໕-໖. ປຸຓ຺ຓສຸຕ຺ຕາທິວຓ຺ຓນາ

໘໘-໘໙. ຕນ຺ຕິ ຈກ຺ຂຸຣູປທ຺ວຍໍ. ເຕນາຫ ‘‘ຈກ຺ຂຸຎ຺ເຈວ ຣູປຎ຺ຈາ’’ຕິ. ນນ຺ທິສມຸທຍາຕິ ນນ຺ທິຍາ ສມຸທຍຕຓ຺ຫາຍ ເສສກາຣເຓຫິ ນນ຺ທິຍາ ສມຸທິຕິ ສໂມຘານໍ ນນ຺ທິສມຸທໂຍ, ຕສ຺ມາ ນນ຺ທິສມຸທຍາ. ເຕນາຫ ‘‘ຕຓ຺ຫາຍ ສໂມຘາເນນາ’’ຕິ. ປຎ຺ຈກ຺ຂນ຺ຘສງ຺ຂາຕສ຺ສ ທຸກ຺ຂສ຺ສ ສໂມຘາເນນ ສມຸທິຕິ ປວຕ຺ຕິເຍວາຕິ ສຫ ສມຸທເຍນ ທຸກ຺ຂສ຺ສ ທສ຺ສິຕຕ຺ຕາ ‘‘ວຏ຺ຏໍ ມຕ຺ຖກໍ ປາເປຕ຺ວາ’’ຕິ ວຸຕ຺ຕໍ. ນິໂຣຘູປາເຍນ ສທ຺ຘິໍ ນິໂຣຘສ຺ສ ທສ຺ສິຕຕ຺ຕາ ‘‘ວິວຏ຺ຏໍ ມຕ຺ຖກໍ ປາເປຕ຺ວາ’’ຕິ. ປຸຈ຺ຉານຸສນ຺ຘິອາທີສຸ ອຎ຺ຎຕໂຣ ນ ໂຫຕີຕິ ອາຫ – ‘‘ປາຏິເຍກ຺ໂກ ອນຸສນ຺ຘີ’’ຕິ.

ຈຓ຺ຑາຕິ ໂກຘນາ. ທຸຏ຺ຐາຕິ ໂທສວນ຺ໂຕຕິ ອຕ຺ໂຖ. ກິພ຺ພິສາຕິ ປາປາ. ກກ຺ຂຬາຕິ ທາຣຸຓາ. ຆຏິກມຸຄ຺ຄເຣນາຕິ ເອກສ຺ມິໍ ປກ຺ເຂ ຆຏິກໍ ທສ຺ເສຕ຺ວາ ກເຕນ ຣສ຺ສທຓ຺ເຑນ. ສຕ຺ຕານໍ ສສນໂຕ ສຕ຺ຖໍ, ຕໂຕ ເອວ ຊີວິຕສ຺ສ ຫຣຓໂຕ ຫາຣກຎ຺ຈາຕິ ສຕ຺ຖຫາຣກໍ. ອິນ຺ທ຺ຣິຍສໍວໂຣ ‘‘ທໂມ’’ຕິ ວຸຕ຺ໂຕ ມນຈ຺ຉຏ຺ຐານໍ ອິນ຺ທ຺ຣິຍານໍ ທມນໂຕ. ປຎ຺ຎາ ‘‘ທໂມ’’ຕິ ວຸຕ຺ຕາ ກິເລສວິເສວິຕານໍ ທມນໂຕ ວູປສມນໂຕ. ອຸໂປສຖກມ຺ມໍ ‘‘ທໂມ’’ຕິ ວຸຕ຺ຕໍ ກາຍທ຺ວາຣາທີຫິ ອຸປ຺ປຊ຺ຊນກອສມສ຺ສ ທມນໂຕ. ຂນ຺ຕິ ‘‘ທໂມ’’ຕິ ເວທິຕພ຺ພາ ອກ຺ຂນ຺ຕິຍາ ທມນໂຕ ວູປສມນໂຕ. ເຕນາຫ ‘‘ອຸປສໂມຕິ ຕສ຺ເສວ ເວວຈນ’’ນ຺ຕິ.

ເອຕ຺ຖາຕິ ສຸນາປຣນ຺ຕຊນປເທ. ເອເຕ ທ຺ເວຕິ ອຍໍ ປຸຓ຺ຓຕ຺ເຖໂຣ ຕສ຺ສ ກນິຏ຺ໂຐຕິ ເອເຕ ທ຺ເວ ຠາຕໂຣ. ອາຫຈ຺ຈ ອຏ຺ຐາສິ ອຸຬາຣໍ ພຸທ຺ຘາຣມ຺ມຓໍ ປີຕິໍ ອຸປ຺ປາເທຕ຺ວາ. ສຕ຺ຕ ສີຫນາເທ ນທິຕ຺ວາຕິ ມມ຺ມຈ຺ເຉທການມ຺ປິ ອກ຺ໂກສປຣິຠາສານໍ ຂມເນ ສນ຺ໂຕສາຠາວທີປນໍ, ປາຓິປ຺ປຫາຣສ຺ສ, ເລຑ຺ຑຸປ຺ປຫາຣສ຺ສ, ທຓ຺ຑປ຺ປຫາຣສ຺ສ, ສຕ຺ຖປ຺ປຫາຣສ຺ສ, ຊີວິຕໂວໂຣປນສ຺ສ, ຂມເນ ສນ຺ໂຕສາຠາວທີປນຎ຺ຈາຕິ ເອວໍ ສຕ຺ຕ ສີຫນາເທ ນທິຕ຺ວາ. ຈຕູສຸ ຐາເນສຸ ວສິຕຕ຺ຕາ ປາຬິຍໍ ວສນຏ຺ຐານໍ ອນຸທ຺ເທສິກໍ ກຕ຺ວາ ‘‘ສຸນາປຣນ຺ຕສ຺ມິໍ ຊນປເທ ວິຫຣຕິ’’ອິຈ຺ເຈວ ວຸຕ຺ຕໍ.

ຈຕູສຸ ຐາເນສູຕິ ອພ຺ພຸຫຕ຺ຖປພ຺ພເຕ, ສມຸທ຺ທຄິຣິວິຫາເຣ, ມາຕຸລຄິຣິມ຺ຫິ, ມກຸຬກາຣາມວິຫາເຣຕິ ອິເມສຸ ຈຕູສຸ ຐາເນສຸ. ຕນ຺ຕິ ຈງ຺ກມໍ ອາຣຸຍ຺ຫ ໂກຈິ ຠິກ຺ຂຸ ຈງ຺ກມິຕຸໍ ສມຕ຺ໂຖ ນຕ຺ຖິ ມຫຕາ ສມຸທ຺ທປຣິສ຺ສເຍນ ຠາວນາມນສິກາຣສ຺ສ ອນຠິສມ຺ຠຸຓນໂຕ. ອຸປ຺ປາຕິກນ຺ຕິ ອຸປ຺ປາຕກຣໍ ມຫາສງ຺ໂຂຠໍ ອຸຏ຺ຐເປຕ຺ວາ. ສມ຺ມຸເຂຕິ ອນິລປເທເສ. ປຏິເວເທສຸນ຺ຕິ ປເວເທສຸໍ.

ອາຣທ຺ຘກາລໂຕ ປຏ຺ຐາຍາຕິ ມຓ຺ຑລມາຬສ຺ສ ກາຕຸໍ ປຖວີມິຕກາລໂຕ ປຠຸຕິ. ສຈ຺ຈພນ຺ເຘນ ປຎ຺ຈສຕານິ ປຣິປູເຣຕຸໍ ‘‘ເອກູນປຎ຺ຈສຕານ’’ນ຺ຕິ ວຸຕ຺ຕໍ. ຄນ຺ຘກຸຏິນ຺ຕິ ເຊຕວນມຫາວິຫາເຣ ມຫາຄນ຺ຘກຸຏິໍ.

ສຈ຺ຈພນ຺ຘນາໂມຕິ ສຈ຺ຈພນ຺ເຘ ປພ຺ພເຕ ຈິຣນິວາສິຕາຍ ‘‘ສຈ຺ຈພນ຺ໂຘ’’ຕ຺ເວວ ລທ຺ຘນາໂມ. ອຣຫຕ຺ຕໍ ປາປຸຓີຕິ ປຎ຺ຈາຠິຎ຺ຎາປຣິວາຣໍ ອຣຫຕ຺ຕໍ ອຘິຄຈ຺ຉິ. ເຕນາຫ ‘‘ມຄ຺ເຄເນວສ຺ສ ອຠິຎ຺ຎາ ອາຄຕາ’’ຕິ.

ຕສ຺ມິໍ ສນ຺ນິປຕິຕາ ມຫາຊນາ ເກຈິ ໂສຕາປນ຺ນາ, ເກຈິ ສກທາຄາມິໂນ, ເກຈິ ອນາຄາມິໂນ, ເກຈິ ອຣຫນ຺ໂຕ ອເຫສຸໍ. ຕຕ຺ຖາປິ ເກຈິ ເຕວິຊ຺ຊາ, ເກຈິ ຉຬຠິຎ຺ຎາ, ເກຈິ ປຏິສມ຺ຠິທປ຺ປຕ຺ຕາ ອເຫສຸໍ. ຕໍ ສນ຺ຘາຍ ວຸຕ຺ຕໍ ‘‘ມຫາຊນສ຺ສ ພນ຺ຘນໂມກ຺ໂຂ ຊາໂຕ’’ຕິ. ເຍ ປນ ຕຕ຺ຖ ສຣຓຄມນປຎ຺ຈສີລທສສີລສມາທາເນນ ລທ຺ຘານຸຄ຺ຄຫາ, ເຕສໍ ເທວຕານຎ຺ຈ ວເສນ ‘‘ມຫນ຺ຕໍ ພຸທ຺ຘໂກລາຫລໍ ອໂຫສີ’’ຕິ ວຸຕ຺ຕໍ.

ອຣຸຓໍ ປນ ມຫາຄນ຺ຘກຸຏິຍໍເຍວ ອຸຏ຺ຐເປສິ ເທວຕານຸຄ຺ຄຫຕ຺ຖຎ຺ເຈວ ກຸລານຸທຍາຍ ຈ. ອປາຍມຄ຺ເຄ ໂອຕາຣິໂຕ ‘‘ໂກຈິ ໂລກສ຺ສ ສຊິຕາ ອຕ຺ຖິ, ຕສ຺ສ ວເສນ ປວຕ຺ຕິສໍຫາຣາ ໂຫນ຺ຕິ, ເຕເນວາຍໍ ປຊາ ສນາຖາ ໂຫຕິ, ຕໍ ຍຸຎ຺ຊຕິ ຈ ຕສ຺ມິໍ ຕສ຺ມິໍ ກມ຺ເມ’’ຕິ ມິຈ຺ຉາຄາເຫຫິ. ປຣິຈຣິຕພ຺ພໍ ຍາຈິ ‘‘ເອຕ຺ຖ ມຍາ ຈິຣໍ ວສິຕພ຺ພ’’ນ຺ຕິ.

ຉຏ຺ຐນ຺ຕິ ພາຫິຍສຸຕ຺ຕໍ. ຕໍ ອຸຕ຺ຕານເມວ ເຫຏ຺ຐາ ວຸຕ຺ຕນຍຕ຺ຕາ.

ປຸຓ຺ຓສຸຕ຺ຕາທິວຓ຺ຓນາ ນິຏ຺ຐິຕາ.