໒. ຣໂຖປມສຸຕ຺ຕວຓ຺ຓນາ

໒໓໙. ສຸສໍວຸຕິນ຺ທ຺ຣິຍສ຺ສ ໂຠຊເນ ມຕ຺ຕຎ຺ຎຸໂນ ສຕສ຺ສ ສມ຺ປຊານສ຺ສ ວິຫຣໂຕ ກິເລສນິມິຕ຺ຕໍ ທຸກ຺ຂໍ ອນວສຣນ຺ຕິ ສຸຂໂສມນສ຺ສພຫຸລຕາ ວຸຕ຺ຕາ. ຍວຕິ ເຕນ ຜລໍ ມິສ຺ສິຕໍ ວິຍ ໂຫຕີຕິ ໂຍນິ, ເອກນ຺ຕິກໍ ກາຣຓໍ. ອສ຺ສາຕິ ຠິກ຺ຂຸໂນ. ປຣິປຸຓ຺ຓນ຺ຕິ ອວິກລໍ. ອນວເສສໍ ອາສເວ ເຂເປຕີຕິ ອາສວກ຺ຂໂຍ, ອຄ຺ຄມຄ຺ໂຄ. ຍໍ ຍນ຺ຕິ ທນ຺ຘໍ ມຊ຺ຌໍ ຊໂວຕິ ຊວາທີສຸ ຍໍ ຍໍ ຄມນໍ. ຣກ຺ຂຓຕ຺ຖາຍາຕິ ກິເລສໂຈເຣຫິ ຣກ຺ຂຓຕ຺ຖາຍ. ເວຄນິຄ຺ຄຫຓຕ຺ຖາຍາຕິ ກິເລສເຫຕຸກສ຺ສ ອິນ຺ທ຺ຣິຍເວຄສ຺ສ ນິຄ຺ຄຓ຺ຫນຕ຺ຖາຍ. ນິພ຺ພິເສວນຕ຺ຖາຍາຕິ ວິເສວນສ຺ສ ວິປ຺ຜນ຺ທິຕສ຺ສ ນິໂຣຘນາຍ. ກິເລສູປສມຕ຺ຖາຍາຕິ ກິເລສານໍ ອຸປຣູປຣິ ສມນຕ຺ຖາຍ ວູປສມນຕ຺ຖາຍ.

ສມຓຣຕິ ນາມ ສມຖວິປສ຺ສນາມຄ຺ຄຜລສຸຂານິ. ທນ຺ຕານມ຺ປິ ສິນ຺ຘວານໍ ສາຣຖິໂນ ປໂຍເຄນ ສິຍາ ກາຈິ ວິເສວນມຕ຺ຕາຕິ ຕທຠາວໍ ທສ຺ເສນ຺ໂຕ ‘‘ນິພ຺ພິເສວເນ ກຕ຺ວາ ເປເສນ຺ໂຕ’’ຕິ ວຸຕ຺ຕໍ. ຎາຓໍ ຄຈ຺ຉຕີຕິ ອສງ຺ຄມນໍ ປວຕ຺ຕຕິ ປເຄວ ອິນ຺ທ຺ຣິຍຠາວນາຍ ກຕຕ຺ຕາ, ກິເລສນິຄ຺ຄຫສ຺ສ ສຸເຂເນວ ສິທ຺ຘຕ຺ຕາ. ທາຍກສ຺ສ ອຊ຺ຌາສໂຍ ວໂສ ອຸຬາໂຣ ລາມໂກ. ເທຍ຺ຍຘມ຺ມສ຺ສ ປມາຓໍ ວໂສ ອປ຺ປກໍ ພຫຸກຎ຺ຈ.

ມຫາມຓ຺ຑປຏ຺ຐານໍ ນາມ ໂລຫປາສາທສ຺ສ ປຸຣໂຕ ເອວ ມຫາຠິກ຺ຂຸສງ຺ຆສ຺ສ ສນ຺ນິປາຕກາເລ ເຕສໍ ປໂຫນກວເສນ ມຫາມຓ຺ຑປສ຺ສ ກຕ຺ຕພ຺ພຏ຺ຐານໍ. ຄຫຓມານນ຺ຕິ ປຣິວິສຄຫຓຠາຊນໍ.

ປກຕິຍາ ຠຕ຺ຕກາຣກິຈ຺ເຈ ອຘິຄໂຕ ອຸປຏ຺ຐາກຸປາສໂກ. ມຸທຸສມຂຣສຎ຺ຎິເຕຫິ, ທຫນປຈນຠຊ຺ຊນສຎ຺ຎິເຕຫິ ວາ ຕີຫິ ປາເກຫິ.

ປຣິໂສເຘຕ຺ວາຕິ ຣຎ຺ໂຎ ອນຸຈ຺ຉວິກຠາວໍ ປຣິໂສເຘຕ຺ວາ. ຠູມິຍໍ ຉຑ຺ເຑສິ ‘‘ຠິກ຺ຂູນໍ ອທຕ຺ວາ ມຍາ ມຸເຂ ປກ຺ຂິຕ຺ຕ’’ນ຺ຕິ. ມຸເຂນ ຄຓ຺ຫິ ຕສ຺ສ ນິທ຺ໂທສຠາວໍ ທສ຺ເສຕຸໍ. ມຕ຺ຕໍ ຊານາເປຕຸໍ ປມຊ຺ຊິ. ‘‘ຕ຺ວໍ ກຸໂຕ ອາຄໂຕ’’ຕິ ປຸຈ຺ຉເນ ປມາທໍ ອາປຊ຺ຊິ. ອນຸຠາໂຄຕິ ອວສິຏ຺ຐຠາໂຄ. ອິທມຕ຺ຖິຍນ຺ຕິ ອິທໍ ປໂຍຊນໍ. ອິຕຣນ຺ຕິ ປາຬິຍໍ ອນາຄຕມ຺ປິ ອາຫາເຣ ປມາຓຊານນໍ.

ສຍນໍ ເສຍ຺ຍາ, ກາມໂຠຄີນໍ ເສຍ຺ຍາ ກາມໂຠຄິເສຍ຺ຍາ. ທກ຺ຂິຓປສ຺ເສນ ສຍາໂນ ນາມ ນຕ຺ຖິ ທກ຺ຂິຓຫຕ຺ເຖນ ກາຕພ຺ພກິຈ຺ຈກຣຓໂຕ. ເຕຊຸສ຺ສທຕ຺ຕາຕິ ອິທໍ ອນຸຕ຺ຣາສສ຺ເສວ ສີຫສ຺ສ ສຍນນ຺ຕິ ທສ຺ເສຕຸໍ ວຸຕ຺ຕໍ. ທ຺ເວ ປຸຣິມປາເທ ເອກສ຺ມິໍ, ປຈ຺ຉິມປາເທ ເອກສ຺ມິໍ ຐາເນ ຐເປຕ຺ວາຕິ ຫິ ອິທໍ ປາທານໍ ອວິກ຺ຂິຕ຺ຕຠາວກຣຓທສ຺ສນໍ.

ຈຕຸຕ຺ຖຊ຺ຌານເສຍ຺ຍາຕິ ຈຕຸຕ຺ຖຊ຺ຌານິກໍ ຜລສມາປຕ຺ຕິໍ ວທຕິ. ເຍຠຸຍ຺ເຍນ ຫິ ຕຖາຄຕາ ຜລສມາປຕ຺ຕິໍ ສມາປຊ຺ຊິຕ຺ວາວ ສຍນ຺ຕິ. ສາ ຈ ເນສໍ ຈຕຸຕ຺ຖຊ຺ຌານໂຕ ວຸຏ຺ຐາຍ, ກິເລສປຣິນິພ຺ພານສ຺ສ ຈ ກຕຕ຺ຕາຕິ ວທນ຺ຕິ. ອິຘ ສີຫເສຍ຺ຍາ ອາຄຕາ ປາທໍ ອຈ຺ຈາຘາຍ ປຸພ຺ເພນາປຣໍ ອຊຫິຕສໍລກ຺ຂຓາ ເສຍ຺ຍາຕິ ກຕ຺ວາ. ເຕນາຫ ‘‘ອຍໍ ຫີ’’ຕິອາທິ. ເອວນ຺ຕິ ‘‘ທກ຺ຂິເຓນ ປສ຺ເສນາ’’ຕິອາທິນາ ວຸຕ຺ຕາກາເຣນ ເສຍ຺ຍໍ ກປ຺ເປຕິ.

ກຖໍ ນິທ຺ທາຍນ຺ໂຕ ສໂຕ ສມ຺ປຊາໂນ ໂຫຕິ? ຠວງ຺ຄຈິຕ຺ເຕນ ຫິ ນິທ຺ທູປຄມນນ຺ຕິ ອຘິປ຺ປາໂຍ. ອປ຺ປຫາເນນາຕິ ຕທຘິມຸຕ຺ຕຕາຍ ຕທປ຺ປຫານໍ ທຏ຺ຐພ຺ພໍ. ຕຖາ ເຕສຸ ນິທ຺ໂທກ຺ກມນສ຺ສ ອາທິປຣິໂຍສາເນສຸ ອຊຫິຕສຕິສມ຺ປຊຎ຺ຎໍ ໂຫຕິ. ເຕນາຫ – ‘‘ນິທ຺ທໍ ໂອກ຺ກມນ຺ໂຕປິ ສໂຕ ສມ຺ປຊາໂນ ໂຫຕີ’’ຕິ. ເອຕໍ ປນາຕິ ‘‘ນິທ຺ທໍ ໂອກ຺ກມນ຺ໂຕປິ ສໂຕ ສມ຺ປຊາໂນ ໂຫຕີ’’ຕິ ວຸຕ຺ຕນຍໍ ວທຕິ. ຎາຓຘາຕຸກນ຺ຕິ ນ ໂຣຈຍິໍສູຕິ ນິທ຺ໂທກ຺ກມເນປິ ຊາຄຣເຓ ປວຕ຺ຕຎາຓສຠາວເມວາຕິ ນ ໂຣຈຍິໍສຸ ໂປຣາຓາ. ນິຣນ຺ຕຣໍ ຠວງ຺ຄຈິຕ຺ເຕສຸ ວຕ຺ຕມາເນສຸ ສຕິສມ຺ປຊຎ຺ຎາສມ຺ຠໂວຕິ ອຘິປ຺ປາໂຍ. ປຸຣິມສ຺ມິຎ຺ຫິ ນເຍ ສຕິສມ຺ປຊຎ຺ຎສ຺ສ ອສໍວໂຣ, ນ ຠວງ຺ຄສ຺ສ. ອິນ຺ທ຺ຣິຍສໍວໂຣ, ໂຠຊເນ ມຕ຺ຕຎ຺ຎຸຕາ, ຊາຄຣິຍານຸໂຍໂຄຕິ ອິເມຫິ ຕິວງ຺ຄິກາ, ນິມິຕ຺ຕານຸພ຺ຍຎ຺ຊນປຣິວຊ຺ຊນາທິ ສພ຺ພໍ ວິປສ຺ສນາປກ຺ຂິກເມວາຕິ ອຘິປ຺ປາໂຍ.

ຕາເນວາຕິ ວິປສ຺ສນາກ຺ຂເຓ ປວຕ຺ຕານິ ອິນ຺ທ຺ຣິຍາທີນິ. ຍາວ ອຣຫຕ຺ຕາ ເທສນາ ວິຕ຺ຖາຣໂຕ ກເຖຕພ຺ພາ. ປາຬິຍໍ ປນ ‘‘ໂຍນິ ຈສ຺ສ ອາຣທ຺ຘາ ໂຫຕິ ອາສວານໍ ຂຍາຍາ’’ຕິ ສງ຺ເຂເປນ ກຖິຕາ.

ຣໂຖປມສຸຕ຺ຕວຓ຺ຓນາ ນິຏ຺ຐິຕາ.