈິ ທຸຕິຍສ຺ສ ກຖໍ ໂຍ ໂກຈິ ອາໂຣເຈຕີຕິ ເອວມຕ຺ໂຖ ຄເຫຕພ຺ໂພຕິ ອາຫ ‘‘ເອເສວ ນໂຍ’’ຕິ.

ຄຕິຄຕນ຺ຕິ ຈິຣກາລປ຺ປວຕ຺ຕໍ. ອາປຕ຺ຕີຕິ ອາປຊ຺ຊນໍ. ‘‘ນິສ຺ສາຣຓີຍ’’ນ຺ຕິ ອິທໍ ກຕ຺ຕຸອຕ຺ເຖ ສິທ຺ຘນ຺ຕິ ອາຫ ‘‘ນິສ຺ສາເຣຕີ’’ຕິ. ອາປນ຺ນໍ ຠິກ຺ຂຸນິໍ ສງ຺ຆໂຕ ວິໂຍເຊຕິ, ວິໂຍຊນເຫຕຸ ໂຫຕີຕິ ອຕ຺ໂຖ.

ຄີວາເຍວາຕິ ອາຓຕ຺ຕິຍາ ອຠາວໂຕ. ເຕສໍ ອນຕ຺ຖກາມຕາຍາຕິ ‘‘ໂຈໂຣ’’ຕິ ວຸຕ຺ຕໍ ມມ ວຈນໍ ສຸຕ຺ວາ ເກຈິ ທຓ຺ຑິສ຺ສນ຺ຕິ ຊີວິຕາ ໂວໂຣເປສ຺ສນ຺ຕີຕິ ເອວໍ ສຎ຺ຎາຍ. ເອເຕນ ເກວລໍ ຠເຍນ ວາ ປຣິກ຺ຂາຣຄ຺ຄຫຓຕ຺ຖໍ ວາ ສຫສາ ‘‘ໂຈໂຣ’’ຕິ ວຸຕ຺ເຕ ທຓ຺ຑິເຕປິ ນ ໂທໂສຕິ ທສ຺ເສຕິ. ຣາຊປຸຣິສານຎ຺ຫິ ‘‘ໂຈໂຣ ອຍ’’ນ຺ຕິ ອຸທ຺ທິສ຺ສ ກຖເນ ເອວ ຄີວາ, ຠິກ຺ຂູນໍ, ປນ ອາຣາມິກາທີນໍ ວາ ສມ຺ມຸຂາ ‘‘ອສຸໂກ ໂຈໂຣ ເອວມກາສີ’’ຕິ ເກນຈິ ວຸຕ຺ຕວຈນໍ ນິສ຺ສາຍ ອາຣາມິກາທີສຸ ຣາຊປຸຣິສານໍ ວຕ຺ວາ ທຓ຺ຑາເປນ຺ເຕສຸປິ ຠິກ຺ຂຸສ຺ສ ນ ຄີວາ ຣາຊປຸຣິສານໍ ອວຸຕ຺ຕຕ຺ຕາ. ເຍສຎ຺ຈ ວຸຕ຺ຕໍ, ເຕຫິ ສຍໍ ໂຈຣສ຺ສ ອທຓ຺ຑິຕຕ຺ຕາຕິ ຄເຫຕພ຺ພໍ. ‘‘ຕ຺ວໍ ເອຕສ຺ສ ສນ຺ຕກໍ ອຈ຺ຉິນ຺ທາ’’ຕິ ອາຓຕ຺ໂຕປິ ຫິ ສເຈ ອຎ຺ເຎນ ອຈ຺ຉິນ຺ທາເປຕິ, ອາຓາປກສ຺ສ ອນາປຕ຺ຕິ ວິສງ຺ເກຕຕ຺ຕາ. ‘‘ອຕ຺ຕໂນ ວຈນກຣ’’ນ຺ຕິ ອິທໍ ສາມີຈິວເສນ ວຸຕ຺ຕໍ. ວຈນໍ ອກໂຣນ຺ຕານໍ ຣາຊປຸຣິສານມ຺ປິ ‘‘ອິມິນາ ຄຫິຕປຣິກ຺ຂາຣໍ ອາຫຣາເປຫິ, ມາ ຈສ຺ສ ທຓ຺ຑໍ ກໂຣຫີ’’ຕິ ອຸທ຺ທິສ຺ສ ວທນ຺ຕສ຺ສາປິ ທຓ຺ເຑ ຄຫິເຕປິ ນ ຄີວາ ເອວ ທຓ຺ຑຄ຺ຄຫຓສ຺ສ ປຏິກ຺ຂິຕ຺ຕຕ຺ຕາ, ‘‘ອສຸກຠຓ຺ຑໍ ອວຫຣາ’’ຕິ ອາຓາເປຕ຺ວາ ວິປ຺ປຏິສາເຣ ອຸປ຺ປນ຺ເນ ປຸນ ປຏິກ຺ຂິປເນ (ປາຣາ. ໑໒໑) ວິຍ.

ທາສາທີນໍ ສມ຺ປຏິຈ຺ຉເນ ວິຍ ຕທຕ຺ຖາຍ ອຑ຺ຑກຣເຓ ຠິກ຺ຂູນມ຺ປິ ທຸກ຺ກຏນ຺ຕິ ອາຫ ‘‘ອກປ຺ປິຍອຑ຺ໂຑ ນາມ ນ ວຏ຺ຏຕີ’’ຕິ. ເກນຈິ ປນ ຠິກ຺ຂຸນາ ເຂຕ຺ຕາທິອຕ຺ຖາຍ ໂວຫາຣິການໍ ສນ຺ຕິກໍ ຄນ຺ຕ຺ວາ ອຑ຺ເຑ ກເຕປິ ຕໍ ເຂຕ຺ຕາທິສມ຺ປຏິຈ຺ຉເນ ວິຍ ສພ຺ເພສໍ ອກປ຺ປິຍໍ ນ ໂຫຕິ ປຸພ຺ເພ ເອວ ສງ຺ຆສ຺ສ ສນ຺ຕກຕ຺ຕາ, ຠິກ຺ຂຸສ຺ເສວ ປນ ປໂຍຄວເສນ ອາປຕ຺ຕິໂຍ ໂຫນ຺ຕິ. ທາສາທີນມ຺ປິ ປນ ອຕ຺ຖາຍ ຣກ຺ຂໍ ຍາຈິຕຸໍ ໂວຫາຣິເກນ ປຸຏ຺ເຐນ ສງ຺ຆສ຺ສ ອຸປ຺ປນ຺ນໍ ກປ຺ປິຍກ຺ກມໍ ວຕ຺ຕຸໍ, ອາຣາມິກາທີຫິ ຈ ອຑ຺ຑໍ ກາຣາເປຕຸຎ຺ຈ ວຏ຺ຏຕິ ເອວ. ວິຫາຣວຕ຺ຖາທິກປ຺ປິຍອຑ຺ຑໍ ປນ ຠິກ຺ຂຸໂນ ສຍມ຺ປິ ກາຕຸໍ ວຏ຺ຏຕິ.

ຠິກ຺ຂຸນີນໍ ວຸຕ຺ໂຕຕິ ຣກ຺ຂໍ ຍາຈນ຺ຕີນໍ ຠິກ຺ຂຸນີນໍ ວຸຕ຺ໂຕ ອຸທ຺ທິສ຺ສອນຸທ຺ທິສ຺ສວເສນ ຣກ຺ຂາຍາຈນວິນິຈ຺ຉໂຍ, ນ ສພ຺ໂພ ສິກ຺ຂາປທວິນິຈ຺ຉໂຍ ອສາຘາຣຓຕ຺ຕາ ສິກ຺ຂາປທສ຺ສ. ເຕນາຫ ‘‘ຠິກ຺ຂຸໂນປີ’’ຕິອາທິ. ອນາກຑ຺ຒິຕາຍ ອຑ຺ຑກຣຓໍ, ອຑ຺ຑປຣິໂຍສານນ຺ຕິ ທ຺ເວ ອງ຺ຄານິ.

ປຐມສງ຺ຆາທິເສສສິກ຺ຂາປທວຓ຺ຓນາ ນິຏ຺ຐິຕາ.

໒. ທຸຕິຍສງ຺ຆາທິເສສສິກ຺ຂາປທວຓ຺ຓນາ

໖໘໓. ປາຬິຍໍ ທຸຕິເຍ ມລ຺ລຄຓຠຏິປຸຕ຺ຕຄຓາທິກນ຺ຕິອາທີສຸ ມລ຺ລຣາຊູນໍ ຄໂຓ ມລ຺ລຄໂຓ. ຠຏິປຸຕ຺ຕາ ນາມ ເກຈິ ຄຓຣາຊາໂນ, ເຕສໍ ຄໂຓ. ເກຈິ ປນ ‘‘ນາຣາຍນຠຕ຺ຕິໂກ ປຸຎ຺ຎກາຣຄໂຓ ມລ຺ລຄໂຓ. ຕຖາ ກຸມາຣຠຕ຺ຕິໂກ ຈ ຄໂຓ ຠຏິປຸຕ຺ຕຄໂຓ’’ຕິປິ (ສາຣຕ຺ຖ. ຏີ. ສໍຆາທິເສສກຓ຺ຑ ໓.໖໘໓) ວທນ຺ຕິ. ຘມ຺ມຄໂຓຕິ ສາສເນ, ໂລເກ ວາ ອເນກປ຺ປກາຣປຸຎ຺ຎກາຣໂກ ຄໂຓ. ຄນ຺ຘວິກຕິກາຣໂກ ຄໂຓ ຄນ຺ຘິກເສຓີ. ເປສກາຣາທິຄໂຓ ທຸສ຺ສິກເສຓີ. ກປ຺ປຄຕິກນ຺ຕິ ກປ຺ປິຍຠາວຄຕໍ, ປພ຺ພຊິຕປຸພ຺ພນ຺ຕິ ອຕ຺ໂຖ.

໖໘໕. ປາຬິຍໍ ວຸຏ຺ຐາເປຕີຕິ ອຸປສມ຺ປາເທຕິ. ອກປ຺ປຄຕມ຺ປິ ປພ຺ພາເຊນ຺ຕິຍາ ທຸກ຺ກຏນ຺ຕິ ວທນ຺ຕິ. ຂີຓາສວາຍປິ ອາປຊ຺ຊິຕພ຺ພໂຕ ‘‘ຕິຈິຕ຺ຕ’’ນ຺ຕິ ວຸຕ຺ຕໍ. ໂຈຣິຕາ, ຕໍ ຎຕ຺ວາ ອນນຸຎ຺ຎາຕກາຣຓາ ວຸຏ຺ຐາປນນ຺ຕິ ທ຺ເວ ອງ຺ຄານິ.

ທຸຕິຍສງ຺ຆາທິເສສສິກ຺ຂາປທວຓ຺ຓນາ ນິຏ຺ຐິຕາ.

໓. ຕຕິຍສງ຺ຆາທິເສສສິກ຺ຂາປທວຓ຺ຓນາ

໖໙໒. ຕຕິເຍ ປຣິກ຺ເຂປໍ ອຕິກ຺ກາເມນ຺ຕິຍາຕິ ຄາມນ຺ຕຣສ຺ສ ປຣິກ຺ເຂປໍ ອຕິກ຺ກາເມນ຺ຕິຍາ. ‘‘ຄາມນ຺ຕຣໍ ຄຈ຺ເຉຍ຺ຍາ’’ຕິ ຫິ ວຸຕ຺ຕໍ. ວິກາລຄາມປ຺ປເວສນສິກ຺ຂາປເທ ວິຍ ‘‘ອປຣິກ຺ຂິຕ຺ຕສ຺ສ ອຸປຈາຣໍ ໂອກ຺ກມນ຺ຕິຍາ’’ຕິ ອວຕ຺ວາ ‘‘ອຕິກ຺ກາເມນ຺ຕິຍາ’’ຕິ ປາຬິຍໍ ວຸຕ຺ຕຕ຺ຕາ ຄາມໍ ປວິສນ຺ຕິຍາ ຆຣູປຈາເຣ ຐິຕສ຺ສ ທຸຕິຍເລຑ຺ຑຸປາຕສງ຺ຂາຕສ຺ສ ອຸປຈາຣສ຺ສ ອຕິກ຺ກໂມ ນາມ ປຐມເລຑ຺ຑຸປາຕຏ຺ຐານສງ຺ຂາຕສ຺ສ ປຣິກ຺ເຂປາຣຫຏ຺ຐານສ຺ສ ອຕິກ຺ກໂມ ເອວາຕິ ອາຫ ‘‘ປຣິກ຺ເຂປາຣຫຏ຺ຐານໍ ເອເກນ ປາເທນ ອຕິກ຺ກມຕີ’’ຕິ.

ມຊ຺ເຌຕິ ຄາມມຊ຺ເຌ. ປຈ຺ຉາຕິ ອປຣກາເລ. ‘‘ຈຕຸຄາມສາຘາຣຓຕ຺ຕາ’’ຕິ ອິມິນາ ວິຫາຣໂຕ ຈຕູສຸ ຄາເມສຸ ຍຕ຺ຖ ກຕ຺ຖຈິ ປວິສິຕຸໍ ວຏ຺ຏຕີຕິ ເອຕ຺ຖ ກາຣຓມາຫ.

ປຣຕີຣເມວ ອກ຺ກມນ຺ຕິຍາຕິ ນທິໍ ອໂນຕຣິຕ຺ວາ ໂອຣິມຕີຣໂຕ ລງ຺ຆິຕ຺ວາ ວາ ອາກາສາທິນາ ວາ ປຣຕີຣເມວ ອຕິກ຺ກາເມນ຺ຕິຍາ. ໂອຣິມຕີຣເມວ ອາຄຈ຺ຉຕິ, ອາປຕ຺ຕີຕິ ປາຣຄມນາຍ ໂອຕິຓ຺ຓຕ຺ຕາ ວຸຕ຺ຕໍ.

ຕາທິເສ ອຣຎ຺ເຎຕິ ອິນ຺ທຂີລໂຕ ພຫິຠາວລກ຺ຂເຓ ອຣຎ຺ເຎ. ‘‘ເຕເນວາ’’ຕິອາທິນາ ທສ຺ສນູປຈາເຣ ວິຣຫິເຕ ສວນູປຈາຣສ຺ສ ວິຊ຺ຊມານຕ຺ເຕປິ ອາປຕ຺ຕິ ໂຫຕີຕິ ທສ຺ເສຕິ. ອຎ຺ຎໍ ມຄ຺ຄໍ ຄຓ຺ຫາຕີຕິ ມຄ຺ຄມູຬ຺ຫຕ຺ຕາ ຄຓ຺ຫາຕິ, ນ ທຸຕິຍິກໍ ໂອຫິຍິຕຸໍ. ຕສ຺ມາ ອນາປຕ຺ຕິ. ອນນ຺ຕຣາເຍນ ເອກຠາໂວ, ອນາປທາຍ ຄາມນ຺ຕຣຄມນາທີສຸ ເອກນ຺ຕິ ທ຺ເວ ອງ຺ຄານິ.

ຕຕິຍສງ຺ຆາທິເສສສິກ຺ຂາປທວຓ຺ຓນາ ນິຏ຺ຐິຕາ.

໔. ຈຕຸຕ຺ຖສງ຺ຆາທິເສສສິກ຺ຂາປທວຓ຺ຓນາ

໖໙໔. ຈຕຸຕ຺ເຖ ກາຣກຄຓສ຺ສາຕິ ອິມສ຺ສ ກມ຺ມໍ ກາຕພ຺ພນ຺ຕິ ເຍຫິ ສນ຺ນິຏ຺ຐານໍ ກຕໍ, ເຕ ສນ຺ຘາຍ ວຸຕ຺ຕໍ. ກມ຺ມວາຈກ຺ຂເຓ ສຫຐິເຕຕິ ເກຈິ. ເນຕ຺ຖາຣວຕ຺ເຕຕິ ນິຕ຺ຖຣຓເຫຕຸມ຺ຫິ ວຕ຺ເຕ.

໖໙໘. ປາຬິຍໍ ອສນ຺ເຕ ກາຣກສງ຺ເຆຕິ ເອຕ຺ຖ ວິຊ຺ຊມານໍ ສຸທູຣມ຺ປິ ຄນ຺ຕ຺ວາ ອາປຸຈ຺ຉິຕພ຺ພໍ. ອນ຺ຕຣາເຍ ປນ ສຕິ ສມ຺ມາ ວຕ຺ຕນ຺ຕໍ ໂອສາເຣຕຸໍ ວຏ຺ຏຕີຕິ. ຘມ຺ມກມ຺ເມນ ອຸກ຺ຂິຕ຺ຕຕາ, ອນນຸຎ຺ຎາຕກາຣຓາ ໂອສາຣຓນ຺ຕິ ທ຺ເວ ອງ຺ຄານິ.

ຈຕຸຕ຺ຖສງ຺ຆາທິເສສສິກ຺ຂາປທວຓ຺ຓນາ ນິຏ຺ຐິຕາ.

໕. ປຎ຺ຈມສງ຺ຆາທິເສສສິກ຺ຂາປທວຓ຺ຓນາ

໗໐໑. ປຎ຺ຈເມ ຕນ຺ຕິ ມຫາອຏ຺ຐກຖາຍໍ ອວຈນໍ ‘‘ອນວສ຺ສຸໂຕຕິ ຊານນ຺ຕີ ປຏິຄ຺ຄຓ຺ຫາຕີ’’ຕິອາທິ ປາຬິຍາ ສເມຕິ. ອຸຠໂຕ ອວສ຺ສຸຕຠາໂວ, ອຸທກທນ຺ຕໂປນໂຕ ອຎ຺ຎໍ ສຫຕ຺ຖາ ຄເຫຕ຺ວາ ອຊ຺ໂຌຫຣຓນ຺ຕິ ທ຺ເວ ອງ຺ຄານິ.

ປຎ຺ຈມສງ຺ຆາທິເສສສິກ຺ຂາປທວຓ຺ຓນາ ນິຏ຺ຐິຕາ.

໖. ຉຏ຺ຐສງ຺ຆາທິເສສສິກ຺ຂາປທວຓ຺ຓນາ

໗໐໕. ຉຏ຺ເຐ ປຏິຄ຺ຄໂຫ ເຕນ ນ ວິຊ຺ຊຕີຕິ ເຕເນວ ‘‘ນ ເທຕີ’’ຕິ ວຸຕ຺ຕກາຣເຓນ ອຸຍ຺ໂຍຊິຕາຍ ຫຕ຺ຖໂຕ ອິຕຣາຍ ປຏິຄ຺ຄໂຫປິ ນຕ຺ຖິ. ປຣິໂຠຄປຈ຺ຈຍາຕິ ອຸຍ຺ໂຍຊິຕາຍ ໂຠຊນປຣິໂຍສານປຈ຺ຈຍາຕິ ອຕ຺ໂຖ. ມນຸສ຺ສປຸຣິສສ຺ສ ອວສ຺ສຸຕຕາ, ຕໍ ຎຕ຺ວາ ອນນຸຎ຺ຎາຕກາຣຓາ ອຸຍ຺ໂຍຊນາ, ເຕນ ອິຕຣິສ຺ສາ ຄເຫຕ຺ວາ ໂຠຊນປຣິໂຍສານນ຺ຕິ ຕີຓິ ອງ຺ຄານິ.

ຉຏ຺ຐສງ຺ຆາທິເສສສິກ຺ຂາປທວຓ຺ຓນາ ນິຏ຺ຐິຕາ.

໗໐໙-໗໒໗. ສຕ຺ຕມໂຕ ຍາວທສມປຣິໂຍສານານິ ອຸຕ຺ຕານາເນວ.

ສງ຺ຆາທິເສສວຓ຺ຓນານໂຍ ນິຏ຺ຐິໂຕ.