໑໐. ຉປ຺ປາຓໂກປມສຸຕ຺ຕວຓ຺ຓນາ

໒໔໗. ວຓສຣີໂຣຕິ ວຓິຕສຣີໂຣ. ປກ຺ກຕ຺ຕາຕິ ກຸຖິຕຕ຺ຕາ. ສຣທຓ຺ເຑສຸ ສຣສມຎ຺ຎາຕິ ກຓ຺ຑ-ສທ຺ໂທ ສຣປຣິຍາໂຍຕິ ອາຫ – ‘‘ສຣວນນ຺ຕິ ກຓ຺ຑວນ’’ນ຺ຕິ. ອຣຸຄຕ຺ໂຕ…ເປ… ເວທິຕພ຺ໂພ ຄຸຓສຣີຣສ຺ສ ຂຓ຺ຑຉິທ຺ທສີລາທີຫິ ເຫຏ຺ຐາ ມຊ຺ເຌ ອຸປຣິຠາເຄ ຈ ເຠທວິສມຈ຺ຉິນ຺ນວິກາຣໂທສຕ຺ຕາ. ເອຕ຺ຖ ກຸສາ ‘‘ກຓ຺ຏກາ’’ຕິ ອຘິປ຺ເປຕາ ກຓ຺ຏກສທິສຕ຺ຕາ, ກຸສຕິຓານໍ ເອວ ວາ ວຸຕ຺ຕາກາຣປເທໂສ ‘‘ກຸສກຓ຺ຏໂກ’’ຕິ ວຸຕ຺ໂຕ.

ຄາມວາສີນໍ ວິຊ຺ຌນຏ຺ເຐນາຕິ ນາຣໂຫວ ຫຸຕ຺ວາ ເຕສໍ ກາຣານໍ ປຏິຄ຺ຄຫຓວເສນ ປີຬນຏ຺ເຐນ.

ປກ຺ຂິນ຺ຕິ ຫຕ຺ຖິລິງ຺ຄສກຸຓໍ. ຕສ຺ສ ກິຣ ຫຕ຺ຖິໂສຓ຺ຑສທິສໍ ມຸຂໍ, ຕສ຺ມາ ‘‘ຫຕ຺ຖິໂສຓ຺ຑສກຸຓ’’ນ຺ຕິ ວຸຕ຺ຕໍ. ວິສ຺ສຊ຺ເຊຍ຺ຍາຕິ ຣຊ຺ຊຸຍາ ຍຖາພທ຺ຘໍ ເອວ ວິສ຺ສຊ຺ເຊຍ຺ຍ.

ໂຠເຄຫີຕິ ອຕ຺ຕໂນ ສຣີຣໂຠເຄຫິ. ມຓ຺ຑລໍ ພນ຺ຘິຕ຺ວາຕິ ຍຖາ ສຣີຣໍ ມຓ຺ຑລາກາເຣນ ຕິຏ຺ຐຕິ, ເອວໍ ກຕ຺ວາ. ສຸປິສ຺ສາມີຕິ ນິທ຺ທໍ ໂອກ຺ກມິສ຺ສາມິ. ເຑຕຸກາໂມຕິ ອຸປ຺ປຕິຕຸກາໂມ. ທິສາ ທິສນ຺ຕິ ທິສໂຕ ທິສໍ.

ຉ ປາຓກາ ວິຍ ຉ ອາຍຕນານິ ນານຊ຺ຌາສຍຕ຺ຕາ, ນານຊ຺ຌາສຍຕາ ຈ ເນສໍ ນານາວິສຍນິນ຺ນຕາຍ ທຏ຺ຐພ຺ພາ. ທຬ຺ຫຣຊ຺ຊຸ ວິຍ ຕຓ຺ຫາ ເຕສໍ ພນ຺ຘນໂຕ. ມຊ຺ເຌ ຄຓ຺ຐິ ວິຍ ອວິຊ຺ຊາ ພນ຺ຘນສ຺ສ ທຸພ຺ພິນິມ຺ໂມຈນເຫຕຸໂຕ. ອາຣມ຺ມຓໍ ພລວໍ ໂຫຕິ ມນຸຎ຺ຎຠາເວນ ເຈວ ຕຕ຺ຖ ຕຓ຺ຫາຠິນິເວສສ຺ສ ທຬ຺ຫຠາເວນ ຈ.

ສຣິກ຺ຂເກນ ວາ ອຸປມາຍ ອາຫຣຓປກ຺ເຂ. ອປ຺ປນາຕິ ສໍສນ຺ທນາ. ປາຬິຍໍເຍວ ອປ຺ປິຕາ ອຸປມາ ‘‘ເອວເມວ ໂຂ’’ຕິອາທິນາ. ຣູປຈິຕ຺ຕາທິວິສມນິນ຺ນຕ຺ຕາ ຈກ຺ຂຸສ຺ສ ວິສມຊ຺ຌາສຍຕາ. ເອສ ນໂຍ ເສເສສຸປິ.

ກຓ຺ຓຈ຺ຉິທ຺ທກູປເກຕິ ກຓ຺ຓຈ຺ຉິທ຺ທສຎ຺ຎິເຕ ອາວາເຏ. ຕສ຺ສາຕິ ໂສຕສ຺ສ. ປຈ຺ຈໂຍ ໂຫຕີຕິ ອຸປນິສ຺ສໂຍ ໂຫຕິ ເຕນ ວິນາ ສທ຺ທຄ຺ຄຫຓສ຺ສ ອຠາວໂຕ. ‘‘ອຊຏາກາໂສປິ ວຏ຺ຏຕິ ເອວາ’’ຕິ ວຕ຺ວາ ຕສ຺ສ ປຈ຺ຈຍຠາວໍ ທສ຺ເສຕຸໍ ‘‘ອນ຺ໂຕເລຓສ຺ມິ’’ນ຺ຕິອາທິ ວຸຕ຺ຕໍ. ຘາຕຸປຣມ຺ປຣາ ຆຏ຺ເຏນ຺ໂຕຕິ ຠູຕປຣມ຺ປຣາສງ຺ຆຏ຺ເຏນ຺ໂຕ.

ເອວໍ ສນ຺ເຕຕິ ເອວໍ ຠູຕປຣມ຺ປຣາວເສນ ສທ຺ເທ ໂສຕປຖມາຄຈ຺ຉນ຺ເຕ. ສມ຺ປຕ຺ຕໂຄຈຣຕາ ໂຫຕິ ໂສຕສ຺ສ. ຆານາທີນໍ ວິຍ ‘‘ທູເຣ ສທ຺ໂທ’’ຕິ ຊານນໍ ນ ສມ຺ຠເວຍ຺ຍ ສມ຺ປຕ຺ຕຄາຫິຠາວໂຕ. ຕຖາ ຕຖາ ຊານນາກາໂຣ ໂຫຕິ ມໂນວິຎ຺ຎາຓສ຺ສ ຄຫຓາກາຣວິເສສໂຕ. ໂສຕວິຎ຺ຎາຓປ຺ປວຕ຺ຕິ ປນ ອຸຠຍຕ຺ຖ ສມານາວ. ທູເຣ ຐິໂຕປິ ສທ຺ໂທ ຕາທິເສ ຐາເນ ປຏິໂຆສາທີນໍ ປຈ຺ຈໂຍ ໂຫຕິ ອໂຍກນ຺ໂຕ ວິຍ ອໂຍຈລນສ຺ສາຕິ ທຏ຺ຐພ຺ພໍ. ຘມ຺ມຕາຕິ ຘມ຺ມສຠາໂວ, ສທ຺ທສ຺ສ ໂສ ສຠາໂວຕິ ອຕ຺ໂຖ. ຕໂຕ ຕໂຕ ສວນໍ ໂຫຕິ ອາກາສສຎ຺ຎິຕສ຺ສ ອຸປນິສ຺ສຍສ຺ສ ລພ຺ຠນໂຕ. ຍທິ ປນ ໂສຕໍ ສມ຺ປຕ຺ຕຄາຫີ ສິຍາ, ຈິຕ຺ຕສມຸຏ຺ຐານສທ຺ໂທ ໂສຕວິຎ຺ຎາຓສ຺ສ ອາຣມ຺ມຓປຈ຺ຈໂຍ ນ ສິຍາ. ປຏ຺ຐາເນ ຈ ອວິເສເສນ ‘‘ສທ຺ທາຍຕນໍ ໂສຕວິຎ຺ຎາຓສ຺ສ ອາຣມ຺ມຓປຈ຺ຈເຍນ ປຈ຺ຈໂຍ’’ຕິ ວຸຕ຺ໂຕ, ພຫິທ຺ຘາ ຈ ຈິຕ຺ຕຊສ຺ສ ສທ຺ທສ຺ສ ສມ຺ຠໂວ ນຕ຺ຖິ. ອຖ ວາ ຈິຕ຺ຕໂຊ ສທ຺ໂທ ຘາຕຸປຣມ຺ປຣາຍ ໂສຕປສາທໍ ຆຏ຺ເຏຕິ, ນ ໂສ ຈິຕ຺ຕໂຊ ສທ຺ໂທ, ໂຍ ປຣມ຺ປຣາຍ ປວຕ຺ໂຕ. ອຸຕຸໂຊ ຫິ ໂສ, ຕສ຺ມາ ຍຖຸປ຺ປນ຺ໂນ ສທ຺ໂທ, ຕຕ຺ຖ ຐິໂຕວ ໂສຕປສາທສ຺ສ ອາປາຖໍ ອາຄຈ຺ຉຕີຕິ ນິຏ຺ຐເມຕ຺ຖ ຄນ຺ຕພ຺ພໍ. ເຕນ ວຸຕ຺ຕໍ ‘‘ອສມ຺ປຕ຺ຕໂຄຈຣເມເວຕ’’ນ຺ຕິ.

ຕທາ ເອກຄ຺ຄຈິຕ຺ຕຕໍ ອາປຊ຺ຊຕິ ປຣິສ຺ສຍານໍ ອຠາວໂຕ. ນາສຈ຺ຉິທ຺ທສງ຺ຂາຕອາກາສສນ຺ນິສ຺ສເຍ ວຕ຺ຕນໂຕ ຆານໍ ອາກາສຊ຺ຌາສຍໍ ວຸຕ຺ຕໍ. ວາເຕນ ວິນາ ຄນ຺ຘຄຫຓສ຺ສ ອສມ຺ຠວໂຕ ວາຕູປນິສ຺ສຍຄນ຺ຘໂຄຈຣໍ. ເຕນາຫ ‘‘ຕຖາ ຫີ’’ຕິອາທິ.

ຄາມໂຕ ລທ຺ຘພ຺ພໍ ອາຫາຣໍ ຄາມໍ, ຕນ຺ນິນ຺ນຕາຍ ຄາມຊ຺ຌາສຍຕາ ວຸຕ຺ຕາ. ຕຖາ ຫິ ຊີວິຕນິມິຕ຺ຕໍ ຣໂສ ຊີວິຕໍ, ຕສ຺ມິໍ ນິນ຺ນຕາຍ ຕໍ ອວ຺ຫາຍຕີຕິ ຊິວ຺ຫາ. ນ ສກ຺ກາ ເຂເຬນ ອເຕມິຕສ຺ສ ຣສໍ ຊານິຕຸໍ, ຕສ຺ມາ ອາໂປສນ຺ນິສ຺ສິຕຣສາຣມ຺ມຓາ ຊິວ຺ຫາຕິ.

ອາມກສຸສານໂຕ ພຫິ. ອຸປາທິຓ຺ຓກຊ຺ຌາສໂຍຕິ ອຸປາທິຓ຺ຓກນິນ຺ໂນ. ກາຍປສາທສນ຺ນິສ຺ສຍຠູຕາຍ ປຖວິຍາ ໂຜຏ຺ຐພ຺ພາຣມ຺ມເຓ ຆຏິເຕ ເອວ ຕຕ຺ຖ ວິຎ຺ຎາຓຸປ຺ປຕ຺ຕິ, ນ ອຎ຺ຎຖາຕິ ວຸຕ຺ຕໍ ‘‘ປຖວີສນ຺ນິສ຺ສິຕໂຜຏ຺ຐພ຺ພາຣມ຺ມໂຓ’’ຕິ. ຕຖາ ຫີຕິອາທິ ກາຍສ຺ສ ອຸປາທິຓ຺ຓກຊ຺ຌາສຍຕາຍ ສາຘກໍ. ອຊ຺ຌຕ຺ຕິກພາຫິຣາຕິ ອຊ຺ຌຕ຺ຕິກາ ພາຫິຣາ ວາ. ອສ຺ສາຕິ ກາຍສ຺ສ. ສຸສນ຺ຖຕສ຺ສາຕິອາທິ ຕສ຺ສ ປຖວິຍາ ປຈ຺ຈຍຠາວທສ຺ສນໍ.

ນານຊ຺ຌາສໂຍຕິ ນານາຣມ຺ມຓນິນ຺ໂນ. ເຕນ ມນສ຺ສ ມກ຺ກຏສ຺ສ ວິຍ ອນວຏ຺ຐິຕຕໍ ທສ຺ເສຕິ. ເຕນາຫ ‘‘ທິຏ຺ຐປຸພ຺ເພປີ’’ຕິອາທິ. ມູລຠວງ຺ຄຄ຺ຄຫເຓນ ປິຏ຺ຐິຠວງ຺ຄໍ ນິວຕ຺ເຕຕິ. ອສ຺ສາຕິ ມນສ຺ສ. ເອວໍ ກິຣິຍມຍໍ ວິຎ຺ຎາຓໍ ທຏ຺ຐພ຺ພໍ. ນານຕ຺ຕນ຺ຕິ ເຠໂທ.

ຍຖາຣຸຈິປ຺ປວຕ຺ຕິຍາ ນິວາຣຓວເສນ ພທ຺ຘານໍ. ນິພ຺ພິເສວນຠາວນ຺ຕິ ໂລລຕາສງ຺ຂາຕປຣິປ຺ຜນ຺ທສ຺ສ ອຠາວໍ. ນາກຑ຺ຒຕີຕິ ສວິສເຍ ຣູປາຣມ຺ມເຓ ຈິຕ຺ຕສນ຺ຕານໍ, ຕໍສມງ຺ຄິນໍ ວາ ປຸຄ຺ຄລໍ ນາກຑ຺ຒຕິ. ປຸພ຺ພຠາຄວິປສ຺ສນາວ ກຖິຕາ ອາຍຕນມຸເຂນ ‘‘ເອວຎ຺ຫິ ໂວ, ຠິກ຺ຂເວ, ສິກ຺ຂິຕພ຺ພ’’ນ຺ຕິ ວຸຕ຺ຕຕ຺ຕາ.

ຉປ຺ປາຓໂກປມສຸຕ຺ຕວຓ຺ຓນາ ນິຏ຺ຐິຕາ.