໑. ກມ຺ມນິໂຣຘສຸຕ຺ຕວຓ຺ຓນາ

໑໔໖. ສມ຺ປຕິ ວິຊ຺ຊມານສ຺ສ ຈກ຺ຂຸສ຺ສ ຕໍນິພ຺ພຕ຺ຕສ຺ສ ກມ຺ມສ຺ສ ຈ ອຘິປ຺ເປຕຕ຺ຕາ ‘‘ນ ຈກ຺ຂຸ ປຸຣາຓໍ, ກມ຺ມເມວ ປຸຣາຓ’’ນ຺ຕິ ວຕ຺ວາ ຍຖາ ຕສ຺ສ ຈກ຺ຂຸສ຺ສ ປຸຣາຓປຣິຍາໂຍ ວຸຕ຺ໂຕ, ຕໍ ທສ຺ເສນ຺ໂຕ ອາຫ – ‘‘ກມ຺ມໂຕ ປນາ’’ຕິອາທິ. ປຈ຺ຈຍນາເມນາຕິ ປຸຣິມຊາຕິສໍສິທ຺ຘຕ຺ຕາ ‘‘ປຸຣາຓ’’ນ຺ຕິ ວຕ຺ຕພ຺ພສ຺ສ ປຈ຺ຈຍຠູຕສ຺ສ ກມ຺ມສ຺ສ ນາເມນ. ເອວໍ ວຸຕ຺ຕນ຺ຕິ ‘‘ປຸຣາຓກມ຺ມ’’ນ຺ຕິ ເອວໍ ວຸຕ຺ຕໍ. ປຈ຺ຈເຍຫິ ອຠິສມາຄນ຺ຕ຺ວາ ກຕນ຺ຕິ ຕຓ຺ຫາວິຊ຺ຊາທິປຈ຺ຈເຍຫິ ອຠິມຸຂຠາເວນ ສມາຄນ຺ຕ຺ວາ ສເມຈ຺ຈ ນິພ຺ພຕ຺ຕິຕໍ. ເຈຕນາຍາຕິ ກມ຺ມເຈຕນາຍ. ປກປ຺ປິຕນ຺ຕິ ອຠິສມີຫິຕໍ. ເວທນາຍາຕິ ອຕ຺ຕານໍ ນິສ຺ສາຍ ອາຣມ຺ມຓໍ ກຕ຺ວາ ປວຕ຺ຕາຍ ເວທນາຍ. ວຕ຺ຖູຕິ ນິພ຺ພຕ຺ຕິກາຣຓໍ ປວຕ຺ຕຏ຺ຐານນ຺ຕິ ວິປສ຺ສນາປຎ຺ຎາຍ ປສ຺ສິຕພ຺ພໍ. ກມ຺ມສ຺ສ ນິໂຣເຘນາຕິ ກິເລສານໍ ອນຸປ຺ປາທນິໂຣຘສິທ຺ເຘນ ກມ຺ມສ຺ສ ນິໂຣເຘນ. ວິມຸຕ຺ຕິໍ ຜຸສຕີຕິ ອຣຫຕ຺ຕຜລວິມຸຕ຺ຕິໍ ປາປຸຓາຕິ. ອາຣມ຺ມຓຠູໂຕ ນິໂຣໂຘ ນິພ຺ພານໍ ‘‘ກມ຺ມນິໂຣໂຘ’’ຕິ ວຸຈ຺ຈຕິ, ‘‘ກມ຺ມໍ ນິຣຸຊ຺ຌຕິ ເອຕ຺ຖາ’’ຕິ ກຕ຺ວາ. ‘‘ຌາຍຖ, ຠິກ຺ຂເວ, ມາ ປມາທຕ຺ຖາ’’ຕິ ວຸຕ຺ຕຕ຺ຕາ ‘‘ປຸພ຺ພຠາຄວິປສ຺ສນາ ກຖິຕາ’’ຕິ ວຸຕ຺ຕໍ.

ກມ຺ມນິໂຣຘສຸຕ຺ຕວຓ຺ຓນາ ນິຏ຺ຐິຕາ.