໖. ສກຸຓຄ຺ຆິສຸຕ຺ຕວຓ຺ຓນາ

໓໗໒. ປາກຕິກສກຸຓກຸເລສຸ ພລວຠາວໂຕ ເຕສໍ ຫນນໂຕ ສກຸຓຄ຺ຆິ. ເສໂນຕິ ວຸຕ຺ຕໍ ‘‘ເສນສ຺ເສຕໍ ອຘິວຈນ’’ນ຺ຕິ, ເສນວິເສໂສ ປນ ໂສ ເວທິຕພ຺ໂພ. ອາມິສຕ຺ຖາຍ ປຕ຺ຕຕ຺ຕາ ‘‘ໂລຠສາຫເສນ ປຕ຺ຕາ’’ຕິ ວຸຕ຺ຕໍ, ໂລຠນິມິຕ຺ເຕນ ສາຫສາກາເຣນ ປຕ຺ຕາຕິ ອຕ຺ໂຖ. ນງ຺ຄເລນ ກຏ຺ຐໍ ກສິຕໍ ນງ຺ຄລກຏ຺ຐໍ, ຕໍ ກຣີຍຕິ ເອຕ຺ຖາຕິ ນງ຺ຄລກຏ຺ຐກຣຓນ຺ຕິ ອາຫ – ‘‘ອຘຸນາ ກຏ຺ຐໍ ເຂຕ຺ຕຏ຺ຐານ’’ນ຺ຕິ. ເລຑ຺ຑຸໂຍ ຕິຏ຺ຐນ຺ຕິ ເອຕ຺ຖາຕິ ເລຑ຺ຑຸຏ຺ຐານໍ, ເລຑ຺ຑຸນິມິຕ຺ຕໍ ກສິຕຏ຺ຐານໍ. ວຊ຺ຊຕີຕິ ວທໍ, ວຈນໍ. ກຸຈ຺ຉິຕໍ ວທໍ ອວທໍ. ຄຣຫເນ ຫິ ອຍໍ ອ-ກາໂຣ ຍຖາ – ‘‘ອປຸຕ຺ໂຕ ອຠຣິຍາ’’ຕິ. ອວທໍ ມາເນຕີຕິ ອວທມານາ, ອຕ຺ຕໂນ ພລມເທນ ລາປໍ ອຕິມຎ຺ຎິຕ຺ວາ ວທນ຺ຕີຕິ ອຕ຺ໂຖ. ເຕເນວາຫ ‘‘ຄຈ຺ຉ ໂຂ, ຕ຺ວໍ ລາປ, ຕຕ຺ຣປິ ເມ ຄນ຺ຕ຺ວາ ນ ໂມກ຺ຂສີ’’ຕິ. ຍໍ ປນ ອຏ຺ຐກຖາຍໍ ວຸຕ຺ຕໍ ‘‘ອຕ຺ຕໂນ ພລສ຺ສ ສຸຏ຺ຐຸ ວຓ຺ຓໍ ວທມານາ’’ຕິ, ຕຕ຺ຖ ອຕ຺ຕໂຕ ອາປນ຺ນໍ ຄເຫຕ຺ວາ ວຸຕ຺ຕໍ. ‘‘ວທມາໂນ’’ຕິ ວາ ປາໂຐ, ສາຣມ຺ຠວເສນ ອວ຺ຫາຍນ຺ໂຕຕິ ອຕ຺ໂຖ. ເຕນາຫ ‘‘ເອຫິ ໂຂ ທານິ ສກຸຓຄ຺ຆີ’’ຕິ. ສຸຏ຺ຐຸ ຐເປຕ຺ວາຕິ ຊິຍາມຸຕ຺ຕສຣສ຺ສ ວິຍ ສີຆປາຕໂຍຄ຺ຍຕາກຣເຓນ ອຸໂຠ ປກ຺ເຂ ສມ຺ມາ ຐເປຕ຺ວາ. ອຍນ຺ຕິ ສກຸຓຄ຺ຆິ. ຎຕ຺ວາຕິ ຍຖາຠູຕທສ຺ສເນນ ອຕ຺ຕໂນ ຎາເຓນ ຊານິຕ຺ວາ. ຜາລີຍິຕ຺ຖາຕິ ຜາລຈ຺ເຉທຕິຂິຓສິຂເຣ ສຸກ຺ຂເລຑ຺ຑຸສ຺ມິໍ ຠິຊ຺ຊິຕ຺ຖ.