໕. ຈມ຺ມກ຺ຂນ຺ຘກວຓ຺ຓນາ

ໂສຓໂກຬິວິສວຕ຺ຖຸກຖາວຓ຺ຓນາ

໒໔໒. ອສີຕິຍາ …ເປ… ກາເຣຕີຕິ ‘‘ອສີຕິ ຄາມິກສຫສ຺ສານິ ສນ຺ນິປາຕາເປຕ຺ວາ’’ຕິ ອິມສ຺ສ ກາຣຓວຈນໍ. ຕຕ຺ຖ ‘‘ຄາມານໍ ອສີຕິຍາ ສຫສ຺ເສສູ’’ຕິ ວຕ຺ຕພ຺ເພ ‘‘ອສີຕິຍາ ຄາມສຫສ຺ເສສູ’’ຕິ ວຸຕ຺ຕໍ. ຄາມປ຺ປມຸຂາ ຄາມິກາ, ເຕສໍ ສຫສ຺ສານິ. ‘‘ກມ຺ມຈິຕ຺ຕີກຕານີ’’ຕິ ອຸປຈາເຣນ ວຸຕ຺ຕໍ. ກມ຺ມປຈ຺ຈຍອຸຕຸສມຸຏ຺ຐາເນ ຫິ ເຕສໍ ອຎ຺ຊນວຓ຺ຓຠາໂວ. ‘‘ເກນຈິເທວ ກຣຓີເຍນາ’’ຕິ ວຕ຺ຕພ຺ເພ ‘‘ເກນຈິເທວາ’’ຕິ ວຸຕ຺ຕໍ. ເອຕ຺ຖ ເອວໍ-ສທ຺ໂທ ໂອປມ຺ເມ ປວຕ຺ຕຕິ. ເອວມຸປມາໂນປເທສປຸຈ຺ຉາວຘາຣຓປຏິຎ຺ຎາຕໂອປມ຺ເມ. ປຸຣໂຕ ເປກ຺ຂມານານນ຺ຕິ ອນາທຣຕ຺ເຖ ສາມິວຈນໍ. ຕໂຕ ປນ ຠຄວໂຕ ຄນ຺ຘກຸຏິຍາ ກວາຏໍ ສຸພທ຺ຘໍ ປສ຺ສິຕ຺ວາ ອິຈ຺ຉິຕາກາຣກຸສລຕາຍ ອິທ຺ຘິຍາ ຄນ຺ຕ຺ວາ ກຸຏິໍ ປວິສິຕ຺ວາ ອາໂຣເຈສິ. ວິຫາຣປຈ຺ຉາຍາຍນ຺ຕິ ວິຫາຣສ຺ສ ວຑ຺ຒມານຈ຺ຉາຍາຍໍ. ‘‘ອໂຫ ນູນາຕິ ອໂຫ ມຫນ຺ໂຕ’’ຕິ ລິຂິຕໍ. ຠຄວໂຕ ສມ຺ພຫຸເລຫິ ສທ຺ຘິໍ ອາຫິຓ຺ຑນໍ ອາຍສ຺ມໂຕ ໂສຓສ຺ສ ວີຣິຍາຣມ຺ຠນິທສ຺ສເນນ ອນາຣທ຺ຘວີຣິຍານໍ ອຸຕ຺ເຕຊນຕ຺ຖໍ, ເອວໍ ສຸຂຸມາລານໍ ປາທຣກ຺ຂຓຕ຺ຖໍ ອຸປາຫນາ ອນຸຎ຺ຎາຕາຕິ ທສ຺ສນຕ຺ຖຎ຺ຈ.

ໂສຓສ຺ສປພ຺ພຊ຺ຊາກຖາວຓ຺ຓນາ

໒໔໓. ຕຕ຺ຖ ຈ ນິມິຕ຺ຕໍ ຄຓ຺ຫາຫີຕິ ເຕສໍ ອິນ຺ທ຺ຣິຍານໍ ອາກາຣໍ ອຸປລກ຺ເຂຫິ.

໒໔໔. ອຘິມຸຕ຺ໂຕ ໂຫຕີຕິ ປຏິວິຊ຺ຌິຕ຺ວາ ປຈ຺ຈກ຺ຂໍ ກຕ຺ວາ ຐິໂຕ ໂຫຕິ. ເນກ຺ຂມ຺ມາຘິມຸຕ຺ໂຕຕິອາທີຫິ ນິພ຺ພານໍ, ອຣຫຕ຺ຕຎ຺ຈ ວຸຕ຺ຕໍ. ‘‘ຕຎ຺ຫິ ສພ຺ພກິເລເສຫິ ນິກ຺ຂນ຺ຕຕ຺ຕາ ‘ເນກ຺ຂມ຺ມ’ນ຺ຕິ ຈ ເຄຫໂຕ ປວິວິຕ຺ຕຕ຺ຕາ ‘ປວິເວໂກ’ຕິ ຈ ພ຺ຍາປຊ຺ຊາຠາວໂຕ ‘ອພ຺ຍາປຊ຺ຊ’ນ຺ຕິ ຈ ອຣຫຕ຺ຕໍ ອຸປາທານສ຺ສ ຂຍນ຺ເຕ ອຸປ຺ປນ຺ນຕ຺ຕາ ‘ອຸປາທານກ຺ຂໂຍ’ຕິ ຈ ຕຓ຺ຫາຍ ຂຍນ຺ເຕ ອຸປ຺ປນ຺ນຕ຺ຕາ ‘ຕຓ຺ຫກ຺ຂໂຍ’ຕິ ຈ ສມ຺ໂມຫາຠາວໂຕ ‘ອສມ຺ໂມໂຫ’ຕິ ຈ ວຸຈ຺ຈຕີ’’ຕິ ວຸຕ຺ຕໍ. ສພ຺ເພຫິ ອຣຫຕ຺ຕໍ ວຸຕ຺ຕນ຺ຕິ ເກຈິ. ສິຍາ ໂຂ ເອວມສ຺ສາຕິ ກທາຈິ ເອວມສ຺ສ, ອສ຺ສ ວາ ອາຍສ຺ມໂຕ ເອວໍ ສິຍາ. ປຈ຺ຈາຄຈ຺ຉນ຺ໂຕ ຊານນ຺ໂຕ. ກຣຓີຍມຕ຺ຕານນ຺ຕິ ອຕ຺ຕໂນ. ໂສ ເອວ ວາ ປາໂຐ. ເນກ຺ຂມ຺ມາຘິມຸຕ຺ໂຕຕິ ອິມສ຺ມິໍເຍວ ອຣຫຕ຺ຕໍ ກຖິຕໍ. ເສເສສຸ ນິພ຺ພານນ຺ຕິ ເກຈິ. ອສມ຺ໂມຫາຘິມຸຕ຺ໂຕຕິ ເອຕ຺ເຖວ ນິພ຺ພານໍ. ເສເສສຸ ອຣຫຕ຺ຕນ຺ຕິ ເກຈິ. ‘‘ສພ຺ເພສ຺ເວເວເຕສຸ ອຸຠຍມ຺ປີ’’ຕິ ວທນ຺ຕິ. ປວິເວກຎ຺ຈ ເຈຕໂສ, ອຘິມຸຕ຺ຕສ຺ສ, ອຸປາທານກ຺ຂຍສ຺ສ ຈາຕິ ອຸປໂຍຄຕ຺ເຖ ສາມິວຈນໍ. ອາຍຕນານໍ ອຸປ຺ປາທຎ຺ຈ ວຍຎ຺ຈ ທິສ຺ວາ.

ສພ຺ພນີລິກາທິປຏິກ຺ເຂປກຖາວຓ຺ຓນາ

໒໔໖. ‘‘ຣຎ຺ຊນໂຈຬເກນ ປຸຎ຺ຉິຕ຺ວາ’’ຕິ ປາໂຐ. ‘‘ຂລ຺ລກາທີນິ ອປເນຕ຺ວາ’ຕິ ວຸຕ຺ຕຕ຺ຕາ ທ຺ເວ ຕີຓິ ຉິທ຺ທານິ ກຕ຺ວາ ວຬຎ຺ເຊຕຸໍ ວຏ຺ຏຕີ’’ຕິ ວທນ຺ຕານໍ ວາໂທ ນ ຄເຫຕພ຺ໂພ.

ຍານາທິປຏິກ຺ເຂປກຖາວຓ຺ຓນາ

໒໕໔. ‘‘ຈຕຸຣງ຺ຄຸລາຘິການີ’’ຕິ ວຸຕ຺ຕຕ຺ຕາ ຈຕຸຣງ຺ຄຸລໂຕ ເຫຏ຺ຐາ ວຏ຺ຏຕີຕິ ເອເກ. ອຸຠໂຕໂລຫິຕກູປຘານນ຺ຕິ ເອຕ຺ຖ ‘‘ກາສາວໍ ປນ ວຏ຺ຏຕິ, ກຸສຸມ຺ຠາທິຣຕ຺ຕເມວ ນ ວຏ຺ຏຕີ’’ຕິ ລິຂິຕໍ.

ສພ຺ພຈມ຺ມປຏິກ຺ເຂປາທິກຖາວຓ຺ຓນາ

໒໕໕. ກິສ຺ສ ຕ຺ຍາຍນ຺ຕິ ກິສ຺ສ ເຕ ອຍໍ.

໒໕໖. ຄິຫິວິກຕນ຺ຕິ ຄິຫີນໍ ອຕ຺ຖາຍ ກຕໍ. ‘‘ຍຕ຺ຖ ກຕ຺ຖຈິ ນິສີທິຕຸໍ ອນຸຊານາມີຕິ ອຕ຺ໂຖ’’ຕິ ລິຂິຕໍ. ກິຎ຺ຈາປິ ທີຆນິກາຍຏ຺ຐກຖາຍໍ ‘‘ຐເປຕ຺ວາ ຕູລິກໍ ສພ຺ພາເນວ ໂຄນກາທີນິ ຣຕນປຣິສິພ຺ພິຕານິ ວຏ຺ຏນ຺ຕີ’’ຕິ ວຸຕ຺ຕໍ, ອຖ ໂຂ ວິນຍປຣິຍາຍໍ ປຕ຺ວາ ຄຣຸເກ ຐາຕພ຺ພໂຕ ອິຘ ວຸຕ຺ຕນເຍເນເວຕ຺ຖ ອຕ຺ໂຖ ຄເຫຕພ຺ໂພ. ‘‘ຕຕ຺ຖ ປນ ສຸຕ຺ຕນ຺ຕິກເທສນາຍ ຄຫຏ຺ຐາທີນມ຺ປິ ວເສນ ວຸຕ຺ຕຕ຺ຕາ ເຕສໍ ສງ຺ຄຓ຺ຫນຕ຺ຖໍ ຐເປຕ຺ວາ ‘ຕູລິກໍ…ເປ… ວຏ຺ຏນ຺ຕີ’ຕິ ວຸຕ຺ຕໍ ວິຍ ຂາຍຕີຕິ ອປເຣ’’ຕິ ວຸຕ຺ຕໍ.

໒໕໙. ມິຄມາຕຸໂກຕິ ຕສ຺ສ ນາມໍ. ວາຕມິໂຄຕິ ຈ ຕສ຺ສ ນາມໍ. ‘‘ກາຬສີໂຫ ກາຬມຸໂຂ ກປີ’’ຕິ ລິຂິຕໍ. ຈມ຺ມໍ ນ ວຏ຺ຏຕີຕິ ເຍນ ປຣິຍາເຍນ ຈມ຺ມໍ ວຏ຺ຏິສ຺ສຕິ, ໂສ ປຣໂຕ ອາວິ ຠວິສ຺ສຕິ. ‘‘ອຕ຺ຕໂນ ປຸຄ຺ຄລິກວເສນ ປຣິຫາໂຣ ປຏິກ຺ຂິຕ຺ໂຕ’’ຕິ ວຸຕ຺ຕໍ. ‘‘ນ, ຠິກ຺ຂເວ, ກິຎ຺ຈິ ຈມ຺ມໍ ຘາເຣຕພ຺ພ’’ນ຺ຕິ ເອຕ຺ຕາວຕາ ສິທ຺ເຘ ‘‘ນ, ຠິກ຺ຂເວ, ໂຄຈມ຺ມ’’ນ຺ຕິ ອິທໍ ປຣໂຕ ‘‘ອນຸຊານາມິ, ຠິກ຺ຂເວ, ສພ຺ພປຈ຺ຈນ຺ຕິເມສຸ ຊນປເທສຸ ຈມ຺ມານິ ອຕ຺ຖຣຓານີ’’ຕິ ເອຕ຺ຖ ອນຸມຕິປ຺ປສງ຺ຄຠຍາ ວຸຕ຺ຕນ຺ຕິ ເວທິຕພ຺ພໍ.

ຈມ຺ມກ຺ຂນ຺ຘກວຓ຺ຓນາ ນິຏ຺ຐິຕາ.