໑໐. ໂກສມ຺ພກກ຺ຂນ຺ຘກວຓ຺ຓນາ

ໂກສມ຺ພກວິວາທກຖາວຓ຺ຓນາ

໔໕໑. ສຸຕ຺ຕນ຺ຕິໂກຕິ ເອຕ຺ຖ ກິຎ຺ຈາປິ ‘‘ວິນຍຘໂຣ ມາຕິກາຘໂຣ’’ຕິ ວຸຕ຺ຕໍ, ອຸຠໂຕວິຠງ຺ຄໍ ປນ ສນ຺ຘາຍ ວຸຕ຺ຕໍ, ນ ຂນ຺ຘກຠາຓໂກ ໂຫຕິ. ອາວຸໂສ ເອຕ຺ຖ ອາປຕ຺ຕີຕິ ວຈນໍ ອຸປາທາຍ ‘‘ໂສ ຕສ຺ສາ ອາປຕ຺ຕິຍາ ອາປຕ຺ຕິທິຏ຺ຐິ ໂຫຕີ’’ຕິ ວຸຈ຺ຈຕິ. ປຈ຺ຉາ ວິນຍຘໂຣ ‘‘ວຕ຺ຖຸມ຺ຫິ ສຕິ ປມາຓໍ, ນ ປຎ຺ຎຕ຺ຕິຍ’’ນ຺ຕິ ສຕິໍ ປຏິລຠິຕ຺ວາ ຕສ຺ສາ ອາປຕ຺ຕິຍາ ອາປຕ຺ຕິທິຏ຺ຐິ ອໂຫສິ, ເຕນ ວຸຕ຺ຕໍ ອນ຺ເຕ ‘‘ອຎ຺ເຎ ຠິກ຺ຂູ ຕສ຺ສາ ອາປຕ຺ຕິຍາ ອາປຕ຺ຕິທິຏ຺ຐິໂນ ໂຫນ຺ຕີ’’ຕິ.

໔໕໕. ‘‘ຍຖາ ມຍາ ຎຕ຺ຕີ’’ຕິ ລິຂນ຺ຕິ ‘‘ປຎ຺ຎຕ຺ຕາ’’ຕິ ເອກວຈນຕ຺ຕາ.

ທີຆາວຸວຕ຺ຖຸກຖາວຓ຺ຓນາ

໔໕໘. ‘‘ຠູຕປຸພ຺ພໍ, ຠິກ຺ຂເວ, ພາຣາຓສິຍໍ ພ຺ຣຫ຺ມທຕ຺ໂຕ’’ຕິ ລິຂນ຺ຕິ. ປຸຣາຓໂປຕ຺ຖເກສຸ ‘‘ພາຣາຓສິຍ’’ນ຺ຕິ ນຕ຺ຖິ, ‘‘ນຕ຺ຖິຠາໂວວ ສຸນ຺ທໂຣ’’ຕິ ວທນ຺ຕິ.

ປາລິເລຍ຺ຍກຄມນກຖາວຓ຺ຓນາ

໔໖໗. ຣກ຺ຂິຕວນສຓ຺ເຑຕິ ສງ຺ຄີຕິຕ຺ເຖເຣຫິ ສຸວິຎ຺ເຎຍ຺ຍໍ ກຕ຺ວາ ວຸຕ຺ຕໍ. ‘‘ປາລິເລຍ຺ໂຍຕິ ຄາໂມ, ຕສ຺ສ ວເສນາ’’ຕິປິ ວທນ຺ຕິ, ຕໍ ຘມ຺ມປທຏ຺ຐກຖາຍ ນ ວິຣຸຊ຺ຌຕິ.

ອຏ຺ຐາຣສວຕ຺ຖຸກຖາວຓ຺ຓນາ

໔໗໓. ນ ຕ຺ເວວ…ເປ… ປຏິພາຫິຕພ຺ພນ຺ຕິ ວທາມີຕິ ເອຕ຺ຖ ເສນາສນາຣຫສ຺ສ ໂຍ ເສນາສນໍ ປຏິພາຫຕິ, ຕສ຺ເສວ ອາປຕ຺ຕິ ທຸກ຺ກຏສ຺ສ. ‘‘ກລຫກາຣກາທີນເມຕ຺ຖ ໂອກາໂສ ນຕ຺ຖີຕິອາທິກໍ ສງ຺ຆສ຺ສ ກຕິກໍ ວຕ຺ວາ ຕໍ ນ ປຎ຺ຎາເປນ຺ຕສ຺ສ ວາ ‘ອຫໍ ພຸທ຺ໂຘ’ຕິ ປສຍ຺ຫ ອຕ຺ຕນາ ອຕ຺ຕໂນ ປຎ຺ຎາເປຕ຺ວາ ຄຓ຺ຫນ຺ຕໍ ‘ຍຸຕ຺ຕິຍາ ຄຓ຺ຫຖາ’ຕິ ວຕ຺ວາ ວາເຣນ຺ຕສ຺ສ ວາ ໂທໂສ ນຕ຺ຖິ. ອິຘ ກລຫວູປສມນຕ຺ຖໍ ອາຄຕານໍ ໂກສມ຺ພິການມ຺ປິ ‘ຍຖາວຸຑ຺ຒ’ນ຺ຕິ ອວຕ຺ວາ ‘ວິວິຕ຺ເຕ ອສຕິ ວິວິຕ຺ຕໍ ກຕ຺ວາປິ ທາຕພ຺ພ’ນ຺ຕິ ວຸຕ຺ຕຕ຺ຕາ ວິວິຕ຺ຕໍ ກຕ຺ວາ ເທນ຺ຕໍ ປຏິພາເຫນ຺ຕສ຺ເສວ ອາປຕ຺ຕີຕິ ກິຣ ອຍມຕ຺ໂຖ ປາຣິວາສິກາທີນໍ ວິຫາຣປຣິຍນ຺ຕທາປເນນ ສາຘິຕພ຺ໂພ’’ຕິ ລິຂິຕໍ.

ສງ຺ຆສາມຄ຺ຄີກຖາວຓ຺ຓນາ

໔໗໕. ‘‘ອຖ ໂຂ ເຕ ອຸກ຺ຂິຕ຺ຕານຸວຕ຺ຕກາ ຠິກ຺ຂູ ຕໍ ອຸກ຺ຂິຕ຺ຕກໍ ຠິກ຺ຂຸໍ ໂອສາເຣຕ຺ວາ ເຍນ ອຸກ຺ເຂປກາ ຠິກ຺ຂູ…ເປ… ຕສ຺ສ ວຕ຺ຖຸສ຺ສ ວູປສມາຍ ສງ຺ຆສາມຄ຺ຄິໍ ກໂຣມາ’’ຕິ ວຈນໍ ທຸວິຎ຺ເຎຍ຺ຍວິນິຈ຺ຉຍໍ ວິນຍລກ຺ຂຓກຸສລສ຺ສ. ວິຊ຺ຊມາເນ ຫິ ກາຣກສງ຺ເຆ ອິຕໂຣ ສງ຺ໂຆ ໂອສາຣິຕຸໍ ນ ລຠຕິ. ໂອສາເຣນ຺ໂຕ ເຈ, ເຕ ຠິກ຺ຂູ ກາຣກສງ຺ເຆນ ສມານລທ຺ຘິກຠາວໍ ປຕ຺ຕຕ຺ຕາ ເຕນ ສມານສໍວາສກາ ໂຫນ຺ຕິ, ຕໂຕ ອຸກ຺ເຂປການໍ ຉນ຺ທໍ ອຄ຺ຄເຫຕ຺ວາ ໂອສາເຣນ຺ຕານໍ ກມ຺ມໍ ກຸປ຺ປຕິ, ຕສ຺ມາ ‘‘ເຕນ ຫິ, ຠິກ຺ຂເວ, ຕໍ ຠິກ຺ຂຸໍ ໂອສາເຣຖາ’’ຕິ (ມຫາວ. ໔໗໔) ຠຄວໂຕ ວຈເນນ ອຸກ຺ຂິຕ຺ຕານຸວຕ຺ຕກາ ໂອສາເຣສຸໍ, ອຸທາຫຸ ນິສ຺ສີມໍ ຄນ຺ຕ຺ວາ, ອຸທາຫຸ ອິຕເຣສໍ ຉນ຺ທໍ ຄເຫຕ຺ວາ ໂອສາເຣສຸໍ, ນນຸ ເອເຕສມຎ຺ຎຕເຣເນຕ຺ຖ ຠວິຕພ຺ພໍ, ນ ຈ ປເນຕໍ ສພ຺ພຄຓ຺ຐິປເທສຸ ວິຈາຣິຕໍ. ອຍໍ ປເນຕ຺ຖ ຕກ຺ໂກ –

‘‘ຍສ຺ມິໍ ວຕ຺ຖຸສ຺ມິໍ ສງ຺ເຆນ, ກຕກມ຺ມສ຺ສ ຠິກ຺ຂຸໂນ;

ສຕິ ຕສ຺ມິໍ ນ ອຎ຺ຎສ຺ສ, ປຏິປ຺ປສ຺ສມ຺ຠນໍ ຂມໍ.

‘‘ວິຣມນ຺ເຕ ຕໂຕ ໂທໂສ, ອປິ ສງ຺ໂຆ ອກາຣໂກ;

ໂອສາເຣຕຸໍ ອລໍ ຍສ຺ມາ, ກາຣໂກ ອນຸໂລມິໂກ’’ຕິ.

໔໗໗. ‘‘ອຏ຺ຐ ທູຕງ຺ຄານິ ນາມ ໂສຕາ ຈ ໂຫຕິ, ສາເວຕາ ຈ ອຸຄ຺ຄເຫຕາ ຈ ຘາເຣຕາ ຈ ວິຎ຺ຎາຕາ ຈ ວິຎ຺ຎາເປຕາ ຈ ກຸສໂລ ຈ ສຫິຕາສຫິຕທສ຺ສໂນ ຈ ອກລຫກາຣໂກ ຈາຕິ ເອຕານີ’’ຕິ ວຸຕ຺ຕໍ.

ໂກສມ຺ພກກ຺ຂນ຺ຘກວຓ຺ຓນາ ນິຏ຺ຐິຕາ.

ມຫາວຄ຺ຄສ຺ສ ລີນຕ຺ຖປກາສນາ ນິຏ຺ຐິຕາ.

ນໂມ ຕສ຺ສ ຠຄວໂຕ ອຣຫໂຕ ສມ຺ມາສມ຺ພຸທ຺ຘສ຺ສ