໑. ອນິຈ຺ຈວຄ຺ໂຄ

໑. ອຊ຺ຌຕ຺ຕານິຈ຺ຈສຸຕ຺ຕວຓ຺ຓນາ

໑. ຈກ຺ຂຕີຕິ ຈກ຺ຂຸ, ຎາຓໍ, ຍຖາສຠາວໂຕ ອາຣມ຺ມຓສ຺ສ ຊານເນນ ສມວິສມໍ ອາຈິກ຺ຂນ຺ຕໍ ວິຍ ປວຕ຺ຕຕີຕິ ອຕ຺ໂຖ. ຕຖາ ມໍສຈກ຺ຂຸ. ຕມ຺ປິ ຫິ ຣູປທສ຺ສເນ ຈກ຺ຂຕີຕິ ຈກ຺ຂຸ. ພຸທ຺ຘານໍເຍວ ຈກ຺ຂູຕິ ພຸທ຺ຘຈກ຺ຂຸ, ອສາຘາຣຓໂຕ ຫິ ສຕ຺ຕສນ຺ຕາເນສຸ ສສ຺ສຕຸຈ຺ເຉທທິຏ຺ຐິ ອນຸໂລມິກຎາຓຍຖາຠູຕຎາຓານຎ຺ເຈວ ກາມຣາຄານຸສຍາທີນຎ຺ຈ ຍາຖາວໂຕ ວິຠາວິຕຎາຓໍ ອາສຍານຸສຍຎາຓໍ ອິນ຺ທ຺ຣິຍປໂຣປຣິຍຕ຺ຕຎາຓຎ຺ຈ. ເຫຏ຺ຐິມາ ຕໂຍ ມຄ຺ຄາ ຈຕຸສຈ຺ຈຘມ຺ເມສຸ ວຸຕ຺ຕາກາເຣນ ປວຕ຺ຕິຍາ ຘມ຺ເມ ຈກ຺ຂູຕິ ຘມ຺ມຈກ຺ຂຸ, ຕຖາ ເຕສໍ ຜລານິ ຕໍຕໍປຏິປກ຺ເຂສຸ ປຏິປ຺ປສ຺ສທ຺ຘິປຫານວເສນ ປວຕ຺ຕນໂຕ. ສມນ຺ຕໂຕ ສພ຺ພຘມ຺ເມສຸ ຈກ຺ຂຸກິຈ຺ຈສາຘນໂຕ ສມນ຺ຕຈກ຺ຂຸ, ສພ຺ພຎ຺ຎຸຕຎ຺ຎາຓໍ. ທິພ຺ພວິຫາຣສນ຺ນິສ຺ສເຍນ ລທ຺ຘພ຺ພໂຕ ເທວານໍ ທິພ຺ພຈກ຺ຂຸ ວິຍາຕິ ຕໍ ທິພ຺ພຈກ຺ຂຸ, ອຠິຎ຺ຎາວິເສໂສ. ອາໂລກໍ ວຑ຺ເຒຕ຺ວາ ຣູປທສ຺ສນໂຕ ‘‘ອາໂລກຜຣເຓນາ’’ຕິ ວຸຕ຺ຕໍ. ‘‘ອິທໍ ທຸກ຺ຂໍ ອຣິຍສຈ຺ຈນ຺ຕິ ເມ, ຠິກ຺ຂເວ, ປຸພ຺ເພ ອນນຸສ຺ສຸເຕສຸ ຘມ຺ເມສຸ ຈກ຺ຂຸໍ ອຸທປາທີ’’ຕິອາທິນາ (ສໍ. ນິ. ໕.໑໐໘໑; ມຫາວ. ໑໕) ນເຍນ ອາຄຕຕ຺ຕາ ຈຕຸສຈ຺ຈປຣິຈ຺ເຉທກຎາຓໍ ‘‘ປຎ຺ຎາຈກ຺ຂູ’’ຕິ ວຸຕ຺ຕໍ. ຕທິທໍ ‘‘ວິປສ຺ສນາຎາຓ’’ນ຺ຕິ ວທນ຺ຕິ, ‘‘ວິປສ຺ສນາມຄ຺ຄຜລປຈ຺ຈເວກ຺ຂຓຎາຓານີ’’ຕິ ອປເຣ.

ປຈ຺ຈຍຠູເຕຫິ ເອເຕຫິ ອຠິສມ຺ຠຣີຍນ຺ຕີຕິ ສມ຺ຠາຣາ, ອຸປຕ຺ຖມ຺ຠຠູຕາ ຈຕຸສມຸຏ຺ຐານິກຣູປາ. ສຫ ສມ຺ຠາເຣຫີຕິ ສສມ຺ຠາຣໍ. ມຫາຠູຕານໍ ອຸປາທາຍ ປສີທຕີຕິ ປສາໂທ. ອກ຺ຂິກູປເກ ອກ຺ຂິປຏເລຫີຕິ ອຸໂຠຫິ ອກ຺ຂິທເລຫິ. ສມ຺ຠໂວຕິ ອາໂປຘາຕຸເມວ ສມ຺ຠວຠູຕມາຫ. ອິຘ ‘‘ເຕຣສ ສມ຺ຠາຣາ’’ຕິ ວຸຕ຺ຕໍ. ອຏ຺ຐສາລິນິຍໍ (ຘ. ສ. ອຏ຺ຐ. ໕໙໖) ປນ ສຓ຺ຐາເນນ ສທ຺ຘິໍ ‘‘ຈຸທ຺ທສ ສມ຺ຠາຣາ’’ຕິ ອາຄຕໍ. ຕຕ຺ຖ ສຓ຺ຐານນ຺ຕິ ວຓ຺ຓາຍຕນເມວ ປຣິມຓ຺ຑລາທິສຓ຺ຐານຠູຕໍ. ວິສຸໍ ວຈນໍ ປນ ເນສໍ ຕຖາຠູຕານໍ ອຕຖາຠູຕານຎ຺ຈ ອາໂປຘາຕຸວຓ຺ຓາຍຕນານໍ ຍຖາວຸຕ຺ເຕ ມໍສປິຓ຺ເຑ ວິຊ຺ຊມານຕ຺ຕາ. ສມ຺ຠວສ຺ສ ຈຕຸຘາຕຸນິສ຺ສິເຕຫິ ສຫ ວຸຕ຺ຕສ຺ສ ຘາຕຸຕ຺ຕຍນິສ຺ສິຕຕາ ໂຍເຊຕພ຺ພາ. ທິຏ຺ຐິມຓ຺ຑເລຕິ ອຠິມຸຂໍ ຐິຕານໍ ປຏິພິມ຺ພປຎ຺ຎາຍນຏ຺ຐານຠູເຕ ຈກ຺ຂຸສຎ຺ຎິຕາຍ ທິຏ຺ຐິຍາ ປວຕ຺ຕິຏ຺ຐານຠູເຕ ມຓ຺ຑເລ. ສນ຺ນິວິຏ຺ຐນ຺ຕິ ເອເຕນ ຈກ຺ຂຸປສາທສ຺ສ ອເນກກລາປຄຕຠາໂວ ທສ຺ສິໂຕ. ຕຖາ ຫິ ໂສ ສຕ຺ຕ ອກ຺ຂິປຏລານິ ອຠິພ຺ຍາເປຕ຺ວາ ວຕ຺ຕຕິ. ຍສ຺ມາ ໂສ ສຕ຺ຕ ອກ຺ຂິປຏລານິ ພ຺ຍາເປຕ຺ວາ ຐິເຕຫິ ອຕ຺ຕໂນ ນິສ຺ສຍຠູເຕຫິ ກຕູປກາຣໍ ຕໍນິສ຺ສິເຕເຫວ ອາຍຸວຓ຺ຓາທີຫິ ອນຸປາລິຕປຣິວາຣິຕໍ ຕິສນ຺ຕຕິຣູປສມຸຏ຺ຐາປເກຫິ ອຸຕຸຈິຕ຺ຕາຫາເຣຫິ ອຸປຕ຺ຖມ຺ຠິຍມານໍ ຫຸຕ຺ວາ ຕິຏ຺ຐຕິ. ຣູປທສ຺ສນສມຕ຺ຖນ຺ຕິ ອຕ຺ຕານໍ ນິສ຺ສາຍ ປວຕ຺ຕວິຎ຺ຎາຓສ຺ສ ວເສນ ຣູປາຍຕນທສ຺ສນສມຕ຺ຖໍ. ວິຕ຺ຖາຣກຖາຕິ ຕສ຺ສ ຈກ຺ຂຸໂນ ໂສຕາທີນຎ຺ຈ ເຫຕຸປຈ຺ຈຍາທິວເສນ ເຈວ ລກ຺ຂຓາທິວເສນ ຈ ວິຕ຺ຖາຣກຖາ.

ສມ຺ມສນຈາຣຈິຕ຺ຕນ຺ຕິ ວິປສ຺ສນາຍ ປວຕ຺ຕິຏ຺ຐານຠູຕໍ ວິປສ຺ສິຕພ຺ພໍ ຈິຕ຺ຕໍ. ເກຈິ ‘‘ວິປສ຺ສນຸປຄຕກິຣິຍມຍຈິຕ຺ຕ’’ນ຺ຕິ ວທນ຺ຕິ, ຕໍ ເຕສໍ ມຕິມຕ຺ຕໍ. ຕີຓິ ລກ຺ຂຓານິ ທສ຺ເສຕ຺ວາ ວິປສ຺ສນໍ ອຸສ຺ສຸກ຺ກາເປຕ຺ວາ ອຣຫຕ຺ຕສ຺ສ ປາປນວເສນ ເທສນາຍ ປວຕ຺ຕຕ຺ຕາ.

ອຊ຺ຌຕ຺ຕານິຈ຺ຈສຸຕ຺ຕວຓ຺ຓນາ ນິຏ຺ຐິຕາ.

໒-໓. ອຊ຺ຌຕ຺ຕທຸກ຺ຂສຸຕ຺ຕາທິວຓ຺ຓນາ

໒-໓. ທ຺ເວ ລກ຺ຂຓານີຕິ ທຸກ຺ຂານຕ຺ຕລກ຺ຂຓານິ. ເອກໍ ລກ຺ຂຓນ຺ຕິ ອນຕ຺ຕລກ຺ຂຓໍ. ເສສານີຕິ ວຸຕ຺ຕາວເສສານິ ລກ຺ຂຓານິ. ເຕຫີຕິ ເຍຫິ ທຸຕິຍຕຕິຍານິ ສຸຕ຺ຕານິ ເທສິຕານິ, ເຕຫິ. ສລ຺ລກ຺ຂິຕານີຕິ ສມ຺ມເທວ ອຸປຘາຣິຕານິ. ເອຕ຺ຕເກນາຕິ ທ຺ວິນ຺ນໍ ເອກສ຺ເສວ ວາ ລກ຺ຂຓສ຺ສ ກຖເນນ.

ອຊ຺ຌຕ຺ຕທຸກ຺ຂສຸຕ຺ຕາທິວຓ຺ຓນາ ນິຏ຺ຐິຕາ.

໔-໖. ພາຫິຣານິຈ຺ຈສຸຕ຺ຕາທິວຓ຺ຓນາ

໔-໖. ວຸຕ຺ຕສທິໂສວາຕິ ‘‘ທ຺ເວ ລກ຺ຂຓານີ’’ຕິອາທິນາ ວຸຕ຺ຕສທິໂສ ເອວ. ນໂຍຕິ ອຕິເທສນໂຍ.

ພາຫິຣານິຈ຺ຈສຸຕ຺ຕາທິວຓ຺ຓນາ ນິຏ຺ຐິຕາ.

໗-໑໒. ອຊ຺ຌຕ຺ຕານິຈ຺ຈາຕີຕານາຄຕສຸຕ຺ຕາທິວຓ຺ຓນາ

໗-໑໒. ສລ຺ລກ຺ເຂຕ຺ວາຕິ ອຕີຕານາຄຕານໍ ອວິຊ຺ຊມານຕ຺ຕາ ຄາຫສ຺ສ ທຬ຺ຫຕາຍ ສລ຺ລກ຺ເຂຕ຺ວາ. ປຈ຺ຈຸປ຺ປນ຺ເນສຸ ວິຊ຺ຊມານຕ຺ຕາ ພລວຕາ ຕຓ຺ຫາທິຄາເຫນ ວິປສ຺ສນາວີຖິໍ ປຏິປາເທຕຸໍ ກິລມນ຺ຕານໍ ວິເນຍ຺ຍານໍ ວເສນ.

ອຊ຺ຌຕ຺ຕານິຈ຺ຈາຕີຕານາຄຕສຸຕ຺ຕາທິວຓ຺ຓນາ ນິຏ຺ຐິຕາ.

ອນິຈ຺ຈວຄ຺ຄວຓ຺ຓນາ ນິຏ຺ຐິຕາ.