໘. ອາທິຕ຺ຕປຣິຍາຍສຸຕ຺ຕວຓ຺ຓນາ

໒໓໕. ກິເລສານໍ ອນຸ ອນຸ ພ຺ຍຎ຺ຊນໂຕ ປຣິພ຺ຍຕ຺ຕິຍາ ອຸປ຺ປຕ຺ຕິປຈ຺ຈຍຠາວໂຕ ອນຸພ຺ຍຎ຺ຊນໍ, ຫຕ຺ຖປາທາທິອວຍວາຕິ ອາຫ – ‘‘ຫຕ຺ຖາ ໂສຠນາ’’ຕິອາທິ. ນິມິຕ຺ຕຄ຺ຄາໂຫຕິ ກິເລສຸປ຺ປຕ຺ຕິຍາ ນິມິຕ຺ຕຠູໂຕ ຄາໂຫ. ສໍສນ຺ເທຕ຺ວາ ຄຫຓນ຺ຕິ ອວຍເວ ສໂມຘາເນຕ຺ວາ ‘‘ອິຕ຺ຖິປຸຣິໂສ’’ຕິອາທິນາ ເອກຊ຺ຌໍ ຄຫຓໍ. ວິຠຕ຺ຕິຄຫຓນ຺ຕິ ວິຠາເຄນ ອນວເສສຄ຺ຄຫຓໍ. ກຸມ຺ຠີລສທິໂສຕິ ກຸມ຺ຠີລຄາຫສທິໂສ. ເຕນາຫ – ‘‘ສພ຺ພເມວ ຄຓ຺ຫາຕີ’’ຕິ ຫຕ຺ຖປາທາທີສຸ ຕໍ ຕໍ ໂກຏ຺ຐາສໍ ວິຠຊິຕ຺ວາ ຄຫຓໍ ຣຕ຺ຕປາສທິໂສ ຊລູກຄາຫສທິໂສ. ເອກຊວນວາເຣປິ ລພ຺ຠນ຺ຕີຕິ ອິທໍ ຈກ຺ຂຸທ຺ວາຣານຸສາເຣນ ອຸປ຺ປນ຺ນມໂນທ຺ວາຣິກຊວນໍ ສນ຺ຘາຍ ວຸຕ຺ຕໍ.

ນິມິຕ຺ຕສ຺ສາເທນ ຄນ຺ຖິຕນ຺ຕິ ຍຖາວຸຕ຺ເຕ ນິມິຕ຺ເຕ ອສ຺ສາທຄາເຫນ ຄນ຺ຖິຕໍ ສມ຺ພທ຺ຘໍ. ຠວງ຺ເຄເນວາຕິ ມູລຠວງ຺ເຄເນວ. ກິເລສຠຍໍ ທສ຺ເສນ຺ໂຕຕິ ຕຖາ ກິເລສຸປ຺ປຕ຺ຕິຍາ ສຕິ ອກຸສລຈິຕ຺ເຕນ ອນ຺ຕຣິຕໍ ເຈ ມຣຓຈິຕ຺ຕໍ ຠເວຍ຺ຍ, ເອກນ຺ຕໂຕ ນິຣເຍ ວາ ຕິຣຈ຺ຉານໂຍນິຍາ ວາ ອຸປ຺ປຕ຺ຕິ ສິຍາຕິ ກິເລສານໍ ຠາຍິຕພ຺ພໍ ທສ຺ເສນ຺ໂຕ. ‘‘ສມຍວເສນ ວາ ເອວໍ ວຸຕ຺ຕ’’ນ຺ຕິ ວຕ຺ວາ ຕມຕ຺ຖໍ ວິວຣນ຺ໂຕ ‘‘ຈກ຺ຂຸທ຺ວາຣສ຺ມິຎ຺ຫີ’’ຕິອາທິມາຫ. ຣຕ຺ຕຈິຕ຺ຕໍ ວາຕິ ຣາຄວເສນ ຣຕ຺ຕຈິຕ຺ຕໍ ວາ. ທຸຏ຺ຐຈິຕ຺ເຕນ ກຖໍ ອາຣມ຺ມຓຣສານຸຠວນນ຺ຕິ? ໂທມນສ຺ສເວທນຸປ຺ປຕ຺ຕິ ເອວ ຕສ຺ສ ອາຣມ຺ມຓຣສານຸຠວນໍ ທຏ຺ຐພ຺ພໍ. ອິມສ຺ສ ສມຍສ຺ສາຕິ ມຣຓສມຍສ຺ສ.

ອຸຠິນ຺ນໍ ນາສຈ຺ຉິທ຺ທານໍ ມຊ຺ເຌ ຐິຕ-ອຏ຺ຐິຕຸທນໍ ສຫ ຂຸຣຏ຺ເຐນ ຉິນ຺ທນໍ. ທຓ຺ຑກວາສີຕິ ທີຆທຓ຺ຑກາ ມຫາວາສິ. ນິປຊ຺ຊິຕ຺ວາ ນິທ຺ໂທກ຺ກມນນ຺ຕິ ອິມິນາ ປຈລາຍິກນິທ຺ທໍ ປຏິກ຺ຂິປຕິ. ຕຕ຺ຖ ຫິ ກທາຈິ ອນ຺ຕຣາ ມິຈ຺ຉາວິຕກ຺ການໍ ສລ຺ລການໍ ອວສໂຣ ສິຍາ, ນຕ຺ເຖວ ນິປຊ຺ຊິຕ຺ວາ ມຫານິທ຺ທໍ ໂອກ຺ກນ຺ຕກາເລ. ວິຕກ຺ການນ຺ຕິ ມິຈ຺ຉາວິຕກ຺ການໍ.

ອາທິຕ຺ຕປຣິຍາຍສຸຕ຺ຕວຓ຺ຓນາ ນິຏ຺ຐິຕາ.