ໂສຬສມຫາວາຣວຓ຺ຓນາ

ປຎ຺ຎຕ຺ຕິວາຣວຓ຺ຓນາ

໑-໒. ສີລສມາຘິປຎ຺ຎາວິມຸຕ຺ຕິວິມຸຕ຺ຕິຎາຓທສ຺ສນສງ຺ຂາຕສ຺ສ ຘມ຺ມກ຺ຂນ຺ຘສຣີຣສ຺ສ ສາສເນຕິ ອຕ຺ໂຖ. ປຣິວາໂຣຕິ ສງ຺ຄຫໍ ໂຍ ສມາຣຸຬ຺ໂຫ, ຕສ຺ສ ປຣິວາຣສ຺ສ. ວິນຍຠູຕາ ປຎ຺ຎຕ຺ຕິ ວິນຍປຎ຺ຎຕ຺ຕິ. ‘‘ປຎ຺ຎຕ຺ຕິກາລໍ ຊານຕາ’’ຕິ ທຸກນຍວເສນ ວຕ຺ວາ ປຸນ ສຸຕ຺ຕນ຺ຕນເຍນ ວຕ຺ຕຸໍ ‘‘ອປິຈ ປຸພ຺ເພນິວາສາທີຫີ’’ຕິ ວຸຕ຺ຕໍ. ຕຕ຺ຖ ປສ຺ສນໍ ນາມ ທສ຺ສນຕ຺ຕາ ທິພ຺ພຈກ຺ຂຸນາ ໂຍຊິຕໍ ປຏິເວຘຎາຓທສ຺ສນໍ. ເທສນາປຎ຺ຎາຍ ປສ຺ສຕາຕິ ອາສຍານຸສຍາທິເກ. ປຸຈ຺ຉາຍາຕິ ສຕ຺ຕມີ. ປຸນປິ ເອຕ຺ຖາຕິ ປຸຈ຺ຉາວິສ຺ສຊ຺ຊເນ. ມິຈ຺ຉາທິຏ຺ຐີຕິ ນຕ຺ຖິກທິຏ຺ຐິ ອນ຺ຕຄ຺ຄາຫິກທິຏ຺ຐິ. ‘‘ອາຊີວເຫຕຸ ປຎ຺ຎຕ຺ຕານີ’’ຕິ ວຈນໂຕ ອິມານິ ຉ ສິກ຺ຂາປທານິ ຐເປຕ຺ວາ ເສສາ ອາຈາຣວິປຕ຺ຕິ ນາມາຕິ ເວທິຕພ຺ພໍ. ກາເຍນ ປນ ອາປຕ຺ຕິໍ ອາປຊ຺ຊຕີຕິ ເອຕ຺ຖ ‘‘ປຸພ຺ພຠາເຄ ເສວນຈິຕ຺ຕມງ຺ຄໍ ກຕ຺ວາ ກາຍທ຺ວາຣສງ຺ຂາຕໍ ວິຎ຺ຎຕ຺ຕິໍ ຊນຍິຕ຺ວາ ປວຕ຺ຕຈິຕ຺ຕຸປ຺ປາທສງ຺ຂາຕໍ ອາປຕ຺ຕິໍ ອາປຊ຺ຊຕິ, ກິຎ຺ຈາປິ ຈິຕ຺ເຕນ ສມຸຏ຺ຐາປິຕາ ວິຎ຺ຎຕ຺ຕິ, ຕຖາປິ ຈິຕ຺ເຕນ ອຘິປ຺ເປຕສ຺ສ ອຕ຺ຖສ຺ສ ວິຎ຺ຎຕ຺ຕິຍາ ສາຘິຕຕ຺ຕາ ‘ກາຍທ຺ວາເຣນ ອາປຊ຺ຊຕີ’ຕິ ວຸຕ຺ຕ’’ນ຺ຕິ ອິມມຕ຺ຖໍ ສນ຺ຘາຍ ວຸຕ຺ຕໍ, ນ ຠຓ຺ຑນາທິຕ຺ຕຍວູປສມໍ. ອາປາຓໂກຏິກນ຺ຕິ ຊີວິຕປຣິຍນ຺ຕໍ ກຕ຺ວາ. ໂປຣາຓເກຫິ ມຫາເຖເຣຫີຕິ ສີຫຬທີເປ ມຫາເຖເຣຫິ ໂປຕ຺ຖກໍ ອາໂຣປິຕກາເລ ຐປິຕາຕິ ອຕ຺ໂຖ. ‘‘ຈຕຸຕ຺ຖສງ຺ຄີຕິສທິສາ ໂປຕ຺ຖກາຣຸຬ຺ຫສງ຺ຄີຕິ ອໂຫສີ’’ຕິ ວຸຕ຺ຕໍ.

ມຫາວິຠງ຺ເຄ ປຎ຺ຎຕ຺ຕິວາຣວຓ຺ຓນາ ນິຏ຺ຐິຕາ.

ກຕາປຕ຺ຕິວາຣາທິວຓ຺ຓນາ

໑໖໖. ກຕາປຕ຺ຕິວາເຣ ‘‘ສງ຺ຆິກໍ ມຎ຺ຈໍ ວາ’’ຕິອາທິ ອຊ຺ໂຌກາສຕ຺ຕາ ວິຫາຣພ຺ຠນ຺ຕເຣປິ ອາປຊ຺ຊນໂຕ ເລຑ຺ຑຸປາຕາຕິກ຺ກມວເສນ ວຸຕ຺ຕໍ. ທຸຕິເຍ ເສຍ຺ຍໍ ສນ຺ຖຣິຕ຺ວາຕິ ອພ຺ຠນ຺ຕເຣ ສນ຺ຖຣິຕຠາວໂຕ ວິຫາຣໂຕ ພຫິຄມເນປິ ຕໍທິວສານາຄເມ ອາປຊ຺ຊນໂຕ ‘‘ປຣິກ຺ເຂປໍ ອຕິກ຺ກາເມຕີ’’ຕິ ວຸຕ຺ຕໍ.

໑໗໑. ສຎ຺ຈິຈ຺ຈ ປາຓໍ ຊີວິຕາ ໂວໂຣເປນ຺ໂຕ ຈຕສ຺ໂສ ອາປຕ຺ຕິໂຍຕິ ເອຕ຺ຖ ກິຎ຺ຈາປິ ຕສ຺ມິໍ ສິກ຺ຂາປເທ ຕິຣຈ຺ຉານຄຕປາໂຓວ ອຘິປ຺ເປໂຕ, ອຖ ໂຂ ປາໂຓຕິ ໂວຫາຣສາມຎ຺ຎໂຕ ອຕ຺ຖຸທ຺ຘາຣວເສນ ‘‘ຈຕສ຺ໂສ’’ຕິ ວຸຕ຺ຕໍ. ເອສ ນໂຍ ອຎ຺ເຎສຸປິ ເອວຣູເປສຸ ຐາເນສຸ.

໑໗໓. ວິກາເລ ຄາມປ຺ປເວສເນ ‘‘ປຐມໍ ປາທໍ ປຣິກ຺ເຂປໍ ອຕິກ຺ກາເມຕິ, ອາປຕ຺ຕິ ທຸກ຺ກຏສ຺ສາ’ຕິ ວຸຕ຺ຕຕ຺ຕາ ອຸປຈາເຣ ນາປຊ຺ຊຕິ, ປຣິກ຺ເຂປໍ ອຕິກ຺ກມິຕ຺ວາວ ອາປຊ຺ຊຕີຕິ ສິທ຺ຘເມວາ’’ຕິ ວທນ຺ຕິ.

໑໙໓. ປຈ຺ຈຍວາເຣ ປຸຣິມວາຣໂຕ ວິເສໂສ ອຕ຺ຖິເຍວ, ‘‘ເມຖຸນໍ ຘມ຺ມໍ ປຏິເສວນ຺ໂຕ ກຕິ ອາປຕ຺ຕິໂຍ ອາປຊ຺ຊຕີ’’ຕິ ວຸຕ຺ເຕ ຊຕຸມຏ຺ຐກສ຺ໂສກາໂສ ນ ຊາໂຕ, ອິຘ ປນ ‘‘ເມຖຸນໍ ຘມ຺ມໍ ປຏິເສວນປຈ຺ຈຍາ’’ຕິ ວຸຕ຺ເຕ ປຸຄ຺ຄລນິທ຺ເທສາຠາວາ ຊຕຸມຏ຺ຐກຎ຺ຈ ປວິຏ຺ຐໍ, ເອວໍ ວິເສໂສ ອຕ຺ຖິ. ຕຖາ ເອວຣູເປສຸ ຐາເນສຸ.

ມຫາວິຠງ຺ເຄ ຈ ຠິກ຺ຂຸນິວິຠງ຺ເຄ ໂສຬສມຫາວາຣວຓ຺ຓນາ ນິຏ຺ຐິຕາ.