ຕຕິຍສງ຺ຄີຕິກຖາວຓ຺ຓນາ

ພ຺ຣຫ຺ມໂລກາ ຈວິຕ຺ວາຕິ ເອຕ຺ຖ ຈຕ຺ຕາໂຣ ມຄ຺ຄາ ປຎ຺ຈານນ຺ຕຣິຍານິ ນິຍຕມິຈ຺ຉາທິຏ຺ຐີຕິ ອິເມເຍວ ນິຍຕາ, ນ ມຫຄ຺ຄຕາ, ຕສ຺ມາ ປຓິຘິວເສນ ເຫຏ຺ຐຸປປຕ຺ຕິປິ ໂຫຕິ. ອຕິຈ຺ຉຖາຕິ ອຕິຈ຺ຈ ອິຈ຺ຉຖ, ຄນ຺ຕ຺ວາ ຠິກ຺ຂໍ ປຣິເຍສຖາຕິ ອຘິປ຺ປາໂຍ. ເກຏຸຠໍ ນາມ ກພ຺ຍກຣຓວິຘິຍຸຕ຺ຕໍ ສຕ຺ຖໍ. ກິຣິຍາກປ຺ປໍ ອິຕ຺ເຍເກ, ກຕ຺ຕາຂ຺ຍາທິລກ຺ຂຓຍຸຕ຺ຕສຕ຺ຖໍ. ອສນ຺ຘິມິຕ຺ຕາຕິ ຕສ຺ສາ ນາມໍ. ຕສ຺ສາ ກິຣ ສຣີເຣ ສນ຺ຘໂຍ ນ ປຎ຺ຎາຍນ຺ຕິ, ມຘຸສິຕ຺ຖເກນ ກຕໍ ວິຍ ສຣີຣໍ ໂຫຕິ. ຕສ຺ມາ ‘‘ເອວໍນາມິກາ ຊາຕາ’’ຕິປິ ວທນ຺ຕິ. ມາຄຘເກນ ປຕ຺ເຖນ ຈຕ຺ຕາໂຣ ປຕ຺ຖາ ອາຬ຺ຫກໍ, ຈຕ຺ຕາຣິ ອາຬ຺ຫການິ ໂທຓໍ, ຈຕຸໂທຓາ ມານິກາ, ຈຕຸມານິກາ ຂາຣິກາ, ວີສຕິຂາຣິໂກ ວາໂຫຕິ. ເກຖຸມາລາຕິ ‘‘ສີສໂຕ ອຸຏ຺ຐຫິຕ຺ວາ ຐິໂຕ ໂອຠາສປຸຎ຺ໂຊ’’ຕິ ວທນ຺ຕິ. ຣາຊິທ຺ຘິອຘິກາຣປ຺ປສງ຺ເຄເນຕໍ ວຕ຺ຖຸ ວຸຕ຺ຕໍ, ນານຸກ຺ກເມນ. ອນຸກ຺ກເມນ ປນ ພຸທ຺ຘສາສນາວຫາຣໍ ວຕ຺ຖຸໍ ທີເປນ຺ໂຕ ‘‘ຣາຊາ ກິຣາ’’ຕິອາທິມາຫ. ກິເລສທມເນນ ທນ຺ຕໍ. ກາຍວາຈາຫິ ຄຸຕ຺ຕໍ. ‘‘ປາຈີນມຸໂຂ’’ຕິປິ ປາໂຐ ອຕ຺ຖິ. ປຸພ຺ເພ ເຊຏ຺ຐຠາຕິກຕ຺ຕາ ເຕເນວ ປຣິຈເຍນ ປຕ຺ຕຄ຺ຄຫຓຕ຺ຖາຍ ອາກາຣໍ ທສ຺ເສຕິ. ອຠາສີຕິ ‘‘ຠາສິສ຺ສາມີ’’ຕິ ວິຕກ຺ເກສິ. ອປເຣ ‘‘ອຎ຺ຎາຕນ຺ຕິ ວຸຕ຺ເຕປິ ສພ຺ພໍ ອຠຓີ’’ຕິ ວທນ຺ຕິ. ອມຕນ຺ຕິ ນິພ຺ພານສງ຺ຂາຕາຍ ນິວຕ຺ຕິຍາ ສຄຸຓາຘິວຈນໍ, ຕສ຺ສາ ອປ຺ປມາໂທ ປທໍ ມຄ຺ໂຄ. ມຈ຺ຈູຕິ ປວຕ຺ຕິຍາ ສໂທສາຘິວຈນໍ, ຕສ຺ສາ ປມາໂທ ປທໍ ມຄ຺ໂຄຕິ ເອວໍ ຈຕ຺ຕາຣິ ສຈ຺ຈານິ ສນ຺ທສ຺ສິຕານິ ໂຫນ຺ຕິ. ສງ຺ຆສຣຓຄຕຕ຺ຕາ ສງ຺ຆນິສ຺ສິຕາ ປພ຺ພຊ຺ຊາ, ຠຓ຺ຑຸກມ຺ມສ຺ສ ວາ ຕທາຍຕ຺ຕຕ຺ຕາ. ນິຄ຺ໂຣຘຕ຺ເຖຣສ຺ສານຸຠາວກິຕ຺ຕນາຘິກາຣຕ຺ຕາ ປຸພ຺ເພ ວຸຕ຺ຕມ຺ປິ ປຈ຺ຉາ ວຕ຺ຕພ຺ພມ຺ປິ ສມ຺ປິຓ຺ເຑຕ຺ວາ ອາຫ ‘‘ປຸນ ຣາຊາ ອໂສກາຣາມໍ ນາມ ມຫາວິຫາຣໍ ກາເຣຕ຺ວາ ສຏ຺ຐິສຫສ຺ສານິ…ເປ… ຈຕຸຣາສີຕິວິຫາຣສຫສ຺ສານິ ກາຣາເປສີ’’ຕິ. ‘‘ປຸຖຸຊ຺ຊນກລ຺ຍາຓກສ຺ສ ວາ ປຈ຺ຈເວກ຺ຂິຕປຣິໂຠໂຄ’’ຕິ ວຈນໂຕ ເສກ຺ຂາວ ປຣມຕ຺ຖໂຕ ທາຍາທາ, ຕຖາປິ ເຖໂຣ ມຫິນ຺ທກຸມາຣສ຺ສ ປພ຺ພຊ຺ຊຕ຺ຖໍ ເອເກນ ປຣິຍາເຍນ ໂລກຘມ຺ມສິທ຺ເຘນ ເອວມາຫ ‘‘ໂຍ ໂກຈິ ມຫາຣາຊ…ເປ… ໂອຣສໍ ປຸຕ຺ຕ’’ນ຺ຕິ. ວຸຕ຺ຕຎ຺ຫິ ເວເທ –

‘‘ອງ຺ຄາ ອງ຺ຄາ ສມ຺ຠວສິ, ຫທຍາ ອຘິຊາຍເສ;

ອຕ຺ຕາ ເວ ປຸຕ຺ໂຕ ນາມາສິ, ສ ຊີວ ສຣໂທສຕ’’ນ຺ຕິ.

ຕສ຺ມາ ອິມິນາ ປຣິຍາເຍນ ໂອຣໂສ ປຸຕ຺ໂຕ ມາຕາປິຕູຫິ ປພ຺ພຊິໂຕ ເຈ, ອຕ຺ຖໂຕ ເຕ ສຍໍ ປພ຺ພຊິຕາ ວິຍ ໂຫນ຺ຕິ. ຘມ຺ມກຖິກາ ກສ຺ມາ ນາໂຣເຈນ຺ຕິ? ຣາຊາ ‘‘ເຖຣໍ ຄຓ຺ຫິຕ຺ວາ ອາຄຈ຺ຉຖາ’’ຕິ ອມຈ຺ເຈ ເປເສສິ, ຘມ຺ມກຖິກາ ເຖຣສ຺ສ ອາຄມນກາເລ ປຣິວາຣຕ຺ຖາຍ ເປສິຕາ, ຕສ຺ມາ. ອປິຈ ເຕນ ວຸຕ຺ຕວິຘິນາວ ວທນ຺ຕິ ຈຓ຺ຑຕ຺ຕາ, ຈຓ຺ຑຠາໂວ ຈສ຺ສ ‘‘ອມ຺ພໍ ຉິນ຺ທິຕ຺ວາ ເວຬຸຍາ ວຕິໍ ກໂຣຫີ’’ຕິ ວຸຕ຺ຕອມຈ຺ຈວຕ຺ຖຸນາ ວິຠາເວຕພ຺ໂພ. ກສ຺ມາ ປນ ຘມ຺ມກຖິກາ ຣາຊາຓາປນໍ ກໂຣນ຺ຕີຕິ? ‘‘ສາສນໍ ປຄ຺ຄເຫຕຸໍ ສມຕ຺ໂຖ’’ຕິ ວຸຕ຺ຕຕ຺ຕາ. ທີປກຕິຕ຺ຕິໂຣຕິ ກູຏຕິຕ຺ຕິໂຣ. ອຍໍ ປນ ກູຏຕິຕ຺ຕິຣກມ຺ເມ ນິຍຸຕ຺ໂຕປິ ສຸທ຺ຘຈິຕ຺ໂຕ, ຕສ຺ມາ ຕາປສໍ ປຸຈ຺ຉິ. ສາຓິປາກາຣນ຺ຕິ ສາຓິປາກາເຣນ. ວິຠຊິຕ຺ວາ ວທຕີຕິ ວິຠຊ຺ຊວາທີ ‘‘ອຕ຺ຖິ ຂ຺ເວສ ພ຺ຣາຫ຺ມຓ ປຣິຍາໂຍ’’ຕິອາທິນາ (ປາຣາ. ໕). ອປິຈ ສສ຺ສຕວາທີ ຈ ຠຄວາ ‘‘ອຕ຺ຖິ, ຠິກ຺ຂເວ, ອຊາຕໍ ອຠູຕໍ ອສງ຺ຂຕ’’ນ຺ຕິອາທິ (ອິຕິວຸ. ໔໓)-ວຈນໂຕ. ເອກຈ຺ຈສສ຺ສຕິໂກ ຈ ‘‘ສປ຺ປຈ຺ຈຍາ ຘມ຺ມາ, ອປ຺ປຈ຺ຈຍາ ຘມ຺ມາ’’ຕິ (ຘ. ສ. ທຸກມາຕິກາ ໗) ວຈນໂຕ. ອນ຺ຕານນ຺ຕິໂກ ຈ –

‘‘ຄມເນນ ນ ປຕ຺ຕພ຺ໂພ, ໂລກສ຺ສນ຺ໂຕ ກຸທາຈນໍ;

ນ ຈ ອປ຺ປຕ຺ວາ ໂລກນ຺ຕໍ, ທຸກ຺ຂາ ອຕ຺ຖິ ປໂມຈນໍ’’. (ສໍ. ນິ. ໑.໑໐໗; ອ. ນິ. ໔.໔໕);

‘‘ອນມຕຄ຺ໂຄຍໍ, ຠິກ຺ຂເວ, ສໍສາໂຣ ປຸພ຺ພໂກຏິ ນ ປຎ຺ຎາຍຕີ’’ຕິ (ສໍ. ນິ. ໒.໑໒໔; ຈູຬນິ. ກປ຺ປມາຓວປຸຈ຺ຉານິທ຺ເທສ ໖໑) ວຈນໂຕ. ອມຣາວິກ຺ເຂປິກປກ຺ຂມ຺ປິ ອີສກໍ ຠຊຕິ ຠຄວາ ‘‘ສສ຺ສໂຕ ໂລໂກຕິ ອພ຺ຍາກຕເມຕໍ ອສສ຺ສໂຕ ໂລໂກຕິ ອພ຺ຍາກຕເມຕ’’ນ຺ຕິອາທິອພ຺ຍາກຕວຕ຺ຖຸທີປນໂຕ ສມ຺ມຸຕິສຈ຺ຈທີປນໂຕ ຈ. ຕຎ຺ຫິ ອຊ຺ຌຕ຺ຕພຫິທ຺ຘາທິວເສນ ນ ວຕ຺ຕພ຺ພໍ. ຍຖາຫ ‘‘ອາກິຎ຺ຈຎ຺ຎາຍຕນໍ ນ ວຕ຺ຕພ຺ພໍ ອຊ຺ຌຕ຺ຕາຣມ຺ມຓນ຺ຕິປີ’’ຕິອາທິ (ຘ. ສ. ໑໔໓໗). ຕຖາ ອຘິຈ຺ຈສມຸປ຺ປນ຺ນິກປກ຺ຂມ຺ປິ ຠຊຕິ ‘‘ລທ຺ຘາ ມຸຘາ ນິພ຺ພຸຕິໍ ຠຸຎ຺ຊມານາ’’ຕິ (ຂຸ. ປາ. ໖.໗; ສຸ. ນິ. ໒໓໐) ວຈນໂຕ. ຕຕ຺ຖ ຫິ ມຸຘາຕິ ອຘິຈ຺ຈສມຸປ຺ປນ຺ນເວວຈນໍ. ສຎ຺ຎີວາທາທິໂກ ຈ ຠຄວາ ສຎ຺ຎີຠວອສຎ຺ຎີຠວເນວສຎ຺ຎີນາສຎ຺ຎີຠວວເສນ. ອຸຈ຺ເຉທວາທີ ຈ ‘‘ອຫຎ຺ຫິ, ພ຺ຣາຫ຺ມຓ, ອຸຈ຺ເຉທໍ ວທາມິ ຣາຄສ຺ສາ’’ຕິ (ປາຣາ. ໖) ວຈນໂຕ. ທິຏ຺ຐຘມ຺ມນິພ຺ພານວາທີ ຈ ‘‘ຂີຓາ ຊາຕິ, ວຸສິຕໍ ພ຺ຣຫ຺ມຈຣິຍ’’ນ຺ຕິ (ມຫາວ. ໒໓; ທີ. ນິ. ໒.໒໑໕; ສໍ. ນິ. ໓.໓໕) ວຈນໂຕ, ‘‘ນຕ຺ຖິ ທານິ ປຸນພ຺ຠໂວ’’ຕິ (ມຫາວ. ໑໖) ວຈນໂຕ, ທິຏ຺ເຐວ ຘມ຺ເມ ນິໂຣຘສມາປຕ຺ຕິທີປນໂຕ ຈ. ເອວໍ ເຕນ ເຕນ ປຣິຍາເຍນ ຕຖາ ຕຖາ ເວເນຍ຺ຍຊ຺ຌາສຍານຸຣູປໍ ວິຠຊິຕ຺ວາ ວທຕີຕິ ວິຠຊ຺ຊວາທີ ຠຄວາຕິ.

ຕຕິຍສງ຺ຄີຕິກຖາວຓ຺ຓນານໂຍ.

ປຸປ຺ຜນາໂມ ສຸມນຕ຺ເຖໂຣ. ມຫາປທຸມຕ຺ເຖໂຣຕິ ເອເກ. ມຫິໍສກມຓ຺ຑລໍ ອນ຺ຘຣຏ຺ຐນ຺ຕິ ວທນ຺ຕິ. ຘມ຺ມຈກ຺ຂຸ ນາມ ຕໂຍ ມຄ຺ຄາ. ໂສຕາປຕ຺ຕິມຄ຺ຄນ຺ຕິ ຈ ເອເກ. ປຎ຺ຈປິ ຣຏ຺ຐານິ ປຎ຺ຈ ຈີນຣຏ຺ຐານິ ນາມ. ຣາຊຄເຫຕິ ເທວິຍາ ກຕວິຫາເຣ. ສິລກູຏມ຺ຫີຕິ ປພ຺ພຕກູເຏ. ວຑ຺ຒມານນ຺ຕິ ອລງ຺ກຣຓຈຸຓ຺ຓໍ. ອຣິຍເທເສ ອຕີວ ສມ຺ມຕໍ ກິຣ. ເອກຣເສນ ນາຖກຣຓາ ອິຕິ ທມິຬາ. ສາຣປາມງ຺ຄນ຺ຕິ ອຸຕ຺ຕມໍ ປາມງ຺ຄໍ. ເປຕວຕ຺ຖຸອາທິນາ ສໍເວເຊຕ຺ວາ ອຠິສມຍຕ຺ຖໍ ສຈ຺ຈສໍຍຸຕ຺ຕຎ຺ຈ. ເມຆວນຸຍ຺ຍານໍ ນາມ ມຫາວິຫາຣຏ຺ຐານໍ. ‘‘ທ຺ວາສຏ຺ຐິຍາ ເລເຓສູ’’ຕິ ປາໂຐ. ທສຠາຕິກນ຺ຕິ ອຠຍກຸມາຣາທໂຍ ທສ, ເຕ ອິຘ ນ ວຸຕ຺ຕາ. ວຸຕ຺ຖວສ຺ໂສ ປວາເຣຕ຺ວາຕິ ຈາຕຸມາສິນິຍາ ປວາຣຓາຍາຕິ ອຕ຺ໂຖ. ປຐມປວາຣຓາຍ ວາ ປວາເຣຕ຺ວາ ເອກມາສໍ ຕຕ຺ເຖວ ວສິຕ຺ວາ ກຕ຺ຕິກປຸຓ຺ຓມາສິຍໍ ອໂວຈ, ອຎ຺ຎຖາ ‘‘ປຸຓ຺ຓມາຍໍ ມຫາວີໂຣ’’ຕິ ວຸຕ຺ຕຕ຺ຕາ ນ ສກ຺ກາ ຄເຫຕຸໍ. ມຫາວີໂຣຕິ ພຸທ຺ໂຘປຈາເຣນ ຘາຕຸໂຍ ວທຕິ. ຊງ຺ຆປ຺ປມາຓນ຺ຕິ ‘‘ຖູປສ຺ສ ຊງ຺ຆປ຺ປມາຓ’’ນ຺ຕິ ວທນ຺ຕິ. ມາຕຸລຠາຄິເນຍ຺ຍາ ຈູໂຬທຣມໂຫທຣາ. ຘຣມານສ຺ສ ວິຍ ພຸທ຺ຘສ຺ສ ຣສ຺ມິ ສຣສຣສ຺ມິ, ຣຎ຺ໂຎ ເລຂາສາສນໍ ອປ຺ເປສິ, ເອວຎ຺ຈ ມຸຂສາສນມໂວຈ. ໂທຓມຕ຺ຕາ ມຄຘນາຬິຍາ ທ຺ວາທສນາຬິມຕ຺ຕາ ກິຣ. ‘‘ປຣິຈ຺ຉິນ຺ນຏ຺ຐາເນ ຉິຊ຺ຊິຕ຺ວາ’’ຕິ ປາໂຐ. ສພ຺ພທິສາຫິ ປຎ຺ຈ ຣສ຺ມິໂຍ ອາວຏ຺ເຏຕ຺ວາຕິ ປຎ຺ຈຫິ ຜເລຫິ ນິກ຺ຂນ຺ຕຕ຺ຕາ ປຎ຺ຈ, ຕາ ປນ ຉພ຺ພຓ຺ຓາວ. ກຕ຺ຕິກຊຸຓ຺ຫປກ຺ຂສ຺ສ ປາຏິປທທິວເສຕິ ຊຸຓ຺ຫປກ຺ຂສ຺ສ ປຐມທິວເສຕິ ອຕ຺ໂຖ. ມຫາໂພຘິຏ຺ຐາເນ ປຣິວາເຣຕ຺ວາ ຐິຕນາຄຍກ຺ຂາທິເທວຕາກຸລານິ. ໂຄປກາ ນາມ ຣາຊປຣິກມ຺ມິໂນ ຕຖາຠາວກິຈ຺ຈາ. ເຕສໍ ກຸລານໍ ນາມນ຺ຕິປິ ເກຈິ. ອຸທກາທິວາຫາ ກາລິງ຺ຄາ. ກາລິງ຺ເຄສຸ ຊນປເທສຸ ຊາຕິສມ຺ປນ຺ນໍ ກຸລໍ ກາລິງ຺ຄກຸລນ຺ຕິ ເກຈິ.

ປຐມປາຏິປທທິວເສຕິ ທຸຕິຍອຸໂປສຖສ຺ສ ປາຏິປທທິວເສຕິ ອຕ຺ໂຖ. ຕຕ຺ຖ ຐິເຕຫິ ສມຸທ຺ທສ຺ສ ທິຏ຺ຐຕ຺ຕາ ຕໍ ຐານໍ ສມຸທ຺ທສາລວຕ຺ຖຸ. ໂສຬສ ຊາຕິສມ຺ປນ຺ນກຸລານິ ອຏ຺ຐ ພ຺ຣາຫ຺ມຓາມຈ຺ຈກຸລານິ. ມຫາອຣິຏ຺ຐຕ຺ເຖໂຣ ເຈຕິຍຄິຣິມ຺ຫິ ປພ຺ພຊິໂຕ. ອມຈ຺ຈສ຺ສ ປຣິເວຓຏ຺ຐາເນຕິ ສມ຺ປຕິກາລວເສນາຫ. ມຫິນ຺ທຕ຺ເຖໂຣ ທ຺ວາທສວສ຺ສິໂກ ຫຸຕ຺ວາ ຕມ຺ພປຓ຺ຓິທີປໍ ສມ຺ປຕ຺ໂຕ, ຕຕ຺ຖ ທ຺ເວ ວສ຺ສານິ ວສິຕ຺ວາ ວິນຍໍ ປຕິຏ຺ຐາເປສິ, ທ຺ວາສຏ຺ຐິວສ຺ສິໂກ ຫຸຕ຺ວາ ປຣິນິພ຺ພຸໂຕ. ວິນໂຍ ສໍວຣຕ຺ຖາຍາຕິ ວິນຍປິຏກໍ, ຕສ຺ສ ປຣິຍາປຸຓນໍ ວາ. ຍຖາຠູຕຎາຓທສ຺ສນໍ ສປ຺ປຈ຺ຈຍນາມຣູປປຣິຄ຺ຄໂຫ. ມຄ຺ຄາທິປຈ຺ຈເວກ຺ຂເຓ ອສຕິ ອນ຺ຕຣາ ປຣິນິພ຺ພານໍ ນາມ ນຕ຺ຖິ ເສກ຺ຂສ຺ສ ມຣຓໍ ວາ, ສຕິເຍວ ໂຫຕິ. ຕສ຺ມາ ອາຫ ‘‘ວິມຸຕ຺ຕິຎາຓທສ຺ສນ’’ນ຺ຕິ. ອນຸປາທາປຣິນິພ຺ພານຕ຺ຖາຍາຕິ ກຎ຺ຈິ ຘມ຺ມໍ ອນຸປາທາຍ ອຄ຺ຄເຫຕ຺ວາ ອີສກມ຺ປິ ອນວເສເສຕ຺ວາ ປຣິນິພ຺ພານຕ຺ຖາຍາຕິ ອຕ຺ໂຖ. ອຸປນິສາຕິ ‘‘ວິນໂຍ ສໍວຣຕ຺ຖາຍາ’’ຕິອາທິກາ ກາຣຓປຣມ຺ປຣາ. ເອຕ຺ຕາວຕາ ອຕ຺ຕຫິຕນິປ຺ຜຕ຺ຕິໍ ທສ຺ເສຕ຺ວາ ອິທານິ ປຣຫິຕນິປ຺ຜຕ຺ຕິໍ ທສ຺ເສຕຸໍ ‘‘ເອຕທຕ຺ຖໍ ໂສຕາວຘານ’’ນ຺ຕິ ອາຫ. ຕສ຺ສຕ຺ໂຖ – ອຕ຺ຕໂນ ວິນຍກຖນໍ ວິນຍມນ຺ຕນຎ຺ຈ ອຸຄ຺ຄເຫຕຸໍ ປເຣສໍ ໂສຕສ຺ສ ໂອທຫນໍ ໂສຕາວຘານໍ. ຕໂຕ ອຸຄ຺ຄຫິຕວິນຍກຖາມນ຺ຕນານໍ ເຕສໍ ອຸປນິສາ ຍຖາວຸຕ຺ຕກາຣຓປຣມ຺ປຣາ ສິທ຺ຘາເຍວາຕິ ນ ປຸນ ທສ຺ສິຕາຕິ ເວທິຕພ຺ພາ. ອຎ຺ຎຖາ ເອຕທຕ຺ຖາ ອຸປນິສາຕິ ອິມິນາ ວຈເນເນວ ອນຸປາທາປຣິນິພ຺ພານສ຺ສ ສງ຺ຄຫິຕຕ຺ຕາ ອນຸປາທາປຣິນິພ຺ພານໂຕ ອຸທ຺ຘໍ ໂສຕາວຘານາສມ຺ຠວໂຕ ເອຕທຕ຺ຖໍ ໂສຕາວຘານນ຺ຕິ ອນ຺ເຕ ນ ສມ຺ຠວຕີຕິ ນິຣຕ຺ຖກໍ ຠເວຍ຺ຍ, ນ ຈ ນິຣຕ຺ຖກໍ ປຣຫິຕນິປ຺ຜຕ຺ຕິຍາ ມູລກາຣຓທສ຺ສນຕ຺ຖຕ຺ຕາຕິ ເວທິຕພ຺ພໍ.

ເອວໍ ຍຖາ ຍຖາ ຍໍ ຍໍ, ສມ຺ຠເວຍ຺ຍ ປທໍ ອິຘ;

ຕໍ ຕໍ ຕຖາ ຕຖາ ສພ຺ພໍ, ປໂຍເຊຍ຺ຍ ວິຈກ຺ຂໂຓຕິ.

ພາຫິຣນິທານກຖາວຓ຺ຓນາ ນິຏ຺ຐິຕາ.