໘. ສມຸຄ຺ຆາຕສາຣຸປ຺ປສຸຕ຺ຕວຓ຺ຓນາ

໓໐. ມຎ຺ຎິຕໍ ນາມ ຕຓ຺ຫາມານທິຏ຺ຐີຫິ ຄເຫຕພ຺ພໍ ມຎ຺ຎິຕໍ. ສພ຺ພສ຺ມິໍ ມຎ຺ຎິຕນ຺ຕິ ສພ຺ພມຎ຺ຎິຕໍ, ຕສ຺ສ ສມຸຄ຺ຆາໂຕ ເສຕຸຆາໂຕ, ຕທາວຫໍ ສພ຺ພມຎ຺ຎິຕສມຸຄ຺ຆາຕສາຣຸປ຺ປໍ. ອຏ຺ຐກຖາຍໍ ປນ ‘‘ມຎ຺ຎິຕໍ ນາມ ຈກ຺ຂາທີສຸ ເອວ ອຸປ຺ປຊ຺ຊຕິ, ນາຎ຺ຎສ຺ມິ’’ນ຺ຕິ ທຸຕິຍນໂຍ ວຸຕ຺ໂຕ. ອນຸຈ຺ຉວິກນ຺ຕິ ອນຸຣູປໍ ອວິໂລມໍ. ອິຘາຕິ ອິເຘວ ສາສເນ ອຎ຺ຎຕ຺ຖ ຕທຠາວໂຕ. ‘‘ຕຓ຺ຫາ-ມານທິຏ຺ຐິມຎ຺ຎິຕານ’’ນ຺ຕິ ວຸຕ຺ຕໍ ມຎ຺ຎິຕຕ຺ຕຍໍ ສປຣສນ຺ຕາເນສຸ ປຏິປກ຺ຂວເສນ ໂຍເຊຕ຺ວາ ທສ຺ເສຕຸໍ ‘‘ຈກ຺ຂຸໍ ອຫນ຺ຕິ ວາ’’ຕິອາທິ ວຸຕ຺ຕໍ. ຕຕ຺ຖ ‘‘ຈກ຺ຂຸໍ ອຫ’’ນ຺ຕິ ອິມິນາ ອຊ຺ຌຕ຺ຕວິສຍໍ ທິຏ຺ຐິມຎ຺ຎິຕຎ຺ຈ ທສ຺ເສຕິ ອຕ຺ຕາຠິນິເວສາຫໍກາຣທີປນໂຕ. ‘‘ມມ’’ນ຺ຕິ ອິມິນາ ຕຓ຺ຫາມຎ຺ຎິຕໍ ມານມຎ຺ຎິຕມ຺ປິ ວາ, ປຣິຄ຺ຄຫມຸເຂນປິ ເສຍ຺ຍາທິໂຕ ມານຸປ຺ປຊ຺ຊນໂຕ. ເສສປທທ຺ວເຍປິ ອິມິນາ ນເຍນ ມຎ຺ຎິຕວິຠາໂຄ ເວທິຕພ຺ໂພ. ອຫນ຺ຕິ ອຕ຺ຕາວ, ໂສ ຈ ຈກ຺ຂຸສ຺ມິໍ ຕທຘີນວຸຕ຺ຕິຕ຺ຕາ ‘‘ປໂຣ’’ຕິ ນ ມຎ຺ຎຕິ. ມມ ກິຎ຺ຈນປລິໂພໂຘ ຈກ຺ຂຸສ຺ມິໍ ສຕິ ລພ຺ຠນໂຕ, ອສຕິ ນ ມຎ຺ຎຕິ ຕຖາມຎ຺ຎິຕສ຺ສ ປຈ຺ຈຍຆາຕໂຕ. ເສສປທທ຺ວເຍປິ ເອເສວ ນໂຍ.

ອຫໍ ຈກ຺ຂຸໂຕ ນິຄ຺ຄໂຕຕິ ‘‘ອຫ’’ນ຺ຕິ ວຕ຺ຕພ຺ໂພ ອຍໍ ສຕ຺ໂຕ ຈກ຺ຂຸໂຕ ນິຄ຺ຄໂຕ ຕຕ຺ຖ ສຸຂຸມາກາເຣນ ອຸປລພ຺ຠນໂຕ. ມມ ກິຎ຺ຈນປລິໂພໂຘ ຈກ຺ຂຸໂຕ ນິຄ຺ຄໂຕ ຕສ຺ມິໍ ສຕິ ເອວ ອຸປລພ຺ຠນໂຕ. ເສສທ຺ວເຍປິ ເອເສວ ນໂຍ. ຕຕ຺ຖ ປໂຣຕິ ປໂຣ ສຕ຺ໂຕ. ມມ ຈກ຺ຂູຕິ ນ ມຎ຺ຎຕິ ຍສ຺ສ ຕໍ ຈກ຺ຂຸ, ຕສ຺ສ ‘‘ອຫ’’ນ຺ຕິ ວຕ຺ຕພ຺ພສ຺ເສວ ອຠາວໂຕ. ມມຕ຺ຕຠູຕນ຺ຕິ ມມ ກາຣຓໍ. ເສສໍ ອຸຕ຺ຕານເມວ. ເອວເມຕສ຺ມິໍ ສຸຕ຺ເຕ ຈກ຺ຂຸຣູປ-ຈກ຺ຂຸວິຎ຺ຎາຓ-ຈກ຺ຂຸສມ຺ຜສ຺ສ-ສຸຂທຸກ຺ຂາທຸກ຺ຂມສຸຂວເສນ ສຕ຺ຕ ວາຣາ ຈກ຺ຂຸທ຺ວາເຣ, ຕຖາ ໂສຕທ຺ວາຣາທີສູຕິ ຉ ສຕ຺ຕກາ ທ຺ເວຈຕ຺ຕາລີສ. ປຸນ ສກ຺ກາຍວເສນ ‘‘ສພ຺ພໍ ນ ມຎ຺ຎຕີ’’ຕິອາທິນາ ວຸຕ຺ຕໍ, ເຕນ ເຕຈຕ຺ຕາລີສ. ປຸນ ເຕຠູມກວຏ຺ຏໍ ‘‘ໂລໂກ’’ຕິ ຄເຫຕ຺ວາ ‘‘ນ ກິຎ຺ຈິ ໂລເກ ອຸປາທິຍຕີ’’ຕິ ວຸຕ຺ຕໍ, ເຕນ ຈຕຸຈຕ຺ຕາລີສ ໂຫນ຺ຕິ. ເອວໍ ສພ຺ພຖາປິ ຈຕຸຈຕ຺ຕາລີສາຍ ຐາເນສຸ ອຣຫຕ຺ຕໍ ປາເປຕ຺ວາ ວິປສ຺ສນາ ກຖິຕາຕິ ເວທິຕພ຺ພາ. ‘‘ຈຕຸຈຕ຺ຕາລີສາຘິກສເຕສູ’’ຕິ ເກສຸຈິ ໂປຕ຺ຖເກສຸ ລິຂນ຺ຕິ, ສາ ຈ ປມາທເລຂາ.

ສມຸຄ຺ຆາຕສາຣຸປ຺ປສຸຕ຺ຕວຓ຺ຓນາ ນິຏ຺ຐິຕາ.