໕. ອມຕວຄ຺ໂຄ

໒. ສມຸທຍສຸຕ຺ຕວຓ຺ຓນາ

໔໐໘. ສາຣມ຺ມຓສຕິປຏ຺ຐານາຕິ ອາຣມ຺ມຓລກ຺ຂິຕາ ສຕິປຏ຺ຐານາ ກຖິຕາ, ນ ສຕິລກ຺ຂຓາ.

໔. ສຕິສຸຕ຺ຕວຓ຺ຓນາ

໔໑໐. ສຸທ຺ຘິກໍ ກຕ຺ວາ ວິສຸໍ ວິສຸໍ ກຕ຺ວາ. ຕຖາ ຈ ວຸຕ຺ຕໍ ປາຬິຍໍ ‘‘ກາເຍ ວາ ຠິກ຺ຂູ’’ຕິ.

໖. ປາຕິໂມກ຺ຂສໍວຣສຸຕ຺ຕວຓ຺ຓນາ

໔໑໒. ເຊຏ຺ຐກສີລນ຺ຕິ ປຘານກສີລໍ. ສີລຄ຺ຄຫຓຎ຺ຫິ ປາຬິຍໍ ປາຕິໂມກ຺ຂສໍວຣວເສເນວ ອາຄຕໍ. ເຕນາຫ ‘‘ຕິປິຏກຈູຬນາຄຕ຺ເຖໂຣ ປນາ’’ຕິອາທິ. ຕຕ຺ຖ ປາຕິໂມກ຺ຂສໍວໂຣວ ສີລນ຺ຕິ ອວຘາຣຓໍ ອິຕເຣສໍ ຕິຓ຺ຓໍ ເອກເທເສນ ປາຕິໂມກ຺ຂນ຺ໂຕຄຘຠາວໍ ທີເປຕິ. ຕຖາ ຫິ ອໂນໂລກິໂຍໂລກເນ ອາຊີວເຫຕຸ ຈ ຉສິກ຺ຂາປທວີຕິກ຺ກມເນ ຄິລານປຈ຺ຈຍສ຺ສ ອປ຺ປຈ຺ຈເວກ຺ຂິຕປຣິໂຠເຄ ຈ ອາປຕ຺ຕິ ວິຫິຕາຕິ. ຕີຓີຕິ ອິນ຺ທ຺ຣິຍສໍວຣາທີນິ. ສີລນ຺ຕິ ວຸຕ຺ຕຏ຺ຐານໍ ນາມ ນຕ຺ຖີຕິ ສີລປຣິຍາເຍນ ເຕສໍ ກຕ຺ຖຈິ ສຸຕ຺ເຕ ຄຫິຕຏ຺ຐານໍ ນາມ ນຕ຺ຖີຕິ ນິປ຺ປຣິຍາຍສີລຕໍ ເຕສໍ ປຏິກ຺ຂິປຕິ. ຉທ຺ວາຣຣກ຺ຂຓມຕ຺ຕເມວາຕິ ຕສ຺ສ ສລ຺ລຫຸກຕມາຫ ຈິຕ຺ຕາຘິຏ຺ຐານມຕ຺ເຕນ ປຏິປາກຕິກຠາວປ຺ປຕ຺ຕິໂຕ. ອິຕຣທ຺ວເຍປິ ເອເສວ ນໂຍ. ປຈ຺ຈຍຸປ຺ປຕ຺ຕິມຕ຺ຕກນ຺ຕິ ຜເລນ ເຫຕຸໍ ທສ຺ເສຕິ. ອຸປ຺ປາທນເຫຕຸກາ ຫິ ປຈ຺ຈຍານໍ ອຸປ຺ປຕ຺ຕິ. ອິທມຕ຺ຖນ຺ຕິ ອິທໍ ປໂຍຊນໍ ອິມສ຺ສ ປຈ຺ຈຍສ຺ສ ປຣິຠຸຎ຺ຊເນຕິ ອຘິປ຺ປາໂຍ. ນິປ຺ປຣິຍາເຍນາຕິ ອິມິນາ ອິນ຺ທ຺ຣິຍສໍວຣາທີນິ ຕີຓິ ປຘານສີລສ຺ສ ປຣິປາລນປຣິໂສຘນວເສນ ປວຕ຺ຕິຍາ ປຣິຍາຍສີລານິ ນາມາຕິ ທສ຺ເສຕິ. ອິທານິ ປາຕິໂມກ຺ຂສີລສ຺ເສວ ປຘານຠາວໍ ພ຺ຍຕິເຣກໂຕ ອນ຺ວຍໂຕ ຈ ອຸປມາຍ ວິຠາເວຕຸໍ ‘‘ຍສ຺ສາ’’ຕິອາທິມາຫ. ຕຕ຺ຖ ໂສຕິ ປາຕິໂມກ຺ຂສໍວໂຣ. ເສສານິ ອິນ຺ທ຺ຣິຍສໍວຣາທີນິ. ປາຕິໂມກ຺ຂສທ຺ທສ຺ສ ອຕ຺ໂຖ ປນ ວິສຸທ຺ຘິມຄ຺ຄສໍວຓ຺ຓນາທີສຸ ວິຕ຺ຖາຣິໂຕ, ຕສ຺ມາ ຕຕ຺ຖ ວຸຕ຺ຕນເຍເນວ ເວທິຕພ຺ໂພ.

ອາຈາເຣນ ຈ ໂຄຈເຣນ ຈ ສມ຺ປນ຺ໂນຕິ ກາຍິກເຈຕສິກອວີຕິກ຺ກມສງ຺ຂາເຕນ ອາຈາເຣນ ຈ ນເວສິຍາທິໂຄຈຣຕາທິສງ຺ຂາເຕນ ໂຄຈເຣນ ຈ ສມ຺ປນ຺ໂນ, ສມ຺ປນ຺ນອາຈາຣໂຄຈໂຣຕິ ອຕ຺ໂຖ. ອປ຺ປມຕ຺ຕເກສູຕິ ອຕິປຣິຕ຺ຕເກສຸ ອນາປຕ຺ຕິຄມນີເຍສຸ. ‘‘ທຸກ຺ກຏທຸພ຺ຠາສິຕມຕ຺ເຕສູ’’ຕິ ອປເຣ. ວຊ຺ເຊສູຕິ ອກຣຓີເຍສຸ ຄາຣຍ຺ເຫສຸ. ເຕ ປນ ເອກນ຺ຕໂຕ ອກຸສລາ ໂຫນ຺ຕີຕິ ອາຫ – ‘‘ອກຸສລຘມ຺ເມສູ’’ຕິ. ຠຍທສ຺ສາວີຕິ ຠຍໂຕ ທສ຺ສນສີໂລ, ປຣມາຓຸມຕ຺ຕມ຺ປິ ວຊ຺ຊໍ ສິເນຣຸປ຺ປມາຓໍ ວິຍ ກຕ຺ວາ ທສ຺ສນສີໂລ. ສມ຺ມາ ອາທິຍິຕ຺ວາຕິ ສມ຺ມເທວ ສກ຺ກຈ຺ຈໍ ສພ຺ພໂສ ຈ ອາທິຍິຕ຺ວາ. ສິກ຺ຂາປເທສູຕິ ນິທ຺ຘາຣເຓ ຠຸມ຺ມນ຺ຕິ ສມຸທາຍໂຕ ອວຍວນິທ຺ຘາຣຓໍ ທສ຺ເສນ຺ໂຕ ‘‘ສິກ຺ຂາປເທສຸ ຕໍ ຕໍ ສິກ຺ຂາປທ’’ນ຺ຕິອາທິມາຫ. ສິກ຺ຂາປທໍ ສມາທາຕພ຺ພໍ ສິກ຺ຂິຕພ຺ພຎ຺ຈາຕິ ອຘິປ຺ປາໂຍ. ສິກ຺ຂາຕິ ອຘິສີລສິກ຺ຂາ. ປຸພ຺ເພ ປທ-ສທ຺ໂທ ອຘິຏ຺ຐານຏ຺ໂຐ, ອິຘ ຠາຄຕ຺ໂຖຕິ ທຏ຺ຐພ຺ພນ຺ຕິ ອາຫ – ‘‘ສິກ຺ຂາໂກຏ຺ຐາເສສູ’’ຕິ. ມູລປຎ຺ຎຕ຺ຕິອນຸປຎ຺ຎຕ຺ຕິອາທິເຠທໍ ຍໍກິຎ຺ຈິ ສິກ຺ຂິຕພ຺ພໍ ປູເຣຕພ຺ພໍ ສີລໍ, ຕໍ ປນ ທ຺ວາຣວເສນ ທຸວິຘເມວາຕິ ອາຫ – ‘‘ກາຍິກໍ ວາ ວາຈສິກໍ ວາ’’ຕິ. ອິມສ຺ມິໍ ອຕ຺ຖວິກປ຺ເປ ສິກ຺ຂາປເທສູຕິ ອາຘາເຣ ຠຸມ຺ມໍ ສິກ຺ຂາຠາເຄສຸ ກສ຺ສຈິ ວິສຸໍ ອຄ຺ຄຫຓໂຕ. ເຕນາຫ – ‘‘ຕໍ ຕໍ ສພ຺ພ’’ນ຺ຕິ. ‘‘ຕໂຕ ຕ຺ວໍ ຠິກ຺ຂຸ ສີລໍ ນິສ຺ສາຍາ’’ຕິ ວຈນໂຕ ອນຠິຊ຺ຌາ ອພ຺ຍາປາທສມ຺ມາທິຏ຺ຐິໂຍປິ ສີລນ຺ຕິ ວຸຕ຺ຕາ, ຕສ຺ມາ ອິມສ຺ມິໍ ສຸຕ຺ເຕ ‘‘ປາຕິໂມກ຺ຂສໍວຣສີລເມວ ກຖິຕ’’ນ຺ຕິ ວຸຕ຺ຕໍ.

໗. ທຸຈ຺ຈຣິຕສຸຕ຺ຕວຓ຺ຓນາ

໔໑໓. ເອຕ຺ຖາປິ ມໂນສຸຈຣິຕໍ ສີລໍ ນາມາຕິ ທສ຺ເສຕີຕິ ກຕ຺ວາ ວຸຕ຺ຕໍ ‘‘ປຈ຺ຉິມາປິ ຕໂຍ’’ຕິ. ອນຠິຊ຺ຌາອພ຺ຍາປາທສມ຺ມາທິຏ຺ຐິຘມ຺ມາ ສີລໍ ໂຫຕີຕິ ເວທິຕພ຺ພາ ກາຍວຈີສຸຈຣິເຕຫິ ສທ຺ຘິໍ ມໂນສຸຈຣິຕມ຺ປິ ວຕ຺ວາ ‘‘ຕໂຕ ຕ຺ວໍ ຠິກ຺ຂຸ ສີລໍ ນິສ຺ສາຍ ສີເລ ປຕິຏ຺ຐາຍາ’’ຕິ ວຸຕ຺ຕຕ຺ຕາ. ເສສໍ ວຸຕ຺ຕນຍເມວ. ຉຏ຺ຐສຕ຺ຕເມສູຕິ ຉຏ຺ຐສຕ຺ຕມວຄ຺ເຄສຸ ອປຸພ຺ພໍ ນຕ຺ຖິ. ເຕນ ວຸຕ຺ຕໍ ‘‘ເຫຏ຺ຐາ ວຸຕ຺ຕນເຍເນວ ອຕ຺ໂຖ ເວທິຕພ຺ໂພ’’ຕິ. ວຄ຺ຄເປຍ຺ຍາລໂຕ ປນ ອິມສ຺ມິໍ ສຕິປຏ຺ຐານສໍຍຸຕ຺ເຕ ກຕິປຍວຄ຺ຄາ ສງ຺ຄຫໍ ອາຣູຬ຺ຫາ, ຕຖາປິ ເຕສໍ ອຕ຺ຖວິເສສາຠາວໂຕ ເອກຈ຺ເຈສຸ ໂປຕ຺ຖເກສຸ ມຸຂມຕ຺ຕໍ ທສ຺ເສຕ຺ວາ ສໍຂິຕ຺ຕາ, ເອກຈ຺ເຈສຸ ອຕິສໍຂິຕ຺ຕາວ, ເຕ ສງ຺ເຂປວເສນ ທ຺ເວ ກຕ຺ວາ ‘‘ຉຏ຺ຐສຕ຺ຕເມສູ’’ຕິ ວຸຕ຺ຕໍ.

ອມຕວຄ຺ຄວຓ຺ຓນາ ນິຏ຺ຐິຕາ.

ສຕິປຏ຺ຐານສໍຍຸຕ຺ຕວຓ຺ຓນາ ນິຏ຺ຐິຕາ.