໗. ເຂມກສຸຕ຺ຕວຓ຺ຓນາ

໘໙. ອຕ຺ຕນິຍນ຺ຕິ ທິຏ຺ຐິຄຕິກປຣິກປ຺ປິຕສ຺ສ ອຕ຺ຕໂນ ສນ຺ຕກໍ. ເຕນາຫ ‘‘ອຕ຺ຕໂນ ປຣິກ຺ຂາຣຊາຕ’’ນ຺ຕິ. ຕຓ຺ຫາມາໂນ ອຘິຄໂຕ ອຣຫຕ຺ຕສ຺ສ ອນຘິຄຕຕ຺ຕາ, ໂນ ທິຏ຺ຐິມາໂນ ອຘິຄໂຕ, ຕຖາ ກາມຣາຄພ຺ຍາປາທາປິ. ອນາຄາມີ ກິຣ ເຂມກຕ຺ເຖໂຣ, ‘‘ສກທາຄາມີ’’ຕິ ເກຈິ ວທນ຺ຕິ. ສນ຺ຘາວນິກາຍາຕິ ສຎ຺ຈຣເຓນ. ເຕນາຫ ‘‘ປຸນປ຺ປຸນໍ ຄມນາຄມເນນາ’’ຕິ. ຈຕຸກ຺ຂຕ຺ຕຸໍ ຄມນາຄມເນນາຕິ ຈຕຸກ຺ຂຕ຺ຕຸໍ ຄມເນນ ຈ ອາຄມເນນ ຈ. ເຕນາຫ – ‘‘ຕໍ ທິວສໍ ທ຺ວິໂຍຊນໍ ອທ຺ຘານໍ ອາຫິຓ຺ຑີ’’ຕິ. ຎຕ຺ວາຕິ ອຊ຺ຌາສຍໍ ຎຕ຺ວາ. ເຖໂຣຕິ ເຂມກຕ຺ເຖໂຣ.

ຣູປເມວ ອສ຺ມີຕິ ວທຕີຕິ ຣູປກ຺ຂນ຺ຘເມວ ‘‘ອສ຺ມີ’’ຕິ ຄາຫສ຺ສ ວຕ຺ຖຸໍ ກຕ຺ວາ ວທຕິ. ອຘິຄໂຕ ຕຓ຺ຫາມາໂນ.

ອຓຸສຫຄໂຕຕິ ອຓຸຠາວໍ ຄໂຕ. ເຕນາຫ ‘‘ສຸຂຸໂມ’’ຕິ. ຕໂຍ ຂາຣາ ວິຍ ຕິສ຺ໂສ ອນຸປສ຺ສນາ ຈິຕ຺ຕສໍກິເລສສ຺ສ ວິໂສຘນໂຕ. ສີລຄນ຺ຘາທີຫິ ຄຸຓຄນ຺ເຘຫິ.

ກເຖຕຸນ຺ຕິ ອຸທ຺ເທສວເສນ ກເຖຕຸໍ. ປກາເສຕຸນ຺ຕິ ນິທ຺ເທສວເສນ ຕມຕ຺ຖໍ ປກາເສຕຸໍ. ຊານາເປຕຸນ຺ຕິ ກາຣຓວເສນ ຊານາເປຕຸໍ. ປຕິຏ຺ຐາເປຕຸນ຺ຕິ ກຖາເປຕຸໍ. ວິວຏໍ ກາຕຸນ຺ຕິ ອຸທາຫຣຓໍ ວຓ຺ເຓຕ຺ວາ ປາກຏໍ ກາຕຸໍ. ສຸວິຠຕ຺ຕໍ ກາຕຸນ຺ຕິ ອນ຺ວຍໂຕ ພ຺ຍຕິເຣກໂຕ ສຸຏ຺ຐຸ, ວິຠຕ຺ຕໍ ກາຕຸໍ. ອຸຕ຺ຕານກໍ ກາຕຸນ຺ຕິ ອຸປນຍນິຄເມຫິ ຕມຕ຺ຖໍ ວິຠູຕໍ ກາຕຸໍ. ອຎ຺ເຎນ ນີຫາເຣນາຕິ ວິປສ຺ສນາວິມຸຕ຺ເຕນ ຈິຕ຺ຕາຠິນີຫາເຣນ.

ເຂມກສຸຕ຺ຕວຓ຺ຓນາ ນິຏ຺ຐິຕາ.