໒. ທຸຕິຍວຄ຺ໂຄ

໑-໒. ອິຈ຺ຉານງ຺ຄລສຸຕ຺ຕາທິວຓ຺ຓນາ

໙໘໗-໙໘໘. ກສ຺ມາຕິອາທິ ວິຫາຣສມາປຕ຺ຕິອາຈິກ຺ຂເຓ ກາຣຓໍ ວິຠາເວຕຸໍ ອາຣທ຺ຘໍ.

ເອວ-ວາກາໂຣຕິ ເອວ-ກາໂຣ ວາ-ກາໂຣ ຈ. ເອກນ຺ຕສນ຺ຕຕ຺ຕາ ເອກນ຺ເຕນ ສນ຺ຕມນສິກາຣຠາວໂຕ. ເສກ຺ຂວຈເນເນວ ເຕສໍ ສິກ຺ຂິຕພ຺ພສ຺ສ ອຕ຺ຖິຠາເວ ສິທ຺ເຘປິ ສິກ຺ຂິຕພ຺ພຣຫິເຕສຸ ເຕສຸປິ ເສກ຺ຂປຣິຍາຍສ຺ສ ວຸຈ຺ຈມານຕ຺ຕາ ສິກ຺ຂິຕພ຺ພສທ຺ເທນ ເສກ຺ເຂ ວິເສເສຕ຺ວາ ວຸຕ຺ຕາ. ອາສວກ຺ຂຍຕ຺ຖໍ ສິກ຺ຂິຕພ຺ພສ຺ສ ອຠາເວປິ ທິຏ຺ຐຘມ຺ມສຸຂວິຫາຣຕ຺ຖໍ ຌານາທິສິກ຺ຂເນນ ວິນາ ສິກ຺ຂິຕພ຺ພາຠາວາ ‘‘ອເສກ຺ຂາ ນາມາ’’ຕິ ວຸຕ຺ຕາ. ພຸທ຺ຘານໍ ປນ ສພ຺ພໂສ ສມ຺ມເທວ ປຣິນິຏ຺ຐິຕສິກ຺ຂຕ຺ຕາ ‘‘ສິກ຺ຂາມີ’’ຕິ ນ ວຸຕ຺ຕໍ. ອານາປານຊ຺ຌານຜລສມາປຕ຺ຕິ ຕຖາຄຕວິຫາໂຣ.

໓-໑໐. ປຐມອານນ຺ທສຸຕ຺ຕາທິວຓ຺ຓນາ

໙໘໙-໙໙໖. ອນິຈ຺ຈາທິວເສນາຕິ ອນິຈ຺ຈທຸກ຺ຂານຕ຺ຕວເສນ. ປວິຈິນຕິ ປກາເຣຫິ ວິຈິນຕິ. ນິກ຺ກິເລສາຕິ ອປຄຕກິເລສາ ວິກ຺ຂມ຺ຠິຕກິເລສາ. ປີຕິສມ຺ໂພຊ຺ຌງ຺ໂຄ, ປສ຺ສທ຺ຘິສມ຺ໂພຊ຺ຌງ຺ໂຄຕິ ປາໂຐ.

ຍາຍ ອໂນສກ຺ກນໍ ອນຕິວຕ຺ຕນຎ຺ຈ ໂຫຕິ, ອຍໍ ຕຕ຺ຣມຊ຺ຌຕ຺ຕຸເປກ຺ຂາ ມຊ຺ຌຕ຺ຕາກາໂຣຕິ ວຸຕ຺ຕາ. ເອກຈິຕ຺ຕກ຺ຂຓິກາຕິ ເອກຈິຕ຺ຕຸປ຺ປາທປຣິຍາປນ຺ນຕ຺ຕາ.

ຈຕ຺ຕຸນ຺ນໍ ຈຕຸກ຺ການໍ ວເສນ ໂສຬສກ຺ຂຕ຺ຕຸກາ. ອານາປານສນ຺ນິສ຺ສເຍນ ປວຕ຺ຕຕ຺ຕາ ອາຣມ຺ມຓວເສນ ປວຕ຺ຕາ ອານາປານາຣມ຺ມຓາປິ ອປຣຠາເຄ ສຕິ ອານາປານສ຺ສຕີຕິ ປຣິຍາເຍນ ວຕ຺ຕພ຺ພຕໍ ອຣຫຕີຕິ ‘‘ອານາປານສ຺ສຕິ ມິສ຺ສກາ ກຖິຕາ’’ຕິ ວຸຕ຺ຕໍ. ອານາປານມູລກາຕິ ອານາປານສນ຺ນິສ຺ສເຍນ ປວຕ຺ຕາ ສຕິປຏ຺ຐານາ. ເຕສໍ ມູລຠູຕາຕິ ເຕສໍ ສຕິປຏ຺ຐານານໍ ມູລກາຣຓຠູຕາ. ໂພຊ຺ຌງ຺ຄມູລກາຕິ ໂພຊ຺ຌງ຺ຄປຈ຺ຈຍຠູຕາ. ເຕປິ ໂພຊ຺ຌງ຺ຄາຕິ ເອເຕ ວີສຕິ ສຕິປຏ຺ຐານເຫຕຸກາ ໂພຊ຺ຌງ຺ຄາ. ວິຊ຺ຊາວິມຸຕ຺ຕິປູຣກາຕິ ຕຕິຍວິຊ຺ຊາຍ ຕສ຺ສ ຜລສ຺ສ ຈ ປຣິປູຣຓວເສນ ປວຕ຺ຕາ ໂພຊ຺ຌງ຺ຄາ. ຜລສມ຺ປຍຸຕ຺ຕາຕິ ຈຕຸຕ຺ຖຜລສມ຺ປຍຸຕ຺ຕາ, ຈຕຸພ຺ພິຘຜລສມ຺ປຍຸຕ຺ຕາ ວາ.

ທຸຕິຍວຄ຺ຄວຓ຺ຓນາ ນິຏ຺ຐິຕາ.

ອານາປານສໍຍຸຕ຺ຕວຓ຺ຓນາ ນິຏ຺ຐິຕາ.