໒. ອໂຍຄຸຬສຸຕ຺ຕວຓ຺ຓນາ

໘໓໔. ອິມິນາ ຈຕຸມຫາຠູຕມເຍນາຕິ ອິມິນາ ສພ຺ພໂລກປຈ຺ຈກ຺ເຂນ ຈຕູຫິ ມຫາຠູເຕຫິ ນິພ຺ພຕ຺ເຕນ ຈຕຸມຫາຠູຕມເຍນ. ມໂນມໂຍ ປນ ນິມ຺ມິຕກາໂຍ ຠຄວໂຕ ຣຸຈິວເສນ ປເຣສໍ ປຈ຺ຈກ຺ໂຂ ໂຫຕິ. ໂອມາຕີຕິ ອວມາຕິ. ອວ-ປຸພ຺ໂພ ຫິ ມາ-ສທ຺ໂທ ສຕ຺ຕິອຕ຺ໂຖປິ ໂຫຕີຕິ ‘‘ປໂຫຕິ ສກ຺ໂກຕີ’’ຕິ ອຕ຺ໂຖ ວຸຕ຺ໂຕ. ອສມ຺ຠິນ຺ນປທນ຺ຕິ ອສາຘາຣຓປທໍ ອຎ຺ຎຕ຺ຖ ອນາຄຕຕ຺ຕາ. ກາຍສ຺ສ ຈິຕ຺ເຕ ສໂມທຫນໍ ອາໂຣປນໍ ຕນ຺ນິສ຺ສິຕຕາກຣຓຎ຺ຈ ອຕ຺ຖໂຕ ຈິຕ຺ຕຄຕິຍາ ປວຕ຺ຕນເມວາຕິ ອາຫ ‘‘ຈິຕ຺ຕຄຕິຍາ ເປເສຕີ’’ຕິ.

ຕຕ຺ຖ ຈິຕ຺ຕຄຕິຄມນໍ ນາມ ຈິຕ຺ຕວເສນ ກາຍສ຺ສ ປຣິຓາມເນນ ‘‘ອຍໍ ກາໂຍ ອິມໍ ຈິຕ຺ຕໍ ວິຍ ໂຫຕູ’’ຕິ ກາຍສ຺ສ ຈິຕ຺ເຕນ ສມານຄຕິກຕາຐປນໍ. ກຖໍ ປນ ກາໂຍ ທນ຺ຘປວຕ຺ຕິໂກ ລຫຸປວຕ຺ຕິນາ ຈິຕ຺ເຕນ ສມານຄຕິໂກ ໂຫຕີຕິ? ນ ສພ຺ພຖາ ສມານຄຕິໂກ. ຍເຖວ ຫິ ກາຍວເສນ ຈິຕ຺ຕປຣິຓາມເນ ຈິຕ຺ຕໍ ສພ຺ພຖາ ກາເຍນ ສມານຄຕິກໍ ນ ໂຫຕິ. ນ ຫິ ກທາຈິ ຕໍ ສຠາວສິທ຺ເຘນ ອຕ຺ຕໂນ ຂເຓນ ອວຕ຺ຕິຕ຺ວາ ທນ຺ຘວຸຕ຺ຕິກສ຺ສ ຣູປຘມ຺ມສ຺ສ ວເສນ ປວຕ຺ຕິຕຸໍ ສກ຺ໂກຕິ, ‘‘ອິທໍ ຈິຕ຺ຕໍ ອຍໍ ກາໂຍ ວິຍ ໂຫຕູ’’ຕິ ປນ ອຘິຏ຺ຐາເນນ ທນ຺ຘຄຕິກສ຺ສ ກາຍສ຺ສ ອນຸວຕ຺ຕນໂຕ ຍາວ ອິຈ຺ຉິຕຏ຺ຐານປ຺ປຕ຺ຕິ, ຕາວ ກາຍຄຕິອນຸໂລເມເນວ ຫຸຕ຺ວາ ສນ຺ຕານວເສນ ປວຕ຺ຕມານໍ ຈິຕ຺ຕໍ ກາຍຄຕິຍາ ປຣິຓາມິຕໍ ນາມ ໂຫຕິ. ເອວໍ ‘‘ອຍໍ ກາໂຍ ອິທໍ ຈິຕ຺ຕໍ ວິຍ ໂຫຕູ’’ຕິ ອຘິຏ຺ຐາເນນ ປເຄວ ສຸຂລຫຸສຎ຺ຎາຍ ສມ຺ປາທິຕຕ຺ຕາ ອຠາວິຕິທ຺ຘິປາທານໍ ວິຍ ທນ຺ຘໍ ອວຕ຺ຕິຕ຺ວາ ຍຖາ ລຫຸກໍ ກຕິປຍຈິຕ຺ຕວາເຣເນວ ອິຈ຺ຉິຕຏ຺ຐານປ຺ປຕ຺ຕິ ໂຫຕິ, ເອວໍ ປວຕ຺ຕມາໂນ ກາໂຍ ຈິຕ຺ຕຄຕິຍາ ປຣິຓາມິໂຕ ນາມ ໂຫຕິ, ນ ເອກຈິຕ຺ຕກ຺ຂເຓເນວ ອິຈ຺ຉິຕຏ຺ຐານປ຺ປຕ຺ຕິຍາ, ເອວຎ຺ຈ ກຕ຺ວາ ພາຫາສມິຎ຺ຊນປສາຣຓູປມາປິ ອຸປຈາເຣນ ວິນາ ສຸຏ຺ຐຸຕຣໍ ຍຸຕ຺ຕາ ໂຫຕີຕິ. ອຎ຺ຎຖາ ຘມ຺ມຕາວິໂລມຕາ ສິຍາ, ນາປິ ຘມ຺ມານໍ ລກ຺ຂຓຎ຺ຎຖຕ຺ຕໍ ອິທ຺ຘິພເລນ ກາຕຸໍ ສກ຺ກາ, ຠາວຎ຺ຎຖຕ຺ຕເມວ ປນ ກາຕຸໍ ສກ຺ກາຕິ.