໖. ອາທິຕ຺ຕສຸຕ຺ຕວຓ຺ຓນາ

໒໘. ຄຍານາມິກາຍ ນທິຍາ ອວິທູເຣ ປວຕ຺ໂຕ ຄາໂມ ຄຍາ ນາມ, ຕສ຺ສໍ ຄຍາຍໍ ວິຫຣຕີຕິ ສມີປຕ຺ເຖ ເຈຕໍ ຠຸມ຺ມວຈນໍ. ຄຍາຄາມສ຺ສ ຫິ ອາສນ຺ເນ ຄຍາສີສນາມເກ ປິຏ຺ຐິປາສາເຓ ຠຄວາ ຕທາ ວິຫາສິ. ເຕນາຫ ‘‘ຠຄວາ ຕຕ຺ຖ ວິຫຣຕີ’’ຕິ.

ຕຕ຺ຣາຕິ ‘‘ຠິກ຺ຂູ ອາມນ຺ເຕສີ’’ຕິ ເຍ ຠິກ຺ຂູ ອາມນ຺ເຕສິ, ຍຖາ ຈາຍໍ ເທສນາ ເຕສໍ ສປ຺ປາຍາ ຊາຕາ, ຕຕ຺ຣ ຕສ຺ມິໍ ອຕ຺ຖທ຺ວເຍ ວິຠາເວຕພ຺ເພ ອຍໍ ອນຸປຸພ຺ພິກຖາ ສມຸທາຄມໂຕ ປຏ຺ຐາຍ ອນຸປຏິປາຏິກຖາ. ອິໂຕຕິ ອິມສ຺ມາ ກປ຺ປໂຕ. ກິຣາຕິ ອນຸສ຺ສວນຕ຺ເຖ ນິປາໂຕ. ປາຣມິຕາປຣິຠາວນາຍ ປຣິປາກຄເຕ. ຎາເຓຕິ ໂພຘິຎາເຓ. ກນິຏ຺ຐປຸຕ຺ໂຕ ເວມາຕິກຠາຕາ ຠຄວໂຕ. ເວຬຸຠິຕ຺ຕິກຸຏິກາຫິ ປຣິກ຺ຂິປິຕ຺ວາ ພຫິທ຺ຘາ, ອນ຺ໂຕ ປນ ປຏສາຓີຫິ.

ສພ຺ເພສໍ ສຕ຺ຕານໍ. ປຸຎ຺ຎເຈຕນໍ ອນ຺ໂຕ ອພ຺ຠນ຺ຕເຣ ປເວເສຕິ. ຠຄວາປິ ຕສ຺ສ ປຸຕ຺ໂຕຕິ ກຕ຺ວາ ‘‘ອຎ຺ເຎ ຕໂຍ ປຸຕ຺ຕາ’’ຕິ ວຸຕ຺ຕໍ. ອວິປ຺ປກິຣິຕ຺ວາຕິ ປຣາຊເຍນ ອວິປ຺ປກິຣິຍ ອປລາຍິຕ຺ວາ. ປິທຫີຕິ ທາຕຸໍ ນ ສກ຺ໂກມີຕິ ຕຖາ ອກາສິ. ສຈ຺ຈວາທິຕາຍ ຄຓ຺ຫິໍສູຕິ ຣາຊກຸລສ຺ສ ສຈ຺ຈວາທິຕາຍ ອຕ຺ຕໂນ ວຣໍ ຄຓ຺ຫິໍສຸ.

ວິນິວຕ຺ຕິຕຸນ຺ຕິ ປຏິຎ຺ຎາຍ ນິວຕ຺ຕິຕຸໍ. ອນ຺ຕຣາຕິ ຕຸມ຺ເຫຫິ ປຣິຈ຺ຉິນ຺ນກາລສ຺ສ ອນ຺ຕຣາ ເອວ ມຕາ. ອຏ຺ຐວີສຕິຫຕ຺ຖຏ຺ຐານໍ ອຸສຠໍ ນາມ. ອຸສເຠ ອຏ຺ຐວີສຕິຫຕ຺ຖປ຺ປມາເຓ ຐາເນ. ທານຄ຺ເຄ ພ຺ຍາວໂຏຕິ ປສຸໂຕ.

ໂສຕິ ຠຄວາ. ຕຖາຣູປຎ຺ຫິ ພຸທ຺ຘານໍ ເທສນາປາຏິຫາຣິຍໍ, ຍຖາ ເທສນາຍ ຄຫິໂຕ ອຕ຺ໂຖ ປຈ຺ຈກ຺ຂໂຕ ວິຠູໂຕ ຫຸຕ຺ວາ ອຸປຏ຺ຐາຕິ. ເຕນາຫ ‘‘ອິເມສໍ…ເປ… ເທເສສ຺ສາມີ’’ຕິ. ສນ຺ນິຏ຺ຐານນ຺ຕິ ຈິຣກາລປຣິຈິຕາທິຕ຺ຕອຄ຺ຄິການໍ ອາທິຕ຺ຕປຣິຍາຍເທສນາວ ສປ຺ປາຍາຕິ ນິຈ຺ຉຍມກາສິ. ປທິຕ຺ຕນ຺ຕິ ປທີປິຕໍ ເອກາທສຫິ ອຄ຺ຄີຫິ ເອກຊາລີຠູຕໍ. ເຕນາຫ ‘‘ສມ຺ປຊ຺ຊລິຕ’’ນ຺ຕິ. ທຸກ຺ຂລກ຺ຂຓໍ ກຖິຕໍ ຈກ຺ຂາທີນໍ ເອກາທສຫິ ອຄ຺ຄີຫິ ອາທິຕ຺ຕຠາເວນ ທຸກ຺ຂມຕາຍ ທຸກ຺ຂສ຺ສ ກຖິຕຕ຺ຕາ.

ອາທິຕ຺ຕສຸຕ຺ຕວຓ຺ຓນາ ນິຏ຺ຐິຕາ.