໘. ອຕ຺ຖິນຸໂຂປຣິຍາຍສຸຕ຺ຕວຓ຺ຓນາ

໑໕໓. ປຣິຍາຍຕິ ປຣິຄຈ຺ຉຕິ ຜລໍ ເອຕສ຺ສາຕິ ປຣິຍາໂຍ ເຫຕູຕິ ອາຫ – ‘‘ຍໍ ປຣິຍາຍນ຺ຕິ ຍໍ ກາຣຓ’’ນ຺ຕິ. ປຈ຺ຈກ຺ຂທິຏ຺ເຐ ອວິປຣີເຕ ອຕ຺ເຖ ປວຕ຺ຕສທ຺ຘາ ປຈ຺ຈກ຺ຂສທ຺ຘາ ຍຖາ ‘‘ສມ຺ມາສມ຺ພຸທ຺ໂຘ ຠຄວາ, ສ຺ວາຂາໂຕ ຘມ຺ໂມ’’ຕິ (ມ. ນິ. ໑.໒໘໘) ຈ. ເອວໍ ກິຣາຕິ ອິຕິ ກິຣາຍ ອຸປ຺ປນ຺ໂນ ສທ຺ທຫນາກາໂຣ ສທ຺ຘາປຕິຣູປໂກ. ເອຕນ຺ຕິ ‘‘ອຎ຺ຎຕ຺ເຣວ ສທ຺ຘາຍາ’’ຕິ ເອຕໍ ວຈນໍ. ຣຸຈາເປຕ຺ວາຕິ ກິຎ຺ຈິ ອຕ຺ຖໍ ອຕ຺ຕໂນ ມຕິຍາ ໂຣເຈຕ຺ວາ. ຂມາເປຕ຺ວາຕິ ຕສ຺ເສວ ເວວຈນໍ, ຈິຕ຺ຕໍ ຕຖາ ຂມາເປຕ຺ວາ. ເຕນາຫ – ‘‘ອຕ຺ເຖຕນ຺ຕິ ຄຫຓາກາໂຣ’’ຕິ. ປຣມ຺ປຣາຄຕສ຺ສ ອຕ຺ຖສ຺ສ ເອວໍ ກິຣສ຺ສາຕິ ອນຸສ຺ສວນໍ. ກາຣຓໍ ຈິນ຺ເຕນ຺ຕສ຺ສາຕິ ຍຸຕ຺ຕິໍ ຈິນ຺ເຕນ຺ຕສ຺ສ. ກາຣຓໍ ອຸປຏ຺ຐາຕີຕິ ‘‘ສາຘູ’’ຕິ ອຕ຺ຕໂນ ຈິຕ຺ຕສ຺ສ ອຸປຕິຏ຺ຐຕິ. ອຕ຺ເຖຕນ຺ຕິ ‘‘ເອຕໍ ກາຣຓໍ ເອວມຍມຕ຺ໂຖ ຍຸຊ຺ຊຕີ’’ຕິ ຈິຕ຺ເຕນ ຄຫຓໍ. ອາກາຣປຣິວິຕກ຺ໂກຕິ ຍຸຕ຺ຕິປຣິກປ຺ປນາ. ລທ຺ຘີຕິ ນິຈ຺ຉເຍນ ຄຫຓໍ, ສາ ຈ ໂຂ ທິຏ຺ຐິ ອຍາຖາວຄ຺ຄຫເຓນ ອຎ຺ຎາຓເມວາຕິ ທຏ຺ຐພ຺ພໍ. ຕນ຺ຕິ ລທ຺ຘິໍ. ອຕ຺ເຖສາຕິ ເອສາ ລທ຺ຘິ ມມ ອຸປ຺ປນ຺ນາ ອຕ຺ຖິ ຍຸຕ຺ຕຣູປາ ຫຸຕ຺ວາ ອຸປລພ຺ຠຕິ. ເອວໍ ຄຫຓາກາໂຣ ທິຏ຺ຐິນິຊ຺ຌານກ຺ຂນ຺ຕິ ນາມ, ປຐມຸປ຺ປນ຺ນລທ຺ຘິສງ຺ຂາຕາຍ ທິຏ຺ຐິຍາ ນິຊ຺ຌານໍ ຂມນາກາໂຣ ທິຏ຺ຐິນິຊ຺ຌານກ຺ຂນ຺ຕິ ນາມ. ປຎ຺ຈ ຐານານີຕິ ຍຖາວຸຕ຺ຕານິ ສທ຺ຘາທີນິ ປຎ຺ຈ ກາຣຓານິ. ມຸຎ຺ຈິຕ຺ວາ ອຄ຺ຄເຫຕ຺ວາ. ເຫຏ຺ຐິມມຄ຺ຄວຊ຺ຌານໍ ຣາຄາທີນໍ ອຠາວໍ ສນ຺ຘາຍ ‘‘ນຕ຺ຖິ ເມ ອຊ຺ຌຕ຺ຕໍ ຣາຄໂທສໂມໂຫ’’ຕິ ອຍໍ ເສກ຺ຂານໍ ປຈ຺ຈເວກ຺ຂຓາ, ສພ຺ພໂສ ອຠາວໍ ສນ຺ຘາຍ ອເສກ຺ຂານນ຺ຕິ ອາຫ – ‘‘ເສກ຺ຂາເສກ຺ຂານໍ ປຈ຺ຈເວກ຺ຂຓາ ກຖິຕາ’’ຕິ. ‘‘ສນ຺ຕໍ ວາ ອຊ຺ຌຕ຺ຕ’’ນ຺ຕິອາທິນາ ເສກ຺ຂານໍ, ‘‘ອສນ຺ຕໍ ວາ ອຊ຺ຌຕ຺ຕ’’ນ຺ຕິອາທິນາ ອເສກ຺ຂານໍ ປຈ຺ຈເວກ຺ຂຓາ ກຖິຕາຕິ ທຏ຺ຐພ຺ພໍ.

ອຕ຺ຖິນຸໂຂປຣິຍາຍສຸຕ຺ຕວຓ຺ຓນາ ນິຏ຺ຐິຕາ.