໑. ລສຸຓວຄ຺ໂຄ

໑. ປຐມລສຸຓສິກ຺ຂາປທວຓ຺ຓນາ

໗໙໓-໗. ອຫໍ ລສຸເຓນາຕິ ເອຕ຺ຖ ‘‘ປວາເຣມີ’’ຕິ ປາຐເສໂສ. ພທຣສາຬວໍ ກິຣ ພທຣຜລານິ ສຸກ຺ຂາເປຕ຺ວາ ຈຸຓ຺ເຓຕ຺ວາ ກຕ຺ຕພ຺ພາ ຂາທນີຍວິກຕິ.

ປຐມລສຸຓສິກ຺ຂາປທວຓ຺ຓນາ ນິຏ຺ຐິຕາ.

໒. ທຸຕິຍສິກ຺ຂາປທວຓ຺ຓນາ

໘໐໐. ສໍຫຣາເປຍ຺ຍາຕິ ‘‘ສໍຫຣຕິ ວາ ສໍຫຣາເປຕິ ວາ’’ຕິ ປທຠາຊນໍ ເວທິຕພ຺ພໍ. ກິຎ຺ຈາປິ ເອຕ຺ຖ ອາປຕ຺ຕິເຠໂທ ນ ທສ຺ສິໂຕ, ຕຖາປິ ຂຸຣສຓ຺ຑາສກຕ຺ຕຣິອາທິປຣິເຍສນຆໍສນາທີສຸ ປຸພ຺ພປໂຍເຄສຸ ທຸກ຺ກຏໍ ຍຸຊ຺ຊຕິ, ຍຖາ ເຈຕ຺ຖ, ເອວໍ ຕລຆາຕກາທິມ຺ຫິ ຈ ອາປຕ຺ຕິເຠໂທ ປາຬິຍໍ ນ ວຸຕ຺ໂຕ. ຍຖາສມ຺ຠວໍ ປນ ປຸພ຺ພປໂຍເຄສຸ ທຸກ຺ກຏໍ ສມ຺ຠວຕິ. ເອວໍ ຠິກ຺ຂຸສ຺ສ ເອຕ຺ຖ ຈ ລສຸເຓ ຈ ທຸກ຺ກຏໍ. ອິທໍ ກິຣິຍາກິຣິຍນ຺ຕິ ໂປຣາຓາ. ຕຕ຺ຖ ‘‘ກິຣິຍາກິຣິຍ’’ນ຺ຕິ ນ ວຸຕ຺ຕໍ.

ທຸຕິຍສິກ຺ຂາປທວຓ຺ຓນາ ນິຏ຺ຐິຕາ.

໘໐໒-໖. ຕຕິຍຈຕຸຕ຺ຖສິກ຺ຂາປທໍ ອຸຕ຺ຕານຕ຺ຖເມວ.

໕. ປຎ຺ຈມສິກ຺ຂາປທວຓ຺ຓນາ

໘໑໒. ປຎ຺ຈເມ ອຸທກສຸທ຺ຘິປຈ຺ຈເຍ ສຕິປິ ຜສ຺ສສາທິຍເນ ຍຖາວຸຕ຺ຕປຣິຈ຺ເຉເທ ອນາປຕ຺ຕິ. ຕຕ຺ຖ ທ຺ວິນ຺ນໍ ປພ຺ພານນ຺ຕິ ‘‘ທ຺ວິນ຺ນໍ ອງ຺ຄຸລານໍ ສຫປເວສເນ ເອເກກອງ຺ຄຸລສ຺ສ ເອເກກໍ ປພ຺ພໍ ກຕ຺ວາ ທ຺ເວ ປພ຺ພາ, ເອກງ຺ຄຸລປ຺ປເວສເນ ທ຺ວິນ຺ນໍ ປພ຺ພານໍ ອຸປຣິ ນ ວຏ຺ຏຕີຕິ ເວທິຕພ຺ພໍ. ມຫາປຈ຺ຈຣິຍມ຺ປິ ອຍເມວ ນໂຍ ທສ຺ສິໂຕ’’ຕິ ລິຂິຕໍ.

ປຎ຺ຈມສິກ຺ຂາປທວຓ຺ຓນາ ນິຏ຺ຐິຕາ.

໘໑໕. ຉຏ຺ຐສິກ຺ຂາປທໍ ອຸຕ຺ຕານຕ຺ຖເມວ.

໗. ສຕ຺ຕມສິກ຺ຂາປທວຓ຺ຓນາ

໘໒໐-໘໒໒. ‘‘ນຄຣໍ ອຕິຫຣນ຺ຕີ’’ຕິ ປາໂຐ. ‘‘ນຄຣທ຺ວາເຣ ອຕິຫຣນ຺ຕີ’’ຕິ ກຕ຺ຖຈິ, ຕຕ຺ຖ ທ຺ວາເຣນາຕິ ອຕ຺ໂຖ. ອຍເມວ ວາ ປາໂຐ. ຕໍ ປຸພ຺ພາປຣວິຣຸທ຺ຘນ຺ຕິ ‘‘ປຸນປິ ວຸຕ຺ຕ’’ນ຺ຕິ ວຸຕ຺ຕໍ ວາທໍ ສນ຺ຘາຍ, ນ ຕໂຕ ປຸພ຺ເພ ຕຕ຺ຖ ວຸຕ຺ຕໍ ວາທໍ. ເອຕ຺ຖ ‘‘ມາຕຣມ຺ປິ ວິຎ຺ຎາເປຕ຺ວາຕິ ວຈເນນ ວິຣຸຊ຺ຌຕີ’’ຕິ ລິຂິຕໍ, ຕໍ ທຸລ຺ລິຂິຕໍ, ນ ຫິ ເຕນ ວິໂຣຘໍ ສນ຺ຘາຍ ອິທໍ ວຸຕ຺ຕນ຺ຕິ. ກຣເຓ ເຈ ປາຈິຕ຺ຕິຍໍ, ກາຣາປເນປິ ປາຈິຕ຺ຕິເຍເນວ ຠວິຕພ຺ພໍ. ອຖ ກາຣາປເນ ທຸກ຺ກຏໍ, ກຣເຓປິ ທຸກ຺ກເຏເນວ ຠວິຕພ຺ພໍ. ນ ຫິ ກຣເຓ ວາ ກາຣາປເນ ວາ ວິເສໂສ ອຕ຺ຖິ ອາປຊ຺ຊເນ ສຕີຕິ ອຘິປ຺ປາໂຍ.

໘໒໓. ສມ຺ປຏິຈ຺ຉິຕຸໍ ວຏ຺ຏຕີຕິ ອປ຺ປຏິກ຺ຂິປິຕ຺ວາ ‘‘ສາຘູ’’ຕິ ວຕ຺ຕຸໍ ວຏ຺ຏຕີຕິ ອຘິປ຺ປາໂຍ. ນ ຫິ ປຏິຄ຺ຄເຫຕຸໍ ວຏ຺ຏຕິ. ອນາມາສຕ຺ຕາ ‘‘ອາມກຘຎ຺ຎໍ ປນ ຎາຕກປວາຣິຕຏ຺ຐາເນປິ ນ ວຏ຺ຏຕີ’’ຕິ ວຸຕ຺ຕໍ. ອນຸຄຓ຺ຐິປເທ ປນ ‘‘ກປ຺ປິເຍນ ລທ຺ຘໍ ຘຎ຺ຎໍ ຠຊ຺ຊິຕ຺ວາ ຠຸຎ຺ຊນ຺ຕິຍາ ທຸກ຺ກຏໍ. ອປຣຓ຺ເຓປິ ເອເສວ ນໂຍ’’ຕິ ຈ ‘‘ອນາປຕ຺ຕິ ອາພາຘປຈ຺ຈຍາຕິ ວຈນໂຕ ສຕ຺ຕ ຘຎ຺ຎານິປິ ອນາມາສານີຕິ ສິທ຺ຘໍ, ເຕເນວ ເຫຏ຺ຐາ ອຏ຺ຐກຖາຍໍ ທຸກ຺ກຏວຕ຺ຖຸມ຺ຫິ ສຕ຺ຕ ຘຎ຺ຎານິປິ ຄຫິຕານິ ອນາມາສານີ’’ຕິ ຈ ວຸຕ຺ຕານິ. ອາມາສານິ ກປ຺ປິຍວຕ຺ຖູນິ ຈ ຍທິ ຠເວຍ຺ຍຸໍ, ຍຖາ ຎາຕກປວາຣິເຕ ສນ຺ຘາຍ ‘‘ອປຣຓ຺ຓໍ ວິຎ຺ຎາເປຕີ’’ຕິ ອວິເສເສນ ວຸຕ຺ຕໍ, ເອວໍ ‘‘ອນາປຕ຺ຕິ ຎາຕການໍ ປວາຣິຕານໍ ອຎ຺ຎສ຺ສ ອຕ຺ຖາຍ ວິຎ຺ຎາເປຕິ, ອຸມ຺ມຕ຺ຕິກາຍ ອາທິກມ຺ມິກາຍາ’’ຕິ ວຕ຺ຕພ຺ພໍ. ຍສ຺ມາ ທຸກ຺ກຏວຕ຺ຖຸຕ຺ຕາ ຈ ອນາມາສຕ຺ຕາ ຈ ມາຕຣມ຺ປິ ສຕ຺ຕວິຘໍ ຘຎ຺ຎໍ ວິຎ຺ຎາເປຕຸໍ ນ ວຏ຺ຏຕິ, ຕສ຺ມາ ຕທຕ຺ຖທີປນຕ຺ຖໍ ສຕ຺ຕວິຘໍ ຘຎ຺ຎໍ ສນ຺ຘາຍ ‘‘ອນາປຕ຺ຕິ ອາພາຘປຈ຺ຈຍາ’’ຕິ ວຸຕ຺ຕໍ, ຍຖາ ຠິກ຺ຂຸນິຍາ ອາພາຘປຈ຺ຈຍາ ວຏ຺ຏຕິ, ຕຖາ ຠິກ຺ຂຸສ຺ສາປີຕິ ຈ. ຍຖາ ວາ ປນ ຠິກ຺ຂຸນິຍາ ຠຊ຺ຊນາທີນິ ກາຣາເປຕຸໍ ນ ວຏ຺ຏຕິ, ເອວໍ ຠິກ຺ຂຸສ຺ສາປິ. ວຸຕ຺ຕມ຺ປິ ເຈຕໍ ອນ຺ຘກຏ຺ຐກຖາຍໍ ‘‘ອຎ຺ຎຕໂຣ ພາລຠິກ຺ຂຸ ກປ຺ປິຍໍ ອຊານນ຺ໂຕ ເອຕທໂວຈ ‘ອາມກຘຎ຺ຎໍ ສມ຺ປຏິຈ຺ຉິຕຸໍ ຠິກ຺ຂູນໍ ນ ວຏ຺ຏຕິ. ເອຕໍ ຘຎ຺ຎໍ ຠຊ຺ຊິຕ຺ວາ ໂກຏ຺ເຏຕ຺ວາ ປຈິຕ຺ວາ ຍາຄຸຂຊ຺ຊກໍ ຠຕ຺ຕຎ຺ຈ ເທຖາ’ຕິ, ອາຓາປກສ຺ເສວ ຠິກ຺ຂຸສ຺ສ ອາປຕ຺ຕິ, ສພ຺ເພສໍ ອນາປຕ຺ຕີ’’ຕິ. ຕສ຺ມາ ‘‘ສງ຺ຆວາຣິການໍ ຘຎ຺ຎໍ ໂກຏ຺ເຏຖາ’’ຕິ ອາຣາມິການໍ ວຕ຺ຕຸຎ຺ຈ ນ ວຏ຺ຏຕິ. ‘‘ທິວສໍ ປຣິພ຺ພຍໍ ຄຓ຺ຫຖ, ຕຓ຺ຑຸເລ ສມ຺ປາເທຖ, ຕ຺ວໍ ເອຕ຺ຕເກ ຄຓ຺ຫ, ຕ຺ວໍ ເອຕ຺ຕເກ’’ຕິ ເອວມາທີນິ ປນ ວຕ຺ຕຸໍ ວຏ຺ຏຕີຕິ ຈ. ຍໍ ປນ ‘‘ອວິຎ຺ຎຕ຺ຕິຍາ ລພ຺ຠມານໍ ປນ ນວກມ຺ມຕ຺ຖາຍ ສມ຺ປຏິຈ຺ຉິຕຸໍ ວຏ຺ຏຕີ’’ຕິ ວຸຕ຺ຕໍ, ຕມ຺ປິ ເຫຏ຺ຐາ ‘‘ອິມໍ ຕຬາກໍ ເຂຕ຺ຕໍ ວຕ຺ຖຸໍ ວິຫາຣສ຺ສ ເທມາ’ຕິ ວຸຕ຺ເຕ ‘ສມ຺ປຏິຈ຺ຉິຕຸໍ ວຏ຺ຏຕີ’’ຕິ ວຸຕ຺ຕໍ ນຍໍ ສນ຺ຘາຍ ວຸຕ຺ຕຕ຺ຕາ ສຸວຸຕ຺ຕເມວ. ‘‘ນວກມ຺ມຕ຺ຖາຍ ຘຎ຺ຎໍ ເທມາ’’ຕິ ວຸຕ຺ເຕ ‘‘ສາຘູ’’ຕິ ວຕ຺ຕພ຺ພໍ. ຍໍ ປນ ເຫຏ຺ຐາ ‘‘ຕຕ຺ຖ ນິສ຺ສຄ຺ຄິຍວຕ຺ຖຸໍ ອຕ຺ຕໂນ ວາ ສງ຺ຆຄຓປຸຄ຺ຄລເຈຕິຍານໍ ວາ ອຕ຺ຖາຍ ສມ຺ປຏິຈ຺ຉິຕຸໍ ນ ວຏ຺ຏຕິ…ເປ… ທຸກ຺ກຏວຕ຺ຖຸໍ ສພ຺ເພສມ຺ປິ ອຕ຺ຖາຍ ສມ຺ປຏິຈ຺ຉໂຕ ທຸກ຺ກຏເມວາ’’ຕິ ວຸຕ຺ຕໍ, ຕມ຺ປິ ສຸວຸຕ຺ຕເມວ. ກສ຺ມາ? ‘‘ເຈຕິຍສ຺ສ ອຕ຺ຖາຍ ຘຎ຺ຎໍ ທາຕຸກາໂມມ຺ຫິ, ຕຸມ຺ເຫ ຠນ຺ເຕ ຕທຕ຺ຖາຍ ສມ຺ປຏິຈ຺ຉຖາ’’ຕິ ວຸຕ຺ເຕ ປຏິຄ຺ຄເຫຕຸໍ ອກປ຺ປິຍຕ຺ຕາ. ‘‘ອິທໍ ປນ ຕາທິສໍ ນ ໂຫຕີ’’ຕິ ຈ ວຸຕ຺ຕໍ. ສພ຺ໂພປາຍໍ ອຸປຕິສ຺ສຕ຺ເຖຣວາໂທ ກິຣ. ຘມ຺ມສິຣິຕ຺ເຖໂຣ ປເນວມາຫ ‘‘ປຸພ຺ເພປິ ນວກມ຺ມຕ຺ຖາຍ ປຏິຄ຺ຄໂຫ ນ ວາຣິໂຕ, ສງ຺ຆສ຺ສຕ຺ຖາຍ ປຏິຄ຺ຄຫິຕມ຺ປິ ປຏິຄ຺ຄາຫກສ຺ເສວ ອກປ຺ປິຍ’’ນ຺ຕິ.

ສຕ຺ຕມສິກ຺ຂາປທວຓ຺ຓນາ ນິຏ຺ຐິຕາ.

໘. ອຏ຺ຐມສິກ຺ຂາປທວຓ຺ຓນາ

໘໒໔. ໂປຣາຓາ ‘‘ນິພ຺ພິຏ຺ຐຣາຊຠໂຏ’’ຕິ ປຐນ຺ຕິ. ຕສ຺ສຕ຺ໂຖ ວາຣິຕຠຕ຺ຕເວຕໂນ ຣາຊຠໂຏຕິ. ‘‘ຕຎ຺ເຎວ ຠຏປຖນ຺ຕິ ຕໍເຍວ ຠຕ຺ຕເວຕນ’’ນ຺ຕິ ອຕ຺ຖໍ ວທນ຺ຕິ. ອຸມ຺ມຸກນ຺ຕິ ອລາຕໍ.

໘໒໖. ເອຕ຺ຖ ຉຑ຺ຑິຕໍ ກິຣິຍາ. ອໂນໂລກນໍ ອກິຣິຍາ.

ອຏ຺ຐມສິກ຺ຂາປທວຓ຺ຓນາ ນິຏ຺ຐິຕາ.

໙. ນວມສິກ຺ຂາປທວຓ຺ຓນາ

໘໓໒. ‘‘ສາມິເກ ອປໂລເກຕ຺ວາ ຉຑ຺ເຑຕີ’’ຕິ ກຕ຺ຖຈິ ໂປຕ຺ຖເກ ນຕ຺ຖິ, ກຕ຺ຖຈິ ອຕ຺ຖິ, ອຕ຺ຖິຠາໂວວ ເສຍ຺ໂຍ ກິຣິຍາກິຣິຍຕ຺ຕາ ສິກ຺ຂາປທສ຺ສ. ອິຘ ເຂຕ຺ຕປາລກາ, ອາຣາມາທິໂຄປກາ ຈ ສາມິກາ ເອວ. ‘‘ສງ຺ຆສ຺ສ ເຂຕ຺ເຕ, ອາຣາເມ ຈ ຕຕ຺ຖ ກຈວຣໍ ນ ຉຑ຺ເຑຕພ຺ພນ຺ຕິ ກຕິກາ ເຈ ນຕ຺ຖິ, ຠິກ຺ຂຸສ຺ສ ຉຑ຺ເຑຕຸໍ ວຏ຺ຏຕິ ສງ຺ຆປຣິຍາປນ຺ນຕ຺ຕາ, ນ ຠິກ຺ຂຸນີນໍ. ຕາສມ຺ປິ ຠິກ຺ຂຸນິສງ຺ຆສນ຺ຕເກ ວຸຕ຺ຕນເຍນ ວຏ຺ຏຕິ, ນ ຕຕ຺ຖ ຠິກ຺ຂຸສ຺ສ, ເອວໍ ສນ຺ເຕປິ ສາຣຸປ຺ປວເສເນວ ກາຕພ຺ພ’’ນ຺ຕິ ວຸຕ຺ຕໍ.

ນວມສິກ຺ຂາປທວຓ຺ຓນາ ນິຏ຺ຐິຕາ.

໑໐. ທສມສິກ຺ຂາປທວຓ຺ຓນາ

໘໓໓. ສາຘຸກີຬິຕຄີຕໍ ວາຕິ ເອຕ຺ຖ ປາຈິຓ຺ຓຄີຕມ຺ປິ ໂສຕຸໍ ນ ວຏ຺ຏຕິ. ‘‘ຄີຕຸປສຎ຺ຫິຕໍ ປນ ຘມ຺ມໍ ໂສຕຸໍ ວຏ຺ຏຕີຕິ ທີຆນິກາຍຏ຺ຐກຖາຍໍ ວຸຕ຺ຕ’’ນ຺ຕິ ວຸຕ຺ຕໍ. ໂປຣາຓຄຓ຺ຐິປເທ ປນ ‘‘ຘມ຺ມຄີຕມ຺ປິ ນ ວຏ຺ຏຕີ’’ຕິ ວຕ຺ວາ ‘‘ພຸທ຺ຘສ຺ສ ຄາຍາມ ວາເທມາຕິ ວຸຕ຺ເຕ ສມ຺ປຏິຈ຺ຉິຕຸໍ ນ ວຏ຺ຏຕິ, ທຸກ຺ກຏໍ ໂຫຕີ’’ຕິ ວຸຕ຺ຕໍ, ‘‘ປູຊໍ ກໂຣມ, ຊາຕກໍ ວາ ວຕ຺ຖຸໍ ວາ ເທເສມາຕິ ວຸຕ຺ເຕ ‘ສາຘູ’ຕິ ສມ຺ປຏິຈ຺ຉິຕຸໍ ວຏ຺ຏຕີ’’ຕິ ຈ ວຸຕ຺ຕໍ.

໘໓໖. ເອກປໂຍໂຄ ນາມ ເອກທິວສາວໂລກນໍ. ເຕສໍເຍວາຕິ ເຍສໍ ນຈ຺ຈໍ ປສ຺ສຕິ. ‘‘ຠິກ຺ຂຸນີ ສຍມ຺ປິ ນຈ຺ຈິຕຸໍ ວາ ຄາຍິຕຸໍ ວາ ວາທິຕຸໍ ວາ ນ ລຠຕີ’’ຕິອາທິ ອິຘ ສິກ຺ຂາປເທ ນຕ຺ຖິ. ກສ຺ມາ? ເອຬກໂລມສມຸຏ຺ຐານຕ຺ຕາ. ຍທິ ເອວໍ ກສ຺ມາ ວຸຕ຺ຕນ຺ຕິ ເຈ? ສຸຕ຺ຕານຸໂລມມຫາປເທສໂຕ. ຍທິ ນຈ຺ຈາທີນິ ປສ຺ສິຕຸໍ ວາ ໂສຕຸໍ ວາ ນ ລຠຕິ, ປເຄວ ອຕ຺ຕນາ ກາຕຸນ຺ຕິ ນຍໂຕ ລພ຺ຠມານຕ຺ຕາ ວຸຕ຺ຕໍ. ອິຕຣຖາ ມຫາປເທສາ ນິຣຕ຺ຖກາ ສິຍຸໍ. ເອວມຎ຺ຎຕ຺ຖາປິ ນໂຍ ເນຕພ຺ໂພ. ‘‘ສມຸຏ຺ຐານມ຺ປິ ອິຘ ວຸຕ຺ຕເມວ ອຄ຺ຄເຫຕ຺ວາ ຉສມຸຏ຺ຐານວເສນ ຄເຫຕພ຺ພ’’ນ຺ຕິ ລິຂິຕໍ. ຕໍ ‘‘ອຎ຺ເຎ ນຈ຺ຈ, ຄາຍ, ວາເທຫີ’’ຕິ ວຕ຺ຕຸໍ ນ ລພ຺ຠຕີຕິອາທິວຈີກມ຺ມໍ ສນ຺ຘາຍ ລິຂິຕຎ຺ເຈ, ຕໍ ສຸລິຂິຕໍ ເອຬກໂລມສມຸຏ຺ຐາເນ ວາຈາຍ ອຠາວໂຕ. ‘‘ສຍມ຺ປິ ນຈ຺ຈິຕຸ’’ນ຺ຕິອາທິກາຍກມ຺ມຎ຺ເຈ ສນ຺ຘາຍ ລິຂິຕໍ, ທຸລ຺ລິຂິຕໍ. ເອຬກໂລມສມຸຏ຺ຐານຎ຺ຫິ ເອກນ຺ຕໂຕ ກາຍກມ຺ມໍ ໂຫຕິ, ຕສ຺ມາ ອຸທ຺ຘຏໍ ອຄ຺ຄເຫຕ຺ວາ ອາທິສທ຺ເທນ ສງ຺ຄຫິຕເມວ ອິຘ ຄເຫຕພ຺ພນ຺ຕິ. ເອຕໍ ເອຬກໂລມສມຸຏ຺ຐານຕ຺ຕາຕິ ເອຕ຺ຖ ກາຣຓວຈເນ ສຸຕ຺ຕານຸໂລມມຫາປເທສໂຕຕິ ເອຕ຺ຖ ປນ ອຸທ຺ຘຏໍ ຄເຫຕພ຺ພໍ, ເອວໍ ຍຖາລາຠວເສນ ຕໍ ລິຂິຕນ຺ຕິ ເວທິຕພ຺ພໍ. ‘‘ອາຫຈ຺ຈຠາສິຕສິກ຺ຂາປທວເສນ ເອຬກໂລມສມຸຏ຺ຐານ’’ນ຺ຕິ ວຸຕ຺ຕນ຺ຕິ ອຸປຕິສ຺ສຕ຺ເຖໂຣ. ‘‘ເອຬກໂລມສມຸຏ຺ຐານຎ຺ເຈ ອິທໍ ສິກ຺ຂາປທໍ, ອາຓາປໂກ ມຸຈ຺ເຈຍ຺ຍ, ນ ຈ ມຸຈ຺ຈຕີ’’ຕິ ວຸຕ຺ຕໍ. ຕໍ ‘‘ກສ຺ມາ’’ຕິ ວຸຕ຺ເຕ ‘‘ສພ຺ພອຏ຺ຐກຖາສຸ ວຸຕ຺ຕ’’ນ຺ຕິ ອຏ຺ຐກຖາຈຣິໂຍ ອາຫາຕິ ຘມ຺ມສິຣິຕ຺ເຖໂຣ.

໘໓໗. ອາຣາເມ ຐຕ຺ວາຕິ ນ ເກວລໍ ຐຕ຺ວາ, ຕໂຕ ຄນ຺ຕ຺ວາ ປນ ສພ຺ພິຣິຍາປເຖຫິປິ ລຠຕິ. ‘‘ອາຣາເມ ຐິຕາຕິ ປນ ອາຣາມປຣິຍາປນ຺ນາຕິ ອຕ຺ໂຖ, ອິຕຣຖາ ນິສິນ຺ນາປິ ນ ລເຠຍ຺ຍາ’’ຕິ ລິຂິຕໍ, ຕໍ ສຸລິຂິຕເມວ.

ທສມສິກ຺ຂາປທວຓ຺ຓນາ ນິຏ຺ຐິຕາ.

ລສຸຓວຄ຺ຄວຓ຺ຓນາ ນິຏ຺ຐິຕາ.