໔. ສາລສຸຕ຺ຕວຓ຺ຓນາ

໓໗໐. ຍຖານຸສິຏ຺ຐໍ ປຏິປຊ຺ຊມາເນ ອປາຍທຸກ຺ເຂ ອປາຕນວເສນ ຘາຣຓຏ຺ເຐນ ຘມ຺ໂມ, ສາສນພ຺ຣຫ຺ມຈຣິຍໍ, ຕເທວ ຕທງ຺ຄາທິວເສນ ກິເລສານໍ ວິນຍນຏ຺ເຐນ ວິນໂຍຕິ ອາຫ – ‘‘ຘມ຺ໂມຕິ ວາ…ເປ… ນາມ’’ນ຺ຕິ. ປຏິປກ຺ຂຘມ຺ເມຫິ ອນຠິຠູຕຕາຍ ເອໂກ ອຸເທຕີຕິ ເອໂກທີຕິ ລທ຺ຘນາໂມ ສມາຘິ ຠູໂຕ ຊາໂຕ ເອເຕສນ຺ຕິ ເອໂກທິຠູຕາ. ເອຕ຺ຖ ຈ ເອໂກທິຠູຕາຕິ ເອເຕນ ອຸປຈາຣຊ຺ຌານາວໂຫ ປຸພ຺ພຠາຄິໂກ ສມາຘິ ວຸຕ຺ໂຕ. ສມາຫິຕາຕິ ເອເຕນ ອຸປຈາຣປ຺ປນາສມາຘິ. ເອກຄ຺ຄຈິຕ຺ຕາຕິ ເອເຕນ ສຸຠາວິໂຕ ວສິປ຺ປຕ຺ໂຕ ອປ຺ປນາສມາຘິ ວຸຕ຺ໂຕຕິ ເວທິຕພ຺ໂພ. ນວກຠິກ຺ຂູຫິ ຠາວິຕສຕິປຏ຺ຐານາ ປຸພ຺ພຠາຄາ. ເຕ ຫິ ຍຖາຠູຕຎາຓາຍ ຠາວິຕາ. ຍຖາຠູຕຎາຓນ຺ຕິ ຫິ ໂສຕາປຕ຺ຕິມຄ຺ຄຎາຓໍ ອິຘາຘິປ຺ເປຕໍ. ຂີຓາສເວຫິ ຠາວິຕສຕິປຏ຺ຐານາປິ ປຸພ຺ພຠາຄາ. ເຕສຎ຺ຫິ ກຕກຣຓີຍານໍ ທິຏ຺ຐຘມ຺ມສຸຂວິຫາຣາຍ ສຕິປຏ຺ຐານຠາວນາ, ເສກ຺ຂານໍ ປນ ສຕິປຏ຺ຐານຠາວນາ ປຣິຎ຺ຎຕ຺ຖາຍ ປວຕ຺ຕາ ໂລກິຍາ, ປຣິຊານນວເສນ ປວຕ຺ຕາ ໂລກຸຕ຺ຕຣາຕິ ‘‘ມິສ຺ສກາ’’ຕິ ວຸຕ຺ຕໍ.