໒. ຍມກວຄ຺ໂຄ

໑-໔. ປຐມປຸພ຺ເພສມ຺ໂພຘສຸຕ຺ຕາທິວຓ຺ຓນາ

໑໓-໑໖. ທ຺ວີສຸປິ ສຸຕ຺ເຕສຸ ອາຍຕນານໍ ວເສນ ເທສນາ ເອກຣສາວາຕິ ‘‘ປຐມທຸຕິເຍສູ’’ຕິ ເອກຊ຺ຌໍ ປທຸທ຺ຘາໂຣ ກໂຕ. ອາຫິໂຕ ອຫໍມາໂນ ເອຕ຺ຖາຕິ ອຕ຺ຕາ, ອຕ຺ຕຠາໂວ. ອຕ຺ຕານມຘິ ອຊ຺ຌຕ຺ຕໍ, ຕປ຺ປຣິຍາປນ຺ນຕ຺ຕາ ຕຕ຺ຖ ຠວານິ ອຊ຺ຌຕ຺ຕິການິ, ເຕສໍ ອຊ຺ຌຕ຺ຕິການໍ. ອຊ຺ຌຕ຺ຕຎ຺ຈ ນາມ ອຊ຺ຌຕ຺ຕຊ຺ຌຕ຺ຕໍ, ນິຍກຊ຺ຌຕ຺ຕໍ, ໂຄຈຣຊ຺ຌຕ຺ຕໍ, ວິສຍຊ຺ຌຕ຺ຕນ຺ຕິ ຈຕຸພ຺ພິຘໍ. ຕຕ຺ຖ ອຊ຺ຌຕ຺ຕຊ຺ຌຕ຺ຕໍ ອຊ຺ຌຕ຺ເຕ ຠວນ຺ຕິ ອຊ຺ຌຕ຺ຕິກນ຺ຕິ ອາຫ ‘‘ອຊ຺ຌຕ຺ຕຊ຺ຌຕ຺ຕວເສນ ອຊ຺ຌຕ຺ຕິການ’’ນ຺ຕິ. ເຕສໍ ຈກ຺ຂາທີນໍ ອຊ຺ຌຕ຺ເຕສຸປິ ອຊ຺ຌຕ຺ຕິກຠາໂວ ອຘິກສິເນຫວຕ຺ຖຸຕາຍາຕິ ອາຫ ‘‘ຉນ຺ທຣາຄສ຺ສ ອຘິມຕ຺ຕພລວຕາຍາ’’ຕິ. ອິທານິ ຕຕ຺ຖ ຕມຕ຺ຖໍ ປຏິໂຍຄິນາ ສທ຺ຘິໍ ອຸທາຫຣຓວເສນ ທສ຺ເສນ຺ໂຕ ‘‘ມນຸສ຺ສານໍ ຫີ’’ຕິອາທິມາຫ. ຕໍ ອຸຕ຺ຕານເມວ. ພາຫິຣານີຕິ ອຊ຺ຌຕ຺ຕິກໂຕ ພຫິ ຠວານິ.

ປຐມປຸພ຺ເພສມ຺ໂພຘສຸຕ຺ຕາທິວຓ຺ຓນາ ນິຏ຺ຐິຕາ.

໕-໖. ປຐມໂນເຈອສ຺ສາທສຸຕ຺ຕາທິວຓ຺ຓນາ

໑໗-໑໘. ນິກ຺ຂນ຺ຕາຕິ ໂລກໂຕ ນິກ຺ຂນ຺ຕາ. ວິສໍຍຸຕ຺ຕາ ສໍໂຍຄເຫຕູນໍ ກິເລສານໍ ປຫີນຕ຺ຕາ ໂນ ສໍຍຸຕ຺ຕາ. ໂນ ອຘິມຸຕ຺ຕາຕິ ນ ອຸສ຺ສຸກ຺ກຊາຕາ. ວິມຣິຍາທີ…ເປ… ເຈຕສາຕິ ວິຄຕກິເລສວຏ຺ຏມຣິຍາທຕາຍ ນິມ຺ມຣິຍາທີກເຕນ ຈິຕ຺ເຕນ. ຈຕຸສຈ຺ຈເມວ ກຖິຕໍ ຈກ຺ຂາທີນໍ ອສ຺ສາທາທິໂນ ກຖິຕຕ຺ຕາ.

ປຐມໂນເຈອສ຺ສາທສຸຕ຺ຕາທິວຓ຺ຓນາ ນິຏ຺ຐິຕາ.

໗-໑໐. ປຐມາຠິນນ຺ທສຸຕ຺ຕາທິວຓ຺ຓນາ

໑໙-໒໒. ວຏ຺ຏວິວຏ຺ຏເມວ ກຖິຕໍ ອຠິນນ຺ທນານໍ ອຸປ຺ປາທນິໂຣຘານຎ຺ຈ ວເສນ ເທສນາຍ ປວຕ຺ຕຕ຺ຕາ. ອນຸປຸພ຺ພກຖາຕິ ອາທິໂຕ ປຏ຺ຐາຍ ປທຕ຺ຖວຓ຺ຓນາ. ເນສນ຺ຕິ ສຸຕ຺ຕານໍ.

ປຐມາຠິນນ຺ທສຸຕ຺ຕາທິວຓ຺ຓນາ ນິຏ຺ຐິຕາ.

ຍມກວຄ຺ຄວຓ຺ຓນາ ນິຏ຺ຐິຕາ.