ເສທໂມຈນຄາຖາວຓ຺ຓນາ

ອວິປ຺ປວາສປຎ຺ຫາວຓ຺ຓນາ

໔໗໙. ຕຫິນ຺ຕິ ຕສ຺ມິໍ ປຸຄ຺ຄເລ. ອກປ຺ປິຍສມ຺ໂຠໂຄ ນາມ ເມຖຸນຘມ຺ມາທິ. ‘‘ວຣເສນາສນຣກ຺ຂຓຕ຺ຖາຍ ວິສ຺ສຊ຺ເຊຕ຺ວາ ປຣິຠຸຎ຺ຊິຕຸໍ ວຏ຺ຏຕີ’’ຕິ ຄຣຸຠຓ຺ຑວິນິຈ຺ຉເຍ ວຸຕ຺ໂຕ. ເອກາທສາວນ຺ທິເຍ ປຓ຺ຑກາທໂຍ ເອກາທສ. ອຸເປຕິ ສປຣິສໍ. ນ ຊີວຕິ ນິມ຺ມິຕຣູປຕ຺ຕາ. ‘‘ອຸພ຺ຠກ຺ຂເກນ ວທາມີ’’ຕິ ອິມິນາ ມຸເຂ ເມຖຸນຘມ຺ມາຠາວໍ ທີເປຕິ. ອໂຘນາຠິວິວຊ຺ຊເນນ ວຈ຺ຈມຄ຺ຄປ຺ປສ຺ສາວມຄ຺ເຄສຸ. ຄາມນ຺ຕຣປຣິຍາປນ຺ນໍ ນທິປາຣໍ ໂອກ຺ກນ຺ຕຠິກ຺ຂຸນິໍ ສນ຺ຘາຍາຕິ ຠິກ຺ຂຸນິຍາ ຄາມາປຣິຍາປນ຺ນປຣຕີເຣ ນທິສມີປເມວ ສນ຺ຘາຍ ວຸຕ຺ຕາ. ຕຕ຺ຖ ປຣຕີເຣ ຄາມູປຈາໂຣ ເອກເລຑ຺ຑຸປາໂຕ ນທິປຣິຍນ຺ເຕນ ປຣິຈ຺ຉິນ຺ໂນ, ຕສ຺ມາ ປຣຕີເຣ ຣຕນມຕ຺ຕມ຺ປິ ອຣຎ຺ຎໍ ນ ອຕ຺ຖິ, ຕຎ຺ຈ ຕິຓາທີຫິ ປຏິຈ຺ຉນ຺ນຕ຺ຕາ ທສ຺ສນູປຈາຣວິຣຫິຕໍ ກໂຣຕິ. ຕຕ຺ຖ ອຕ຺ຕໂນ ຄາເມ ອາປຕ຺ຕິ ນຕ຺ຖິ. ປຣຕີເຣ ປນ ເອກເລຑ຺ຑຸປາຕສງ຺ຂາເຕ ຄາມູປຈາເຣເຍວ ປທໍ ຐເປຕິ. ອນ຺ຕເຣ ອຠິຘມ຺ມວເສນ ອຣຎ຺ຎຠູຕໍ ສກຄາມໍ ອຕິກ຺ກມຕິ ນາມ, ຕສ຺ມາ ຄຓມ຺ຫາ ໂອຫີຍນາ ຈ ໂຫຕີຕິ ຎາຕພ຺ພໍ. ເອຕ຺ຕາວຕາປິ ສນ຺ໂຕສມກຕ຺ວາ ວິຈາເຣຕ຺ວາ ຄເຫຕພ຺ພໍ. ຠິກ຺ຂູນໍ ສນ຺ຕິເກ ອຸປສມ຺ປນ຺ນາ ປຎ຺ຈສຕາ ມຫາປຊາປຕິປ຺ປມຸຂາ. ມຫາປຊາປຕິປິ ຫິ ອານນ຺ທຕ຺ເຖເຣນ ທິນ຺ນໂອວາທສ຺ສ ປຏິຄ຺ຄຫິຕຕ຺ຕາ ຠິກ຺ຂູນໍ ສນ຺ຕິເກ ອຸປສມ຺ປນ຺ນາ ນາມ.

ປາຣາຊິກາທິປຎ຺ຫາວຓ຺ຓນາ

໔໘໐. ‘‘ທຸສ຺ສກຸຏິໍ ສນ຺ຘາຍາ’’ຕິ ສຫ ທຸສ຺ເສນ ວີຕິກ຺ກມນສ຺ສ ສກ຺ກຸເຓຍ຺ຍຕາຍ ວຸຕ຺ຕໍ. ລິງ຺ຄປຣິວຕ຺ເຕ ປຏິຄ຺ຄຫຓສ຺ສ ວິຊຫນໂຕ ສາມໍ ຄເຫຕ຺ວາ ຠຸຎ຺ຊິຕຸໍ ນ ວຏ຺ຏຕິ. ກາກອູຫທນໍ ວາຕິ ກາເກນ ອູຫທນໍ ວາ. ‘‘ຕໂຍ ປຸຣິເສປິ ອຸປຄນ຺ຕ຺ວາ’’ຕິ ປາຐເສໂສ.

ປາຈິຕ຺ຕິຍາທິປຎ຺ຫາວຓ຺ຓນາ

໔໘໑. ເມຖຸນຘມ຺ມປຈ຺ຈຍາ ນາມ ກາຍສໍສຄ຺ໂຄ. ຕໍເຫຕຸ ເມຖຸນຘມ຺ມສ຺ສ ປຸພ຺ພຠາຄຠູຕໍ ກາຍສໍສຄ຺ຄໍ ວາຍາມນ຺ຕິຍາຕິ ອຏ຺ຐວຕ຺ຖຸປູຣຓໍ ສນ຺ຘາຍ. ປຣິໂຠຄປ຺ປຈ຺ຈຍາຕິ ປຣິໂຠຄກາຣຓາ. ຕສ຺ມາຕິ ຍສ຺ມາ ປຣິໂຠຄປ຺ປຈ຺ຈຍາ ອາປຊ຺ຊຕິ, ຕສ຺ມາ ໂຠຊນປຣິໂຍສາເນ ໂຫຕີຕິ ອຕ຺ໂຖ. ໂປຣາຓໂປຕ຺ຖເກສຸ ‘‘ຕສ຺ສາ’’ຕິ ປາໂຐ. ‘‘ກາຣຓວຈນໍ ສຸນ຺ທຣໍ ໂຠຊນປຣິຈ຺ເຉທທສ຺ສນໂຕ’’ຕິ ວທນ຺ຕິ.

ເສທໂມຈນຄາຖາວຓ຺ຓນາ ນິຏ຺ຐິຕາ.