໑. ກມ຺ມກ຺ຂນ຺ຘໂກ

ຕຊ຺ຊນີຍກມ຺ມກຖາວຓ຺ຓນາ

໑. ຈູຬວຄ຺ຄສ຺ສ ປຐເມ ກມ຺ມກ຺ຂນ຺ຘເກ ຕາວ ‘‘ພລວາພລວ’’ນ຺ຕິ ອິທໍ ເອກປທໍ. ‘‘ພລວພລວ’’ນ຺ຕິ ວຕ຺ຕພ຺ເພ ອາກາຣໍ ກຕ຺ວາ ‘‘ພລວາພລວ’’ນ຺ຕິ ວຸຕ຺ຕໍ. ຕຎ຺ຈ ‘‘ທຸກ຺ຂທຸກ຺ຂ’’ນ຺ຕິອາທີສຸ ວິຍ ອຕິສຍຕ຺ເຖ ວຕ຺ຕຕີຕິ ອາຫ ‘‘ສຸຏ຺ຐຸ ພລວໍ ປຏິວທຖາ’’ຕິ, ອຕິ ວິຍ ພລວໍ ກຕ຺ວາ ປຏິວຈນໍ ເທຖາຕິ ອຕ຺ໂຖ.

໒. ປາຬິຍໍ ອາປຕ຺ຕິ ອາໂຣເປຕພ຺ພາຕິ ເອຕ຺ຖ ກິຎ຺ຈາປິ ‘‘ມາ ໂຂ ຕຸມ຺ເຫ ອາຍສ຺ມນ຺ໂຕ ເອໂສ ອເຊສີ’’ຕິອາທິເກ ຠຓ຺ຑນາທິຊນເກ ວຈເນ ປຎ຺ຎຕ຺ຕາ ກາຈິ ອາປຕ຺ຕິ ນາມ ນຕ຺ຖິ ມຸສາເປສຸຎ຺ຎາທີສຸ ເອຕສ຺ສ ອປ຺ປວິຏ຺ຐຕ຺ຕາ, ຕຖາປິ ຠິກ຺ຂູຫິ ວິສຸໍ, ສງ຺ຆມຊ຺ເຌ ຈ ‘‘ມາ, ອາວຸໂສ, ຠິກ຺ຂູ ອຎ຺ຎມຎ຺ຎໍ ປໂຍເຊຕ຺ວາ ຠຓ຺ຑນາທິໍ ອກາສິ, ເນທໍ ອປ຺ປິຈ຺ຉຕາທີນໍ ອຕ຺ຖາຍ ວຕ຺ຕຕີ’’ຕິ ເອວໍ ອປຎ຺ຎຕ຺ເຕນ ວຸຈ຺ຈມານສ຺ສ ຠິກ຺ຂຸໂນ ອນາທຣິເຍນ ອໂນຣມນປຈ຺ຈຍາ ວາ ອຎ຺ຎວາທວິເຫສາທິກຣຓປຈ຺ຈຍາ ວາ ຍາ ອາປຕ຺ຕິ ໂຫຕິ, ສາ ອາປຕ຺ຕິ ອາໂຣເປຕພ຺ພາ ທິຏ຺ຐິວິປນ຺ນສ຺ສ ວິຍາຕິ ເອວມຕ຺ໂຖ ທຏ຺ຐພ຺ໂພ.

ຍສ຺ສ ປນ ອິທໍ ວຈນໍ ວິນາວ ກາຍວາຈາຫິ ອາປນ຺ນາ ລຫຸກາປຕ຺ຕິ ອຕ຺ຖິ, ຕສ຺ສປິ ອາໂຣເປຕພ຺ພາວ. ຍໍ ປນ ກມ຺ມວາຈາຍ ‘‘ອຕ຺ຕນາ ຠຓ຺ຑນກາຣກາ’’ຕິ ອຕ຺ຕນາ-ສທ຺ທຄ຺ຄຫຓໍ, ‘‘ເຍປິ ຈຎ຺ເຎ ຠິກ຺ຂູ ຠຓ຺ຑນກາຣກາ…ເປ… ເຕ ອຸປສງ຺ກມິຕ຺ວາ’’ຕິອາທິວຈນຎ຺ຈ, ຕໍ ວຕ຺ຖຸວເສນ ຄຫິຕໍ. ໂຍ ປນ ສຍເມວ ຠຓ຺ຑນກາຣໂກ ໂຫຕິ, ອຎ຺ເຎ ປນ ຠຓ຺ຑນກາຣເກ ອຸປສງ຺ກມິຕ຺ວາ ‘‘ມາ ໂຂ ຕຸມ຺ເຫ’’ຕິອາທິວຈນໍ ນ ວທຕິ, ຕສ຺ສາເປຕໍ ກມ຺ມໍ ກາຕພ຺ພເມວ. ກໂຣນ຺ເຕຫິ ຈ ‘‘ສຸຓາຕຸ ເມ, ຠນ຺ເຕ, ສງ຺ໂຆ, ອຍໍ ອິຕ຺ຖນ຺ນາໂມ ຠິກ຺ຂຸ ຠຓ຺ຑນກາຣໂກ…ເປ… ສງ຺ເຆ ອຘິກຣຓກາຣໂກ. ຍທິ ສງ຺ຆສ຺ສ ປຕ຺ຕກລ຺ລ’’ນ຺ຕິອາທິນາວ ກມ຺ມວາຈາ ກາຕພ຺ພາ. ໂຍ ຈ ອຎ຺ເຎປິ ຠິກ຺ຂູ ກລຫາຍ ສມາທເປຕິ, ຕສ຺ສາປິ ເອວເມວ ກມ຺ມວາຈໍ ກາຕຸໍ ວຏ຺ຏຕິ ອຎ຺ເຎສໍ ສມາທາປນສ຺ສປິ ຠຓ຺ຑນກາຣກຕ຺ເຕ ເອວ ປວິສນໂຕ. ອຎ຺ເຎສໍ ສມາທາປນາກາຣມ຺ປິ ວຕ຺ວາວ, ກມ຺ມວາຈໍ ກາຕຸກາເມນປິ ຈ ເຕຫິ ວຸຕ຺ຕວຈນຕ຺ຖເມວ ຄເຫຕ຺ວາ ຕທນຸຄຸຓໍ ໂຍເຊຕ຺ວາວ ກາຕພ຺ພໍ, ນ ອິຘາຄຕວເສເນວ ສພ຺ເພສມ຺ປິ ອິຘາຄຕວເສເນວ ວຈນາສມ຺ຠວາ. ຠູເຕນ ວຕ຺ຖຸນາ ກຕເມວ ຫິ ອວິປນ຺ນໍ ໂຫຕິ, ນາຎ຺ຎນ຺ຕິ ຄເຫຕພ຺ພໍ. ເອສ ນໂຍ ນິຍສ຺ສກມ຺ມາທີສຸປິ.

ຕຊ຺ຊນີຍກມ຺ມກຖາວຓ຺ຓນາ ນິຏ຺ຐິຕາ.

ອຘມ຺ມກມ຺ມທ຺ວາທສກກຖາທິວຓ຺ຓນາ

໔. ອປ຺ປຏິຎ຺ຎາຍ ກຕນ຺ຕິ ວຕ຺ຖຸໍ ວາ ອາປຕ຺ຕິໍ ວາ ອສມ຺ປຏິຈ຺ຉາເປຕ຺ວາ ກຕໍ. ໂຍ ປນ ສພ຺ເພສໍ ປສ຺ສນ຺ຕານໍ ເອວ ວຕ຺ຖຸວີຕິກ຺ກມໍ ກຕ຺ວາ ປຈ຺ຉາ ກມ຺ມກຣຓຠເຍນ ‘‘ນ ກໂຣມີ’’ຕິ ມຸສາ ວທຕິ, ຕສ຺ສ ຠິກ຺ຂູນໍ ສມ຺ມຸເຂ ວີຕິກ຺ກມກຣຓເມວ ປຏິຎ຺ຎາ. ຕຖໂຕ ຊານນຕ຺ຖເມວ ປຏິຎ຺ຎາຍ ກຣຓໍ ອນຸຎ຺ຎາຕໍ. ຍຕ຺ຖ ປນ ສນ຺ເທໂຫ ໂຫຕິ, ຕຕ຺ຖ ສມ຺ປຏິຈ຺ຉາເປຕ຺ວາວ ກຕ຺ຕພ຺ພນ຺ຕິ ຄເຫຕພ຺ພໍ.

‘‘ປາຣາຊິກາປຕ຺ຕິຍາ ວາ’’ຕິ ອິທໍ ລິງ຺ຄນາສນນິມິຕ຺ຕຕາຍ ປາຣາຊິກສ຺ສ ກມ຺ເມນ ອຕິກິຈ຺ຉນີຍໂຕ ວຸຕ຺ຕໍ. ‘‘ສງ຺ຆາທິເສສາປຕ຺ຕິຍາ ວາ’’ຕິ ອິທໍ ປນ ປຣິວາສາທິນິສ຺ສາຣຓກມ຺ມສ຺ສ ອາເວຓິກສ຺ສ ວິຊ຺ຊມານຕ຺ຕາ ວຸຕ຺ຕໍ. ຍໍ ປນ ປຣໂຕ ‘‘ອຘິສີເລ ສີລວິປນ຺ໂນ ໂຫຕິ…ເປ… ຕຊ຺ຊນີຍກມ຺ມໍ ກເຣຍ຺ຍາ’’ຕິ (ຈູຬວ. ໖) ວຸຕ຺ຕໍ, ຕໍ ‘‘ອາຍຕິໍ ສໍວເຣ ຐຕ຺ວາ ວຸຏ຺ຐານໍ ກໂຣຫີ’’ຕິ ໂອວທິຍມານສ຺ສ ອນາທຣິຍາທິປຈ຺ຈຍລຫຸກາປຕ຺ຕິໍ ສນ຺ຘາຍ ວຸຕ຺ຕໍ. ສີລວິປຕ຺ຕິມູລກຎ຺ຫິ ລຫຸກາປຕ຺ຕິໍ ອາປນ຺ໂນ ອິຘ ອເຠທູປຈາເຣນ ‘‘ອຘິສີເລ ສີລວິປນ຺ໂນ’’ຕິ ວຸຕ຺ໂຕ ‘‘ອຕິທິຏ຺ຐິຍາ ທິຏ຺ຐິວິປນ຺ໂນ’’ຕິ ເອຕ຺ຖ ວິຍ.

ຍຖາ ຈ ທິຏ຺ຐິໍ ຄເຫຕ຺ວາ ໂວຫຣນ຺ຕສ຺ສ ‘‘ອິໂຕ ທິຏ຺ຐິໂຕ ໂອຣມາຫີ’’ຕິ ອວຕ຺ວາ ກຕກມ຺ມໍ ເກວລາຍ ທິຏ຺ຐິວິປຕ຺ຕິຍາ ກຕຕ຺ຕາ ອນາປຕ຺ຕິຍາ ກຕໍ ນາມ ອຘມ຺ມກມ຺ມໍ ໂຫຕິ, ເອວໍ ສີລວິປຕ຺ຕິໍ ອາປຊ຺ຊິຕ຺ວາ ລຊ຺ຊິຘມ຺ເມ ໂອກ຺ກນ຺ເຕ ຍຖາຘມ຺ມໍ ວຸຏ຺ຐາຍ ສໍວເຣ ຐາຕຸກາມສ຺ສ ກຕໍ ຕຊ຺ຊນີຍາທິກມ຺ມໍ ເກວລາຍ ສີລວິປຕ຺ຕິຍາ ກຕຕ຺ຕາ ອເທສນາຄາມິນິຍາ ກຕໍ ນາມ ອຘມ຺ມກມ຺ມໍ ໂຫຕິ. ເຕເນວ ນິຍສ຺ສກມ຺ເມປິ ‘‘ອປິສ຺ສຸ ຠິກ຺ຂູ ປກຕາ ປຣິວາສໍ ເທນ຺ຕາ’’ຕິອາທິນາ ສໍວເຣ ອຏ຺ຐານເມວ ກມ຺ມນິມິຕ຺ຕຠາເວນ ວຸຕ຺ຕໍ. ອທນ຺ຕໍ ທມນຕ຺ຖເມວ ຫິ ຕຊ຺ຊນີຍາທິກມ຺ມານິ ອນຸຎ຺ຎາຕານີຕິ. ເກຈິ ປນ ‘‘ອເທສນາຄາມິນິຍາຕິ ອິທໍ ປາຣາຊິກາປຕ຺ຕິໍເຍວ ສນ຺ຘາຍ ວຸຕ຺ຕໍ, ນ ສງ຺ຆາທິເສສ’’ນ຺ຕິ (ສາຣຕ຺ຖ. ຏີ. ຈູຬວຄ຺ຄ ໓.໔) ວທນ຺ຕິ, ຕໍ ສຸກ຺ກປກ຺ເຂ ‘‘ເທສນາຄາມິນິຍາ ອາປຕ຺ຕິຍາ ກຕໍ ໂຫຕີ’’ຕິ ອິມິນາ ວຈເນນ ວິຣຸຊ຺ຌຕິ. ສງ຺ຆາທິເສສສ຺ສາປິ ຈ ປຣິຍາຍໂຕ ເທສນາຄາມິນິໂວຫາເຣ ຄຍ຺ຫມາເນ ‘‘ອາປຕ຺ຕິຍາ ກຕໍ ໂຫຕີ’’ຕິ ວຸຕ຺ຕວາຣໂຕ ອິມສ຺ສ ວາຣສ຺ສ ວິເສໂສ ນ ສິຍາ, ອຏ຺ຐກຖາຍມ຺ເປຕ຺ຖ ວິເສສຠາໂວ ນ ທສ຺ສິໂຕ. ຕສ຺ມາ ວຸຕ຺ຕນເຍເນເວຕ຺ຖ ອຘິປ຺ປາໂຍ ຄເຫຕພ຺ໂພ.

໖. ສພ຺ພານິປີຕິ ຕຊ຺ຊນີຍນິຍສ຺ສປພ຺ພາຊນີຍກມ຺ມານິ ຕີຓິປິ. ອຎ຺ຎກມ຺ມສ຺ສ ວຕ຺ຖຸນາຕິ ຕຊ຺ຊນີຍໂຕ ອຎ຺ຎສ຺ສ ກມ຺ມສ຺ສ ວຕ຺ຖຸນາ ອຎ຺ຎກມ຺ມກຣຓໍ ນາມ ໂກຈິ ໂທໂສປິ ນ ໂຫຕີຕິ ອຘິປ຺ປາໂຍ. ກາຣຓມາຫ ‘‘ກສ຺ມາ’’ຕິອາທິນາ.

໘. ປນ຺ນໂລມາຕິ ປຕິຕມານໂລມາ.

ອຘມ຺ມກມ຺ມທ຺ວາທສກກຖາທິວຓ຺ຓນາ ນິຏ຺ຐິຕາ.

ນິຍສ຺ສກມ຺ມກຖາທິວຓ຺ຓນາ

໑໑. ນິຍສ຺ສກມ຺ເມ ປາຬິຍໍ ອປິສ຺ສູຕິ ອປິຈາຕິ ອິມສ຺ມິໍ ອຕ຺ເຖ ນິປາຕສມຸທາໂຍ. ນິສ຺ສາຍ ເຕ ວຕ຺ຖພ຺ພນ຺ຕິ ເອຕ຺ຖ ເກຈິ ກລ຺ຍາຓມິຕ຺ຕາຍຕ຺ຕວຸຕ຺ຕິຕໍ ສນ຺ຘາຍ ວຸຕ຺ຕນ຺ຕິ ວທນ຺ຕິ, ອຎ຺ເຎ ປນ ນິສ຺ສຍຄ຺ຄຫຓເມວາຕິ, ອຸຠເຍນປິສ຺ສ ເສຣິວິຫາໂຣ ນ ວຏ຺ຏຕີຕິ ທີປິຕນ຺ຕິ ທຏ຺ຐພ຺ພໍ.

໒໑. ປພ຺ພາຊນີຍກມ຺ເມ ‘‘ປພ຺ພາຊນີຍກມ຺ມໍ ປຏິປ຺ປສ຺ສມ຺ເຠຕູ’’ຕິ ອິທໍ ປກ຺ກມນາທິໍ ອກຕ຺ວາ ສມ຺ມາວຕ຺ຕນ຺ຕານໍ ວເສນ ວຸຕ຺ຕໍ.

໓໓. ປຏິສາຣຓີຍກມ຺ເມ ເນວ ຠິກ຺ຂຸວຈນໍ, ນ ຄິຫິວຈນນ຺ຕິ ເອຕ຺ຖ ປຣິຍາຍໂຕປິ ຠິກ຺ຂູ ປຣຂຸໍສນໍ ນ ວທນ຺ຕິ, ຄຫຏ຺ຐາ ປນ ສຣູເປເນວ ອກ຺ໂກສິຕຸໍ ສມຕ຺ຖາປິ ອຸປກາຣີສຸ ອກາຣຓໍ ເອວຣູປໍ ນ ວທນ຺ຕິ, ຕ຺ວໍ ຄິຫິຄຸຓໂຕປິ ປຣິຫີໂນຕິ ອຘິປ຺ປາໂຍ.

໓໙. ‘‘ອງ຺ຄສມນ຺ນາຄໂມ ປຸຣິເມຫິ ອສທິໂສ’’ຕິ ອິມິນາ ຕຊ຺ຊນີຍາທີນໍ ວຸຕ຺ຕກາຣຓມຕ຺ເຕນ ອິທໍ ກາຕຸໍ ນ ວຏ຺ຏຕີຕິ ທີເປຕິ. ອິຘ ວຸຕ຺ເຕນ ປນ ຄິຫີນໍ ອລາຠາຍ ປຣິສກ຺ກນາທິນາ ອງ຺ເຄນ ຕານິປິ ກາຕຸໍ ວຏ຺ຏຕີຕິ ຄເຫຕພ຺ພໍ. ເອຕ຺ຖ ຈ ‘‘ສທ຺ຘໍ ປສນ຺ນໍ ທາຍກໍ ກາຣກໍ ສງ຺ຆຸປຏ຺ຐາກໍ ຫີເນນ ຂຸໍເສຕີ’’ຕິ ວຸຕ຺ຕຕ຺ຕາ ຕາທິເສສຸ ຄິຫີສຸ ຂຸໍສນາທີຫິ ຄິຫິປຏິສໍຍຸຕ຺ເຕຫິ ເອວ ອງ຺ເຄຫິ ກມ຺ມາຣຫຕາ, ນ ອາຣາມິກເຈຏກາທີສຸ ຂຸໍສນາທີຫິ. ຕຕ຺ຖາປິ ທາຍກາທີສຸ ຂມາປິເຕສຸ ກມ຺ມາຣຫຕາ ນຕ຺ຖິ, ອາປຕ຺ຕິ ຈ ຍຕ຺ຖ ກຕ຺ຖຈິ ເທເສຕຸໍ ວຏ຺ຏຕິ. ໂຍ ເຈ ຕິກ຺ຂຕ຺ຕຸໍ ຂມາປິຍມາໂນປິ ນ ຂມຕິ, ອກຕກມ຺ເມນປິ ທສ຺ສນູປຈາເຣ ອາປຕ຺ຕິ ເທເສຕພ຺ພາ. ໂສ ເຈ ກາລກໂຕ ໂຫຕິ, ເທສນ຺ຕຣໍ ວາ ຄໂຕ, ຄຕທິສາ ນ ຎາຍຕິ, ອນ຺ຕຣາມຄ຺ເຄ ວາ ຊີວິຕນ຺ຕຣາໂຍ ໂຫຕິ, ກຕກມ຺ເມນປິ ອກຕກມ຺ເມນປິ ສງ຺ຆມຊ຺ເຌ ຍຖາຠູຕໍ ວິຎ຺ຎາເປຕ຺ວາ ຂມາເປຕ຺ວາ ອາປຕ຺ຕິ ເທເສຕພ຺ພາຕິ ວທນ຺ຕິ. ຘມ຺ມິກປຏິສ຺ສວສ຺ສ ອສຈ຺ຈາປເນ ປນ ເຕສໍ ສນ຺ຕິກໍ ຄນ຺ຕ຺ວາ ‘‘ມຍາ ອສມເວກ຺ຂິຕ຺ວາ ປຏິສ຺ສວໍ ກຕ຺ວາ ໂສ ນ ສຈ຺ຈາປິໂຕ, ຕໍ ເມ ຂມຖາ’’ຕິອາທິນາ ຂມາປເນ ວຈນກ຺ກໂມ ຎາເປຕພ຺ໂພ.

໔໑. ປາຬິຍໍ ມງ຺ກຸຠູໂຕ ນາສກ຺ຂິ ຈິຕ຺ຕໍ ຄຫປຕິໍ ຂມາເປຕຸນ຺ຕິ ຕິໍສໂຍຊນມຄ຺ຄໍ ປຸນ ຄນ຺ຕ຺ວາປິ ມານຖທ຺ຘຕາຍ ຍຖາຠູຕໍ ໂທສໍ ອາວິກຕ຺ວາ ອຂມາປເນນ ‘‘ນາຫໍ ຂມາມີ’’ຕິ ເຕນ ປຏິກ຺ຂິຕ຺ໂຕ ມງ຺ກຸຠູໂຕ ຂມາເປຕຸໍ ນ ສກ຺ຂິ, ໂສ ປຸນເທວ ສາວຕ຺ຖິໍ ປຈ຺ຈາຄນ຺ຕ຺ວາປິ ມານນິຄ຺ຄຫຕ຺ຖາເຍວ ປຸນປິ ສຕ຺ຖາຣາ ເປສິໂຕ ປຸຣິມນເຍເນວ ຂມາເປຕຸໍ ອສກ຺ໂກນ຺ໂຕ ປຸນາຄຈ຺ຉິ. ອຖສ຺ສ ຠຄວາ ‘‘ອສນ຺ຕໍ ຠາວນມິຈ຺ເຉຍ຺ຍາ’’ຕິອາທິນາວ (ຘ. ປ. ໗໓) ຘມ຺ມໍ ເທເສຕ຺ວາ ມານນິມ຺ມຖນໍ ກຕ຺ວາ ອນຸທູຕທານໍ ອນຸຎ຺ຎາສີຕິ ທຏ຺ຐພ຺ພໍ.

໔໒. ‘‘ໂນ ເຈ ຂມຕິ…ເປ… ອາປຕ຺ຕິໍ ເທສາເປຕພ຺ໂພ’’ຕິ ວຸຕ຺ຕຕ຺ຕາ ປເຄວ ຄຫຏ຺ໂຐ ຂມຕິ ເຈ, ທສ຺ສນູປຈາເຣ ອາປຕ຺ຕິເທສນາກິຈ຺ຈໍ ນຕ຺ຖີຕິ ຄເຫຕພ຺ພໍ.

໔໖. ອຸກ຺ເຂປນີຍກມ຺ເມສຸ ຕີສຸ ອຣິຏ຺ຐວຕ຺ຖຸສ຺ມິໍ ອາປຕ຺ຕິໍ ອາໂຣເປຕ຺ວາຕິ ວິສຸໍ ສງ຺ຆມຊ຺ເຌວ ປາປິກາຍ ທິຏ຺ຐິຍາ ອປ຺ປຏິນິສ຺ສຊ຺ຊນປຈ຺ຈຍາ ທຸກ຺ກຏໍ, ສມນຸຠາສນປຣິໂຍສາເນ ປາຈິຕ຺ຕິຍໍ ວາ ອາປຕ຺ຕິໍ ອາໂຣເປຕ຺ວາ. ເອຕ຺ຖາປິ ກມ຺ມວາຈາຍ ‘‘ຕຖາຫໍ ຠຄວຕາ’’ຕິອາທິ ວຕ຺ຖຸວເສນ ວຸຕ຺ຕໍ. ເຍນ ເຍນ ປກາເຣນ ທິຏ຺ຐິຄຕິກາ ໂວຫຣິໍສຸ, ເຕນ ເຕນ ປກາເຣນ ໂຍເຊຕ຺ວາ ກມ຺ມວາຈາ ກາຕພ຺ພາ. ຄຫຓາກາຣໍ ປນ ວິນາປິ ‘‘ສຸຓາຕຸ ເມ, ຠນ຺ເຕ, ສງ຺ໂຆ, ອິຕ຺ຖນ຺ນາມສ຺ສ ຠິກ຺ຂຸໂນ ປາປິກໍ ທິຏ຺ຐິຄຕໍ ອຸປ຺ປນ຺ນໍ, ໂສ ຕໍ ທິຏ຺ຐິໍ ອປ຺ປຏິນິສ຺ສຊ຺ຊຕິ, ຍທິ ສງ຺ຆສ຺ສ ປຕ຺ຕກລ຺ລ’’ນ຺ຕິ ເອວໍ ສາມຎ຺ຎໂຕປິ ກມ຺ມວາຈໍ ກາຕຸໍ ວຏ຺ຏຕິ.

໖໕. ‘‘ຍໍ ທິຏ຺ຐິໍ ນິສ຺ສາຍ ຠຓ຺ຑນາທີນິ ກໂຣຕີ’’ຕິ ອິມິນາ ທິຏ຺ຐິໍ ນິສ຺ສາຍ ອຸປ຺ປນ຺ນານິ ເອວ ຠຓ຺ຑນາທີນິ ອິຘ ອຘິປ຺ເປຕານິ, ນ ເກວລານີຕິ ທສ຺ເສຕິ. ໂຍ ປນ ‘‘ຠຓ຺ຑນາທີນໍ ກຣເຓ ໂທໂສ ນຕ຺ຖີ’’ຕິ ທິຏ຺ຐິໂກ ຫຸຕ຺ວາ ຠຓ຺ຑນາທິໍ ກໂຣຕິ, ສາປິສ຺ສ ທິຏ຺ຐິ ເອວ ໂຫຕິ, ຕສ຺ສປິ ອປ຺ປຏິນິສ຺ສຄ຺ເຄ ກມ຺ມໍ ກາຕຸໍ ວຏ຺ຏຕິ.

ນິຍສ຺ສກມ຺ມກຖາທິວຓ຺ຓນາ ນິຏ຺ຐິຕາ.

ກມ຺ມກ຺ຂນ຺ຘກວຓ຺ຓນານໂຍ ນິຏ຺ຐິໂຕ.